هادي الروح ... لك تشتاق
الجزء التاني ....
الحلقه الخامسه 😍😍
مريم ..... توا بروحنا شن في ؟ خيرك ؟
سمر (( مع تنهيده كبيره )) ..... مريم .... ااااااااه ... اني مش حامل (( ودموع يصبو منها ))
مريم (( شهقة صدمه كبيره وايدها علي فمها )) .... هييييييييييييييييييييييييييييييييييييييييييي بجد تتكلمي ؟
سمر .... لو شغتي ملامح دكتور وكيف يتكلم معاي كنتي عرفتي ... ( وانهارات بالبكي اكتر )
مريم ... تعالي نبعدو اكتر ونحكو ... لان سلفتك مش مرتاحتلها اني
سمر ... اوك ...
مريم ... ( قربت منها ومسحتها دموعها وقالتلها ) ... امسحي دموعك ومعاش تبكي ... اكيد في حل لكل شي ... باهي شن الا خلاك مبكري تجاوبيهم هكي ؟
سمر ... مش عارفه ... مش عارفه ... حسيت الزمن يمشي ببطئ لما وقفت نتفرج عليهم ... وحسيت شفت الملامح لكل وحده منهم لو كنت قولتلها ... والاكتر حميدا ... ماتقبلتش نحرقله قلبه يامريم ... ماقدرتهاش والله ماقدرتها ( ودموع ينزلو ) انتي فاهمتيني . حاسه اني شن نحس ؟
وهنا مريم خدتها في حضنها وضمتها بالقوه وقالتلها ...
مريم .... معاش تبكي اكيد في حل ... لكل شي ...
سمر .... اني خايفه ... ومش عارفه كيف نتصرف مريم ساعديني ...
مريم .... مش عارفه شن نقولك بس اول حاجه لاززززززم ترجعي لحوشك وماتقعديش معاهم ... لانك لو قعدتي معاهم رح يركزو عليك ..
سمر ... باه والحل في مصيبه التانيه ؟
وفي اللحظه الا بتتكلم فيها مريم .. حست بحد عفس علي شكاره ... فاسكتت وتلفتو للجيهه الا جاي منها صوت ... وهنا قالت
امال .... خلعتكم ههههههههههه قولت خلي نديرلكم صوت الكلب هههههههههه ...
سمر ... انتي من بكري هنا ...
امال .... اني احمد ينادي عليا حسهم جو ... خلي نمشي ... ( ومشت وبعدين تلفتت وقالتلهم ) .. ونخليكم تلقو حل للمصيبه ( مع ابتسامه ) وكملت طريقها ومشت ...
مريم ... اني قتلك والله سلفتك هيا ماهي ساهله ...
سمر ...( بدت تلطم ) .... حي عليااااا حي علياااا اكيد سمعت كل شي ... اني غبيه ...
مريم ... لا لا .. نوعيه خبيته هيا نعرفها ... هيا سمعت جمله من الحديت وجت بخت سمها بيها باش تستدرجنا وتحسسنا انها عرفت ... بس لو سمعت لكان واحد من الاتنين اما جت وبخت سمها كله وقالتها او مشت وقالتلهم .... مهم توا خلينا نمشو ومانحسسوهمش بااي شي ... وتكلمي انتي وحميدا قوليله غيرت رأي نبي نرجع لشقتي ...
سمر .... ماشي ...باهي مريم نبي نتكلم معاك في شي ممكن ؟
مريم .... نعم ...خلينا نتكلمو واحنا نمشو
سمر ... اوك ... لكن تسمعيني للاخر ...
مريم ... اوك .
سمر ..... عقاب محتاجلك .... ولاول مره نقولهالك ... مريم اني حسيت بالكأبه في كل جدران شقته وحوشه ..
مريم .... سمر ... الا بيني وبين عقاب نكسر ومستحيل يرجع ...
سمر .... مريم ... عقاب يحبك وانتي تعرفي .... وانتي تحبيه وهوا يعرف .... ماتخليش اي دكريات من الماضي توقف بينكم ... والله انتم نكتبتم لبعض ومهما بعدتهم مش قادرين تعيشو من غير بعض وهالشي باين في عيونكم ...
