💖💖هادي الروح ... لك تشتاق 💖💖
الجزء التاني 💞💞
الحلقه التالته عشر 💖💖...
ملاحظه .. ((سامحوني من بكري نحاول نزل فيها بس نت ضعيف وهدا وين نزلت ..... مشاهده ممتعه للكل ))
وبعد اكتر من 10 دقايق وهوا بدو ن تعليق والا علي خط تتكلم ... قال كلمه بس وسكر تلفون ...
عقاب ..... اني موافق ...
وسكر تلفون وحطه علي الفودرا وكمل طريقه للجامعه .... وهوا في طريق كان فاتح الراديو ... وبالصدفه جت اغنيه لتامر عاشور... لفتتله نظره لانها حست انها علي جرحه بالزبط فاقوي الاغنيه وزاد سرعه لما شاف انه وقت عليه ....
(( كرهيني فيكي حاولي بأي شكل
متسيبيش على حبي ليكي ف يوم علامة
ساعديني يمكن وانتي ماشية على الأقل
يجيني قلب اقولك ساعتها بالسلامة!
سيبيلي أسباب يمكن اتمنى الفراق
خليني اشوفك واحدة من غير انتماء
لو بعدتي قبل قلبي ما يكرهك
مش هبطل ليكي في البعد اشتياق
علميني أنسى وانكر أي وعد
زي مانتي نسيتي وبنفس الطريقة
أقلُّه أضمن روحي بس ان شفنا بعض
بالصدفة متأثرش يومها ولو دقيقة
سيبيلي أسباب يمكن اتمنى الفراق
خليني اشوفك واحدة من غير انتماء
لو بعدتي قبل قلبي ما يكرهك
مش هبطل ليكي في البعد اشتياق ))
وهوا يسمع للاغنيه مالقاش روحه الا وهوا يفكر فيها .... في الطريقه الا جرحاته بيها ... في غبائه طول هالفتره ... في تنازلاته وكبريائه الا قدرة بنت تخليه يتنازال عليهم ... بس الا تعلمه من تجربته ... انا هالقلب تسكر بالمفتاح .. والمفتاح تلوح في اعماق المحيطات ...
وماقطعش حبل افكاره الا اغنيه رومانسيه جت بعدها فاسكر الراديو طول ... وحاول يفكر في اي شي تاني غيرها ... اقلها لو ماعرفش ينساها فا يتعلم انه يعيش من غيرها ويحاول يمسح اي داكره ليها ... ومع الوقت اكيد رح يلقي البنت الا تقدر تنسيه فيها ....
وبين كل هالافكار وبين فكره وفكره ... مالقاش روحه الا وهوا في البريكدجو وطفي سيارته ونزل ... واول مانزل وفي اللحظه الا نزل فيها تحديدا ...
كانت مريم تتناقش مع امها بمنتهي العصبيه ...
مريم .... ( بعصبيه ) ... خليني يااامي اني مخنوقه خليني نبي نمشي للجامعه وماتمنعنيش ..
امها .... يابنتي انتي مريضه وامس راقده بالمسكنات ... انتي مش مخنوقه ... انتي ماشيه باش تشوفيه ... بس الا تديري فيه غلللللللط ... خلاص طالما انتي قررتي تنسيه بعدي عليه وخليله فرصه ينساك ... حرام عليك الا تديري فيه في ولد ناس الا مش دنبه شي الا انه حبه ...
مريم .... مش رح نعطل ياماما ... خليني نمشي بس نشوفه من بعيد ... اني ليا شهر حاولت والله حاولت بس والله ماقدرة ... اني نبي نشوفه من بعيد بس بس ياماما خليني ... نبي نطمن عليه انه بخير ...
امها .... وانتي شن الا عرفك اصلا انه مشي ...
مريم .... صاحبتي اتصلت بيا قالتلي انها شافاته في البركيدجو يدرس ...
ومشت مريم وامها تجري وتحاول تمنع فيها تطلع لسوء حالتها ....
