وجع الماضي

الحلقة ٣٦

#وجع الماضي
#ليوثي المياحي

والله اذ ما اعلمك ياساقط يالي ما تستحي؟؟ والله متشوف مني كشة ..ولا انطيك قمري من الورث مالتي لو تموتني؟؟ تخبل وجنن جنوناته وكام يضرب بيه ..واني ماسكتتلة كمت اخرمش بيه واضرب وين ما تجي ايدي.. خرمشت وجهه ..هوة تخبل بالزايد جرجرني من شعري وسحلني من يم محمد ..التحفية اللي جتي براس محمد فرفوري ..تكسرت وصارت قطع زغيرة..سحلني عليهه تجرح جسمي كمت اعيط ولا همة شي.. لزمت قطعة من الفرفوري منبلة وضربتهه بصفحتة ..
صاح بكل قوته اااااي التفتلي وما مصدك اللي سويته بيه ..نوب زدت كمت افر بيهه بحركة وقهر...موت ياكلب ..واني اعيط واصرخ دخلت بحالة هستيرية..موت يا كلب موت ...موت ... ما عاش ولا صار اللي يذلني او يحاول يوسخني .. كرار وكع بالكاع كمت اضرب بيه وهوة يصرخ من الوجع..ركضت على محمد اللي دمه طالع من راسة من قوة الضربة ..اخض بيه واصرخ محمد.... حبيبي.. الله عليك كوم ..الله عليك لا تخليني وحدي.. كافي تعذبت وتعبت ...محمد ..دفنت راسي بصدرة واشتم بيه وابجي.. سمعت نبضة ..فرحت.. أي محمد بعدة عايش الحمد لله ..حي...اي حي.. محمد ..محمد..طلعت اركض من البيت واني اصرخ بوسط العمارة ..يا نااااااااس ساعدونه.. اصرخ حتى الناس تلتم وتساعدني ..وصل الصياح للجيران ..انفتحت بيبانهم واجوي يتراكضون يشوفون شنو السالفة..ما اعرف منو خابر الشرطة وكاللهم اكو واحد طايح بالكاع والدم يجري من راسة..والثاني لازم صفحته ويتوجع والدم غركة.. واني جاثمة على محمد وابجي..وصلو عمي صلاح واخوه سالم..اللي هوة يمكن ابوية او لا.. عرفو المكان بعد ما محمد دازلهم العنوان بمسج..فتحو عيونهم ومصدومين باللي شافوه..وصرخ..ريماااا شنو شصار ؟؟؟
الدنية انكلبت بالعمارة ...اني ابجي ..وعمي صلاح اتخبل على ابنه شافة غركان بدمه..وسالم اللي هوة ابوية واكف وكلبة صاير دم علية أي عليه ..نتيجة التحليل طلعت واكدت ان ريمااا بنت سالم من دمه ولحمه.. لا كدر يجي ويحضني.. ويضمني على صدرة ويواسيني ولا كدر يسوي أي شي.. وكف مجتف ..جان يحب الوضع مختلف .. يجي ويشوفهه ويفرحهه انو هية من صلبة مو بنت حرام ..ياكدلهه انو حياتهه ما جانت جذبة .. ريمة جديتهه.. وصلاح عمهه.. ورجلهه يصير ابن عمهه..بس اني بقيت شايلة منه من كال اسوي التحليل.. رفضته ..بسبب شكة بيه ..المفروض  يكعد ويتناقش وياي ويقنعني ويحضني ويبجي بحضني ..يبجي على عمرة وحياته اللي ضاعن..
يبجي بفرحة حقيقية طلع بيهه من الدنية وهية بنته ريماا.. راد يدخل ويشيلني ويحضني..بس اني جنت بدنية ثانية .. نسيت اليوم نتيجة التحليل ولا سألت ولا تذكرت اصلا ..اجتي الشرطة اخذتني للمركز  ومحمد وكرار ودوهم للمستشفى..وبحكم العرج يحن.. عمي صلاح راح وية ابنة..وسالم ابوية اجة وياي للمركز كل واحد كلبة محترك على ضناه.. اني بالمركز ياخذون افادتي ..
