💞💞 هادي الروح ... لك تشتاق 💞💞
الجزء التاني ....
الحلقه التانيه ...
وفي اللحظه الا كانت سمر فرحانه وتهدرز مع سلفتها وعلي سيرة مريم الا انجابت اتدكرت ان مرات مريم تتصل بيها فامشت لشنطتها ولقتها تهز فاطلعت تلفون .... وهنا وكيف بتطلع تلفون شافت رقم المصحه تتصل بيها ..... وفي اللحظه الا بتفتح الخط وبترد عليهم انطفي تلفونها لانه تم الشحن ...
سمر .... اوووووف ... تم شحن ومش جايبه معاي شحن .
سلفتها ... سومه حبيبتي اعطي تلفون لنهال قولها قالتلك خويله سمر حطيه في شحن .
سمر .... تهبببل ياوخيتي قداش عمرها ؟ وبنت مني ؟
امال ( السلفه ) ... بنت اخت عزوزتنا امها شكلها مريضه تتوحم واحنا نوحلو في ضناها .... هما يحملو واحنا نوحلو ... والكارته البنت تقول لسمي انزلي واني نرقالك وهيا بين فوق ولوطه حوشي وحوشهم ولما نتكلم تقولي غير افلحي انتي وجيبلنا زيها يعبي الحوش علينا بدل ماتعدي وتحسبي لاختي ماهو الفالحه تجيب والبايره تقعد تعد .... ااااااه ربي رحمك وافتكيتي وحملتي وفقصتيلهم عينهم ... والله ربي يحبك في حاجتين الاوله سكنتي بعيد وافتكيتي مش زي حالاتي وتانيه انك حملتي ...
سمر .... انتي علاش سكنتي فوقهم طالما مش متحمله ...
امال .... الله غالب الا عندي فقري امه تبي تزوجه وماعنداش مشت عطاته دور تاني دارله صيانه وسكنت فيه وهما سكنو لوطه وقالت لي راجلك يبني فوقنا بس هوا رفض واختار يسكن بعيد .. وياريتني انشليت ولا رضيت ... قعدة خدامه ليها ولبنتها بنتها مدايره روحها دكتوره و24 ساعه في دارها يااما في جامعه واني بين فوق ولوطه ..وياريت حتي عاجبهم 24 ساعه وهيا تعاير فيا بااني مش قادره نجيب صغار ...
سمر ... معليشي هونيها تهون ... وسعي بالك انتي اني بالعكس حسيتهم كويسين سواء اللاي او نهال فامش عارفه كيف يتعاملو معاك هكي ..
السلفه ... لا لا غير انتي زعميتك بعيده عليهم وشاده خيرك شرك ... لاحظي انتي ولا مره خلونا نهدرزو مع بعض زي توا غير لاهين وفرحانين انك حامل بس ... عزوزتنا عندها نظام فرق تسد وانتي المده الا فاتت كلها كنتي شاده روحك علينا هلبااا فاهدا علاش مش عارفه طبعهم ... لكن مادمك نويتي تقعدي هنا فترة حملك تفرجي واحكمي حوش الافاعي كيف يكون ... بس تعرفي ههههههه والله ربي يحبك بجد لانك حملتي وكسرتي عينهم كيف كانت عزوزتي تلمح عليا وعليك ولامس تقول اني مطيحني في الشجر الا جدورها يابسه ..
سمر ... ( بوجه مصدوم )... معقوله
امال .... مال شني تحسابي ... تي عندك علم ان ليا 6 سنين متزوجه قضيت منهم ممكن 5 سنين بين حرجانه وراضيه تعودت خلاص شهرين تلاته هنا و6 شهور في حوش اهلي ... واخر حرجه ليا توا قعدة سنه ونص في حوش اهلي وكنت علي وشك نطلق
سمر .... علاش ... هل انتم مش متفاهمين ؟
امال .... شن تبيني نقولك ... اول مشاكلنا موضوع صغار برغم ان كل دكاتره قال مافيكم شي من ربي موضوع وشوية وقت ..بس يعاير فيا ويهدد فيا بالزواج ... تاني شي لاطلعه لاخشه وحبسه وكله عنده عيب وحرام ولايبيني نخدم ولا نسوق ولا حتي نمشي معاهم للبحر او اي مكان ... امه واخته يطلعو واني يقولي لا ... قال ايه هما حرين في تفكيرهم واني هادي عقليتي ... وفوق من هدا كله خدامه ليه ولماليه والالعن يضربلي المتل بااخلاق اخته وكارته اني غاسله صابونها كله واكتر من مره فاكشتها تكلم في تلفون في تركينه ... ولما قولتله ضربني وحطني مسخت اخته وكلمه مني كلمه منه وصلت بيناتنا اني ماخليت ماقولت عليه وعلي اماليه ولميت حوايجي وطلعت وكنت نبي نطلق لولا اهلي سكرو دماغهم مانطلقش وراجل مافيشي عيب ... مهم هوا قالي مش رح ترجعي لين تعتدري لاختي علي كل الكلام الا قولتيه عليها وعلي امي واني سكرت دماغي ... ولهدا قعدة حرجانه سنه ونص ...
