اوطان الدمار🖤

حزن😔😔

راويه:
احساس الخوف من شخص طائفي شعور جدا مقيت واني رغم كل عمري ما خايفة من شي ولا حسبت حساب احد يوكفني ويكول عندي ثار وياكم لان اني ببساطة بنيه ...هذا اللي اسمه كرار خلاني اجرب هالشعور كل عمري اشوف نفسي ما الي ذنب بجرائم والدي ولاول مره شخص يحجي وياي بوجهي ويهددني وفوك هذا الاذية طايلتهم هواي من بابا وعمو فالح والمصيبة هذا حاقد عليه وعلى كل عائلتي وخفت من صدك منه لا يأذيني وصرت اتجنبه

رجعت للغرفة وشافتني مها وسولفت الها اللي صار وما علقت على كلامي بس بكلمة غبية ويمكن هالكلمة قليلة بوصفي هسه اني ما اكدر اسد حلكي واسكت
طلعت مها واعتذرت منه بمكاني ...اني ما وصلت للردهة وهو موجود بعد الا يطلع يلا اروح ...رحت عليهم ويه مها وسوينا الواجب وياهم مهما يكون هالعائلة همه اللي ناطين لبيت خالو الامن والبيت الكاعدين بي وهواي ساعدوهم 

اول مره شفت امهم كنت غيرانه كلش وكأن ورثت غيرة امي على بابا منها ...امرأة جميلة جدا ولحد هسه عدها مقومات الجميلات كلها من طول ووجه صافي وعيون خضر
عذرت بابا بتعلقه بيها وعذرت امي لغيرتها منها ليومنا هذا ...امي من حبها بوالدي عمت عن كل شي حتى عن اهلها وناسها لفترة طويلة...وانتهى مرضها اللي اسمه العشق بوفاته اللي اخذت من عافيتها وحتى من شكلها وتعبت حيل بموته 

صح ما يستحق الحب وجازاها بحب غيرها وتعذيبها وحرق روحها وشبابها وعدم الوفاء الها بس هي لحد يومنا هذا على وعده وعلى حبه ووفية حتى لقبره اللي بأشد حالاتنا صعوبة تروح وتزوره والاقوى النهار كله تكتب بي اشعار ومرثيات ونعي راح تتحول ملايه هههه

بابا اذنب بحق كل اللي حواليه بحق امي وبحق اللي حبها وبحق اهله وعائلته كلها ويكولون ليش تكرهيه غير لو اكدر اكول الله يرحمه حتى فشلة من ربنا نطلب اله الرحمه 

انتبهت لام كرار شلون تحب اولادها وما همها اني منو ولا علقت ولا تضايقت من وجودي معقولة ما تكرهني معقولة ما تريد تأذيني عالاقل بكلامها تقربت الها اكثر من مره واتعمد اخليها تعرفني منو بس ما علقت ولا اعترضت على وجودي قريب ابنها ...شلون خلفت كرار المقيت ما ادري يمكن لان ما اهتمت لبابا لا قبل ولا هسه وحسب كلام امي كان من يضوج وينقهر منها يجي يطلع غيضه بامي شكد كان خوش ادمي .....لا تعليق يبقى ابويه

التقيت بجدتهم وطائفيتها وكلامها بوجهي وشلون طردتني من الغرفة تدفع لا الصدك والكلام بيناتنا دفرات الا شويه وشتمت حتى الطب اللي اني انطيه للناس مثل حفيدها مم طردني بس هي باسلوب مضحك مال جنوب ..جدتهم من هذوله العجايز ام عصابة التكتل ...كتلتني الا شويه ههههه واستنتجت على منو طالع هالثور كرار

بعد خروجهم من المستشفى بعد ما شفتهم واطمأنيت من ناحية كرار نساني ونسى تهديده الي بس بقيت بحذر وكل خطوة اخطيها صرت احسب الها حساب وصار امر سفري موضوع حتمي ولازم يصير