اوطان الدمار🖤

مصارحه

راوية:
وصلنا منتصف سنة ٢٠١٧ وتقرر سفري المستعجل للاردن لمرض جدتي الشديد وطلبت تشوفني ضروري اطلع من العراق وهالسفرة كانت بوقتها فعلا ...تعب نفسي وتعب عاطفي بخلال الاشهر الفاتت ...مشاكل هوايه ومشاعر معقدة خلتتي الجأ للهروب من الواقع وانهزم من الشيزوفرينيا اللي صابت روحي وتعبتها ...بعد فترة طويلة من المشاكل بيني وبينه وصلت لفكرة ولو كانت غبية جدا بان هو عنده مشاعر خاصة بيه او يمكن اجا ببالي ممكن يتقبلني مو يحبني هالشي ما ببالي يصير ولا راح يصير يمكن ....سنوات عشت بالمكان وبينهم وصرت اطمع بالانتماء وادور عن استقرار بمكان من الجنون الكالي بي مكان الي..الكل استقر الا اني بقيت مرتحلة... اني بالضبط مثل النباتات المائية يشيلوها يحولوها من مكان لمكان ويا دوب تسوي جذور يجرفها الماي بعيد ..

طلعت من العراق بالليل وما تتصورون الخنكه والقهر اللي تجي بهالوقت..اتأمل بداية جديدة بالاردن واذا استقريت بعد ماكو رجعة على اتفاقنا اني وامي فترة وتلحكني بس تضبط اجازاتنا اني وياها لان طلعت باجازة مستعجلة مدتها قليلة... روحي انقبضت بوداع امي وخالي ومشيت وحدي ..احس نفسي طفلة وضعت من اهلي ..الدمع بلل خدودي ...امسح دموع يجي غيرهم تكولون مطر

وصلت الاردن واستقبلني عمي الصغير واخذني من المطار وصلني لبيوتهم ..وجدتي فرفحت من شافتني بجت هوايه وحضنتني... تبجي على اولادها وعلى احفادها وتتذكرهم وتشم بيه كلش تأثرت واني منا مقهورة لفراق امي ما احجي الكم متت بجي ...طبعا استقبالهم كان حلو وعمامي الاثنين موجودين بس ما كملوا حلاتهم للاخير وبدت الاتهامات لامي وخالي وخالتي بتضييع احفادهم وموتهم وبده الكلام يتصاعد واللهجة تحتد بيناتنا ....اللي عرفته جدتي عدها مستندات باسم والدي بأملاك بالعراق وضامتهن كل هالسنين عن عمامي وهمه متنحسين وضايجين وعمي الكبير كل شويه ويذب حجايه ويشعلني شعل ..قهروني وبس جدتي بنصهم تدافع الي بناتهم ما تقدموا ولا وحدة منهم احتكت بيه رغم عدهم بعمري واصغر واكبر عدهن نوع من التكبر والانفه ...كعدت عدهم مدة والروح ما عادت تحمل ..جدتي صارحتني بافكارهم يريدوني اخذ ابن عمي اسمه غياث وهو المسؤول عن شغلهم وادارتها ..مهندس وعنده شركه استيراد وتصدير بين الاردن والعراق وعدهم اموال ومخازن وخيرهم هوايه ...بالبداية اقتنعت ابن عمي وشكو بيها اذا يناسبني اهله كلهم يحجون بي وبجماله وبفلوسه ومكانته ولحد هسه اني ما قابلته كان مسافر وحسب اللي فهمته هو موافق عالزواج بس اول شروطه بعد رجوع للعراق ماكو وشغل وطلعة من البيت ماكو وهوايه شغلات يريدها بالزوجة وكل هاي كلت امور ممكن تنحل بالتفاهم 

اجا غياث من السفر وره مدة ومن شفته شويه واهج من الاردن كلها وانهزم فد اخلاق زبالة لا يحترم ام ولا اخت الغلط عنده بدون سبب اذا راد حاجه من وحدة منهم يكومها بإهانة وجدتي وامه طايرين بي ويهفون اله بريشة طاووس... الملك كسرى مال زمانه شرب وسهر تالي الليل ومن يجي للبيت يطبق شريعة الرب على امه واخواته ..نسخة طاهر ونسخة فالح كلش كرهته وكرهت جدتي لان هيج تريد تأذيني وكرهت امي وياها لان طول هالفترة تقنع بيه وتلح عليه اوافق لان غياث شكلا ومضمونا يشبه حبيب قلبها وكادت تقنعني بالموافقة ...رفضت والرفض كان شي مو بقواميسهم الظاهر ولا متناقشين بي ..ومن رفضت طلعت الوجوه الحقيقية ...عمي الكبير يريدني لابنه لان عدنا شكم مستند باسمنا بعد ما كادر يبوكهم ولا يحط ايده عليهم وابنه طمعان اكثر منه الكلب كدامي ويكول الهم تتنازل عن الاراضي اللي باطراف بغداد ...تعاركت وياه وويه ابنه وصرت بنصهم ووكفت بوجهم وما تخيلت توصل بيهم يضربوني لو يأذوني ...المشكلة وحدي كنت بالمشكلة وجدتي ما بيها تدافع عني وكعت وتخربطت وانخبصوا بيها وطردني عمي من البيت بالشارع بالليل بعد ما انضربت ...