واول مامشت ركبت سيارتها بسرعه وطلعت وهيا تمسح في دموعها والابتسامه تعلو شفايفها وكأنها بعد شوفتها ليه رح تنسي كل شي ...
ومن شدة اشتياقها ليه الا خلاها تتصرف بقمة الانانيه وكأنها ماكانتش سبب جرحه ... علت السرعه ومالقتش نفسها الا وهيا قريبه من الجامعه ... واول ماوصلت للبريكدو شافت سيارته من بعيد ... فادرست جنبها ... ونزلت وقربت من سياره وقعدة حاطه ايدها علي المانيليا باب سوق الخاريجيه .. لعلها تحس بلمساته عليها .... وفي اللحظه الا قعدة تشوف لمانيلة راسها وهيا تبكي وتمسح في دموعها ... قامت عيناها باش تمشي ... لقت عقاب واقف يشبحلها .... واول ماجت عينهم في عين بعض ... قعد يشبحلها بنظرات قاسيه لتواني وبعدين تجاهل وجودها وفتح الباب وخدي منه الشيتات من تالي الا كان ناسيه وولي خداهم ومشي بدون مايتلفت وراه ...
وفي اللحظه هيا ومن كتر ماقلبها يدق ومن الخوف مالقتش روحها الا وهيا راكبه في سياره ومقعمزه علي الكرسي ومن صدمه مقعمزه بدون اي ردة فعل الا انها حاطه ايدها علي قلبها وتسمع في قلبها الا زادت نبضاته كل ماتدكرت نظراته الحاده ليها ... وكانها حشره شي قدر شافه وحاول يبعد عليه طول ويتجاهله .... ومالقتش روحها الا ودموع ينزلو منها وبتولع سيارتها وبتمشي ... لولا حد طق علي روشن ... فامسحت دموعها بسرعه وتلفتت باش تشوف من ..
رامي .... معقوله جيتي وبتمشي ومانشوفكش ؟
مريم .... لا لا بنمشي يارامي ... خديت حاجه بس وبنمشي ...
رامي .... عليا الطلاق لما تنزلي ( بوجه عصبي ) ..
مريم ..... ( بوجه مصدوم ) .... هوا انت تزوجت باش تطلق ؟
رامي ... لا لا هههههههههههه تي هيا انزلي عازمك علي فطور اليوم علي حسابي ...
مريم .... مش رح نقدر نطول ... اني تعبانه بجد رامي .
رامي .... ماشي ماشي انزلي ونتكلمو في الكافتيريا ...
ونزلت مريم وهيا رجل تقدم فيها ورجل توخر فيها لانها مش ناويه تزيد الطن بله ... وخاصة بعد ماشافت نظراته الا تقوللها ... بعدي علي حياتي ... وبجد معاش نبيك فيها ....
ومشت هيا وياه وهوا يحاول يتكلم ويضحك معاها وهيا تساير فيه وعقلها مش معاها وفي مكان تاني .... وماحطتش انتباه لأي حديت هوا يحكيه الا لما فتح سيرت الشخص الا جرحاته بمنتهي القسوه ...
رامي .... شفتي الحقير هوا خشمي كيف دشدشه ؟ قدمت فيه شكوي عند عميد الكليه وقالولي رح يكتفو بالاندار ليه بالفصل لو كررها ... شفتي ؟ شكله الحقير واسطه ... بس اني علي العناد نموت ... شني يعني كان طليقك معناها يفتل اي راجل يشوفه معاك ...
مريم ..... خلاص بعد اليوم مش رح يضايقك ...
رامي .... كانا راجل يقرب مني اساسا ... مهم فوتينا منه وقوليلي ... شن تبي تفطري ؟ وامتي بترجعي ؟ طبعا السمستر هدا انتي ساقطه اكيييييد بس الشي المطمن ان في حد رح يسايرك بعون الله علي اجاباته الزفته ..
مريم .... ههههههههههه ... علاش ماقريتش ؟
رامي .... هما صحابي يخلو حد يقرا ؟ اني ماصدقت لايمت عليك باش نقرا وانتي طفشتي ومعاش شفتك ...
