وجع الماضي

الحلقة ٢٩

#وجع الماضي..
#ليوثي المياحي

من طلعنة من البوتيك..كمنه نفتر بالسوك..اني امشي واتلفت..يمنه ويسرة ردت بس اعرف مكانات السوك..صديقتي دخلت على محل ..مال غراض بلاستك..تتسوك منه..اني كلت الصديقتي..علما تسوكين راح اروح اتفرج على الملابس..بذاك المحل...وهاج هذا رقمي سجليه يمج اخاف اتيه خابريني عليه...كالتلي ماشي بس ابقي اكمل واجي اتفرج وياج واليعجبنة نشتريه..كتلهه ماشي..رحت للمحل مال الملابس وعفتهه بمحل البلاستك..
اختاريت طريقي..وقررت انهزم وابتعد..اللي شفته..كافي..اريد ادرس..اريد اعيش حياتي..حددت وجهتي لبيت جدي وخوالي..امي الله يرحمهه ويسامحهه..هي سبب معاناتي..ماتت وارتاحت..وخلتلي الهم والعذاب..اعاني بيه..انتو اكيد تكولون غلط تنهزم..ومو من حقهه لان هية على ذمة رجال..احب اكللكم..هوة مو هزيمة لا..لا..هاي اول خطوة..لبناء شخصيتي..المستقلة..وهية ابتعد من يمه..وبعدين  لكل حادث حديث..اني بقيت وياه..وتحملت وصبرت..كلت بلكي يكتشف الحقيقة..وتتغير نضرته اليه..بس ماكو فايدة..بقة بفكرة المريض..وما غيره..صبرت هواي..واللي عشته..وياه..كافي..لازم اشربة من الكاس اللي شربت منه..شوية شوية..فتحت التلفون..لكيته مليان مسكولات..ومسجات..لا فتحتهن ولا كلبتهن..دزيت مسج لصديقتي..سامحيني..جنتي انتي الوسيلة..حتى انهزم..سامحيني..بلغي محمد..لا يدور عليه..بعد...ضغطت ع الارسال وقفلت التلفون..
وافكر شلون..راح يتخبل..من يسمع ويعرف..ويفهم..راح يستوعب..شكد خسارتة..الي..ما منهزمة..بس اريد اقوي روحي وما ابقة ضعيفة من نتواجه..والمواجهات بيناتنه هواي..السيارة تمشي بيه..واني سارحة..بدنية اخرى..وهايمة بوجه الدنية..عائلة امي شلون راح يتلكوني..يقبلوني لو يرفضوني..يبقوني لو يطردوني..اريد ابتعد على عائلة بابا..عمي وعماتي..اريد ابني حياتي بعيد عليهم..اريد اتنفس الحرية..
محمد يحجي...
طلعت مكيف من البيت..واني افكر بيهه..كلت فرصة خطية خل تطلع وتغير جو..بدل هل خنكة بالبيت..ومن ترجع..احجي وياهه واحط النقاط ع الحروف..اريد اطوي صفحة الماضي..واحاول ابني حياتنه من جديد..خاصة انها طلعت نظيفة وصافية..واعتبر اللي فات مات..وابدأ من جديد اني وياهه..
بالشغل اني ومهندس بسام..كالي..اليوم فرحان ومرتاح.. وهوة يفرك باديه..اكو شي..جنك عريس بليلة زفته..
اي عريس لعد ليش لا..وانت شبيك ضايج..
لا والله ماضايج..انتة صاحبي واحب اشوفك..فرحان ومرتاح ..خاصة..انتة.من جيت وانته حالتك مو تمام..
جان الجو مخربط وضرووف خاصة عكرتة..بس هسة الحمد لله كلشي انحل وهدت النفوس..
اي هيج..ربي يسعدكم ويهدي بالكم..
شكرا صاحبي..
اندمجنة بالشغل..وعيني على الطريق شوكت اسمع صوت السيارة..جاية..
رجعت للبيت اجيب الخرايط مالت المشروع..شفت البيت كأيب..لان ماكو هيه بيه..الغرف فارغة..وباردة..هية جانت ماليتهه..ومحليتهه..البيت يلمع من النظافة..والتركيب اطيب تركيب..وريحة الجاي المهيل..دائما بخشمي..اريد انسى اللي شفته واعيش..مرتاح..اريد افرح وية ريماا..فرحتي..بيهه ما تنوصف..بس خربتهه من كامت تبجي..خل تجي وعندي وياهه هواي حجي..ابالي..اسويلهه ليلة رومانسية..وامسح دموعهه..واوعدهه بالمحبة..والوفة..رجعت للشغل..وعقلي وحواسي كلهه..رهينه ريماا..واذني توكف وية..كل صوت..يمر من يمهه..بانتظار انو ترجع..التهيت بشغلي..اباوع بسام..جاي يركض..وجهه مرتبك..اصفر..بقيت متبسمر بمكاني..اتاني بيه يحجي..
