اوطان الدمار🖤

مشاعر مختلطة😊

هلو متابعيني 🤗

رمضان كريم 😘

زينب :

انفتحت الباب وعمي استقبلني وشافني وانزعج لمنظري اني وابني من الصبح والدمع كان ناشف بوجهي وعيوني ذابلات ...بدون ما اشتكي حضن راسي وقربني لصدره

-لج زينب اني عايش وانت تبجين اليوم انعل اهله للي ضوجها لبنتي وحبيبتي

-عمو اجيت اشتكي الك ظلم اهلي وظلم ابن عمي
-فوتي اني اعرف شغلي وياه شمسويلج هيج تبجين

-محد يدري بيه اجيت لهنا ما كلت الهم
-عنهم ما دروا جدتج وين عنج ام كرار وين 

دنكت وسكتت وهو افتهم ...فتنا لبيته كانت بهالفترة زوجته موجودة من شافتني اخذت ابني مني وكعدتني وراحت جابت الي ماي .. كل مره تثبت عدها انسانية بس ويه اشخاص محدودين ..زوجة عمي مثلي محد فهمها ولا راح يفهموها ...تحس بغربة مثل ما اني هسه احس بغربة رغم اني عندي اهل هي ما عدها اهل مرات احسها تتعاطف وياي لان اني بلا اهل ووحيدة وهي مثلي 

كعدت وحجيت لعمي كل شي ما خليت بخاطري شي ما حجيته وهو ساكت ويسمع بالاخير وكف وطلع وزوجته بقت يمي تمسح على راسي خليت راسي بحضنها ابجي وهي تواسي دموعي وتكول كل شي يتصلح وتطمن بيه واني ما اشوف شي قابل للاصلاح كل شي تدمر بحياتي

دقايق وسمعت حسه يجعجع بالحديقة وكفت اريد اروح لغرفة ايرام بس زوجة عمي كالت ابقي بمكانج وابقي ساكته 

كعدت يمها وسمعت كلامها ...دخل هو وشافني كاعدة وعمي وياه واجا قريب مني ما اخفي عنكم كمية الرعب اللي حسيت بي بس جمدت ما اريد يبين ضعفي كدامه 

-كومي لج شجابج هنا ومنو كال الج تطلعين من البيت ...شلون تطلعين بلا علمي

ما جاوبته وكان جواب زوجة عمي كفيل يسكته

-واذا اجتي شنو يعني بيت عمها وتجي بكل وكت تحبه شنو تريد تمنعها انت ..تجي يمي اني وايرام لو حاسبنا غربه وتكملة الكلام كان بالفارسي اكيد هو رزالة لرضا لان ما فهمناه بس ايديها تأشر بعصبية 

جواد:رضا زوجتك ما طالعه لمكان بعيد اجتي لبيتي واجتي تشتكي منك واني جبتك نفهم من اثنينكم ونحل هالمشاكل وتنتهي ...شنو كلامها هذا صحيح انت رايد زوجة زين العابدين

-عمي رجاءا خليني اخذ زينب ونرجع للبيت وهناك نتفاهم وهالموضوع بيناتنا
-ماكو بعد زوجتك اجتني واني ما ارجعها الا اعرف شنو هالكلام اللي سمعته منها ما اصدك انت تأذيها وتضربها صح هالكلام رضا؟ 

  

-بيني وبينها واذا ضربتها فأسألها ليش خليها تجاوبك تقبلها انت زوجتك تبجي على اخوك وتكول زينة الشباب راح وتتأسفه وتجيب طاري زوجته باتهامات ما الها صحه ..اني ما كنت رايدها اشو هسه غصب عنج اخذها يا زينب واريد من الله تعترضين