مريم ..... اني خايفه .... خايفه نكتشف ان عقاب تمسكه بيا مش حب ... هوا حب امتلاك شي كان ليه بس ...
سمر ... اني نعرف خوي اكتر منك .... اعطيه فرصه ... واعطي لحبكم فرصه ... انتي شفتيه مبكري كيف يدافع عليك ... والله والله اكتر مره نتصل بيه ويبدا واضح صوته انه كان يبكي ويكابر ويقولي مافي شي ... واني نعرف انه ضايقه بيه جدران الحوش من غير وجودك فيها ...
مريم .... خايف نرجع ومانقدرش ننسي الا فات ... ولا رح نعطيه الا هوا يبيه ...
سمر .... جربي ... لان الحياه محتاجه نعطوها فرص ... انتم توا بعاد علي بعض مش شهر او اتنين ... انتم حاليا متفارقين اكتر من سنتين ... وحابه ننصحك نصيحه من قلبي بس ... راجل في الاول تبعدي ويقرب وبعدين تبعدي ويزيد يقرب ... بس بعد علي بعد رح يخليه يبعد ويمل ... واظني انتي عاقبتيه علي شي هوا ماليشي دنب فيه اكتر من سنتين ...
مريم .... سمر خوك لليوم الا اختي ماتت فيه كان يخون فيا ... وكان مع اختي ... وهلبااااا حاجات ..
سمر .... انتي سمعتيه ؟ اعطيه فرصه يتكلم ؟ اني مش حابه ننبش في ماضي ... بس فتحته موضوع اني وهوا ... وهدا هوا الا حرقه ... انك طلبتي طلاق واصريتي عليه بدون ماتتأكدي انه هل كان معاها او لا ...
مريم .... ورساله ؟
سمر .... رساله ماتعنيش انه كان معاها ... عقاب اختك قعدة تتصل بيه وكانت تبي تلاقيه ظروري وهدداته انه رح تديرله فضيحه وتلبسله تهمه لو ماجاهاش وتكلمو .... وكانت بتموت ومحروقه لما عرفت ان هوا حاب يكمل معاك ... وهوا بعد ماخاف ان يفقدك مشي ليها وبمجرد ان وصلها ... في شي خلاه ماينزلش ... وبالفعل ولع سيارته وطلع ... وهيا الباين اول ماشافاته قصت وراه وضربتها سياره ...
مريم ... وانتي شن أكدلك الكلام هوا ؟
سمر .... هوا حكالي .... وبعدين اني تلاقيت بصدفه مع صاحبة اختك سهيله وحتكلي كل شي ..
مريم.... بس اني ماحكتليش هكي سهيله ...
سمر ... اني مش عارفه بزبط علاش توا قررت تقول الحق ... بس اني لما شفتها حسيتها متغيره هلبااااا ضاعفه ولبست الحجاب وتنقبت ... ماعرفتهاش لدرجة انها لو ان هيا ماتعرفتش عليا ماكنتش عرفتها ...
مريم .... علاش ماقولتليش قبل توا هالكلام ...
سمر ... علاش اني لقيتك ... انتي فجأه فص ملح وداب ...
مريم .... انتي كيف تلاقيتي معاها ووين .
سمر .... حميدا كان عنده صديق قريب هلباااا ليه سمع ان خوه الكبير توفي ليه اسبوع .. ... فاطلب مني نمشي للعزي نعزي ... وبالصدفه طلع خالها الراجل المتوفي ... واول ماشافتني رحبت بيا وقعمزة جنبي وطلبت انا نتلاقو ... واعطتني رقمها ... عزمتها علي حوشي وتكلمنا ...
مريم .... علاش ماقولتيليش الا توا ؟
سمر .... لاني كل مانحاول نتكلم معاك في ماضي تصديني ونحسك انك مش طايقه حد ينبشلك في ماضي ....بينما توا .. اني حاسه انك في شي في عيونك حاب يصدق ويعرف ويعطي فرصه ... مش عارفه شن الا تغير بس انتي مهبوله عادي يخطرلك كل يوم شكل هههه.