كالي محمد..وهوة يلهث..اخوية..
كتلة احجي شبيك..احجي..يباوعلي بعينة..ويخلي ايدة على حلكة..
مر..مرت...ك..
عيوني ضاكت..وعقلي ضرب..لزمته من ذراعاتة واهز بيه..شبيهه مرتي..شبيها..هيه مو راحت وية مرتك..
بسام موبايلة دك ..فتح الخط..طلعت مرته اني من سمعت مرت بسام عل تلفون جريتة من عندة ..واني خايف..كلت الووو....
ردت كالت الووو منو خوية محمد..
كتلهه خير شصار..شبيهه..ريما؟؟؟
الحقيقة..ما اعرف شاكلك..كالتلي بس اتفرج على الملابس بالمحل..اني رحت اشتري من ابو البلاسك..
اني كلبي وكع..بين ظلوعي..ليكون صارلهه شي..
اي احجي..شنو الصار..
مالكيتهه بالمحل مال الملابس..ضليت ادور عليهه..وخابرتهه ميت مرة ع التلفون..بس قافلتة..لحد ما انفتح واجاني مسج..
اي وشبيه..المسج..رحمة الوالديج احجي ع السريع..لان ما ضل بيه حيل..اكلج احجي.. ترة نفذ صبري ... شنهي الرسالة .. نزلت التلفون واني متفاجأ ودايخ من اللي سمعتة .. اخذت التلفون ورميتة من ايدي بالكاع.. بسام عيونة مليانة خوف علية من ردة فعلي اجة علية يركض ولزمني من ايدي .. محمد اهدة عيب العمال ديباوعون علينة امشي نروح للكابينة وكام يجرجر بيه واني عاجز حتى عن لملمة افكاري اللي تشتت ولا اشوف اللي كدامي حتى اتمكن اخذ قرار .. مرتي انهزمت مني ومن بيتي؟؟
قررت وحدهه وحسبت الرسالة هايهية راح تخلصهه مني؟؟ احس عروك عقلي ورمن وبلحظة يطكن من العصبية .. سحبت ايدي من ايد بسام ورحت اركض للبيت وهوة وراي يحاول يهديني ..محمد اصبر محمد لحضة احاجيك .. ما عندي شي نحجي بيه.. هل مرة راح تخبلني .. اني ضايع من البداية وهية كملت ع الباقي.. لازم اروح واحجي وياهه ..
لا تتهور اني راح اجي وياك..
لا ما تعب روحك خليني اتصرف وحدي ..
ميخالف بس لا تاخذ قرار وانته بهاي الحالة..
هدي اعصابك ..يصير سوء فهم بين كل الازواج.. ابداية حياتهم.. حتى يتفاهمو وياخذ الواحد على اللاخ..
ما عندي أي شي ابالي هسة بس اريد الكاهه.. وبعدين الي حجي وياهه.. حاجي مرتك كللهه خل ترجع وحدهه.. واني اتصرف..
ماشي اخوية .. الله وياك وشتحتاج اني موجود..
ما جاوبتة لان جنت احس بصخونة صعدت الراسي ما خلتني اشكر او ارد ...اوووف لو هسة الكاهه ...بدلت ملابسي واخذت سويج السيارة شغلتهه وطرت ..ما عدهه مكان قابل وين تروح لو لبيتنه لو لبيت عماتي.. لازم الكاهه والليلة لو كاتل لو مكتول مثل ميكلون .. بعد هذيج الليلة مستحيل اعوفهه او افرط بيهه مرتي وحقي وين تريد تنهزم مني.. اني وياج ياريمااا والزمن طويل وحدة بوحدة....
وصلت لبغداد  .. ومن حسن حضي عمي نطاني فلوس ومحمد فوكاهن هم نطاني ..ساعدني حتى اكضي حاجاتي وكروة ابو التكسي .. اللي نطيته الورقة اللي بيهة العنوان اللي نطتنياه مرت عمي ..بقيت محتفظة بيهه كلت يجي يومهه .. ابوية الله يذكرة بالخير ما ادري الله يرحمة جان يشتغل بالكرادة وبيهه عرف امي منى وتزوجهه..وتحدو الناس كلهه برغم الفوارق ..اللي بيناتهم بنت مدينة وابن عرب .. بس بالاخير خانته...
