وجع الماضي

الحلقة ٣

#وجع الماضي
#ليوثي المياحي
الحلقة ٣
دفعته.... وصحت بيه.. ونهزمت....
ماجد يحجي....طلعت من الصبح .. رحت على المزرعة اتفقدهه .. لان زرعتهه جديد واخاف من الطيور والعصافير تاكلهه... كمت افتر على السواكي ..واثبت الهروش المشلوعة .. واترب بالسواكي.. وجان اسمع صوت سحرني سحر ..كمت امشي ورة هل صوت واتبعه مثل المسحور ..جان بيني وبينهه بس سياج مال سيم شائك.. يفصل مزرعتنه عن مزرعتهم.. هيه جانت واكفة ومغمضة عيونهه شعرهه فالتة يسرح وية النسمات اللي تتلاعب بيه.. حاضنة عصاتهه وتغني جان صوتهه طالع عذب من كل جوارحهه ودموعهه جانت تجري .. المنضر سحرني ... اويلي شعرهه سرح اسود فحم يتموج شوية شوية وي اللحن مال الغنية... عيونهه كبار جنهه عيون الريم مبينات من رموشهه رغم ما جانت مغمضتهن.. والخشم شمحلاه جواه شفايف تكول رمان..لابسة صاية طويلة مغطية جسمهه كلة بس الصاية جانت طابعة على جسمهه ومطلعه كل تفاصيلة الحلوة..كلبي دك  وسرح وية صوتهه اللي يسحر , عبرت السياج الشائك وما حسيت من جلب بذيال الدشداشة وشكهه..مو مهم المهم اشوف عيونهه...شلون تفتحهه..منظرهه سحرني وخلاني امشي مخدر .. وكفت بدون ماتحس بوجودي من كثر ما هية منسجمة ..اديهه ترعش ورعشتهه دكت بكلبي وحسيت بوجعهه من حنية صوتهه.. وحرارة دموعهه.. مسحت دموعهه بايدهه وفتحت عيونهه..واااااااااااه من عيونهه....اااااااه كلبي لك هاي شلون عيون عسلية ..غركت بيهن ودخت..فتحت عيونهه حيل وهي تباوعلي بخزرة ..عبالهه حلم...واني من غير ما احس سحبتها لحضني بلحظات جنت فاقد للوعي..
_اني كمت اتملص منه واصيح ..ولك حلني....حلني دا اكلك.. جان اتذكر عصاتي بايدي.. جان البعة بيهه على ظهرة مرة ومرتين وما يحلني.. كمت اضرب بيه بالعصى بكل قوتي... على ضهرة وعلى موخرتة..كام يصيح اخ يابةهههههه.. يالة هدني انهزمت رحت اركض وكلبي يدك مخليت لا ساكية ولا مي ولاتراب اوكع وارد اكوم ما التفتت وراي ابد خليت النعاج وعفت الدنية كلهه ردت انهزم وافلت بجلدي..لا استحة لا كال مكيف حضني... وج يمة ريمة وج يمة..كالتلي شبيج بنيتي خبصتيني بالعياط.. ترة اني بعدني اسمع مو طرشة ....شكو شصاير؟؟وج يمة طلعلي جلب مجلوب يركض وراي ومايرضة يعوفني خليت النعجات سارحات وحدهن روحي شوفيهن..واني احك براسي ...كالتلي لا قيم الركاع.. وانتي خايفة من جلب واني اكول ابنيتي زلمة امشي روحي غسلي وجهج وامسحيه بوصلة حمرة حتى تروح منج الخرعة... واني راح اروح اشوف ..غسلت وجهي واخذت الحوش طراكة رايحة جاية اتاني امي ريمة ...ورة شوية رجعت وجايبة النعاج اتسوك بيهن وياهه شالي ..كلبي دك من الخوف وهية شايلة الشال مالتي وتلوبح بيه .. كالتلي.. ام علية شالج شامرته.. منو شافج مفرعة كولي.. اشو لا لكيت جلب ولا حتى خياله..ربي يهديج بنيتي..اني ليهسة ركبي ماشايلاتني ولازمتني الرعشة ما اكدر اسيطر على روحي..