🌼🌼🌼هادي الروح ... لك تشتاق 🌼🌼🌼
الحلقه التالته عشر ....🌺🌺
مربم ... عادي تركبي تباتي فوق ؟ نبي نتكلم معاك في موضوع ممكن ...
سمر ... اي عادي .. بس هل بتاخدي رقم عقاب ؟
مريم ... لا لا مانبيشي حاليا ( مع ابتسامه صفره وبعدين قالتلها ) .. نستني فيك فوق ... بدلي واركبيلي .. عندي موضوع حابه نحكيهولك.
سمر ... اوك ... ان شالله خير .
وخشت سمر للحوش باش تبدل وتركب ... ومريم نفس الشي ... بس قعد قلبها علي نار ... تقوللها ؟ لا ؟ باهي معقوله تشوه شكل خوها في عينها ... بس هيا تلمحياتها كأنها تعرف .... لا لا مستحيل منين بتعرف ... وبين كومة هالافكار سمعت سمر سكرت الباب وراها وخشت ...
سمر .... مرررريم جعاااانه اني بنموت من الجوع راهو ... قولت توا نركب ناكل معاك ...
مريم .... ههههههه نعلق لبستي ونجي اللحقيني علي مطبخ وحطي براد الشاهي ...
سمر ... ماشي ...
وخشت سمر ... حطت براد شاهي علي نار وطلعت زيتون وطن وجبنه وحطت طاوة البيض علي نار وقرضة الخضره دارت سلاطه ... بينما مريم خشت للحمام توضت وصلت ومشتلها للمطبخ ...
سمر .... مريم بنسألك ...
مريم ... اها ..
سمر ... لو متلا متلا طلعنا وخدينا لبس تعارضي ؟
حست مريم هنا بالاحراج والارتباك شوي ..وبعدين قالتلها ...
مريم ... عارفه اني ماعنديش هلبا حاجات ... لان الحاجات الا شريتهم راحو مني ( ووجهها تغير من الكدبه )
سمر ... اي عارفه بس حبيبتي ماتفهمنيش غلط ... اني بس حابه نلبسك بدوقي انتي تعرفيني نحب فاشن وهكي ههههههه حتي اني خريجة تصميم ازياء راهو ياحلوه ولانسيتي
مريم ... هههههههه خلاص تمام ..
سمر ... نبيك الا عندك كله تلميه في شنطه وتقيميه ... حطيه علي جنب ..او نعطيك فكره ... انتي مش مقرره انك تولي مريم جديده ؟ خلاص كبيهم مع مريم الاوله ..طالما عندك فرصه انك تكوني انسانه جديده ..
مريم .... اني اصلا مانبيش اي شي يدكرني بالماضي ..
سمر ... خلاص معناها بكرا رح يكون يوم حاففففففل ... واسمعي من بعد بكرا بتبدي مع مدربه سمر باش تدربك علي قياده 😜😜😜
مريم ... هدا كله رح نديروه ... مش عارفه حاسه اني صعب ندير هدا كله ..
سمر .... ااااااي احنا شن قولنا ؟ طاقه سلبيه كلها لازم تطلعيها منك .. بعون الله الا رح تديريه مش حاجه صعبه يبي اراده بس وتكني بجد حابه تتغيري ... يعني ... فايتنق 💪
مريم .... ههههههه فايتنق 💪
توا خلينا نتعشو لاني ميته بالجوع
مريم ... اني ماعنديش نيه ... نبي نرقد بس تعبانه حاسه روحي .. بس رح نسايرك ونشرب شاهي معاك هههه
سمر .... شني بدينا معاش نتعشو ونحافظو على الا نقصناه او شن ..
مربم ... لا لا بس ممكن الفتره الاخير جوني اعصاب المعده وقولون متعي نحس فيه تعبان ... كل ماناكل شي دسم او نشويات بطني تقعد طول الليل قريب تتقطع ..
سمر ... امتي هدا الكلام من لما كنتي بنت ؟
مريم ... لا لا لما تزوجت بس ...
سمر ... ربي يهديه الا عندنا ركبلك الاعصاب هههههه
مريم .... ههههههههه .
سمر ... تمشي بكرا تعايني ؟
مريم .... لا لا مانتعبش الا لو تعصبت هلبا او كليت شي دسم بس ومانبيش نخش علي سريب الادويه ودكاتره من توا بس لو زادو تعبوني رح نمشي نعاين بعون ...
سمر ... اي ماتهمليش نفسك في موضوع هوا ... ااااه الحمد لله شبعت .. خليني نغسل معايين وانتي بري ارتاحي ...
