اوطان الدمار🖤

ولادة فرح

راويه:
ابتعدنا اني وكرار فترة مو قليلة بعد هذيج الليلة ...هو التحق مرتين ونزل وما شفته ولا شافني ..يتصل وما اجاوبه ...ما اعرف ليش هيج اسوي وياه ...خطوبتنا استمرت بعد ايام ووساطات وكلام هوايه ...امي كانت مع زواجنا رغم حزنها وغياب الضحكه عن وجهها لايام بس بقت رأيها نفسه بأن ابويه اخذ القصاص اللي يستحقه ...خالتي ليلى اجتنا زعلانه بوقتها هي وبطنها شكبرها وكضت ايام تبجي بسبب خلاف بينهم والحجي رايح جاي على بيتنا وهي ما تطلع اله...سمعتها تحجي لامي عن رد فعل عنيف من زوجها من عرف هي موصله الكلام الي وتكول عن كرار مو صاحي ويريدون يشمروه براسي..الوحيدة اللي تشجعني عالفراق هي ...بقت تخوف بيه من كرار وصورته الي فالح ثاني ...كان اكو مشاكل صايره بينهم هي وكرار اني ما اعرفها وهي ما رضت تكولها ...ورغم كل شي ما سمعت او بالاحرى غلست على كل شي واخذت فترة من العزلة

التقينا بعد اسابيع ببيت خالتي لما الحجي رجعها وعزم الكل ببيتهم وكان هاليوم مميز جدا بالنسبة النا ...بعد هالفترة من الابتعاد واللي اثنينا التزمنا بيها ...كان بداخلنا اشتياق جديد علينا 

خلي اوصف الكم هذاك اليوم بالتفصيل لان كان مميز بشدة بالنسبه الي ...رجعت من عيادتي مرهقة جدا ما بين دوام مستشفى وعيادة وقبلها ليلة كانت خفارتي ...دخلت البيت اجر بروحي جر ..تلكتني سلوى بمودها المعتاد مخبوصة عدها عزيمة تكولون هي صاحبتها مشكله ردانها ودا تحضر بالكبب والمقبلات ببيتنا حتى تاخذهم جاهزات بس شافتني وانطلقت

-يلا رويه غيري ملابسج بسرعه خالتج وحدها تروحين الها

-ماما والله تعبانه ما بيه مو البنات يمها
-لج ماما زينب وايرام وهوسة جهالهن تخبل اكبر واحد روحي وياهم عالاقل اكمشي الجهال

-ماما تريدين اجرم بيهم ما الي خلك ليش مها وين بس ايرام وزينب
-مها طلعت ويه علي يشترون بقية شغلات مهرهم اسبوع اللي يجي حفلتهم

-هااا حددوا موعد
-اي احسن منكم 

باوعت الها بنظرة غير راضية عن الكلام ..
-رجعنا ماما
-اي نرجع شنو هالسوالف ...ما افتهمنا انتو فاسخين مخطوبين ..راويه اني ما يعجبني هالحال 

-شنو اللي يعجبج انت ..ما يعجبج شي ابد اروح انخمد احسن الي
-وين ولج تعالي ..امشي روحي .... خالتج...راااااوووويييه؟؟

عفتها تصيح وتتعارك ويه نفسها واني دخلت غرفتي وقفلتها واخذت ساعة اطفاء اجباري ...لان التعب بيه وصل حده ...كعدت على دك امي للباب ..تكولون مداهمة مال امريكان ....ومثل استقبالها الي طلعتني برزالة لبيت الحجي ..ما عرفت شلون البس ...لبست ثوب عادي لونه شمباني وبطرف ردانه والياخه اسود وحجابي اسود...

وصلت لبيتهم لكيت الكل واصل قبلي والشباب بالحديقة يشوون للعشا والبنات يحضرون بتفاصيل السفرة ...واني كمزت بنصهن اكل لا عبالكم اشتغلت اصلا اجيت عالتالي ...نزلت عالمقبلات كلهن تذوقتهن وانطيت تعليقي عليهم واشرافي المهم طبعا ...كنت مندمجة اغمس خبز بالطحينة واكل اموت عليها ..جريت ماعون وكعدت اكل واحجي وياهن ..