💜💜💜 صباح الورد .... هادي الحلقه الاضافيه واسفه علي تاخير 💜💜💜💜
هادي الروح .... لك تشتاق
الحلقه الرابعه .....
وطلعت مريم ومشت لصالة ضيوف واول ماوصلت قالت ...
مريم .. احم احم ...
فاطمه ... مريم ... خشي خشي بنتي ... ( وشبحت لناس لقتهم متشوقين والابتسامه العريضه شاقه فمهم )
وهنا خدت مريم شهيق وزفير وبعدين فتحت الباب وخشت ....
وفي اللحظه هيا انصمت وبرد الجو فجاه وكأن نزل التلج ... والبنت نزلت عيونها طول والام الابتسامه بدت تتلاشي من علي وجهها تدريجيا اما امها فا فمها تحول علي جنب شوي لما شافت بنتها لابسه قونتها وشعرها المنكوش وقالت ...
فاطمه .. هادي العروسه .. سلمي يامريم ...
مريم ... اهلين خالتي ... اهلين شن اخبارك .
فاطمه .... هادي بنيتنا ... وانتم والله الا قولتوه بعد علي وليدكم يشرف اي عيله تناسبكم ... لدلك هل تبو مقابله شرعيه بينهم ؟
سمر ( اخت عقاب ) ... رح نسألوه ونردو عليكم .
حليمه .... والله شن بنقولك هوا قالي اني شفتها وقالي لو وافقتو عليه مبدئيا حاب يدير توا يقعمز مع زوجك باش يتفاهمو علي كل شي
فاطمه ... متبوش تديرو فصانيه ؟
حليمه .... لا غير زوجك يقعمز مع وليدي وكان قالك بعدها زوجك نتوكلو نعطيك رقمي ونحدوو يوم للفضانيه ... بس عندي شي واحد بس وفكرو فيه ... اني ولدي يخدم في بحر وبعد شهر بيرجع بيقعد شهر ... فا نبو الفضانيه والعرس في اقرب وقت ممكن ....
فاطمه .... والله شن بنقولك .... هوا توا غير يقعمز مع بوها وبعدين نشواره وحاضر نرد عليكم ...( وفنصت في بنتها باش نطلع )
حليمه ... باهي خلاص مالا هوا توا مقعمز نقوله يخش باش يقعمز مع بوها ؟
فاطمه ... اي حاضر شوي بس نخش نكلم ناصر .. نستادن منكم ...
واول ماطلعت لقت بنتها واقفه وفمها مفتوح ومستبله ومش مصدقه كل الا صار وهنا قالتلها ...
فاطمه .... حسابك انتي واختك بعدين ...
مريم .... يما حتي اني بنخش مع بوي ... نبي نتاكد انه شافني ..
امها .... تعالي تعالي هنا .... تي قسما بالله لو ماتخشي لدارك الا مانرتكب فيك جريمه ... اني ماصدقت لصقتك في راجل وانتي تطفشي فيه ... باش حتي كان شافك بالغلط من بعيد حلوه ولا حتي اشتبه فيك .. يطفش توا بي شكل غوريلا الا طالعه بيه هوا ..
مريم .... وين شافني وووووين اني مانطلعش ... في شي غلط
امها ...( بدت تندب في خدودها )..... وووووه عليا وووه سكري فممممك وين طلعتي ... علي اساس ماطلعتيش معاي لعيادة الاسنان لمره الا فاتت ... مرات شافك متنيله في عياده ضمممممي فمك وخشي داخل ...
خشت مريم ومش فاهمه شي ... من جيهه فرحانه ومن جيهه قلبها مغموم من ملامح اهله اول ماخشت ... والا هما نفسهم مش فاهمين شي ...
حليمه .... ضمي فمك ولا حرف .... خوك لاخر لحظه مبكري اتصل بيا وقالي اني شايفها وتمي معاهم ...
سمر .... بس يما في شي غلط قصدى مستحيل عقاب يختار اختيار زي هوا ...