مريم ... لا لا توا نضمهم معاك واهو فرصه نهدرز معاك ...
سمر ... اوك ... اي حقا شن هوا موضوع الا تبيني فيه ...
مريم ... اه اي ... بنسالك ... عندي صاحبتي تمر بظروف وتبي نصيحه واني ماعرفتش ننصحها بصراحه فاقولت نسالك ...
سمر ... خيرها ؟ ...
مريم .... تزوجت شخص بشكل عبيط يعني زي قطوس في شكاره ... ولقت بعد الزواج انه نفس الشخص الا اختها معجبه بيه ..
سمر ... وهوا ؟
مريم ... مش عارفه ... لا ايه حتي هوا ...
سمر ... وهيا صاحبتك شن موقفها ؟
مريم ... كارته انها اكتشفت انها تحبه ... بس نكسر شي في داخلها كبير اتجاهه واتجاه اختها .. وبدات بعد مااكتشفت انه خانها معاها ..
سمر .... باهي كيف متأكده هيا ان خانها ؟
مريم ... مجرد كلام بس نص موقف بالفعل هيا حضراته بس نص تاني مش عارفه تصدقه او لا ...
سمر ... شوفي ... موضوع الحب مش باايده وخاصة انه عرف اختها قبلها ... فانصيب وربي مكتوبلها انها تتزوجه فا عندها تلاته خيارات ... تعطيه فرصه لو حبها ونسي اختها ... الله مابارك ... ماحبهاش و وحست انها بتقعد لعبه في نص تنفصل عليه .. ولو بالفعل شداته وتاكدت انه يخون فيها او حتي خانها مره بعد زواج ... تنفصل عليه بدون تفكير لان الخاين مستحيل يتغير ...
مريم ...(عيونها تعبو دموع ) ... باهي لو هيا نكسر في داخلها حاجه كبيره ومش متقبله وجودها في حياته بعد الا صار ...
سمر ... ماهو لهدا قوليلها تعطي لنفسها فرصه وبدات لو ان الموضوع طازه ... احيانا تشوف منه شي تغير رايها بيه ...
مريم .... هل ينفع تستمر معاه في وجود اختها ؟ رح تعيش في شك طول عمرها .... طالما هيا قريبه منهم ...
سمر ... ماتستبقيش الاحدات ... ماتعرفيش شن يصير ...
وفي اللحظه هيا ناضت مريم لان خنقة دموع سبقتها ... فاقالتلها سمر ..
سمر ... اه وين نايضه ؟
مريم ... بنخش للحمام بس ..
وخشت تجري للحمام وتبكي وكاتمه عيطتها لتسمعها سمر ...
وبعد نص ساعه طلعت من الحمام غاسله وجهها بس دموع ماترين علي عيونها وقالت لسمر ...
مريم .... نبي نطلب منك طلب ... عادي لو بكرا مانبيش نطلع ؟ حابه نقعد الفتره هيا بروحي ... محتاجه نفكر مع نفسي ...
سمر ... (مع تنهيدة احساس بيها ) الا يريحك حبيبتي ...
مريم .... خلاص ارتاحي توا بكرا وراك مواضيع ..
سمر ... طالما اجلتي موضوعك معناها بنمشي لدكتور الا دارلي عمليه علي عيوني وركبلي عدسات طبيه في عيوني عندي معاه مراجعه ..
مريم ... سعدودك نتمني نحيهم ...
سمر ... ديرها مش صعبه وفي نفس اليوم تطلعي ... والله تحسي بااحساس حلو بدونهم ..
مريم ... مش عارفه بجد ... الباين اني ماكنتش عايشه ... هدا كله وين كنت منه اني ؟
سمر .... مكتوبلك حبيبتي ... خلاص ارتاحي توا ... وبكرا رح ننزل ونخليك تفكري كووويس في حياتك وكل الا حابه تغيريه ..
مريم ... مرات نحس من كلامك مغزي غريب ..
سمر .... هههههه ولاحاجه ... خلاص ارقدي توا بنررررقد 😗😗😗 تصبحي الف خير ...
