اوطان الدمار🖤

جيران😒😒

زينب:

بليلة من الليالي تغيرت حياة كل واحد من عائلتنا ..كانت ليلة مظلمة حزينة على الشارع كله انطفت بيها شمعة من شموعه ...كل الناس حزنت على عمر وعلى شبابه واخلاقه من كثر ما الناس يحبوه كانوا يرفضون يكولون ابن فالح ويسموه ابن ليلى وما ينزعج من هالشي ومو بس هيج صار لقبه بهاي الفترة القليلة ابو ليلى وولد المنطقة كلها تصيحله ابو ليلى ...ولد كلش خلوق ما يعرف الطائفية ابد ولا اله يد بجرائم ابوه وعمه بس بالمقابل اكو ناس فكرهم غير شكل يفكر اذا قتله راح يأذي اهله وفعلا اذاهم بس مو عمامه ..لا اذاها للمسكينة اللي تخبلت وره ابنها واذية لعائلته اللي بلا ذنب يتحاسبون على ذنب اهلهم ..

ايام العزا كلها واحنا وياهم ما عفناهم حتى جدتي شكد تكره بيت النجار من ونين امه بالليل وعياطها بالنهار تركت كل اللي راح وراحت تواسي ام ثكلى بابنها ..الي يعيش الشعور ويجربه ما يشمت بأحد يمر بي وحتى وان كان عدو وليلى وابنها ابد ما يعتبرون اعداء لاي بشر 

كنا بالبيت بلحظة اللي سمعنا بعمر مقتول وكانت امه بعد ما داريه راحوا الولد كلهم لبيتهم وشويه وبدت العياط والصوت صار يدوي بروسنا صوت امه المسكينه

عمتي ام كرار طلعت اول وحدة بينا لبيتهم وهي تبجي اجيت اتبعها جدتي صاحت بيه اكعد ما قبلت اروح وهي تنتقد البقية لان راحوا

اول يوم فات الولد وياهم عدا كرار بالبيت راح للدفنة ورجع كعد ويانا ..اني وجدتي بقينا بالبيت بس بالنا يمهم الحزن يعم واذا الجار متكدر انت هم تتكدر

كانت جدتي كل شويه تكوم تنعى اولادها وتتذكرهم واحد واحد وتبجي وبللاخير ما تحملت
راحت جابت عباتها وتريد تطلع شافها كرار صاح وراها

-هااا جده اشوفج رايحه الهم

-ولك يمه هسه امه نار ومشتعله بروحها نروح نواسيها بلكت يفيد

-مو هذول اللي تكرهيهم

-يمه عليش اكرهه الولد ما يوم فات من بابنا ما سلم عليه واني كاعده بره ...وهم ما ارد سلامه امداه للگلب الاسود...قبل شكم يوم شافني شايله علاكه ورايحه لبيت ام ابراهيم حلف الف يمين يوصلني واني اادفع بي وارزل وهو يضحك سودة بوجهي...خطي والله اخذوه بذنب ابوه شلون وليد ورد...امه تعبت عليه المسكينة

-مو تكولين ذبحهم حلال 

-ياا اني هيج كلت عاب حلگي ...لا يمه انفجعت امه بي وهو بعده صغيرون ولك يمه ابوك وعمك مو راحوا كنت اصبر رويحتي بيك وبأخوانك وبزينب هي ربحها بيمن صار لا من ولد ولا من عيال ولا من رجال ضلت وحيدها

سكتنا وجدتي اجت تطلع وقفتها اني
زينب :جدة اجي وياج انتظريني اجيب عباه

كرار :وين رايحه ماكو داعي كلكم ترحون
زينب :رايحه لمها مو صديقتي ووياي بالخط