حليمه .... اه قصدك تبيني توا نقوله لكلام هوا ... وهوا يصر اكتر وفوقه يكرهني لاني هزيت علي اختياره .... لا لا خلاص هوا بعتني لهنا وقالي بالاسم مرررريم ولاخر لحظه قالي اني شفتها وتمو فيها خلاااااص ... يعني احنا هنا مجرد شكلي وخلاص ... ولدلك وحق ربي لو تقولي لخوك الكلام الا قولتيهولي الا نهارك اسود ... هوا شايفها زي ماقالي وراضي بيها ويبها معناها احنا نطلعو منها والحب عمي صدقيني مرات هوا شاف فيها الا احنا ماشفناشي فيها
سمر .... بس يما ^-*
امها ..... اااااص ولا حرف خوك يتصل ...
عقاب .... اه يما شن صار معاكم .؟
حليمه ..... اهو بوها طلعلك البنت خليك واقف فم الباب ...
عقاب .... اي اهو الباب نفتح ... ماشي هي سلام ...
خش عقاب وخشو الاب لمربوعة تريس .... بينما خالتي فاطمه قعمزة خشت لي خالتي حليمه وبنتها ...
حليمه ... شني مريم مكمله قرايتها ؟
فاطمه .... لا والله موقفه قيدها ..
حليمه .... وناويه تكمل ..
فاطمه .... والله هادي بعدين تتفاهم في هالشي مع شخص الا بتكون من نصيبه
حليمه ... اي اي فهمت عليك ... والله احنا كانا اتفاهمنا علي كل شي .. اني نبي نعطي ولدي مادبيا اليوم قبل غدوه ... ولو اليوم مشو علي خير مادبيا حتي قبل مايسافر ولدي نتمو فيها ونديرو العرس باش ياخد اجازه حتي تلاته شهور ... بالك بعد الزواج يخلوه يخدم هنا ويبطل مشيته للبحر ..
فاطمه ... والله شن بنقولك ... انتم فصلو واحنا نخيطو ... وغير كان اتفاهمو الرجاله في مربوعه اعتبرو البنت بنتكم ...
حليمه ... علي بركه الله معناها ... انتم اليوم شاورو روحكم وبكرا ردولنا نردولكم الخبر اليقين ... وتردو علينا وتقولولنا بنتكم موافقه او لا ...
فاطمه .... خلاص علي خير ان شالله ...
وفاتت الدقيقه وراء الدقيقه ومافاتتش ساعه الا ماطلعت حليمه وبنتها من حوش عمي ناصر بناء علي اتصال عقاب بعد ما طلع من مربوعه وركب سيارته .... وماهيا الا دقايق الا ولحقاته حليمه وسمر ... واول ماركبو لسياره ... قعمزة امه تالي هيا وبنتها لان كرسي قدامي تبزع عليه سزوة القهوه لما كان يهدرز مع حميدا ..
واول ماقعمزو ... فاتت لحظات صمت وتنهيدات من سمر مع نخصات من امها باشىتبطل تنهيد ...
عقاب .... خيرا منظركم مايبشرش بخير تقول شفتو غوله ههههههه ... كانا ماشفتهاش البنت راهو قولت كنتم في دفنة ميت ...
سمر .... والله يا عقاب هوا ( وهنا جتها ركله من امها فاسكتت )
وكملت امها باقي جمله نيابة عنها
حليمه .... (مع تفنيصه في سمر ) هاك تلفونك يشرين ياسمررر .... والله ياولدي تقدر تقول تمينا فيها ..
عقاب ... شن ياامي ان شالله عجباتك ...
حليمه .... اي خيرها كويسه ... واهم شي الاخلاق قبل شكل لان البنت الا بيدمولها اخلاقها قبل شكلها ..
عقاب .. كويسه .؟ هههههه بصراحه متواضعه هلباا يا حلومتي انتي 😙😙😙
حليمه ... شن صار معاك انت ؟
عقاب .... والله شن بنقولك اني ارتحت لبوها وحتي هوا حسيته ارتاحلي ... بس ماتكلمناش علي تفاصيل معينه
حليمه .... اني قولت نشاورك ونرد عليهم بكرا ... باش كانا تفاهمتم نحددو موعد فضانيه وعرس ..