والضابط يستجوب بيه.. ويدون افادتي..اني اجاوب وابجي على اللي صار بيه ..سالم ابوي برة يروح ويجي وكاتلة التوتر ما خلوه يدخل ولا يحاجيهه ..بقى يتاني أي خبر يريحة..خابر على عمي صالح..هاااا خوية شلونة محمد ..كالة هياته هسة دخلوه للطوارئ وليهسة ما اعرف شبيه..والثاني هم وياه دخلوه..وليهسة ما مفتهمين شي من السالفة.. كالة ريمااا شلونهه وين هسة؟؟؟
هياتهه بغرفة الضابط ديستجوبوهه..واني واكف برة مخلوني اطب وياهه..شنسوي امرنة لله..اكلك يرادلهه محامي..نوكللهه..ماشي هسة احاجي محامي خلي يجيهه واعذرني اخوية اني يم ابني ما اكدر اعوفة وهوة بهل حالة .. الله يفك كربتنة ..اعذرني اخوية وطمني عليهه عود..
كل واحد حاير بهمة وبخلفتة...اني اتاني أي خبر على ريمااا..وصلاح يتاني أي خبر على ابنه..
اهل كرار اجوي للمستشفى.. حتى جديته وجدة هم اجوي.. الناس كلهه خايفة وترجف وتسأل على اللي صار.. حجالهم عمي صلاح..باللي صار واللي كلته اله..جانت صدمة جبيرة ..معقولة اللي امنوه عليه هيج يسوي ابنت عمته اللي تعذبت..جديتي كامت تسب بيه وتلعنه..وتسب بابوه على هاي الترباية..الي رباهيالة..وتحلف وتتوعد بيه بس يكوم..بس جدي سكتهه..بس خل تفوت هل شدة وبعدين يتصرف..امه تبجي عليه..وابوه..مدنج راسه من الفضيحة ميعرف شيكول..وكلهه اتاني..اي واحد يطلع من الطوارى ويطمنهم..لحد ما طلع الدكتور..كلهه ركضت عليه وتسأل بخوف ولهفة..خير دكتور طمنه..
اللي مضروب بصفحته..ضربته سطحية..دخلناه للعمليات حتى يخيطون جرحة..وحالته زينه..
اللي مضروب براسة..شوية ضربته خطرة..بعد ما متأكدين منهه..
كل واحد بينت ردت فعلة على وجهه..اللي فرح واللي حزن وضاج..عمي صلاح..كعد ..بعد رجليه ما يستحملنه..ضل يدعي ويبجي الله يشفيلة ابنه..
اني ورة ما حققو وياي..خلوني بالتوقيف..على ذمة التحقيق..بانتضار مستجدات..لحد ما ياخذون افادة المضروبين..وابوية سالم يركض وراي..ويتبعني وين ما يودوني..من طلعوني..والكلبجات بايدي..جان واكف برة..جتي العين بالعين..رغرغن عيوني بالدموع..حسيته يريد يجي ويحضني..تقرب مني..كالي ابوج مراح يعوفج..بنتي  ..قوية وكدهه..لا تبجين..حسيت يكول ابجي..وابجي..اني زيدت بالبجي وبحركة طلعت البجية من كل كلبي..وبدون ما احجي ولا كلمة...كلمة ابوج..فرحتني هواي..وبنفس الوكت وجعتني..اجتي مو بوكتهه..ما كدرت احجي وياه..ولا اجاوبه..عيوني مغوشة..من الدموع..اباوعلة واشوف الخوف بعيونة..عليه..
الحنية..والوجع..بينن بدموعي..صوتة يرجف..وهوة يحجي..لا تهافين مراح اخليج.. هنا..راح اطلعج..باسرع وكت...
اخذوني صعدوني بالبوكس مال سيارة الشرطة..دموعة نزلت..وهوة يردد..لا تخافين ريمايتي..اني وراج..وحك بنتي..ما راح اخليج..
بكد خوفهه وحزنهه ..بكد ما كلامة ..جان برد وسلام..عليهه..
