اوطان الدمار🖤

اقتحام

كرار :

بعد ايام مشاكل بيني وبين زين وعركات اصريت على كلامي ما ياخذ اللي يريدها ويختار بينا وبينها وجدتي شدت وياه اكثر مني بعد كل ظنا راح يبطل من خباله ويتراجع بس اللي صار بقى مصمم عليها وامي وكفت وياه واضطريت اسكت مغصوب ما توصل اخسر اخويه بسبب السنيه بس ما راضي على زواجه بس لام نسكت طبعا هاي اني سكتت.. جدتي تكوم وتكعد تعد عليه والنهار كله تحجي بعد عجايزنا واحزروا شلونها

سكتنا وهو اخذ امي وراحوا يشوفون اهلها ورجعوا ما حجوا شي واحنا ما سألناهم بيتنا صاير احزاب بعدنا ما تزوجنا وهيج بدت الفرقة بيناتنا امي تحب زين هوايه لان هو الاصغر والاوكح هو اول واحد بيناتنا راح يتزوج بيناتنا واصلا سبقنا بهواي شغلات غيره ... وعلى ذكر الزواج انزعجت واني دا افكر بروحي

كنت مقابيل المرايا وباوعت بشكلي اللي نادرا ما اركز بي ....شيب على اطراف لحيتي وشعري بي شيبات وشكلي جبير رغم اللي بمواليدي بعدهم زينين بس اني مبين عليه الكبر مو من عمري الجبير بس من قهري الاكبر 

صفنت بحالي يعني اني ابقى بدون زواج محتاج طفل ويايه محتاج ...دنكت واني اكذب روحي محتاج مرأه تحبني ومحتاج حظن يحتويني وما لكيت لهسه وحده اكدر امنها على اسراري لو تحتوي جروح قديمه اذتني هواي ...تمددت بفراشي وافكاري ودتني ليوم اسود لحد هسه براسي حطيت مخده فوك راسي اكتم الافكار اللي براسي وقبلها اكتم توسلات امرأه منهارة تتوسلني لا اذيها وانجبرت اذيها واكتم كلمات وافعال ترن براسي كلمات قبيحة كوجوه وافعال اقبح لسجانين بلا رحمه ....ضميت راسي بايديه قوي احاول اضبط عصبيتي ونفسي المكسورة لا اروح اجرم باللي ما الهم ذنب... اووف يا طاهر الكلب حرامات عندك بس روح وحده واني طلعتها بسرعه لو باقي لو ما كاتلك وباقي اشوفك الموت بأشكاله والوانه ...وكفت وبقيت افتر بالغرفة اروح وارجع وراسي يريد ينفجر وارجع اشمر نفسي بفراشي ..الحمد لله سلاحي مو قريب مني 

اخذت العلاج وسكنت بلا حراك بعد صراع ويه فراشي وغرفتي ....هدأت شويه وحاولت انام والنوم فارقني بعد ...حسيت نفسي احسن وكفت اطلع من الغرفة لان ببالي شي لازم اسويه

طلعت امي وجدتي كاعدات مسيت عليهن وكعدت انتظر رضا المهزوم من البيت صارله فتره يجي يتعشى ويرجع يطلع الا يعزل الكافيهات اللي بالمنطقه على ايده يلا يرجع رغم هذيج الفتره استهدفوا تجمعات الشباب واماكن الترفيه بالمحافظه وكنت خايف عليه وعندي فكره راح تخلي مكابل البيت وكاعد

فات من الباب سلم وراح لغرفته بدل وتأخر لحد ما اجا كعد مقابيلي واني ساكت ومنتظر يلتم الكل يلا احجي وياه وبالاخص اللي بالمطبخ كاعده تحظر عشانا

اجتمعنا واكلنا وخلصنا الوجبة وعزلوا كل شي ورضا كاعد بصف امي تقطع فاكهة وهو ياكل ووجهت كلامي اله
كرار:رضا اكعد يمنا اليوم لا تطلع عندي سالفه وياك
رضا:هاااا ...لا والله ما اكدر اصدقائي متواعدين نطلع للكازينو
كرار :اعتذر منهم الليلة كلامي وياكم مهم ويفرح الكل