**احببتك خارج الوطن**

الحلقة الرابعة والعشرون

لا احلل النشر

**احببتك خارج الوطن**حلقة24
للكاتبة *سونيا ايلين*

جداي :وينها بنتك
محضيه :في خربتها خامده
جمعه: تكلمي كويس يا مرا
محضيه :سوووري قصدي في سويييتها😄
ناصر: ههه مليكش حل
محضيه: من قدك عاداليوم بيانك
صبحيه: الحمد لله كملنا حاجات البيان الكل
محضيه: زعما سالمه تمشي
جداي: ولاش لا... لامتى بتقعد حزينه على ولدها....

قبل ثلاثه شهور...
قصي... نزلنا في المطار كان عالم تاني ناس مش زينا مهناك حد يشوف لحد
اسماعيل :هيا السياره تستنى
قصي: تمام
ركبنا السياره وكنت نتفرج من الروشن البلاد عااالم تاني دنيا تااانيه بنايات عاليه كياسات نظيفه
اسماعيل: هادي كالفورنيا
قصي: شايفها في الافلام
اسماعيل: الواقع احلى ارتاحو وبعدين سيفانا ادهور بيك
قصي ..كنت مسحور بالمنظر تفكرت ليبيا ومنطقتي
سيفانا شدت يديه: وصلنااا
قصي: هدا حوشكم
سيفانا: yes
كان حوش من دورين واضح انه كبير وفخم دخلنا كان الاثاث روعه
سامانثا: اركبو ارتاحو
سيفانا :تمام
سيفانا :وهدي داارنا
قصي :قصدك بنسكنو هني
سيفانا: yes
قصي: لا اني نحب الاستقلال
سيفانا :مش حيضايقك حد حني فرييي
قصي: عارفكم فرييي بس نبي حريتي حتى اني
سيفانا عصبت:what you mean
قصي: قصدي انأجرو حوش
سيفانا: باهانه you have mony
قصي :عندي ملقطهم حولتهم لدولارات يمشونا كم شهر لين نخدم
سيفانا تضحك: ههههه كم شهر.. وتخدم ..قصي شن بتخدم انت جاي من بلد جااهل مش مستعرف بيه من ناحية التعليم انت حتى زبال ميخدموكش
قصي ملامحه: تغيرو انتي فاش تقولي احترمي نفسك
سيفانا :sory بس قصي الحوش كبير علاش نأجرو بعدين يلي عندك دسهم لان اني مصروفي فوووق الوصف
قصي: تو نكلم عمي يشوفلي شقه
سيفانا:as you likeوطلعت
قصي قعمز ع السرير مش مستوعب انه يعيش مع نسيبه في حوش واحد حتى لو كااان عمه

سلاف: السلام عليكك
جداي :طيب فيك طلعتي من جحرك
سلاف :كيف حالك جداي
جداي: الحمد لله
سلاف: وين الكل
جداي :عند عمتك سالمه
سلاف :خيرها
جداي :فاقدة ولدها
سلاف :طبست راسها
جداي: ااايه دنيا قبل مقعمزه اني وجداك خدوج الله يرحمها وفي طرف دجاج في المبكبكه تحشمنا ناكلوه كل وحده ادف فيه للتانيه المهم قهدنا نهدرزو وجت زمزم تهدرز علينا لهينا معاها ونسينا الماكله لما طبسنا ع التبسي لقينا الدجاجه مهناش تعاركت ان وخدوج تريش الشعر كل وحده تحساب التانيه كلتها وزمزم تضحك
سلاف مبتسمه :علاش
جداي :طلعت هي يلي واكلتها وقلنالها لاش قالت شفتكم ادفو فيها قلت شكلكم متبوهاش
سلاف :ههه
جداي :لتوا هديكا الدجاجه بين عيوني وقعد خاطري فيها
سلاف: تو نديرلك دجاج
جداي: فهمتي قصدي من الحكايه
سلاف: لا
جداي: عنا بوك هبله اصلا ماضيعك كان هبالك
سلاف مستغربه
جداي: يعني يا بنيتي المنجوه كااان قدامك سنين الله وحشمتك خلت بنت عمك الغريبه تجي ترفعه
سلاف عيونها دموووع
جداي حضنتها :والله ماكنت نعرف انك تبيه الا بعد مرضتي ويوم محضرتيش العرس
سلاف تمسح في دموعها
جداي :فهمتي الحكمه التانيه من الحكايه
سلاف هزت راسها بمعنى: لا
جداي ضربتها ع ضهرها :يعني يا بنت الكلبه لما تدخلي للجامعه يلي تجي عينك عليه طيحيه وخليه طايح ياحيط يا مزبكه
سلاف 😓
جداي: ربي يبعتلك خير منه

سلاف... نضت من حدا جداي واني نقول معقوله مقدرتش نوريه قداش انحبه ندمت ان مدرتش زي ميديرو البنات

سيفانا: شنو رايك
قصي: فاش
سيفانا: في حوايجي
قصي :روب حلو
سيفانا: روووب شنو هدا فستان سهره
قصي: وين ناويه تسهري
سيفانا :بنسهرو مع صحابي نبيك تتعرف عليهم
قصي: توا خيرك شوفي الساعة
سيفانا: عادي اصلا توا يبدا السهر
اسماعيل: خيركم
قصي: تبي تطلع توا
اسماعيل: good اطلعو ادهورو
قصي كنت مستغرب في كل شي كيف تلبس قدام.بوها هكي كيف جسمها مكشوف بكل والحق انصدمت في عمي
قصي: تبي تطلعي غيري حوايجك
سيفانا: no way
قصي: خلاص نقعدو
سيفانا: تمام نغير وننزل
قضي :تمام

في ليبيا 😂
سلاف... كان الجو باااسل حاسه الحوازه فاااضيه نحاول نلهى بأي شي تاني بس منقدرش الحوش في الحوش.. اهله انشوف فيهم.. سيارته ..حتى شياهه قدام وجهي ويقولولي انسيه
سهام :بخخخخ
سلاف: اف خلعتيني
سهام :وين عقلك
سلاف: تلعب بالتراب
سهام :اهو شن مازال وندخلو للجامعه وتنسي
سلاف: زعما فاش يدير فاقداااااته بجد
سهام :الله اعلم كريمه تقول يسلم ع الكل سلاف: نتمنى نموووت او تفوووت سنه
سهام ضمتها: تفففوت

قصي: زحمه شوفي مكان تاني
سيفانا: المكان هدا ديمه زحمه بس يعرفوني هني
قصي :كييف
سيفانا: ههه come
دخلنا وكان المكان زي منشوف فيه ع tv كان ديسكو
قصي: هدا شنووو
.....يتبع