وفي اللحظه الا مريم بترد فيها عليه .... شافت عقاب خش للكافتيريا باش ياخد قهوه وهوا لابس نظرات .... واول ماخش نحي نظراته وماحاولش حتي يقيم عينه عليهم ....
رامي .... اني ميت بالجوع بناخد بريوش وقهوه وانتي ناخدلك كريب وكاكاو تمام ؟
مريم .... الا يريحك ...
وخدت شيتات متعه بعد ما مشي وحاولت تدس راسها فيهم وماتحاولش حتي تقيم راسها .... بس الا تفاجأت بيه ... ان طاوله الا قدامها بالزبط كان مقعمز دكتور وعاطيها بظهره ... واول ماشاف عقاب كرش فيه باش يشرب القهوه معاه ... فا قعد يشوف لساعه شوي عقاب وبعدين قعمز معاه .... وهنا قعمز معاه وقعدو يحكو وهيا وهوا قدام وجوه بعض بالزبط .... وفي اللحظه الا بتقيم راسها من وسط شيتات رامي باش تشوفه بنظره خاطفه ... جي رامي وفي ايده الاكل ...
رامي .... شرفتي سور بيتك ياشابه هههههههههه
مريم .... هههههههههههه ووالله انت بجد فايق ورايق ... قداش ليا علي فطور الكليه ...
رامي ..... شفتي من ورانا .... مرض وهوا ديما زي ظلي ساحق وماحق ورصاص متلاحق ههههههه شن رايك فيها حفضتها امس من امي بعد ماكانت تقولي فيها لما خشيت بكندرتي ....
مريم ... هههههههههههه بجد انت مش طبيعي ... وناشت باايدها شيتات طاحو لوطه ...
فاناضت بسرعه تلم فيهم ونزل رامي بسرعه يلم فيهم معاها وهوا يضحك ...
رامي .... لا والله هلبا علي الجمعيه نعزمك علي الفطور وتنطريهم علي طول ايدك ...
مريم ... بجد اسفه وقامت راسها بعد مالمتهم باش تحطهم وهوا بجانبها يلم في الباقي ... واول ماقامت راسها لقت عقاب اختفي من المكان ...
فاقلبه قبضه وتضايقت وحست فجأه انها اكيد اكيد استفزاته لهدا ناض وسيبلها المكان ... فاحاولت تشرب الكاكاو سخون متعها بسرعه وبعدين قالتله ...
مريم ....سامحني والله اني تعبانه ومش رح نقدره هوا ...
رامي ... بتروحي ؟
مريم .... اسفه والله مضطره ... اني اصلا ماكنتش جايه وبنقعد ...
رامي .... اوك خلينا علي تواصل مره مره ولو بالفيس ...
مريم .... ان شالله ..
رامي .... ان شالله نشوفك سيمستر الجاي مش زي هدا تختفي ...
مريم .... ان شالله ... سلام ( مع ابتسامة مجامله وطلعت بسرعه )
واول ماطلعت مشت للبريكدجو طول وكانت متوقعه انها مش رح تلقي سيارته ... ولكن سيارته كانت مدرسه ... وكان هوا بجانبها واقف ومعاه بنت عاطيه بالقفي .... فا قعدة واقفه شوي تشوف وبعدين كملت طريقها وركبت لسيارتها ... وهيا كيف ببتلفت تالي باش تطلع السياره ... شافت البنت الا كانت واقفه بجانب سيارته هوا وياها .. وكانت نهال ... وهنا صدمه كانت بالنسبه ليها .... بس وخرت سيارتها ودارتها رابعه غبرت فيها عليهم ومشت ....
نهال .... من الغبي الا خلانا كلنا تراب اه اه اه .... مهم اول شي اني اسفه اني طول شهر كنت نبعتلك في رسائل كل يوم علي نفس الموضوع ... بس انت لا بيت ترد علي اتصالاتي ولا حتي ترد علي رسائلي ولهدا اني ماوقفتش لاني محتاجه بجد اني نقنعك وماتوقعتش انك بتقعد شهر ماتردش علي اي محاوله ليا ...