ورقدو ... وماقتش مريم صبح الا علي صوت تقربيعة الباب من سمر ... فا ناضت وبعدين تلوحت تاني علي فراش بكل فشل وخمول وكان هموم دنيا كلها فوق دماغها ... وكانها ماحستش بالا صار بالفعل الا بعد ماروحت باش فاقت من صدمتها وخشت في مرحله تانيه من مرحله تقبل الحقيقه ... وهالمرحله تانيه كانت الاكتئاب ... وكانت بدايته هاليوم ... وبعدها اليوم تاني وبعدها الاسبوع تاني وتالت والرابع ... وكانت سمر في كل يوم تحاول انها ترجع الامل فيها بس بدون ماتضغط عليها ... لان حابتها القرار تاخده بنفسها مش اكتر ... وكانت في الشهر هوا شبه منقطعه علي الاكل لحد ماوصل وزنها 54 كيلو ... وحياتها كانت بين النوم والقهوه ودموع والروشن والتفكير ومراجعة حساباتها الا فاتت والصلاه ... ولكن دائما مابعد ضيق الا الفرج ... وربك بعد ضيق يبعت الصبر والامل ... وهالامل هوا الا خلي مريم تفيق من الا كانت فيه علي اتصال رقم غريب ... بعد شهر كامل ... عزله في بيت وخاصة انها بلغت اهلها انها مسافره هيا وعقاب ... باش ماضطرش تنصدم مع حد في حوش اهلها وتحكي كل شي .. لانها عارفه رح تكون نهاية احد تلاته اطراف امها او بوها او وحدا منهم يقتل مرام ...
مريم ... ترن ترن .ترن ...
بس في الاول كنسلت ومابتش ترد لين وصلتلها رساله ...
مريم ...(اول مافتحت رساله لقت فيها كلمه بس ) ... عقاب ..
ورجع اتصل ... وهنا فتحت الخط وقعدة ساكته ...
عقاب ... ( سكت شوي وقاللها ) اني اسف ..
مريم ... طلقني عقاب ...
عقاب ... اني اسف ... حبيت نطمن عليك بس .. سلام ...
مريم ... نتمني اول ماتروح تكون كلمتي عندي بهدوء ..
عقاب ... سلام ...
وسكرو الخط هما زوز ... وهنا ناضت وكان الروح ارتدت فيها وارتدت معاها كرامتها وكبريائها والامان الا كانت فاقداته ... وناضت بدلت حوايجها ... ونزلت ...
مريم ... صباح الخير ..
سمر ... صباح النور ..
مريم ... نبي ندير عملية الليزرك بكرا .... خلاص ... ونبي نطلع اليوم اني وياك ... ناخد لبس جديد ليا ... وهدا لبسي الاول ...
وجبدت سمر من ايدها وطلعت بيها لجنان ... وحطت لبسها وتصواير عرسها وفيلوها واي شي ليه علاقه بحياتها الا فاتت ... وصبت عليه شيشه اسبيرتو وولعت فيه نار ...
سمر ... مريم خيرك مهبوله انتي .
سمر ... مش ليا ... لان صاحبها مش ليا اصلا والا في صوره مش اني فاعلاش نحتفظ بي حاجه مش ليا ...
مريم ( مست جبهتها ) ... خيرك انتي يابنت اليوم حرارتك مرتفعه ؟
سمر ... اني اليوم بس شفيت ههههههه هيااااا البسي بنطلعو نفطرو برا ونمشو لسوق ..
سمر ... اعطيني تواني بس ونكمل لبسي ...
وبعد شوي طلعو ... ومشت رفعتها لااكتر المحلات الا فيها لبس حلو ... شرتلها لبس كامل ومكياج وارواب وحوايج حوش وحويج عمليات وحفله ورياضه ... وقعدو لحد المغرب وهما في سوق ...
سمر ... اااااه رجليا طابو ...
مريم ... تعرفي لما شفت الكورنيش جي خاطري في شي ...
سمر .... شني يامهبوله هههههه
مريم .... نجرو لحد سيارة جيلاطي هديكا هههههههه
سمر .. استني يامهبوووووووله ...
وبدو يجرو ويضحكو زى مجانين ... وبعدين ركبو لمدينة الملاهي الا غادي ... وطول ماهيا تلعب مريم قعدة تعيط تعيط ... وكل الا كانو يلعبو كانو يعيطو علي خاطر الالعاب ... بس هيا كانت تعيط باش الكبت والقيود ووالا تبقي في قلبها من حزن وهم ...
سمر .... يعطيهالك صوتك نبح من كتر العياط هههههههه
مريم .... تصوري اول مره نتجراء ونطلع للوقت هوا وندير البلواي هيا ...
سمر .... واني والله ... بس حسيتك محتاجه للحاجه هيا وحسيت انك ارتحتي هلبا صح ...
مريم ... بعد اليوم هوا اي ارتحت هلباااااا وحسيت من علي كتافي باقي الهم وبدات بعد القرار الا خديته اليوم ...