عقاب ... علي شن مستعجله انتي ..
حليمه .... انت لاتبي تخش لصالونهم باش تتلاقي معاها بشكل مستمر ولا تبي تتكلم معاها في تلفون الا بعد الزواج فاعلاش تطويل الحبل .
عقاب .... باهي هيا البنت راضيه بشروطي هادم .؟ وقولتيلها خدمه لا ؟ وقولتيلها علي طبيعة خدمتي .
حليمه ... قولتلهم ... وحسيتها موافقه علي كل شروطك ... وقالتلي امها بالفم المليان البنت ماتبيش تقعمز معاه قالت بوي يقعمز معاه خلاص وبوي ادري مني ...
عقاب ... خلاص براحتها ...
سمر ... عقاب بنسالك ... انت متاكد ماتبيش تشوفها .
عقاب .... اني قوتلكم ياسمر شفتها مرتين ولا تلاته فاعلاش بنخش ونشوفها ...
سمر .... بس ( وركله تانيه من امها ) ...
امها .... معناها خلاص علي بركة الله بكرا نتمو ونحددو موعد الفصانيه والا هيا بعد اسبوع والعرس نهاية شهر هوا .
عقاب ... الا يريحك يما ...
امها .... خلاص علي بركة الله مالا ...
وفي اللحظه الا انتهي موضوع من ناحيه خالتي حليمه وعقاب وسمر .... مازال موضوع ماانتهاش عند خالتي فاطمه ...
مريم .... نبي نقعمز معاه ... من حقي ...
امها .... علاااااااش تبي تقعمزي معاه .
مريم .... نبي نتاكد انه راضي بيا او لا من حقي ...
امها .... قولي نبي نطفشه صح . مالا خودي مني الكلام رسمي والله والله مارح تحلمي تقعمزي معاه الا بعد فااااتحتك ... اني ماصدقت ربي رحمني ورزقك بنصيب زي هادي ولا حتي تحلمي بيه ... وتاني شي بكرا لو قالولي حتي العرس نهاية شهر زي ماامه لمحتلي اني موافقه ....
مريم .... كيف ... قصدي شن مازال عليه هوا نهاية شهر ...
فاطمه .... ااااايى سادنا ... هوا يوم في صاله بس بس وقبلها سهريه بسيطه ...
ناصر .... فاااطمه ... فاطممممه ... فنجان قهوه وتعالي ..
فاطمه ... هيا هيا ... خشي توا لدارك خلاص انتهي موضوع ... اختك وين ..؟
مريم .... تقرا في دارها ...
وهنا طلعت مرام ... شن تم موضوع نقولو مبروك ههههههههه رووووووووووووووووووووووووووووووووووووووووي خاطري نعرف سعيد الحظ بس هههههههه
وهنا مريم ضحكت زي العبيطه وقالت ...
مريم .... اكيد سعيد الحظ ويحبني بدليل جاب اهله ...
مرام .... غير حبك طول .. غير اهدي علينا بس ههههههههههه
مريم .... اي يحبني ومصر العرس نهاية الشهر قبل امه ...
مرام ... اها ... احدات غير متوقعه ... بجد بجد قتلني حب الفضول ههههههههه
امهم ..... خلااااص بنتكلم مع بوكم ... كل واحد في داره ...
... بعد مابوي يشرب من قهوه دخليلي فنجان لداري ... وتلفتت لدراها وشدت مانيلة الباب وشافت لي مريم وقالت ...
مرام .... بجد بجد متشوقه نشوفه هههههههههه
وخشت لدارها وهيا تضحك وسكرت دار ... بينما مريم قعدت تقلد فيها كيف تشيح وتضحك بفم معاق وبعدين قعدة تقلد فيها كيف تمشي وخشت لدارها وسكرت الباب ... وتلوحت علي فراشها واول ماغمضت عيونها بدت تتخايل في روحها معاه على طول وهما عايشين في قمة سعاده ورمانسيه ووهيا سارحه في افكارها خشت عليها مرام لوحتها بالحوايج الا كانت مريم عازقتهم في دار مرام لما كانت تقيس وتشوف علي مرايه لان مرايتها اصغر من مراية مرام ...