عقاب ... باهي توا شن المطلوب ؟
نهال ..... بكرا تجي تخطبني لان مرة عمي اليوم بتحدد موعد باش يجو يتقدمولي رسمي ....
عقاب .... ... اني توا عندي محاضره وكنت جاي بنحط شي وبنمشي يعني مشغول ... نتكلمو في وقت تاني ...
نهال ... خلاص اني اليوم رح نروح ونقول لاهلي ونفتح معاهم موضوع ... وحميدا اليوم رح نقوله هوا واهلي واكيد رح يكلمك العشيه لانه مش رح يصدقني .... بس لازم ماتجي بكرا وتخطبني ونلبسو دبل بعد اسبوع باش معاش حد يقدر يغصب عليا ... وصدقني هما 3 شهور بس بس وكل واحد فينا يمشي لحاله بس اهم شي انت مش تقول الكلام هوا لحميدا ؟
وهنا عقاب لما لقاها ترغي هلبا قاللها ...
عقاب ... اني مشغول نستأدن ..
ومشي وخلاها واقفه تشبحله كيف قطع عليها حديتها ومشي بدون اي نوع من الاحترام ...
وفي اللحظه الا كانو نهو فيها حديتهم اجباري من عقاب .... كانت مريم تحاول تنهي الحديت اجباري مع امها وبوها .... ولكن المره هادي كان صوت بوها اعلي منها ...
مريم .... اني مسرع وصلت .... باش تستلموني ... انتم تشوفو في نفسيتي حاليا وقت ناقش حاد زي هوا ؟ ياريت تحترمو قراري ولو مره بس ...
بوها ..... اسمعي يابنت اني نسمع فيك من بكري وساكت وومن اول يوم عرفت فيه مرضك واني نحاول نساير فيك زي العيل ... بس اني نتفرج عليك اكتر من شهر وانتي تضيعي مني هدا الا ماينسكتش عليه .... بكرا العشيه حجزتلك موعد عند دكتور وعليا طلاق لو ماتمشي بكرا لاخصائي الاورام الا مانقلب الحوش هوا قلب تسمعي فيا ؟
وهنا مريم خشت تجري لدارها وهيا تبكي .... بينما امها وقفت وشبحتله وقالتله ...
الام .... معقوله بعد العمر هوا هنت عليك تحلف بطلاق ولاول مره ؟ ...
الاب .... سامحيني .. لاني لو ماحلفتش بطلاق وحلفت حلف عادي رح نلقوها طالعه ومسيبه الحوش بدرقه علينا بس لما تعرف اني حلفت بطلاق ... مستحيل ترضي انك تتطلقي علي خاطرها ... بنتي واني ادري بيها بس متأسف جدااااا وياريت ياريت تخشي وتعقليه وتوعيها ان الا تدير فيه مش لصالحها .... بنتك متأتره بالمسلسلات ووحاليا ماتعرفش هيا شن تقول او حتي كيف تتصرف ... اني طالع توا ... سلام ...
وهنا طلع الاب وخشت الام لمريم وقعدة تتكلم معاها اكتر من ساعتين ... وواضح ان كان في نقاش عقيم في الغرفه ... ولكن انتهي الحديت بدموع الام وطلوعها من الغرفه ....
اما مريم .... فا خدت 3 حبوب مسكنات فيهم نسبة منوم و خشت في عالم افكارها لحد ماخداها نوم ورقدت .... ومافاقتش الا علي صوت أدان العشي .... وهنا فاقت وقعدة تشوف لساعة موبليلها ... وبعدين خدت تلفون وفتحت الفايبر ... فالقت الشفره الا كانت عنده ايام زواجهم فاتح عليها الفايبر وحاليا اون لاين .... فاقعدة تشوف شوي للمحادته وبعدين في شي خلاها تحط صوابعها علي البطم وتكتبله ...
مريم .... اني اسفه بجد ماكنتش قاصده نجرحك ...
بس هوا اكتفي بفتح الرساله وعدم تعليق ...
مريم .... ان شالله تلقي بنت خير مني تسعدك وتريحك ...