سمر .... والا هوا ؟
مريم .... رح تعرفيه في وقته ...بس بجد لولاك انتي ماكنتش قدرة ناخده ... بس بالقرار هوا نقدر نتبت لنفسي اني بجد تغيرت 😊
سمر .... ان شالله ديما هكي ههههههه بالله خلينا نروحو ...
مريم .... اووووك لان بكرا ورانا يوم عصيييييب ...
سمر ... اني خديتلك موعد مع دكتور اليوم وقالي تقدر بكرا تدير التحاليل ولو تمام ندخلوها ...
مريم .... فرحتيني ... اي بنسالك بعد العمليه بتبدي تدربيني ظروري ...
سمر ... علاش ظروري ..
مريم ... خلاص ... قررت نرجع نقرا ...
سمر ... تصوري شي ... اني ماكنتش حابه نضغط عليك شهر الا فات ... لاني كنت حابه كل هالقرارت تنبع منك ...
مريم ... عارفه ... وعارفه انك تعرفي الا صاير وتستعبطي عليا .. هوا حكالك ؟
سمر .... ههههههههه ايه .
مريم ... امتي حكالك ؟
سمر ..... قبل مايركبلك انتي ...
مريم ... علاش ماقولتيليش ؟
سمر ... لاني مش حابه نتدخل او نخش في حياتكم او مشاكلكم .... بس الا نقدر نديره باش نساعدكم درته ...
مريم .... في اللعبه كلها كنت خاسره ... بس ربحت اهم شي ... اخت زيك عوضتني علي معني احساس الاخوه ... أتاري مش شرط الاخوات الا يطلعو من بطن وحده ...
سمر .... ههههههههههه عندك شك .. بس خلينا في جد ... بنقولك شي بس ... عقاب اني اكتر وحده نعرفه ... مستحيل يدير شي يغضب ربي مهم كان
مريم ... مع تنهيده .... وصلنا ... خلاص خلينا ننزلو ...
سمر ... اوك ... انزلي انتي واني ندرس سياره ونلحقك ..
مريم .... تبي ترقدي عندي تعالي ... بس اني خلاااص بنطيح علي وجهي وبنرقد باش بكرا صبح نكونو في عياده ...
سمر .... اوك ...
مريم .... قبل ماننزل ممكن طلب ..
سمر ... نعم ..
مريم .... ماتقوليش لعقاب علي اي شي درته او رح نديره ..
سمر ... اكيد من غير كلامك حبيبتي ...
مريم ... اوك ... تصبحي علي الف خير ....
سمر ... وانتي من اهلو ...
ونزلت مريم وركبت لحوشها فوق ... وسمر درست سيارتها وخشت. ..
واول مافتحت سمر باب حوشها ... دخلت الحوايج وسكرت الباب ... وعلقت كل لبس في مكانه وطبقت الا يبي في دولاب ... ووتت صاكو مستشفي والفلوس والاوراق مطلوبه ... وتلوحت في سرير ووهيا تفكر في القدام والا بيصير ... لحد مامشت في نومه عميقه ... مافاقتش منها الا علي طقت الباب تاني يوم صبح ...
سمر .... مررررريم مررررريم ..
مريم .... هيااااااا ... ولبست طرف روح الخارجي وفتحت الباب ...
سمر .... ااااااااااي شني مالا عقاب روح في الليل واني مانندريش ..
مريم ... هههههههه مصحك ..
سمر .... وقت بري بسررررررعه اطلعي خلي نلحقو ...
مريم .... تمااااام لحظه بس ....
وخشت مريم للحمام دوشت وجبدت شعرها ولبست سروال وبلوزه مخصره ربع وطلعت ...
سمر .... الله هالطرحه مش ناقصها الا تنحي نظارت هما بس ...
مريم .... هههههههه خلاص هيا نديروها ...
ووركبو لسياره وطلعو .... واول مااستقبلهم الدكتور بترحاب ... ودخلها لغرفتها بعد مادرت كل تحليلات وخشت علي عمليه ... بس قبل ماتخش قالتلها سمر ...
سمر .... متأكده ماتبيش تقولي لاهلك او عقاب ...
مريم .... ايه ماتقوليش لحد وادعيلي بس ..
سمر .... ربي معاك حبيبتي ...
وفاتت دقايق وراء دقايق لحد ماطلعوها .... وهنا مشت سمر لدكتور ...
سمر .... شني دكتور . شن حالها مريم ؟
دكتور .... ههههههههه خيرك خايفه يابنتي هادي حاجه بسيطه وبعد اسبوع تقدر تنحي ضماد عادي جداااا واليوم في الليل رح نكتبلها ورقة خروج
سمر ... بارك الله فيك دكتور ...
