اوطان الدمار🖤

لقاء

مرت الايام وهي بالحي واني اخاف اعبر من بابهم واخاف امر من جهتهم بالشارع وقيدت عيوني حتى من الالتفات للمكان اللي خليتها بي
بيتهم القديم نفسه وبيتنا القديم نفسه اولاد اخواني وامهم وجدتهم سكنوا بالبيت الجديد اللي بنيته واختاريت بيت اهلي القديم يكون سكن الي ولعائلتي وهالبيت بينه وبين باب اهلها ثلاث ابواب بالجهة الماقبله من الشارع 

ساعدتهم بكل شي فراش واغراض يمشون بيها حالهم بايامهم الاولى والاغراض كنت ابعثها ويه زين العابدين لان هو الوحيد اللي يقبل يروح الهم والبقية لو اشيل ايدي يمكن يذبحوهم وبالاخص كرار ..خايف منه لا تثور اعصابه بيوم واعرفه مخبل ..خايف أذيهم

كان الجو حار لان جيتهم كانت بصيف تموز الحار من هذيج السنه ..متمدد بغرفتي الظهرية وكل فكري بيها ..هسه نايمه كاعده يا ربي اريد اشوفها بس ما الي قوة ..اخاف تشوفها عيوني وتخون وافضح نفسي خلي اتعود وجودها قريبه احتمال اكدر الاقيها بلا مشاعر 

انطفت الكهرباء دقايق والغرفة صارت نار حارة لحد ما اشتغلت المولدات وتذكرتها قبل من كانت ترجع من دوامها والدنيا حر خدودها تكون حمر وتريد تبجي هسه شلون لونهم بهالحر اكيد ضايجه ..ترافتها بعدها هذيج لو انسلبت واختفت ملامحها واخذوها مثل ما اخذوها هي مني غمضت عيوني اتذكرها ..
هاي اني وقيس واكفين بالباب مالتهم كانت اول مره اركز بيها كنت ما منتبه الها صغيرة بالعمر كانت متوسطه وهي اخت صاحبي واني طبعي ما اركز بمره ابد ونادرا ما ارفع عيوني الهن اني بس بيومها ما كدرت اغض النظر

وهاي اجت هي من بعيد تمشي بصدرية المدرسة وجنطتها بكتفها ...حلوة، طويله وبياضها يشع تلمع بالشمس شعرها مسويته ضفيرة ونازلة صفح على كتفها وواصله لخصرها 
استغربت من اهلها شلون هيج حلوة بلا حجاب وهمه معروفين بحجابهم الملتزم
فاتت بتعب منا وشالت راسها وكالت ..السلام عليكم.. والصوت اخذ العقل اكثر ووجها المحمرته الشمس صاير قرمزي لونه انطبع بملامحه براسي عدها عيون تخبل
اخوها يشاقيها ويدلعها ويرد عليها يهلا ليلو شكلج تعبانه ومشويه
مسحت جبهتها بضوجه وكالت اووف حاره اليوم وتعبت والاووف على قلبي اللي راح مني واندفن بباب بيتهم والتعب لقلبي اللي صار فتات

بلا وعي ترخصت من قيس اللي يريد يسولف واني حيل ما ضل بيه واوكف يمه
مشيت واحس قلبي صدك كيوبيد شجه بسهم بلا رحمه خلاه ينفض دم وكل قطره اسمها ليلى

   إن أنكر العشاق فيك صبابتي❤❤
فأنا الهوى وابن الهوى واخيه💔💔

ومن هذاك اليوم ولهسه واني العليل بحبها لا نلتها ولا ارتاحيت والعذاب يزيد بجيتها يمي واني محرمها على روحي

تذكرت اني شكد حقدت على الدنيا من وراها من تركتني وانزفت لهذاك الكلب .... حتى ما كلفت روحها وردت عليه وعلى حبي حتى برسالة ..وبسببها وبسبب قهرتي حرقتي ذبيتها بعمها اللي سلب حياة اخواني وسلب حياتنا احنا هم