بس هوا كدلك اكتفي بشبح الرساله وبعدها سكر الفايبر علي طول ....
واول ماسكر الفايبر .... وحط تلفونه .... جاه اتصال علي طول ... فاخدي تلفون وشاف رقم ...الا لقاه حميدا .... فاقام سمعه وقاله ...
عقاب .... ايوا ...
حميدا .... اهلين عقاب ... شن اخبارك ... معقوله نتصل بيك شهر كامل من لما روحت لا انت ترد ... واختك نفس الشي ...
عقاب .... موضوعي اني افصله علي اختي ... اني ماكنتش حاب نرد علي حد ..
حميدا .... عقاب اني جيت لحوشكم ومابتش تفتحلي ونتصل بيها نبيها تسمعني بس ... اني والله ماكنت نبي نطلقها ... اني كنت نتكلم اني وامي وكنت نتناقشو وهيا الا طلبت مني نطلقها بعد ماعرفت من جارتهم ..
عقاب .... وكيف عرفت من جارتهم الا صار ياحميدا ... قول كلام يخش العقل ...
حميدا ... الباين اليوم الا كانت فيه سمر في عياده كانت بنت جيرانا معاهم تابع عند نفس الدكتور ... وخشت بعدها وشورا قصقصت الدكتور او سألته اني مانعرفش كيف صار هكي بس والله هدا الا صار هيا قالت لامي وامي كلمتني وكنا نتناقشو ... وبعدها بيومين او تلاته لقيتها باعتتلي رساله حكتلي فيها الا سمعاتها وانها عادي مستعده تطلق ومعاش تبي تشوف وجهي وسكرت تلفونها ... وحاليا حتي نتصل بيها او نبعتها في رياله ماتبيش تصدق ... عقاب انت هديكا الليله اتكلمت معاي ... لو كنت ناوي علي طلاق كنت عرفت ... اني ممكن نعاقبها صح معاش نكلمها صح بس انطلقها مستحيل ...
عقاب .... اني مش عارف شن نقولك ... بس اني رح نحاول معاها ولكن الحل الاخير زالقرار الاخير باايدكم انتم اني مانقدر ندير شي ..
حميدا ... مامي ماشي .... مهم اني اختي قالتلي كلام صدمني ... قالتلي عقاب بيجي بكرا وبيتقدملي ... اني مش فاهم شي ... قصدي كيف بين يوم وليله تجي وتخطب اختي هكي وعلاش ومريم ؟
عقاب .... مريم مشت في حالها واني مشيت في حالي ... واني نبي نكمل نصي تاني ومش رح نلقي خير من اختك اكيد ...
حميدا ... عقاب انت بجد تدوي ؟ قصدي انتم تتكلمو او في بينكم شي ؟
عقاب .... لا بس هل يخليك ترفض هالشي متلا ؟
حميدا .... لا اكيد اني ليا شرف بس اهم شي انت تكون متاكد من قرارك بس وماتكونش اخديت قرارك بناء علي قرارت اخري ... وبعدين مش تكون استعجلت شوي ... يعني اعطيتني فرصه اقلها لين نقدر نحل مشاكلي مع سمر قبل ...
عقاب .... مشاكلك انت واختي طلعوني منها ... انتم ازواج وتحلو مشاكلكم مع بعض ... اني بكرا بنجي نقعمز معاك ومع وخوك شوي وتم ...
حميدا .... ان شالله خير ... خلاص تفضل الحوش حوشك في اي وقت ... خلاص نخليك توا ... في امان الله ... سلام .
وهنا سكر عقاب التلفون وداره علي وضع طيران وطفي الضي ورقد .. وماناضش تاني يوم الا علي صوت المنبه يرن ... واول مافاق ... قعمز علي سرير ومرر ايديه علي شعره بعصبيه وبعدين فتح تلفونه وشده في ايده شوي علي امل توصله اي رساله ... وبعدين لوحه علي طول ايده في سرير وناض ... خش للحمام ولبس حوايجه ووسخن سيارته وخدي شنطة لاب توبه وخدي اوراقه وسكر الحوش ونزل ... واول مانزل لقي سمر في جنان فاقاللها .....