تمشي التكسي ..نسمة هوة بغداد ضربت خشمي ..حسيتهه غيرت هوة جان خانكني وتبدل هوة ريتي بهوة جديد انقى من هوة محمد..مثل ما اريد انسى محمد وطوي صفحتة واعيش صفحة جديدة
كلبي تنهد شلون انسة محمد نور العين ...ااااااااه يا كلبي شكد عانيت ..وكفت التكسي بمنطقة الكرادة .. جدام بيت جبير وحلو تصميمة مرمم جديد ومصبوغ بابة من حديد سلايد وحديقة وباب داخلي خشب ضخم..كلبي يرجف وخايفة من ردت فعلهم ..نطيت الكروة الابو التكسي ونزلت خطوة تمشي ليكدام وعشرة ترجعني ليورة ..وصلت الباب  رجلية توهدنن وكمت ارجف وما اسيطر على ركبي .. مديت ايدي على الجرس واني ارجف...قويت روحي ودست الدكمة دك الجرس ثواني واجة الرد صوت ثخين مال رجال ..نادى منو .. ترددت وبحت صوتي راحت وما طلعت الكلمة منه شاكول شجاوب ما جنت احب اكوللهم بنت منى 
حسيت جيتي غلط وتسرع مني بس هم  اهون من هم .. اقنع بروحي امي غلطت همة ما عدهم ذنب وهمة عائلتي رضيت او ما رضيت ..الصوت رجع وصاح ..منو بالباب ..ترة راح اطلع انعل والديكم روحو العبو بعيد ما عدكم احترام..رفعت حاجبي ..يبووووه هذا مبينة ما ينجرع .. وكفت عدل ولملمت روحي وجاوبت..اني ريمااا ..ريما
..عيني ريماا احنة ما طالبين شغالات..اخذتني كرامتي..ولساني كام يهلهل..شغالات شنو ..وين راح تفكيرك..اني ريما..بنت سالم..
ورة شوية انفتح الباب..وطلع واحد..نزل من درج الباب الخشب الدخلي..ركض من غير ما يباوع على الدرجات..فتح باب الحديد الخارجي..واني اباوعلة..عيونة..تلمع وتفحص..من فوك ليجوة..دفعته من جتفة..كتلة شبيك اخي عيب عليك شنو ما شايف..
كال..اريد اتاكد منج انتي ريمااا صحيح..
اي اني ريماا بشحمهه ولحمهه..تريد اثبات؟؟
اي اريد اثبات..لو سمحتي..
يعني اللي تجي وتكللكم اني بنت بنتكم ..بعد كل هلغيبة..ما تكولولهه اهلا وسهلا..
بلة نكللهه اهلا وسهلا وناخذهه بالاحضان..بس اللي نعرفة ريمااا تكرهنة وما رايدتنه؟؟ولا تعترف بينه..معقولة تجي بعد كلهل سنين؟؟..
اوكف جنت شايلة جنسيتي..وبطاقة امتحان السادس الاعدادي..مخليتهن بالجزدان..كتلة هاك مو تريد اثبات..هاي جنسيتي..اخذهه مني يباوع بيهه ويباوع عليه..عيونة نازلة صاعدة..كالي اوكفي..هنا هسة ارجعلج..دخل للبيت..ضليت افكر بمحمد ..وصلة المسج..وشسوة من قراه..اعرفة كل الزين راسه كوي..واكيد راح يدور عليه لحد ما يوصلني..بس تانيني محمد شوية الا اعذبك..واتوبك بكد الذل والوجع..اللي عيشتنياه..احلف..وارجع اباوع.. عجوز..طالعة..
ترعش..وتتجي على باكورة..وراهه شايب..هم يمشي وبايدة عكازته..وراهم الولد اللي فتحلي الباب..العائلة كلهه..اجت ..خفت وكلبي رجف..والعجوز نازلة..وتتعثر..بالدرج..والابتسامة على وجهه المجعد..ودمعاتهه تلمع بنظاراتهه نزلت من جواهن علخدود تحجي وصوتهه.. يرجف..
ريماا..اي والله..ريما بنتي؟؟
عثرت بالدرج ورادت توكع على وجهه..ركضت..من غير ما احس..لزمتهه..من كدام والولد لزمهه من ورة اجت اديه باديه..من لزمناهه..سحبت اديه..اوخرت..بس هية جلبت بيه واخذتني بحضنهه..وتتلمس بوجهي باديهه المكرمشة..ودماراتهه..طالعه مشت اديهه على وجهي..رغم التجاعيد اللي بايدهه بس شكد حسيت بحنانهه..ذكرتني بامي ريمة..الله يرحمهه..الوحيدة الحنينه علية..بهل دنية..
