اوطان الدمار🖤

تغيير💛

راويه:
طلعنا للشمال سفرة سياحية ويه خالتو ليلو وزوجها واولاد اخوه وزوجاتهم وجواد وايرام واني ومها اكيد ما نخلي طلعة تفوتنا .. طبعا من اجينا نروح مها وايرام اشتروا بناطير للسفره ووياها قمصان طوال وامي رادتني البس مثلهم ..مشكلتي ما اعرف البس هيج ورود الله يرحمها كان عدها من هالملابس اني لا ما اعرف البسهم ولان جسمي ما يساعد وضخامتي ووطولي ما تتناسب ويه هالملابس ما رضيت بس بعد اقناع منهم رحت اشتريت بنطرون واحد كابوي ووياه قميص طويل 

لبستهم كدام امي وخالتي وشجعوني وفعلا شفت نفسي حلوة والملابس هوايه غيرت شكلي وصارن امي وخالتي يا رايحات للسوق جايبات قطعة ..يا رادات جايباتلي قطعة ثانيه 

مرات اعاند مرات اسكت ومرات اتعصب بس عليمن اعند اثنين بالكرة الارضيه سلوى واختها واختها اهون ..الا هي راح تموتني بالذبحة القلبية😁😁... تدخلت بملابسي ورادوني اغير الالوان الغامقه اللي مسيطرة على حياتي بصورة تامه ...دخلوا الوردي والاحمر والاصفر اللي بعمري ما مفكره البسهم بلبسي حتى صرت احس روحي لابسه البردة مال غرفتي من جبروني البس الاوف وايت

بيوم طلعتنا للشمال اني ومها كنا مترافقات وكعدنا بنفس المكان وعلي كعد بالكرسي المنفصل بجوارنا وجواد وايرام كدامنا واحنا صرنا باخر مقاعد منهم ...ما اسولف الكم الونسة اللي تونسناها ضحك وشقى طول الطريق ولحظات حلوة كانت خربها علينا كرار بعركتين ويه شباب بالباص الظاهر مسمعين زوجته حجي او مضوجيها ما فهمنا ليش ورجع بالمطعم هم تعارك وكوه رجعوه...

زعجنا تصرفاته مال همج ما عنده اسلوب ولسانه الوصخ كعادته خرب علينا طلعتنا لحد ما وصلنا الفندق ونزلنا هم تكامش ويه شاب وتضاربوا وخلانا نندم اشد الندم لان اجا هو وعائلته ويانا ..خطيه زوجته قضت السفرة بجي من وراه ما عنده ذوق ابد ...الحجي كل شويه ياخذه بصفحه ويكعد يسولف وياه وهو يريده يبطل بس وين الهمجي يبقى همجي

اليوم الاول كان زبالة بسببه وصلنا دا نصعد لغرفنا وهو ويانا ويدردم ..نمنا بعد يوم متعب وهوسه كرار براسنا وصوته العالي الاجش يزرف طبلة الاذن ..طريق طويل وازعاج وكرار وياهم خلوا يومنا ينتهي بمسكنات لالام الراس ونومه ثكيله ...كعدت الصبح من الفجر بين ما صليت وتصفحت شويه بموبايلي صارت ساعه سبعه ومها لساها نايمه ردتها تكعد ماكو وضلت كل ما اروح اصحيها تطردني ...

ضجت واني بالغرفة ..كمت غيرت ملابسي اريد شي اكله متت جوع بطني كامت توجعني ومعدتي كلبت وهاي اني من اجوع بعد ما اعرف دربي ...والفطور بوفيه مفتوح بنفس الفندق كلت اروح انزل اكل ..بيومها لبست بنطرون كلوش اوفر قماش لون اسود كانت مودته شائعه وجديده ولبست جواه بدي لون اوف وايت ردانه مشغوله عراض كلش ..حجابي بسيط نازك لفه عاديه ..اختاريت هالملابس الفضفاضه حتى اخذ راحتي بالحركه اكره التقييد والملابس الضيقه