اوطان الدمار🖤

شجار وخصام

راويه :
رجعنا سكنا ببيت خالنا بهاي الفترة لان خالتي ليلى انهارت كليا حتى نداريها وامي تكون قريبه منها دائما ...اني وورود اخذنا غرفة وامي بقت ويه خالة ليلى بنفس الغرفة وغرفنا ابوابهن متقابلة اول اسبوع واول شهر مرت ايام سود ما تسكت خالتي ابد من النواح الا لما تتعب وتنام ...الكل مل من كثر بكاءها المستمر ...وجهها صار مال اموات وصوتها ما يطلع اغلب الوقت مبحوح ونايمة بفراشها ما ترضى تطلع من غرفتها ...قاطعت الحياة بس الحياة مستمرة وياها ...خالي قيس بالبداية ضل كل يوم يحاول وياها وما يفيد كلامه ولا يغير من حالها شي تالي صار يحجي عليها لان هيج تسوي بروحها وفعلا مرات الانسان من تضل تواسي بي تكسره اكثر واسلوبه الخشن خلاها تسكت عالاقل لما يكون هو موجود وتجاوزنا هيج مرحلة البكاء المتواصل

مرت عطلة اخر السنة وبده الدوام وبدوا امي وورود يداومون بنفس مدرستها وكل يوم نحاول نطلعها ونخليها تداوم وهي تعاند.تحسنت شويه وصارت تسكت بس تقضي اكثر وقتها صافنه ...تقربت منها كلش وصرت كل وقتي اللي كاعده خلاله بالبيت اني وياها مره نبجي مره نضحك وشويه شويه صارت تكسر من حزنها ورجعت تسولف وتكعد ويانا وتضحك بس لسه بداخلها غصه واضحه بعيونها 

سفرنا للاردن خالي رفضه نهائي بهالفترة بسبب خلاف بينه وبين عمامي وجدتي رادت تسحبنا وحملت خالي وامي وخالتي مسؤولية مقتل عمر وصاروا يتجاوزون عليه بكل اتصال لحد ما صار يرفض يتواصل وياهم ومنعنا نتواصل وياهم احنا هم ..ومع ذلك امي ما بطلت من افكارها هالمره هي تريدنا نروح وهي تجي ورانا وخاصه لما سمعت كلام عمي يريدنا زوجات لاولاده وهي ما تصدك بس تريد تخلص مني اني بالاخص تكولون خشيت بالعمرين واني كل عمري ما تجاوز الخامسه والعشرين 

بعدني توني تخرجت من الكليه وهي كامت تدور الي زواج واني ما مفكرة بالزواج ابد كل همي ادرس اختصاص واشتغل واطور نفسي واشتهر بتخصص معين بالطب مخليته هدف الي ... والزواج اخر اولوياتي ولهالسبب اني غيرت رأي وبطلت اروح لعمامي خفت لا انجبر على شي ما رايدته وهي ضلت تلح تريدنا نضغط على خالو قيس يسمح النا نطلع من العراق وهالمره احنا ما قبلنا ورود اصلا لا قبل ولا بعد الحادث تريد تطلع واني هم تبعتها بالرأي 

بالنسبة الي صرت بنص الناس اللي يكرهونا والمنطقة من اطلع احسها كلها تباوع الي بحقد احس والدي ولعنته ملاحقتني بكل خطوة السبب اللي مانعني من الرجوع هو هذا ...احساس بالذنب تجاه الناس اللي انسجن واللي انقتل واللي تعذب بسبب والدي احس اني مسؤوله عن اذيته شكد احاول بيني وبين نفسي اكون قويه ترجع هالهواجس تقوى اكثر مني مرات اتجاهلها مرات اصف وياها واصير طائفية والكي لنفسي اعذار هسه الناس نفس الشي هسه هم دا يأذون ابويه كان بالحكومة وادى واجبه مثل ما هسه يأدون واجبهم وارجع واتذكر جرائمه بحق ابرياء وانخرس
بعد صراع طويل