اوطان الدمار🖤

❤❤اعلان العشق❤❤

بارت قصير يتبعه تكملته بوقت قريب جدا 🤗

اعتذر للتأخير والقصه باقيلها القليل😘

راويه :
تحدد عرسنا بنهاية صيف ٢٠١٧ ...ايام واصير لكرار اللي غير كل حياتي ...طائفية وكره وتعصب تحول لحب وود وغرام والاهم من كلهن تعايش ..تحولت الحياة لصورة ثانية كل مخاوفي ذبيتها وراي واني ابدي حياتي وياه وكنت اردد بداخلي ...انسى الماضي اعيش وياه بطيب ومودة وربنا كفيل بسعادتنا 

كرار ابد ما قصر باظهار المشاعر والحب والنية الصادقة والحب الصافي
اهلي شجعوني هواي بزواجي رادوا تنتهي اي خلافات قديمة بهالزواج ويندثر ماضي اسود حرق العائلتين لسنوات وهالشي ما يتم اذا بقينا اني وكرار مثل الحية والبطنج حسب قولهم ...جواد كان الاب الروحي وعراب علاقة الحب اللي صارت واللي عرفته كان يدري بكل شي ومن البداية ..وكان معارض الزواج بالاول وبعدين كل شي تغير وهو اللي سعى بي بعد ما عرف بمشاعر كرار صادقة وعرف اني عندي ميل تجاه ابن اخوه ...ليلى اللي عارضت الزواج لاسباب كلش منطقية ..ما مر وقت طويل ورجعت تحثني على المسير بهالعلاقة وبدت تحجي الي سوالف عشاق وشلون عايشة بحب ويه جواد رغم كبر عمرهم بالنسبة لعمرنا وجواد دلاله ما مضموم عن احد بس واحد يركز وياهم يشوف حبه الظاهر للكل واني هواي ركزت بأيام العزوبية بيهم😁😁

تفاصيل ما كدرت اسردها بالقصة ومواقف هوايه مرت لحد ما وصلنا لهنا ...
صار اليوم الموعود ولبست احلى ما تتمناه الفتاة ..تلبس الابيض وتصير عروس ..من طفولتنا نحلم بالابيض كنت اتذكر من نلعب اني استحي اخذ دور العروس نسوي ورود عروستنا ...اخذ دور امها لان اني اكبرهم وجواد الاب ومها نسويها عريس لان كانت سمره وطويله اطول من عدنا اني وورود...اووف يا ورود شكد مشتاقه الج ومفتقدتج بهاليوم محتاجتها حيل تذحرت شكد كنت قاسية بعرسها وما حضرته كل ما ايذكر هالتفصيل دموعي تصب على اللي خسرته من عمري وفاتني ....صار اسبوع ما فاركتني حتى بأحلامي لابسه ثوب عرس وتضحك ذيج ضحكتها القديمة وكل ما تجيني بحلم تكول كرار يحبج بس مقهور لا تزعلين منه ابد واصبري..هالاحلام كلش تعبتني وتخليني ما اكدر انام ...اللي يقويني ويشجعني كلام كرار ولطفه وياي ..تعلمت على كلمة اموتن بيج من حلكه تعلمت على كلمات يكولها بس هو من عائلته ...هيج يحجي حجايات اصلها جنوبي ماخذها من حبوبته على قوله ..صرت احب الچا من تطلع من حلكه ...اتذكر قبل من اسمع احد يلفظ حرف الجيم بشكل مختلف لو يكول چا كنت بساع ابتعد وكأن المتكلم من غير عالم....ويه كرار كل شي غير

كل شي تجاوزته وكدرت اتعايش وياه بس كرهه لابويه بقى يحز بخاطري ما يكول اسمه ابد صح هاي اذا اضطر ونطق اسمه لان هو من الاساس يتجنب سيرته..يحبني الي ما يحب اي شي اتبعه... عيشني احلى لحظات حياتي بس من نوصل بنت منو يبين عليه انزعاج شديد وحقد ما يكدر يخفيه او يتغاضى عنه ..ما صرح ابد الي شصار بسجنه ولا كال الي سبب هالكره الدفين اللي نايم بصدره كنت خايفه من هالشي يكون عائق كدامنا بحياتنا