كامت تشمشم بيه..نفس ريحة امج..يا بنيتي..سنين وسنين..واني اتاني بيج تجيني..ليش هلكد طولتي غيبتج عليه..؟؟ليش حرمتيني..منج..
كامت تبجي..واني بحضنهه.. وبجتني وياهه..دخل علينه..الشايب ..وكاللهه وخري خل احضنهه..حضني واني حضنته..كالي مرحبة بنيتي كل الهلا بيج..وينج من زمان..انتاني بيج..تمرين علينه نشوفج ونطمن عليج..
ما لكيت شي اكولة الهم..كمت ابجي..دموعي اللي..حزنتهن سنين..من الوجع والظلم..سنين محرومة من ناس اتانيني وتتمنى تشوفني..لحد ما تنحنح الولد..الحليو..وكال..تعالو ادخلو لا ضلون واكفين بالباب..جوة اشبعو بجي..يلة امي وابوية ما بيكم حيل ضلون واكفين طبو جوة اكعدو ..جديتي..بقت مجلبة بيه وما ترضى تهدني..ايدهه لازمة ايدي..ودخلتني..للبيت..كلش حلو..اللهم صلي ع النبي..كعدت بالصاله..وياهم..جديتي كالت..كرار..كوم خابر امك..وخالك..شكر..وخالك ماهر..خل يجون..خل يعوفون اي شي بديهم وهسة يجون..
هز راسة..وطلع تلفونة..يخابرهم..وهية لزمتني..من ايدي..
تعاي بصفي..تعاي اريد اشبع منج..اشبع من ريحتج..وريحة المرحومة..ورجعت تبجي..حركت كلبي..يا ريمااا..انجويت مرتين..هية ماتت موتة صعبة..وانتي اخذوج من عدنه..
ما حصلنة لا حك ولا باطل..خلت خشمهه بشعري..وركبتي..حسستني بوجعهه..ضميتهه على صدري..
ولا يهمج..الحمد لله جدة..على كل حال..
امج جانت كلش حلوة...وابوج بشر ويتأثر بكلشي..وبدة الحجي حجاية اجيب حجاية..وحجينة كلة بيه تحفض ..خاصة العيون اللي تراقبني من اول ما اجيت...عيون كرار وهوة يخابر بالتلفون ..ابد ما نزل عيونة من يمي .. ورة شوية والباب اندكت..اكثر من مرة وبكل مرة يدخلون ناس ..عرفت كل العائلة ..تعارفت وية الكل ..حسيتهم فرحانين بية ويريدون يطيرون بية طير.. وكل شوية واحد يسألني واني اجاوب.. اني كلتلهم..ما شاء الله انتو عائلة جبيرة لعد ليش ما حاولتو تتصلون بية ..بعد ما هددوكم عمامي مرة واثنين..سكتو الكل وما كو واحد رد على سؤالي ..بس كرار كال اني دورت عليج وما لكيتج كل ما اروح واسال عمامج ما ينطوني نشدة.. وانتي هم ما حاولتي تتصلين بينه ..ولا تعرفين احوالنة.. كلت ميخالف لازم يجي يوم وتجين علينه ..كلت اذا هية حابتنة ورايدتنه اكيد رجليهه راح اتجيبهه النة .. ولا عبالج احنة قليلين شر بس ما ريد كل مرة نسويلنة مشكلة ويضل يعايرونة بذيج السالفة..احنة ناس مستورين وما نحب الفضايح واللي توقعتة هياتة صار ..
باوعتلة وحاسة انو جاي يريد يسيطر علية او يفرض امرة شنو اني دائما اكو رجال متسلط علية اذا بعمامي او خوالي ..تركو كل اشغالهم بيومهه وكعدنة نسهر كلنة بالبيت..وصارت عزيمة كلش جبيرة ..جانو فرحانين بية خاصة ولد وبنات خوالي اللي تعرفت عليهم بليلتهه جان هوة المتسلط وحجايتة الماشية ..اللي عرفتة الكل يجون يزورون جدي وجديتي ..ويرحون لبيوتهم بس هوة مخلينة عايش وية جدي وجديتي حتى يداريهم  ويشوف طلباتهم..
