اوطان الدمار🖤

اعتراف

كرار:
الحجي اتصل عليه المغرب يستدعيني لبيته ...استغربت طلبه قبل ساعات كنت ببيتهم ما كان بيناتنا غير كلام عادي ...طلعت توجهت الهم وبس وصلت لكيت عمي بالحديقة وليلى يمه وعيونه دم وعصبي فتت من الباب عاط بيها تفوت للبيت ...شكد صار من تزوجوا ما سمعته حاجاها بهالاسلوب ابد ما يحجي غير بعيني والحبيبة ...هي كن مو عاجبها الكلام مشت بثكل

جواد:تعال كرار فوت حياك الله
كرار:عمي شنو شبيك اجيت بوجهي عليك خير شصاير بينكم
جواد:كرار لا تعصب ولا تضوج احنا اصدقاء قبل لا نكون عم وابن اخوه وقريبين حيل لا تخلي اللي راح اكوله هسه يأثر على هالشي...انت تستاهل الاحسن ....راويه رجعت الذهب ويه خالتها وتكول لهنا حدنا
ضحكت باستخفاف من كلامه 

-الصبح جانت وياي ما بيناتنا شي تتشاقون
-هذا اللي صار بعد
حط العلبة بايدي واني مستغرب شنو اللي صار ...ضاجت من معاملتي بس اني ضغطت على نفسي حتى ما اضوجها شنو اللي صار هسه
-عمي صيح خالتها اسألها
-لا تسأل لا هي ولا غيرها البنية تكول ماكو نصيب

-اليوم اهجم الدنيا فوك راسها شنو هو الماكو نصيب ...نصيبي هي ما الي نصيب غيرها
-كرار كلت الك لا تعصب الموضوع بسيط لا يتعقد 

تركته يحجي وتوجهت لبيتها اشوفها واحجي وياها وبالموت يلا كدرت ااخليها تطلع الي 

اجتي ووكفت بصف الباب وعيونها ما عرفت شنو اللي بيهم نظرة كره ووياها شي ثاني يمكن خوف ؟؟..واجا السؤال اللي ما توقعت تسأله هي كنت اتأمل بعد زواجنا امهد الها الموضوع شي وره شي وما حطيت ببالي بهالسرعة تدري
-ابويه شلون مات؟؟

كان صيغة السؤال اتهام مباشر...تراجعت عن عصبيتي بسرعه وبديت اغير كل كلامي وياها وصار الحق وياها واني اللي عايل وابن كلب ابوها اللي اجرم بحقنا اثنينا صار الضحية
تقربت الها اريد افهمها شفت الخوف بعيونها ماليهن ودموع تترقرق بمدامعها ..خبلتني هالدمعة شكد كانت صعبة على روحي هالمره 

-راوية ..عوفي عنج هالكلام ...صار سنين مرت
-قتلته انت
- وداعة عيونج اللي ما عندي بدنيتنا اغلى منهن الذنب منه مو مني...ابوج اذى هواي عالم ولو تعرفين شصار تعذريني ..راويه اني اعشقج حد الجنون ومستعد اسوي اللي تطلبيه مقابل رضاج
تقربت واخذتها بحظني وهي صارت تبجي بصوت مسموع تريد تدفعني واني مقيد ايديها بحظن قوي
-عوفني ...روح تضرب بصدري وشهكاتها تعلى
-ما اعوفج ابد لا تحلمين

-روح كرار ...روح عني هسه ما اريد شي منك
-اروح بس حلقتي ترجعيها باصبعج وزواجنا بموعده
-الزواج مو سهل للي مثلنا وبيناتنا اني وانت دم ...

بعدتني عنها واجتي تطلع من الاستقبال كمشتها جريتها مره ثانيه وهالمره بعصبية
-ما تروحين وتعوفيني والله ما اقبل شنو لعبة هي وبهالسهولة نكول عزلنا وخلص زوجتي انت
-ما بيناتنا غير حلقة ورجعتها