سمر .... يارووووحي والله كسرتيلي خاطري ياامال ربي يجازيك علي قيس نيتك ويرزقك ياررررب ويريحك ....
وفي اللحظه الا بترد عليها امال ... خشت نهال عليهم ....
نهال .... سموره راهو سومه راهو كيف جابتلي تلفونك شكلها كانت تلعب بيه جابتهولي مفكوك علي بعض وبدون شفره ...
سمر .... ( بوجه مصدوم ) شفره شكلها طاحت قصدك ؟
وناضت بسرعه باش تسأل البنوته صغيره علي شفره .
سمر .... سومه حبيبتي وين لعبتي بتلفون ؟
سومه .... ( بوجه برئ ) ماارفش ... ني .. وني واقادي ... ويله نلعبو تي 😛
سمر .... لو لقيتلي شفرتي نلعب معاك لصبح تمام ؟
امال ... خليك انتي وين نايضه ارتاحي .. توا نوض اني ونهال نشوفهالك ...
نهال .... نستأدن اني عندي امتحان شوفيها انتي امال حبيبتي ..
امال .... اي لا صح امتحانك اهم اني ندورها بري حبيبتي ...
وفي اللحظه هيا سمر كانت لاهيه تقصقص في بنوته وتشوف وين طيحت تلفونها ...
وهنا نهال خشت لدارها وشويه مافاتتش 10 دقايق ولحقتها امال في دارها ....
نهال .... مالقيتهاش .؟
امال .... لا لا دورتها وفص ملح وداب ... ربي يهديها حتي هيا مالقتش تعطيها الا لبنوته صغيرونه ماتعرف شي ... اتنبلت حتي علي شحن تلفونها من توا وتعامل فينا تقول خدامينها ...
نهال .... حرام عليك شن طلبت مننا هييا ...
امال .... انتي طيبه يانهوله ... تي تصوري لمحتلي انك انتي خديتها شفره ..
نهال ... واني شن مصلحتي ناخدها ....
امال .... قالتلي شفره معبيلها فيها خوك 300 دينار وتحسابك فتحتي تلفون فاشفتي رصيد و طمعتي فيها وقولتي خلي نلصقها في سومه ونقول راحت ..... استتتتتتني وين طالعه ...
نهال .... خلي نفهمها ونخليها تحترم نفسها وتبطل تخنيب في ناس هدا من توا هكي .. خليني نطلع ... انتي متاكده قالتلك هكي ؟
امال .... والله من فمها لودني ونطيت فيها نطه ولا وجهه اسود وبعدها حاولت تغير موضوع وتحسسني اني فهمت غلط ....
نهال .... امي وين مش رح نسكت علي موضوع هوا ...
امال .... تعالي هنا يامهبوله انتي ناقصك مشاكل ... ولامس خوك شدك تكلمي في صهيب وكليتي منه طريحه ... وتوا تطلعي تداعكي معها ويطيح العيل الا امك تستني فيه بشياط ريق ويحسابوك غير غايره منها وتبي تنتقمي من راجلها علي طريحه الا عطهالك ولامس ...
نهال .... انتي تشهدي معاي ...
امال .... لا ياعمري انتي تبيني ناخد كلمتي في جرايرك .... هني روحك وارتاحي اني مانقدرش نشهد بشي والله خوك يطلقني ومعاد يخليني لحظه ... خلاص انسي وانتبهي منها في جديد بس وماتخلطيش روحك معاها راهو حسيتها في الوجه مرايه وفي القفي برايه وشايفه روحها بالعيل تقول ولي العهد ...
