هادي الروح ... لك تشتاق ..💞💞💞
الجزء التاني 💝💝💝💝
الحلقه الحاديه عشر ... والاضافيه 💞💞💞
... واكتفت انها تبعد عليه وترسمله رسمت الخائنه الا ماتستاهلش الا يتلفت وراه ويسيبها ويكمل حياته مع وحده افضل منها ... وحده قادره تكمل معاه وهما مطمنين انها خاليه من هالمرض اللعين الا قد يسبب موتها في اي لحظه ... وحده تعطيه اتمن هديه من روحها ليه ... وهوا رح يكون مقدر هالهديه الا كان يستني فيها طول عمره وهيا كلمة (بابا )) .... ورح يكتفي في الاخر انه يحكيلها علي الخائنه الا كانت ماتستاهلش الا النسيان ....
طلع عقاب من حوش مريم ... ومايشوفش في دنيا الا ظلام قدامه ... وبعد مالف ولف ودار شوارع بدون هدف زي تائه بدون عنوان ... مالقاش نهاية مشواره الا راجع لحوش بوه .... وأول مادرس سيارته وخش للحوش لقي سمر مقعمزه في الجنان علي الكرسي بصمت قاتل ... فأول ماشافها مسح وجهه باايديه وتنهد تنهيده كانت تعبر علي كمية الوجع والهم الا حس بيه لما شافها اكتر من الهم الا في قلبه ... وقرب منها وقعمز علي الكرسي وقاللها ....
عقاب .... سمر... حبيبتي انتي بحال احسن توا ؟
سمر ....( وهزت راسها بالنفي وانهارت بالبكي )
فاناض بسرعه وحضنها وقعد يطبطب عليها وقاللها ...
عقاب ... مافيش حد في دنيا يستاهل زعل اختي حبيبتي ... اني مستعد نقتله علي خاطرك انتي .
سمر ... (مسحت دموعها وقالتله ) ... اسفه مبكري لما خشيت وطقيت عليا مافتحتش ... كنت حابه نقعد بروحي بس لاني توا بس كيف قدرة نستوعب الا صار .... سامحني عقاب ...
عقاب .... ولايهمك ... اني قداش عندي سموره .... يالله وريني ضحكتك ... اها ... اني علي خاطر ضحكه هيا ... مش رح نسيبك قدر الامكان ورح نكون معاك لين ترجعي لراجلك ....
سمر .... المره هادي مافيهاش رجعه ... حميدا قرر يطلقني ياعقاب .....
عقاب .... اني عارف كل شي ... حميدا كلمني وحكالي كل شي في الليله الا عنكشيتي فيا اتصالات ...
سمر ... قصدك انت تندري ان هوا بيطلقني ياعقاب ؟
عقاب .... اكيد لا ... هوا حكالي وكان متضايق جدااااا منك وواخد علي خاطره ... بس ماتوقعتش ان الامر يوصل لطلاق ياسمر ...
سمر .... بس اني مانستاهلش منه هالشي ..( وانهارت بالبكي )
عقاب ....اني مانعرفش علاش دسيتي عليه ... واني ماحبيتش اني نضغط عليك وقولت رح تجي بروحها وتحكيلي ... ولكن انتي الا درتيه مش شي صغير يا سمر ... انتي دسيتي عليه موضوع كان من حقه يعرفه زيك انتي بالزبط ... وانتي بي الا درتيه حطيتي نفسك في دائرة الشك بدون قصد وخليتيه يفقد تقته فيك وبدات انه بعيد عليك ...
سمر .... عقاب اني ضحيت علي خاطره هلبا لو تدكر وتحملت هلباااا وعانيت لهدا ... ومن اللحظه هيا ... طالما فكر فيها مجرد تفكير الكلمه هيا معناها معاش يلزمني في حياتي ...
عقاب ... ماتتسرعيش طالما انتي ماسمعتيش منه شي ياسمر حميدا راجل وكويس ... قوليلي اخر شي قالوهولك شن هوا ؟
سمر .... هددني اني لو طلعت من شقتي مش رح يصير طيب ...
عقاب ... وشن الا خلاك تطلعي منها .
سمر ... مشيت لحوش عزوزتي وبصدفه خشيت عليها سمعتها تحكي معاه وتقوله (( بتطلقها سمر .. ايه مفروض هكي يصير ... ))
عقاب ... بس مرات انتي فاهمه غلط ...
سمر ... لا مافهمتش غلط لان عزوزتي ماتندري عل شي وحاليا مايندري حد الا اني وهوا ومريم بس فا هوا اتصل بيها وحكالها الا درته وقاللها بنطلقها باش قالتله اي هوا هدا مفروض الا يصير ...
عقاب ... رح نحاول نتواصل معاه ونفهم منه شن صار بالزبط ...
سمر .... لا لو سمحت ياعقاب كرامتي اهم من اي حد علي الارض ... وحتي لو رجعلي مستحيل نوافق نرجعله بعد الا نكسر بينا والا صار ... ماعطاش نفسه فرصه يسمعني اصلا ومشي وسيبني .... انت متلا تتصرف هكي مع مريم ياعقاب تقدر ؟
وهنا عقاب لما سمع كلمة مريم تنهد تنهيده قويه وقاللها ...
عقاب .... خلينا نخشو داخل خير الجو صقع والدنيا ظلمت ...
سمر ... خيرك عقاب في شي ؟
عقاب .... لا لا مافي شي ... ماتشغليش بالك انتي بيا ...
سمر ... تعشيت ؟
عقاب ..... قولي فطرة او تغديت او تعشيت مع بعض ... لاني ماكليتش اي شي اليوم وماعمديش نيه ...
سمر .... علاش خيرك انت هكي ومريم مبكري لما وصلتني لقيتها مدمره نهائيا .. شن في ؟ خيركم ؟ اني مبكري كنت منهاره ومصدومه لاني متوقعتش هالشي يصير اقلها بسرعه ولهدا ماسألتهاش ..
عقاب ..... هيا قالتلك شي ؟
سمر .... لا لا حضنا بعضنا وبكينا وكنت نحكيلها في سياره ونبكي وهيا تسمع بس ...
عقاب ... اها اوك ( وغير الموضوع ) .... اني توا بنطلع حاس روحي مخنوق شوي ... بس لما نروح رح تحكيلي علاش دسيتي علي حميدا واسبابك باش اقلها ممكن نفهمه علاش انتي درتي هكي ... اني بجد مش حابب تخسريه يا سمر لان حميدا انسان كويس ...
سمر ... اني رح نحكيلك فقط لانك خوي ومن حقك تفهم اني علاش بنطلق .. ولكن حميدا انتهي بالنسبه ليا خلاص ...
وطلع عقاب بعد ماانتهي الحديت بينه وبين سمر خشت للحمام باش تاخد دوش سخون يريحها من كل طاقه سلبيه الا حاسه بيها قبل النوم .....