والله فضيحة بس منو هذا اللي شافني واني مفرعة ومسلطنه اغني..بس هذا شلون جلب من شافني حضني بكل حيلة..وجان اتذكر شلون لعبت العصا على ظهرة وهوة يتوجع ويتوحوح..اجتني الضحكة .. اية لعد شعبالة يحضن بكيفة خلص النهار  واجة الليل رحت على صديقتي سهى حتى اسهر وياهه جان بيتهم مخبوص بالحنة مال اختهه.. وعالكين المسجل وصوت الغنى عالي..والبنات يحفن ويحضرن ويرتبن بالبيت..والهلاهل والفرحة مبينة عليهم..مدينة ادينة حتى يخلون بيهه الحنة .. وتحنينة كامت سهى تغني وتتمركص بعد ماشدت الشال مالهه على خصرهه..هاي الرادهه وهاي التمناهه .. بنت الشيخ لبن الشيخ جبناهه...وعروستنة واخذناهه بعد شل هل عواذل..واللي يريد يتبارك يجي بصفكة وهلاهل.. هاي الليلة حناهه فرحانيين وياههههههههه....خالتي ام سهى كالتلهه الله ينطيج ابن الحلال يبنيتي.. واحنة نضحك ..كامت خالتي جابت الشربت وزعته على النسوان... سهى كامت كعدت بصفي وتشاورني ..كالتلي اخيتي رمروم ... اجة واحد ضمن الكاع من ابوية شاكلج عليه يخبل طول وعرض وهيبة ...يبووووه ...كرصتهه من جوة ليجوة وهي تتوجع وتكول اااااااي نوب فضحتنه الكل كام يباوع عليهه.. كمت اسكت بيهه ..كالتلي كومي وياي للغرفة  احجيلج..مشيت وراهه جانت امي ريمة تباوع علية... مشيت وية سهى وهي تجرجر بيه واني اسحل وراهه عفنة الناس كلهه بالداير مال الحوش واخذتني لغرفة العروسة جانت مرتبينهه مالينهه اوراد   شوفتنياهه..وتاشر بديهه شوفي ملابسهه شكد حلوات شوفي بدلة العرس شلونهه حلوة وبيضة تلمع..وهية تتأفأف.. كالتلي ريما خيتي.. ولج يكتل.. من شفته واني كلبي.. ذبحني.. حبيته شكد حلو يا ربي.. وجهه مثل البدر منور ..اصبح بيه وامسي.. راح اموت من حبي اله.. كتلهه شتكولين ولج تخبلتي انتي بلة احنة مال حب وسوالف مكسرة.. كالتلي والله يا اختي تولعت بيه ومو بكيفي..سبحان من صوره وج شكلة يخبل...ضربتهه على جتافهه كتلهه ..نصي صوتج ليروح يسمعونة ويودون جلدنة للدباغ..صار صوت عالي برة بالحوش عبالك عركة.. طلعنة نركض من الغرفة لكينة اخو سهى الوسطاني ماجد يتعارك هوة وامة وكفنة نسمعه شيكول.. وياريتني ما سمعته ..يكوللهه يمة اني رايدهه هية ..اني اعرفهه تربيتهه احسن تربية ..واخلاقهه بعد..اما الماضي مال امهه وابوهه فميهمني.. هي رباية خالتي ريمة وربتهه بميت رجال...يمة احجيلي وياهه اني رايدهه...كالتله.. واني اكلك لا .. صحيح ماعندي شي اكولة هية طفلة ومالهه ذنب بماضي امهه وابوهه بس ياوليدي الماضي ماينسي ويبقة عايش لو شكد تمر سنين..وليدي اني احب الخير الك..انته زين الشباب تستاهل وحدة احسن منهه انتة ما يعيبك شي..اني ما كدرت اكمل اسمع... حطيت ايدي على حلكي..وطلعت اركض حتى ما انفضح اكثر...مريت على امي ريمة وشاورتهه وطلعنة بعد ما سلمنه عل الجماعة وباركنالهم..فتنه بنص الحوش.. ومن بعيد شفنة الرياجيل..ومن بينهم جان ماجد.. سلم على ضيف جايهم.. وجان يفز من جتي عيني بعينه..