مريم ..... مبررررردك مبرررررردك .... امتي عرسي ونفتكي منك بس
مرام ... هههههههههههه والله وكبرتي وتدورتي ياموزه هههههههههههههههه خشيتي علي عرسك طول ... من هاللحظه بس اكتبي لسته بس قائمة ناس الا بتتنقمي منهم وتقهريهم بي عرسك نقولك ابدي بكرا بي هناء عليكي بيها هههههههههههههههه ... good night 😗😗😗
مريم .... مبررررررد اطلعي ... وحدفتها بالمخده ... وبعدين ناضت باش تسكر دارها وخطرتلها فكره .... وهيا صح صاحبة الفكره ندله ... بس صح بكرا بنحرق هناء ... ونقوللها تعالي افرحي معاي هههههههه ... خلاص خلاص بنغمض عيوني باش بكرا يجي بسرعه ونصنع فيه امجادي 😗😗 بس زعمك بالفعل هكي عجباته ... اكيد اكيد يعني شن الاجبره يجيب امه ويقول مرررريم ... كلام امي صح علتش نكد علي روحي اني ولا هوا اني تعودة علي نكد وخلاص ...
.... وطفت ضي سهره وخششت راسها تحت مخده ورقدة ....
وفاتت ساعه وراء ساعه .... ومافاقوش الكل الا بصوت امهم تنادي ....
فاطمه .... مررررام ... نووووضي وقت عليك ساعه 9 ...
مرام ..... ماعنديش محاضره اليوم خلييييني نرقد وسكري دار
مريم ... صباح الخير يما ... كلمووووك ؟
امها ... صبح يافتاح اصطبحي وقولي ياصبح ... شن بايتين يحلمو بيك
مريم .... مانعرفش اني لا نخطبت قبل ولاتزوجت ههههههه
امها ... اطلعي سيقي جنان بعد ماتخشي للحمام لبين ماوتيت الفطور وعجنت الخبزه ( ورمة دبلتها باش تخش تعجن ) ...
مريم .... خشيت ... اني طالعه للجنان ( وعيونها مكرشين في دبلة امها ) .... واول ماشافت امها خشت للمطبخ خشت خدت طول الدبله ... وحطتها في صبعها وطلعت ... وتدكرة انا مرام عندها خاتم فضه مدهبه فيه فصه كبيره فاتسسلت وخشت لدار وخداته ولبساتهم مع بعض وبالفعل بانو زي دبله وطلعت تسيق في جنان وتغني ... وفجاه ركبت فوق صور وضبحت
مريم .... هنااااااء .. هنووووو ....
هناء .... صبح يافتاح شن ديري ...
مريم ... نسيق جنان وقعدة تحرك في ايدها علي شعرها ...
هناء .... اووووووو انخطبتي ولا تلعبي هههههههه
مريم .... مقدمك وحتي لبسولي دبله وعرسي شهر هوا
هناء .... لطف خير ماقال حد ...
مريم .... واتمو اموركم بالكتمان .... يالله نخليك امي تنادي فيا علي فطور باااي ...
ونزلت وهيا تنقز وميته بالفرحه 😙😙😙😙 ووبدت تصب في ميه وتكمل في تسيق جنان ... ووهيا ولاول مره حاسه روحها مالكه دنيا كلها ... وفاتت ساعه وراء ساعه والكل داير روحه لاهي بس مترقب المكالمه الا واقفه عليها سعادة الحوش كله بااستتناء مرام لان مش فارق موضوع معها ..... ومع ساعه 6 المغرب طلعت مرام من دائرة الصمت وقالت ...
مرام .... شكلهم غيرو رائيهم يامريم ... من غير ماتعبي روحك وتشوفيه ... قيم اوفر هههههههههههه
وفي اللحظه هيا وهيا ماكملتش جملتها ... شرين تلفون ...
رن رن ... رن رن ...
ناضت فاطمه بسرعه وقالت اااااااص ...( مع ضحكه بانت فيها 30 سن )
فاطمه .... السلام عليكم ...