..
..
..
..
وهنا ومن اللحظه هيا ... مريم قدرة تفتح باب جديد في حياتها ... وحست انها مش باقي من شخصيتها الا اسمها بس ...
وبعد مرور اسبوع ....
مريم .... واخيرااا نحيت ضماد ... وبديت نشوف حتي في شمس الله محلاه الاحساس هوا ... اتاريني ماكنتش عايشه ...
سمر .... ههههههه مازالك حاجتين ... سواقه وتبدي في قرايتك ... وعقاب ... اها ابن الحلال عن دكرو بي يبان ... عقاب يتصل ...
بس في اللحظه الا عقاب يتصل بيها وتسكر الخط بدون ماترد سمر ... جاته مكالمه بدون اسم ... وهنا شبح شويه لرقم وفتح الخط ...
عقاب .... الو ...
مرام ( مع صوت تاعب ومنهار وواصل لمرحلة الانهيار ) .... حبيبي استاحشتك ... اكيد ماقدرتش تنساني حتي وانتم مع بعض ..
عقاب .... بعد كل الا صار مازال تتصلي مرام ... انتي بجد مجنونه ... اني نصدمت فيك صدمة العمر ... كيف حصلتي رقمي .
مرام .... الا يسال مايتهوش ... وحميدا صاحبك مازال مامتش ...
عقاب .... انتي بجد مريضه اني بنسكر ...
مرام .... هههههههه ماتقدرش ... لانك لو سكرت رح تنتهي ... اني عرفت انك مروح توا ... وحاليا نستني فيك ولو ماطلقتش مرام وجيتني في مكان الا نقولك عليه ... رح نقول لاهلي علي كل شي ...
عقاب .... ( وهنا هبل وقعد يعيط ) ... انتي مهبوله . اني مافي بينا شي اااافهمي ..
مرام ... رح نقوللهم لما مشيت لحوش مريم حاول يتحرش بيا واغتصبني اقسم بالله الا مانخليهم يصدقوني ... ورح نقوللهم يبتز فيا ويبيني نطلع معاه ... ورح يصدقوني بدات لما يسمعو وجهة نظر مريم ... مريم مش رح تدس شي صدقننني ..
عقاب ... انتي مريضه بجد مريضه ...
مرام ... انت في طريق توا ...لاقيني في سريع ... نستني فيك ... واقسم بالله لو ماجيت رح تندم ... نستني فيك ...
وهنا عقاب ... سكر وقعد يفكر ... ودماغه نشل ... وهنا مالقاش نفسه الا علي طريق سريع يجري ... لحد ماشافها علي طريق تانيه من طريق واقفه تستني فيه .... وهنا درس سيارته فاشافاته ... ونزل من سياره وقعد يشبحلها من بعيد .... ووهيا تشبحله ... ووكيف بتقص كانت سيارات زحمه ويتهافو جري خيالي ... بس هوا تردد في اخر لحظه وركب سيارته وطلع ... ووهيا اول ماشافته هكي ... نجنت وقصت طريق ليه جري بدون وعي .... وهوا خدي سرعه وطلع يجررررري ... ووهيا كيف قصت بسرعه بدون ماتتلفت هفتها سياره جابتها علي مرشبيدي ... وتلقطت عليها ناس كلهم ....
واحد من الناس .... لاحول ولاقوة الا بالله ....ﻻحول ولاقوة الا بالله ... لاحول الله ماتت ماتت غطوها واطلبو الاسعاف او شرطه ... وتلمت عليها شرطه والاسعاف وقاموها .... وبينما عقاب كان في طريق ... واول ماوصل للحوش درس سيارته اتصل بي مريم ... وهيا كانت في جنان بي سكمتشاته برتقاليه مقعمزه علي حاشية الجنان وتشوف للورد ... واول ماشافاته يتصل مابتش ترد ... فاسكر الخط ونزل من سياره ... وكيف بيسكر سياره جاه اتصال فارد وخش ... واول ماخش جت في عينه مريم طول وقعد مصدوم يشبحلها ومش مصدق عيونه ... وفي نفس الوقت كان الاتصال ...
المتصل .... الوووووو .... ياخونا انت معاي ؟
عقاب ... معاك معاك تفضل ... ( ويشبحلها )
متصل .... راهو انت لقيناك اخر رقم متصله بيه الاخت ... راهو ضربتها سياره وتوفت وحاليا في المستشفي ... ياريت لو كنت من اهلها او تعرف اهلها تبلغهم وتقوللهم يستلمو الجته ويكملو الاجراءات ....
يتبع ....
Kinda