جان شايل بيدة وصلة جنت متحزمة بيهه الصبح...اني كمت اهرول وامشي سريع..واجرجر بامي ريمة..وهية اجر بروحهه جر..وتدردم وية روحهه..والله مابينة..نصبح بمصيبة ونمسي بمصيبة..ولج بنيتي علكيفج امشي شبيج منو ديركض ورانه..شنو انلسعتي..كبل شوية جنتي تضحكين وتصفكين..ومتونسة...كتلهه يمة مابيه شي..بس سهى ضوجتني وخربت واهسي..كالتلي خير شبيهه شكالتلج..كتلهه ما كالت شي بس رادتني ابات يمهه وتعاركنه..لان مقبلت ابات يمهه..اي بنيتي خير ماسويتي شيبيتج بغير بيت واني منو يبقة يمي..رجعنة للبيت واحنة ساكتين..امي ريمة مشغلة الايت ..حتى تضويلنة الطريق..واني امشي ولازكة بيها لزك..وامشي على اعصابي..شلون ياربي..بيوم واحد ضربتين..بالراس توجع..لان الرجال طلعلي وحضني الصبح..حس بسهولة يحصلني ...بس خالتي صدمتني بحجيهه..علية..كاعدة تحاسبني..على شغلة..اني ما مسويتهه..واني اجابني على ابنهه ماجد..اصلا اني ما مفكرة بالزواج من الاصل..بس التجريح..واللوم..مو من حقهه..ولا من حقهه تنزل من قيمتي..وقدري بين بنات القرية..منا تكول اني اعرف تربيتهه واخلاقهه الزينة..ومالهه ذنب باللي سووه اهلهه..ومنا تكول..ما تفيد تكون زوجة الابني..والله شغلة دوخ..
روحي معذبتني..ولو بيدي..اهج لغير ديرة..واخليهه الهم على طولهه وعرضهه..بس امي ريمة هي دنيتي...وصلنة لبيتنة بعد ما عبرنة..الزرع..والكاع المحروثة..اللي تفصل بيتهم عن بيتنه..والصراحة تعبنة لان دنية ليل..وكل شوية نعثر..ونكوم..فرشت لامي ريمة..نامت..واني النوم ما جاني..ولا لفاني..ضليت سهرانة ومانمت الة وجه الصبح..امي خلتني على راحتي..من كعدت الصبح مريت عليهه مالكيتهه بفراشهه..عرفت طالعة تسرح بالنعاج..وتشوف الزرع..خلتلي ريوكي محضر ع الطباخ..حميت الجاي وتريكت..ولملمت الفرش وكنست الحوش وكمت احضر الغدة..وسويت جاي جديد..لما هية اجتي..واني سارحة اسمع سهى..تصيح علية..طلعت اركض دخلتهه للبيت..كتلهه هااا سهى شجابج بهل ظهرية..ضحكت بميوعه وخبث..ما احب هاي الصفة اللي بيهه..كتلهه استعدلي واضحكي عدل واحجي..شرايدة..كالت جيت..اعتذر منج..تدرين معزتج عندي وما استحمل زعلج..وثاني شي دزني اخوية ماجد..يكلج لا تاخذين بكلام امي..ولا يضل بخاطرج..اي شي..لزمتهه من جتفهه وكلتلهه..باعي سهى..اني لا رايدته لاخوج..ولا رايدة غيرة..اني اللي ضوجني..امج..تعرف كل الزين تربية امي ريمة..واخلاقي..وتحجي علي..والله كافي كل العشيرة والديرة يجون ياخذون رأيهه..ويحترمووهه..كالتلي اكلج صدك اسمعي..شفت الحب مالتي..البارحة اجة..ابوية عزمة على العشة..كتلهه هذا اللي ضمن الكاع مالتكم..كالتلي اي..ريما..ولج سلبلي عقلي..اني ضربتهه على راسهه..كتلهه اشبعي بيه..اصلا عقلج فارغ..من كاعه..وهسة انلحس..هههههه