مريم .... امبحي كلبه هههههههههه
سمر .... هههههههههههههههههههه
وبدو يضحكو وقامت عيونها لقت عقاب يشبحلها وهوا مبتسم وكأن فرحان انها قريبه منه وبجانبه ...
ووهيا لاارديا ردتله الابتسامه ونزلت عينها ودرات روحها مشغوله بتقليب نقالها ... وقالت لسمر ..
مريم .... عندك علم اني ماقريتش في الامتحان كويس ... انتي جرتك ملح ..
سمر .... هاااا انتي هدا علاش توزعيله في الابتسامات ههههههههه ...
مريم .... لا والله لا خززززي عليك ( وخدت طاسه ميه وبختها عليها )
سمر ..... والله الا مانردهالك ها ههههههههه ( وخدت المالقي وصباته عليها ) ...
عقاب وحميدا وامال ونهال والعزوزه ..... ههههههههههههههههههههههههههههههههههههه
نهال .... والله الا مهبله .... ههههههههههه
امال ..... مهبله ؟ اني وانتي الا مهبله ؟ هما يدرقو في المصيبه الا داسينها بينهم بس تعالي نقولك شن صار داخل ..
نهال ... شن في ؟
امال .... غير خشي نحكيلك شن صار .... ونتسبلو بالكاكاويه الا امك قالت نفضوها ...
نهال .... ماشي خشي توا نلحقك ...
وخشت امال ولحقتها نهال وقعدو طول الوقت وهما مع بعض ويهدزو .... لحد ماتمت العاله وضمو الحوسه وحتي العويله خش كل واحد منهم لدار باش يرقدو ....
العزوزه ( ام حميدا ) .... هاك مدي مالقي الميه لرجاله وتعالي طفي علينا الضي وصكري باب الدار... سمر بنتي زعمك مايطلعناش عقرب من استراحتكم ؟
سمر .... لا لا يااللاي بعون الله مافي شي .. ( وبعدين تلفتت لي مريم الا لقتها نايضه وقالتلها ) ... وين نايضه يادعوه انتي ؟ ساعه 12 في الليل ...
مريم .... بنوض نحاول نقرا في جنان خلي تضربني نسمه مصقعه باش نصحصح ... لان شكله حتي يوم غدو بيمشي زي اليوم ...
سمر ... اوك اطلعي حتي اني بنطلع نخش الحمام ..
مريم .... اوك ...
وطلعت مريم لجنان وقعمزة علي كرسي وحطت شيتاتها ولاب توبها علي الطاوله وطاوله ... وهنا لحقتها سمر وقالتلها ...
سمر .... الله جو رومانسي ...
مريم .... بري اقلبي وجهك وخليني نقرا ... ياسر منقعتيلي حوايجي بالميه ... شن مازال تبي تاني .. كرهتك ههههههه
سمر ..... مريم .... اني مش متحمله نرجع لشقتي ونبعد عليك ... اني لما نكون في حوش عزوزتي اقلها اني بجنبك .. انتي ماتتصوريش اني قداش محتاجاتك جنبي وتدعمي فيا وتفكري وتحسي بيا ..
مريم .... حتي اني والله حبيبتي مانبي نبعد عليك لانك اختي وصديقتي وكل شي ..
سمر ... اني بس ههههههه ؟
مريم .... ( بوجه مرتبك ) اي انتي بس هههههههه
سمر ....كدابه وفي نص عينك اني شفتك مبكري لما خشيتي لدار ولقيتي سورية عقاب كيف قعدتي تشمشمي فيها زي قطوس هههههههههه
مريم .... انتي بجد ندله كيف تتجرأئ .... نكرهك اني تعرفي ..
سمر .... اوك تصبحي علي خير ... وخشت لدار ورقدت ...