عقاب ... صباح الخير ...
سمر ... صباح الورد ... شني ماشي للجامعه ؟
عقاب ... اكيد ... عندي محاضره .. بنقولك ... امس كلمني حميدا وقالي ...
وهنا قطعت عليه سمر وقالتله ...
سمر .... ماتفتحليش موضوعه ... حميدا انتهي بالنسبه ليا خلاص ... لااني مازال نصلحله ولا هوا ...
عقاب ... اني مش رح نتدخل في قراراتك ... الا يريحك ديريه .. بس نقولك فكري كويس بس ..
سمر .... هههههههه وانت فكرت كويس قبل ماتفكر اليوم تمشي تخطب نهال ؟
عقاب .... ماتقارنيش نفسك بيا ... اني غيرك ياسمر ..
سمر .... لا انت زيني ...واحرف ... انت تحسابني مانعرفش انك وافقت تخطب نهال بس باش تكسر قلب مريم زي ماكسرتلك قلبك .. وتبي تقنعها انك قادر تبدلها وتعيش من غيرها ؟ .... بس انت هكي مادمرش في مريم ... انت تدمر في نفسك بس صدقني لان نهال مش سهله ... وصدقني رح تشوف ...
عقاب ... يعني نفهم انك مش جايه اليوم ؟
سمر .... مستحيل نوافق علي شي زي هوا ... ولو امي كانت عايشه ماكنتش خليتها رح توافق انك تتزوجها ...
عقاب .... ولا كانت رح توافق علي زواجك من حميدا ... لدلك حياتي خط احمر ماتفكريش تخشي فيه .
ووخر الكرسي وناض وسيبها ... وطلع ... وفي اللحظه هيا مالقتش نفسها الا وهيا تقيم في تلفون وتتصل بي مريم ...
مريم ... صباح الخير ... خيرا صوتك هكي ؟
سمر ... في اللحظه هيا كانت بتقوللها لكن ماكانتش حابه تضايقها اكتر وبدات في حالة مرضها هدا الا اهم شي فيه الحاله نفسيه واكتفت باانها تقوللها .... لا لا متضايقه شوي ... تعرفي انتي مشاكلنا اني وحميدا ماانتهتش ... اني مصره علي طلاق وهوا رافض ..
مريم .... ننصحك نصيحه من قلبي ... لما مرضت توا عرفت قيمة عقاب بجانبي كل ليله ... ولو ماكانش المرض فرقنا ... ماكنتش نفكر نبعد عليه تاني ... وبجد اني نادمه علي اي مشكله صارت بينا وكبرت لدرجة الانفصال ... فالدلك حبيبتي ماتكبريش الفجوه الا بينكم اكتر وتصري علي موقفك وتدكري الحاجات الحلوه منه قبل ماتفكري تبعدي عليه ...
سمر .... ان شالله خير يامريم ... اني لو قررت نبعد عليه مش من الا صار صدقيني ... بس اني حاولت نجيبله عيل الا هوا نفسه فيه وماقدرتش وهوا مش قادر يعيش من غير مانشوف هالشي كل يوم في عيونه ... لدرجة انتي تعبت وهوا متاكده تعب وخاطره يولي اب ... فا بالك الا اني ماقدرتش نعطيهوله لما نطلق منه يتزوج وحده قادره تعطيهوله من اول سنه وتعوضه ... وصدقيني اول مايشوف البيبي في ايده رح ينساني اكيد ...
مريم .... ومرات العيل تقدري انتي تجيبه ...
سمر .... (مع تنهيده ) .... اني عندي مشاكل يامريم وانتي تعرفي ... ومن واني بنت نعالج وعندي تشوه اساسا في الرحم ... وبعد توا قريب 3 سنين محاولات فاشله تقدري تقولي يأست ... والحمد لله علي كل شي ... مهم انتي شن حالك اليوم ...
مريم ....اني في طريق مع اهلي... ماشيه لدكتور اورام عندي موعد معاه ...