واخيرا..بقالي سند اتجي عليه..واخيرا..عندي ابو يوكفلي بالشدات..سلمت امري لربي..ادعي وانتخيه يخلصني..ويخفف مصيبتي..وهمي جان محمد..شصار بيه؟؟
نسيت كلشي وتذكرت انو رجلي..انو ابو طفلي..انو حبيبي..اي احبه رغم..كلشي صار.. حبيته..تسلل لكلبي غفلة بدون ما احس..وسكن كلبي ..اول رجال حلة بعيوني..واعرف بيه معنى الحب..رغم كل  الي صار بيناتنه..احبه..وكبر حبه بكلبي..ادعي ربي يكوملياه بالسلامة..ويخليه الية..حتى ابوية..وبالرغم من كل اللي صار..نسيت اني جنت شايلة عليه..وزعلانة منه..لان ظلمني..وشك بيه..تذكرت دموعه..وهوة يبجي..ويكلي..مراح اخليج وحدج..اني يمج..
كلت بلكي الله يفك ضيجتي..واطلع لبوية ورجلي..واعيش وياهم حياة جديدة..واكللهم اني شكد احبهم..واعشقهم..وافتح بيبان جديدة..بحياتي..وانسة اللي راح..واتصاحب وية الفرح..كافي اللي عانيته والتعب اللي تعبته..
مشت الايام..صعبة..كرار سوة عملية..ومن فضل ربي عليه..وكت العملية اكتشفو بداية ورم خبيث بكلياتة ..سووله عملية وستأصلو مكان الورم..لان المرض جان ابدايته..واكتشفوه بفضلي طبعا..هههههه
من سمع بالمرض وعرف الحقيقة كام يبجي..وتندم على سوايته..وياي..وجديتي وامة رزلوه رزالة تسوة عمرة..
محمد ..جانو خايفين اكو ارتجاج بمخة..لان صاير عندة نزيف داخلي..بس الحمد لله..ربي ستر ولطف..الدكاترة سوو اللازم واسعفوه وخيطو جرحة..وصار زين..تغيرت الاوضاع..كرار راح يخلوه بالحجز..لان حاول الاعتداء علية..بانتضار يطلع من المستشفى..واني كمت ادافع على روحي..بعد ما اخذو اقوال كرار..اللي اكد الحجي الي كلته..وبرؤني واخلو سبيلي..بيوم طلوعي من السجن..الجماعة..كلهم برة ابوية ومحمد..وعمي واولادهم وجديتي..جميلة..وجدي..طلعت لكيت الناس كلهه..برة..يتانوني..ما شفت احد ..بس محمد من شفته كلبي رف عليه..اجة علي يركض وشالني وحضني بكل قوته..وعصرني..ويبوس ويبسبس..الحمد لله عليج..مريتي..حمد لله على سلامتج..يا نضر عيني..كتلة على كيفك عصرتني اني والطفل..
اشتاقيتلج..
حتى اني هم اشتاقيتلك..
وخر راسة..ويركز وهوة ما مصدك..ريماا
عمرهه ما كالتلي كلمة حلوة ردت اتأكد..
ريماااا شكلتي..
كتلك حتى اني مشتاقتلك..
عليج الله صدك وحشتج..
اي حبيبي..
ما مصدك..هل حجي ردت استوعب..صدك لو جذب..
ابوي وعمي تراكضو علي كل واحد يريد يحضن ويبوس..عمي صلاح كوة جرني من حضن محمد..
كالة عوف المرة خلي نشبع منهه..
وابوية كال...وخرو ابوهه اولة بيهه..انحرم من هل حضن..سنين وسنين..وهوة اولى منكم..فتح ذراعاته..يتانيني اروح وارتمي بحضنه..باوعلي..وعيوني دمعت..عفت الكل..ورميت نفسي بحضنه..ابجي لف ذراعانة..عليه..وحضني وباسني..من راسي وايدهتطبطب على ظهري..
كالي ربي يخليج الية بنيتي..ريمايتي..اللي طلعت بيهه من الدنية..سامحيني..على كل...
ما خليته يكمل كلامة..
كتلة انته سامحني بابا على ردة فعلي..عاذرتك ومفتهمتك..كافي انو اني عندي ابو..كافي كل ما احتاجك الكاك يمي..حضني بكل قوتة..من شدة فرحة بيه..