وهنا مريم فتحت شيتاتها وشغلت الاغاني بصوت واطييي ووبدت تقلب في الورق وحست انها مش فاهمه اي شي ... وهنا حطت ايديها علي راسها وهيا تفكر كيف بتطلع روحها من الا هيا فيه ... ووهيا في زحمة تفكيرها سمعت باب الحوش الا يفتح علي جنان نفتح ..
فالمت روحها ودارت نفسها تقرا ... لحد ماحست بي شخص طلع ويتكلم بتلفون والباين ان تلفون الا جايه مهم لدرجه ماتلفتش ليها وكمل طريقه بااتجاه المزرعه ... وهناقعدة تشبحله كيف يتكلم بتلفون من بعيد وهوا منفعل وصوته واطي ...
وحست ان الا تكلم فيه مرأه مش راجل وقعدو يتكلمو مع بعض اكتر من نص ساعه ... وبعدها سكر ورجع .... وهنا اول ووصل لاقرب نقطه يكونو فيها شبه قراب من بعض ...قعدة متردده تسكت او تتكلم معاه ... ولكن في اللحظه الا كان هوا فيها باين عليه متعصب ... شبحت للارض وقالتله ...
مريم .... في شي ؟
وهنا اكتفي بالصمت وبعدين قرب منها وهوا يشبحلها بدون مايرد عليها ... وبعدين قاللها
عقاب .... يهمك امري ؟
مريم ..... ممكن نحتفظ بالاجابه لنفسي ...
عقاب .... الا يريحك ... محتاجه شي ؟ نستأدن ...
مريم ... ( سكتت شوي وبعدين قالتله ) .... اي محتاجه نتكلم معاك شوي ممكن ؟
عقاب .... ( قعد يشبحلها شوي وبعد جبد الكرسي وقعمز وقاللها ) .... نعم ..
مريم .... اني كنت حابه نقولك اني ... اني ... قصدي ... ( وهنا لسانها خانها علي التعبير علي الا في قلبها وقالتله ) .... معلومات
وهنا عقاب عقد حواجبه وقعد يشبحلها متع هادي شن تقول وقاللها ...
عقاب .... اه قصدك بخصوص شيت في حاجات مش فاهمتيها ....
مريم .... ايه بالفعل ...
عقاب .... اوك ... لحظه بس نجيب شنطتي من سياره ونجي ...
مريم ..... اوك ...
وهنا مريم قعدة تشبحله وتحاول تفسر شخصيته معقده .. احيانا يكون الانسان متهور الرومانسي واحيانا يكون الانسان العصبي المتحدي واحيانا البارد ولامبالي .... وكل مره يلعب معاها شخصيه ... هل هوا متعمد يلعب معاها هالادوار بتاوب .. او هوا هكي ... انسان ببساطه مزاجي حتي في اختياره لشخصيتها ... وماقطعش علي تفكيرها الا صوته الا كان يخترق مسامعها من اول كلمه مريم ...
عقاب .... مريم ... وين سارحه ...
مريم ... لا لا شي ... اني مش رح نعطل عليك ... الورقه هادي بس وتقدر تمشي بعدها ...
عقاب .... نعتبرها لزه هادي ؟ ماتخافيش مش رح نسيبك الا مانتأكد انك خلاص تقدري تكملي صح من بعدي ..
مريم .... شن تقصد ؟
عقاب .... نقصد هيا ركزي معاي .... واطفي الاغاني باش تقدري تركزي ..
وفي اللحظه هيا قعدة مكتفيه بصمت وتشوفله وتحاول تفهم الكلام الا من بين سطور ... وهوا يبادلها نفس نظرات بصمت ... وماقطعش صمتهم .. الا الاغنيه الا كانت سبب في استمرار نظرات بينهم تعبر علي كلمات اعمق من البوح بيها ... والا كانت سبب ان يقوللها ...
عقاب ....( بصوت حنين وعيون مليئه بالحزن والكبرياء ونزل عيونه وقاللها ) ... كل الاسئله الا تدور في بالك رح تلقي اجابتها في الاغنيه هيا ... نستأدن منك شوي ...
وناض وسيبلها المكان ومشي للحوازه وخلاها تسمع في الاغنيه وعيونها تعبو دموع ...