سمر .... والله فرحتيني بجد ... كيف اقتنعتي ...
مريم ... ااااااه اهلي ... توا نحكيلك لما نروح ...
سمر .... خلاص معناها نخليك وبعد ماتطلعي من الدكتور كلميني .. اوووك ... سلام
مريم ... اوك حبيبيتي سلام ...
وسكرت مريم تلفون وتلفتت لروشن تتأمل في الحايش والطرق ... وبعد نص ساعه صمت في سياره وكل منهم مترقب دخولها لدكتور وشن بيقول ... وصلو للمصحه ... واول مامشو للاستعلامات قالتلهم انهم اول حاله تجي وان دكتور يستني فيهم ... فاخشو لدكتور طول ...
اخصائي الاورام عماد .... اهلللللللللن ناصر عاش من شافك ياخوي ...
ناصر ... اهلين يادكتور عماد والله الايام تشغل ناس علي حبابها ...
اخصائي ... معقوله ولامس بس نشوف رقمك علي تلفوني وتتصل ..
ناصر ... وتعبت باش لقيت رقمك والله ... ولكن ... اني شرحتلك امس مشكلتي وهادي بنتي ... ياريت تقولنا شن الخطوه الاوله ..
اخصائي ... اولا زي ماقتلك يا ناصر ... الدكتور الا انتم مشيتوله مع احترامي ليكم فاااااشل ... معقوله يبلغكم بوجود سرطان من مجرد اعراض وشوية صور بس اصلا اكبر غلط ..المفروض انه مايبيلغكم بشي ويحولكم ليا علي طول حتي لو اشتبه في شي ..
ناصر .... باهي توا ممكن نعرف كيف نتاكدو ؟
اخصائ ... بنديرلها اولا فحص خاريجي ... وبعدها بنديرلها صوره بااستعمال الموجات صوتيه باش نقدرو نحصلو صوره واضحه للرحم اكتر.. واخر شي بناخدلها خزعه من نسيج ونديروله تحليل باش ناخدو الكلام الاخير ... واحتياطا بنطلب منها تحليلات اخري ..
ناصر .... وهل نقدرو نديروه اليوم الشي هوا كله ؟
دكتور .... بعون الله وحتي الخزعه الا بناخدوها منها مش محتاج لا بنج ولااي شي ... معناها الموضوع بسيط .. ومش رح نقوللكم اليوم اي شي الا بعد اسبوع بعد ماتطلع نتيجه بعون الله ... وتوا ان شالله تكوني جاهزه يااخت مريم باش الممرضه تاخدك معاها ..
مريم .... ( بعد تنهيده قويه) ... بعون الله
وهنا طلعو بوها وامها في الانتظار خارج والممرضه خدت مريم ورفعتها معاها للغرفه الخاصه بالكشف .... وبعد ساعه وراء ساعه ... دارت مريم كل الا طلبه منها الاخصائي .... وبعد ماكملت كل شي ... اعطاهم الاخصائي موعد بعد اسلوع وروحو .... وكان كل واحد فيهم مكتفي بالصمت في سياره لانهم عارفين ان لحظات الامل والفشل بدت واخدت متل الساعه الرمليه في تنازال ... اما اكدلهم الاخصائي كلام الطبيب العام او انتشلهم من اكبر كابوس فاقو عليه ..... وطبعا في ظل زوبعت افكار كل واحد منهم ... قطع تفكير مريم صوت امها تقول ...
امها .... اااااااي معقول توا ساعه 6 العشيه ؟ مسرع الوقت يجري .... حتي صلاه فاتتني ...
ناصر .... اهو وصلنا خلاص وصلي ...
وخشو لزنقه .... واول ماخشو لزنقه ومريم قامت رأسها لقت سيارة عقاب مدرسه فم حوش حميدا ومافيهاش حد او بجانب الكنشيلو متعهم حد .... فاقعدة تشوف لسياره وسارحه ... وشي في قلبها يعصر فيها بدون ماتعرف سبب ... لحد ماسمعت صوت ........
يتبع
Kinda