لملمنة ارواحنة ورجعنة للبيت..مال عمي صلاح..راجعين فرحانين والهلاهل والصفكات مالية البيت..فرحانين بيه..واني ماسايعتني فرحة..بين ابوي ورجلي..اجمعو كلهم بالصالة..واني كاعدة بين محمد وابوي..كل واحد لازمني من ايد..ومحمد كل شوية..يشاورني..
ريمااا شوية الصبر اللي عندي خلص كومي نروح لبيتنه..
وجهي احمر من المستحاه..وعمي صلاح من بعيد صاح..ريمااا شلون هبدتي براسه..بالتحفية..
ضحكو الكل..ومحمد كال..هاي رادت تهبد كرار..هبدتني..وشكت راسي..هههههه ما وجدت..
اي غير جنت دايخة اشوفكم اربعة..
كامو يضحكون حتى انسى الموقف ويتبدل الجو..
جرس البت اندك..فتحنة الباب طلعو خوالي  وجديتي..اللي حضنتني وكامت تبوس بيه..سلمت على خالي ورحبو بيهم عمامي..وكعدو ويانة..
ريمااا..حمد لله على سلامتج..
الله يسلمكم..
خالي كال مستحين منج...ونشكرج لان جنتي سبب بانقاذ حياة كرار من المرض..
وجدج يسلم عليج..وما راد يجي..لان خجلان من اللي صار وما يكدر يباوع بوجهج..واحنة اجينه نهنيج على سلامتج..ونريد..ونريد..
اي خالي احجي شتردون ..لا تستحي..
نريدج تسقطين الدعوة..على كرار..لان نادم على اللي سواه بنتي؟؟
محمد وكف وكال حك مرتي وما نتنازل عنه..
جريته من ايدة..اهدي بيه..محمد اهدة شوية..خالي جيتك عزيزة علية..خلي شوية تهدة الامور..ونحجي بالموظوع..ردت اهدي النفوس..وتصفية الجو..
الجماعة راحو بعد ما كعدو يمنه شوية وهدت النفوس اللي جانت متوترة..بين كره وغضب وحقد بين العائلتين..اللي جمعهم ماضي اسود وخيانة  وموت ودم..بس بوسط هذا كلة جانت اكو نقطة بيضة تضوي ..هيه ريماااا..
انسحب التوتر ورجع جو النكته والضحكة لحد ما حجة محمد..
يا جماعة..معزومين الليلة..ابيتي بمناسبة رجوع ريماا الية سالمة..
ابوي كال..لا..لا..وليدي..ريما راح ترجع وياي..حتى نذبح الذبايح..ونعزم الناس..البعيدين..اريد افرح ابنتي..
اني ضحكت..ومحمد لسانة سكت..ابوي يريد ياخذني..ومحمد ما صدك ارجعلة..وكام يدردم..بس ...هية.. مو زين عليهه الطريق البعيد..
كمزت من مكاني..ردت اضوجة شوية كتلة..بلة اريد اروح وية ابوية..ولا تنسة ابوية ما حضر عرسي..خليه يفرح ..ولازم تجي وتخطبني منه..من جدة وجديد..وتسويلي عرس..
الكل ضحكو..ههههه.محمد وجهه كام ينطي الوان..من الصدمة..لمو ارواحهم..حتى يطلعون يرحون لبيت امي ريمة الله يرحمهه..
ابوية خابر خوانة حتى يجون على العزيمة..الليلة..
ابوية وياي ما عافني..ومحمد يتكرضم..وينفخ..وحالته..حالة..لحد ما وصلو ..لبيت امي ريمة..التهو بالعشة واللمة..والجو الفرايحي..محمد طلع وخلاهم..باحتفالهم..ذبايح..وريحة الاكل تفوح..والجو حلو..الجيران اجوي وفزعو وياهم..ولمة وهلاهل..ابوية جانت فرحته بية ما سايعته..
محمد اجة وجايب وياه..علاليك ..نطانياه..كتلة وين جنت طلعت من زمان..وشبيهه هاي العلاليك..
رحت للسوك شتريت ملابس حتى اكشخ واخطبج من ابوج..
كمت اضحك..لحد ما بطني وجعتني..
