اوطان الدمار🖤

عداوة 🖤🖤

متابعني الاحبه😘

احييكم🖐🖐

نظرا للطلبات الكثيرة لبارت جديد نزلت الكم 😘وراح اكمل القصه بالايام الجايه لان هوايه يكولون ما نكدر نصبر للعيد وبرمضان احلى ونزليها لان احنا نحب نسهر على القصص 😍 لطلباتكم احاول انزل كل يوم بارت  واعذروني لو قصرت بس احاول التزم وياكم 😘

كرار:
بدوا بيت النجار يستعمرون بعائلتي شي وره شي بالبداية ورود وبعدها جواد ابن قيس وختمتها ليلى وجوادنا كنت اتفرج مع امتعاضي الشديد لهاي القربى بس لكل واحد بعائلتنا كان لبيت النجار اثر بداخله واكبر الاثر كان لعلي زواجه من ورود كان يعتبر تنقية لدواخله اخذته من عالم اظلم كان يتوغل بي ورجعته لفطرته وانتزعت جانب شيطاني منه وراحت 

كان زواجهم كاقتران الاضداد ملاك مع شيطان وهذا كان كلامه ووصفه لورود يوصفها بالملاك ذكراها ما تنمحي ابد من باله وكل شي يذكره بيها كان يحبه ويحاول يحافظ عليه حتى قربه لاهلها حافظ عليه وصداقته لامها ولاختها استمرت والاقوى من هاي هو هم صار عدهم فد شي مقدس وكأنه مسجل بأسمهم ودوم ذكره يمهم اذا طبخه طيبه ينذكر واذا حلويات ينذكر تجي ايام الماعون ما يلحك يرجع الهم يجي غيره وغيره 

ازعجني الوصل اللي استمر حتى بعد وحاولت اقطعه بكل شكل وما فلحت ...كنت احاول ابعد عائلتي القريبه عنهم بس اللي صار كل التحاق للجيش ونزول الكي اهلي متوغلين بالقربى والعلاقات تقوى يوم بعد يوم
امي اللي تكره بيت النجار صارت صديقه الهم وبالخصوص صديقه لسلوى اللي بعمرها وعدهن نفس الاهتمامات والسوالف ...جدتي راضيه عن ليلى لان عمي فرحان وطاير والام فرحها لفرح ابنها ورضاها عنها خلاها ترضى عن كل اهلها 

خو هذا علي صار ابنهم مو ابنا وام ورود تبنته كليا حتى ملابس اللي تعجبها يلبسهن هو ...زينب وايرام صديقات لبناتهم حيل وخاصه بالايام اللي سبقت عرس ايرام صارن النهار كله سويه ببيت عمي جواد بحيث بيته ما نكدر نفوت اله لان بناتهم موجودات عدنا وكان عمي الاسعد بهالعلاقات وهو هم بدوره كان يحضر لزواجه الجديد 

كل اللي بالبيت ارتاحوا عدا اثنين اني ورضا .. اني احس روحي بديت انعزل وما اكدر اتحمل اشوف شي بعد ولا اتقابل ويه بيت النجار ووصلت بيه بيت عمي ما افوت اله نهائي ..اما رضا فموضوعه مصخم اكثر مني ..زينب صارلها اشهر زعلانه وما ترضى ترجع اله ومشكلتهم ما زالت قائمه وكل ما يلتقون تنتهي بفزعه من كل الاهل حتى يفضون عركاتهم ...زينب مقهورة منه وهو ما يقبل يتنازل كلنا تدخلنا وما فلحنا بتصحيح وضعهم بالاخير تركناهم لحد ما يعقلون ويرجعون واني من عرفت اساس مشكلتهم ردت احلها من يمي بدون ما استشير احد 

رحت لامي افاتحها بموضوع دوخت راسي بي واني كنت ارفضه بس من شفت اخويه حياته راح يضيعها ما اجا ببالي غير اسد السالفه وقررت اجيب ابن زين يمي ويكون بيناتنا وما يربى يتيم ولا بعيد عنا... ومو لخاطر احد ولا لاجل احد ولا فكرت بزواج بس اريد الولد يرجع وامي طارت بفرحتها من خبرتها بالموضوع كانت ميته عليه وكل يومين تروح تشوفه وترجع تبجي وتتوسل بينا تريدنا نرجعه هو وامه وهي الله يهديها كانت سبب بمشاكل رضا وزوجته ورادت تعيل بحق بنت عمنا واني تخبلت من عرفت بهالشي ورحت اسد السالفه كلها.. كانت كاعده هي وجدتي واجيتهم بالخبر