خديجه .... معقوله ياماتتحشميش لين بنتي تشوف الدبله في ايد بنتك باش نعرفو
فاطمه ... شن في خيرك اللطف ...
خديجه .... بنتك يتمو فيها وتنخطب وماتقولوش ...
فاطمه ... وانتي من قالك ...
خديجه .... بنتك ... شافتها بنتي هناء لابسه دبله في ايدها وعرسها نهاية شهر ... امتي بتعزمونا ياتري في نفس يوم الحفله ؟
فاطمه ... والاه ماهكي هيا كل الحكايه ..اه .. الو الو ... الخط نقطع احسن حشم حالك يامريم حشم حااااالك ( وعيونها ولو حمر وودانها يطلع منهم دخان وبدت تنادي وتعيط وخشت لدارها ...
فاطمه .... مررررررررررررررريم مرررررريم زفت تعالي هنا شن مقايله لي هناء ....
وفي اللحظه الا خشت لبنتها ... شرين تلفون وردت مرام ....
مرام ... الو ... من معاي ... اهلين ... اي اي عرفتك ... حاضر لحظه بس ...
وهنا خشت مرام لدار ولقت الام شاده في ودن بنتها وتشح في شعرها وتقولها ...
فاطمه .... شن بندير فيك اني بس قوليلي ... بشعتي بروحك ... افرض ناس معاش اتصلت افرض غيرو رايهم شن بنقول اني بعدين ... ياحشمتي بس نولع في روحي اني ررررردي ..
مرام ... اجلي توليعة الغاز في روحك لين تردي علي تلفون ناس علي خط ويستنو فيك ويسمعو في اصواتكم ...
فاطمه ... حولي انتي تانيه من جنبي سحقيه ..
وطلعت وسكرت وراهم ومشت تجري علي تلفون .... وماهيا الا لحظات وقالت ...
فاطمه ... الفضانيه بعد بكرا ؟ والعرس نهاية شهر ... خلا ص اتفاهمنا علي بركة الله .... الا بتجيبوه باهي اعتبروها بنتكم لا لا يوم واحد في صاله بس وباقي تفاصيل. راجله يتفاهمو فيها ... ماشي خلاص تشرفو في اي وقت خلاص بسلامه بوسيلي سمر ماشي .. سلام ...
رووووووووووووووووووووووووووووووووووووووووووووووووووووووووووووووي ...
وفاتت ساعه وراء الساعه ... واليوم وراء اليوم ... وكانت كل الامور ماشيه زي ماخطط ليها القدر بزبط ... وزي ماحلمت مريم وامها .... وبدأ العد تنازلي بعد مافاتت الفضانيه علي خير ... لحد ماجت ساعة الصفر .....
فاطمه .... اختك في مزين من بكري ... اي مشت ... معقوله تستناك لين تكملي محاضرتك ... خلاص الحقيها غادي طول وتوا نبعتلك قفطانك ... ماشي تمام ...
مرام .... ماشي ماشي تمام ... توا نكلمها اني توا نشوفها وين وصلت ...
فاطمه .... ماشي ... اني ماشيه بكري لصاله باش نستقبل ناس ...
مرام ... قالتلك مريم قوليلهم ماتنسيش اغنية يارا يحطوها لما يخش معاها بعدين واسماء الله الحسني لما تخش بروحها مش يتلخبطو
امها .... ماشي ماشي خلاص ... اني نعطيهم الورقه الا كتيبتهالي بس ...
مرام ... خلاص سكري مريم خشت انتظار ... الو اه مريم وين وصلو فيك ...
مريم ....اني خايفه وقلبي يطق وفرحانه ... اني بنبكي مرام اني فرحانه ونبي فرحتي تبدا من اليوم ..
مرام ... شن نتمنالك يااعمي ههههههه ان شالله يارررب مهم اني جايه في طريق وين وصلولك هما توا .؟
مريم .... دارولي ظوفري وزمالطو وكملولي مكياج ... مازال تسريحه وبودرة الجسم ونلبس فيلو ...
ماشي خلاص اني تقريبا وصلت .... سلام ...
مريم ... نستني فيك ...
بتبع
Kinda