صدك تحجي محمد..كافي شقة؟؟
تقرب مني..ولزمني من خصري..
كالي وحك عيونج اللي كتلني..احبج..اريدج تفرحين..واعوضح كل اللي فات ..روحي البسي وتزيني..الليلة ليلتنه..
رعشة مشت بجسمي..وابتسامة..عريضة على حلكي..ولمعة بعيوني..حب وفرحة..ما كدرت..احجي ..اخذت العلاليك..ورحت للغرفة مالت امي ريمة..دخلت ولبست البدلة البيضة ..جت على قياسي فيت..وبركع..ابيض مرصعة بالليلو..خليت مكياج خفيف خدودي وردت..ونورت..من الفرحة..ردت ازيد المكياج دزيت على سمر..خبيرة بالمكياج..والميك اب..
اجتي سمر شافتني انبهرت...وج شنو هل جمال هذا..هههه
كتلهه غير نريد نعرس من جديد..
ضحكت ههههه تحجون صدك..صرتو نفس المسلسلات التركية..تخلفون يالة تزوجون هههههه..
اي شكو بيههه..الليلة عرسي..اركص واردد الليلة عرسي..والليلة يجي يخطبني من ابوية..
هههه حلوة الوحدة تعرس مرتين..
عوفي هل سوالف تعاي رتبيلي وجهي..
كعدت تمكيج بيه..كملت وطلعنة اني وياهه الصالة..وين ما ملمومين الجماعة..وبعد الهوسة والعشة..والجيران راحو..دخلت عليهم..عمتي سليمة من شافتني هلهلت..اللهم صلي عالنبي..بنيتي الله يهنيج..
ابوية كام واجة باسني..من كصتي وكعد يمي..
محمد حجة وعيونة حولت..من شافني وشاف جمالي..
عمي حجة كال اجيناكم اليوم..نريد نخطب بنتكم ريما لمحمد...
محمد كال هااا عمي هياتني..رجعت خطبت..مرتي انطونياهه..عاد خلي اخذهه واروح..
الكل ضحكو.. ابوية كال..ميخالف وليدي اجتك..ريماااا بس مو الليلة..خليهه الليلة تبات يمي..وبعدين ننضر بالموضوع..
محمد كام يبلع بريجة..والجماعة..خربو من الضحك..وغلسو ع الموضوع..محمد تخبل..خلاهم ملتهين..وغمزلي ..حتى اطلع عليه..طلع واني وراه طلعت..لكيته واكف بصف السيارة..ركبني بالسيارة حرك وطلع طاير..
ههه يريد يخليهه بايته..يمه..اني راح اتخبل وهوة يريد يليتهه يمه..
هههههه مخبل انته..
اي مخبل بيج..يا روح محمد..
ورة سنة..
بليلة راس السنة..ابوية ابيتي..الكيكة منصوبة ع الميز..والعشة الزين ..صحت بابا..تعال العشة جاهز..لا تكعدهه خليهه نايمة..حتى نكعدهه من نكطع الكيكة..
ابوية بغرفة بنتي..اللي اجتي على دنيتنه..وجابت الفرحة وياهه..ابوية يبوس بيهه ويبجي..والتاريخ يعاود نفسة ..تذكر من جان يلعب ويبوس ابنته..ملتحق لوحدته..#ليوثي
هاي نهاية ريمااا ان شاء الله عجبتكم..الرواية.. حقيقية..وصلتني من احدى الاخوات ..كتبتهه وضهرت بهاي الصورة مع الاضافات الكثيرة اللي ضفتهه..ومع تحفضي عن الاماكن الحقيقية..كما بدئتها كملتها..من وصلتني القصة..فكرت البنت شنو مصيرها..بلا سند بالاخير..اسدل الستار على جريمة..وكعت بيهه هل طفلة..المسكينه..ان شاء الله وصلت فكرتي..
شكرا لكل من تابعني..وانطة رأيه..شكرا على صبركم..وياي..ومتابعتكم..بالرغم من تأخري بالنشر التمس عذركم لضروف خاصة..شكرا لكم
ان شاء الله نتلاكة برواية جديدة..محبتي لكم..#ليوثي المياحي