كالتلي يالة حاولي تجينة الليلة..وحاولي تباتين..زين..يالة اني اروح كبل ما تفكدني امي وترزلني...ولا تواخذيني خيتي بحجي امي..طلعت وراهه اوصلهه الباب البيت..واودعه..اني فتحتلهه الباب..جان اشوف رجال جاي هوة ومرة..شايلهه على ظهرة....عفت سهى وراي.. وكمت  اركض..اركض واتعثر وكل شوية اريد اوكع على وجهي..وصلت لنص المزرعة..شفت خيالة..الرجال جاي لبيتنه..اني اتلفت..واتساءل بلهفة..شبيهه امي ريمة..ما ركزت بملامحة زين..جان وجهه غامض بالنسبة الية..بس صوته..تسلل الاذاني بكل قوته..وبالكوة يحجي.. كالي لا تخافين لكيتهه دايخة ومتخربطة وهية تسرح..ردت اخذتهه منه وكتلة مقصرت مشكور انطينياهه..كال لا يمعودة هذا واجب..خليني ادخل اوصلهه لفراشهه لان مابيج تشيلينهه..بس كوليلي وين غرفتهه وفراشهه..امشي وهوة يمشي وراي..وشايل امي..سهى ما راحت لبيتهم..بقت يمي وتمشي وياي..دخلته لغرفة امي خلاهة بفراشهه..وكالي جيبيلهه مي..ركضت وجبتلهه كلاص مي..كعدت يم راسهه غسلت وجهه وشربتهه مي..بعد ما كعدتهه..فتحت عيونه...كالت..شكو شنهو شصار..كاللهة والله ياحجية..لكيتج دايخة..شلتج وجبتج للبيت..كالتلي اشكرك وليدي..الله يبارك بصحتك.. واولادك ..ابتسم وكاللهه..اني ما متزوج..بس ناوي امشي هل ايام..كالتلي الله يتمملك بخير..كام وكال اني اترخص..لحكتة لباب البيت..كالي اخاف تحتاجون شي..هذا رقمي..مبين انتو وحدانيين..ومالكم راعي..ان شاء الله..مشافاية..الحجية..كتلة احنة مو وحدانيين..عدنة اهل وناس..بس كل واحد وية عائلتة..ابتسم وافتهم قصدي..ستوة راد يطلع لحكته امي ولزمته من ايدة..كالتلة ميصير تروح بدون ما نظيفك..تعال اكعدلك ساعة..وبعدين امشي..طبطب على ايدهه..وهوة مبتسم..اني ارتاحيت للحجي مالته..كاللهه لا حجية..انتي تعبانة..ارتاحي وريحي بالج..نطاهه رقم التلفون بعد ماكتبة بورقة ..كاللنه في امان الله وطلع راح...اني تنفست وبقيت اداري بامي ريمة..كتلهه شبيج..يمة شنو الي يوجعج ..شتحسين....تردين اوديج للطبيب..كالتلي..لا لا بنيتي..شوية دوخة..هسة تروح..واصير زينة..جيبيلي..استكان جاي اريد اعدل راسي..الله يرحم والديه..لحكني..بوكتهه..
بقينه اني..وامي ريمة..واني ما مرتاحة..لان حالة امي ماعاجبتني..ولازم اخذهه للطبيب..سهى..سلمت علية وراحت لبيتهم بعد ما شبعت تغزل بالحبيب..مالتهه..رجعت لغرفة امي ريمة اطمن عليهه ..ما صبرت..دكيت على عمي صلاح..اخو ابوية الجبير يعيش ابغداد..صحيح هوة جياتة قليلة بس بهيج حالات يجي طاير..حجيت وياه وكلتلة
صحة امي مو زينة..كبل ليصير المغرب..دخل علينه للبيت..بات يمنه ومن الصبح..اخذناهه وديناهه للطبيب..كال الضغط والسكرصاعدات عدهه وحالتهه تعبانة شوية..عمي صلاح رجع لبيتهم اوصاني..اخابرة..اذا صار شي..وباي وكت..وخلاني لا الكاع شايلتني..ولا السما..طايلتني..اخاف اخسر سندي الوحيد بهل دنية..واني وحدي لا حول ولا قوة..ااااااه يا دنية..ما ترحمين..الناس وخاصة اللي ماعندة والي..ولا تالي..اااااااه يا ريما..ياويلج من اللي جاي...وللحكاية بقية