ورة شوية والجماعة راحو لبيوتهم جديتي كالتلي تعاي حتى اشوفج غرفتج.. تردين غرفة امج تكعدين بيهه لو احضرلج غرفة ثانية.. نغزتني اني ما احب اذكر امي.. والاسباب معروفة .. كتلهه أي غرفة ..ما اكدر انام بغرفة امي لان اضل ابجي.. ودتني لغير غرفة تمددت على السرير وهية ارتجت بصفي ..كالتلي احجيلي بنيتي ريماا  شنو شصار احنة وحدنة ومحد يسمع.. وحسبالك شريط حياتي صار كدام عيني حجيتلهه السالفة كلهه من البداية للنهاية ابجي واحجي وهية تبجي وياي مرة تحضني ومرة تمسح دموعي...
كلشي سولفتة الهه بس سالفة زواجي من محمد ما كلته الهه..ولا جبتلة طاري ..جانت هاي اول ليلة لحياة جديدة مشيت بيهه باختياري وما فرضهه احد علية...
محمد...
طلعت بالسيارة طاير لبيتنة ما لكيته بي وراهه رحت البيت عمتي سليمة ..كل عقلي ما تنهزم لغير مكان لان ما عدهه مكان تروحلة غير بيتنه وبيوت عمامي.. ضجت حيل وتعصبت وصخونتي صعدت لاوكفت بمكان ولا ارتاحيت رغم حالتي التعبانة.. لحد ما وصلت ..وكفت السيارة كدام بيت عمتي سليمة .. دخلت لكيتهه وحدهه سلمت عليهه ..امل من سمعت صوتي اجتي تركض ..اتفاجأت بشكلهه شعرهه كصير مزينينه التكول ولد..
عمتي تحجي واني اسال اريد افتهم .. كتلهه عمة شبيهه امل ليش كاصين شعرهه هيج ..خاف بيهه ذاك المرض.. كالت لا وليدي ربي الستار والحافظ ..وجان تحجيلي السالفة بالتفصيل.. وهية واكفة وتسمع.. عينهه كوية لا حجت ولا حاولت ادافع عن روحهه ولا نكرت ..التفتت عليهه وسالتهه واني كلبي يشتعل نار..صحيح امل اللي سمعته من امج؟؟ يعني اللي كالتة ريمااا وابوية صحيح.. واني جذبتهم وما صدكت بيهم..صحيح؟؟ يعني انتي صدك هيج سويتي ابنت خالج .. عيونهه مليانة دمع ..من غير ما تستحي ولا تخجل..كالت كلة علمودك؟؟ما خليتهه تكمل وضربتهه براشدي معدل ونطيتهه راشدي ثاني خليت حلكهه يجري دم  وكعت بالكاع ..لو بيدي جان خنكتهه دمرتني ودمرت حياتي من ورة انانيتهه وحقدهه.. وعمتي لازمتني وليدي انته جبير حكم عقلك غلطت وتعاقبت ابوهه خلص عليهه واسبوع جلدهه ازرك ونايمة بالفراش كصلهه شعرهه وبطلهه من الدراسة وليهسة مزاعلهه وما يحاجيهه.. باوعتلهه واني اصيح شنو من عقل عندج حطمتي حياتي .. من هيج ريماا انهزمت مني ..وجاي ادور عليهه .. عمتي ضربت صدرهه ..يبوووه صدك وليدي لا يا ربي لا.. اني كلت الابوك بصباحية عرسكم وحجيتلة كل السالفة ..ليش اشسويتلهه وانهزمت.. اني اضرب وجهي بادية بعصبية.. كتلهه سويت بيهه اللي ما يتسوة ..ما اكدر احجيلج شنو صار بيهه كامت امل من بعيد وهية تمسح بدموعهه وتضحك.. أي حيل بيهه.. الله يلعنهه  وياخذلي حقي منهه
الله استجاب دعائي شكد دعيت عليهه من كل كلبي ودعوة المظلوم توصل من غير حجاب.. وبعد وبعد شوفو شراح يصير بيهه؟؟ رجعتلهه ولزمتهه من ركبتهه بادية وكمت اخنك بيهه اهز بيهه وايدي محاوطة ركبتهه النفس بدأ ينكطع عليهه وعمتي تسحب بية من ايدي... وليدي محمد حلفتك بجاه النبي ..وليدي عوفهه عوفهه اني مو عمتك لخاطري عوفهه سحبتني بكل قوتهه من ايدي وكعتني بالكاع وسحبت بنتهه اللي كامت تكح وكوة تسحب النفس
الله لا يوفق جامل يا جلبة عفتهم ومشيت طلعت من البيت واني اسب وافشر صعدت بالسيارة رحت البيت عمتي الخ.. وهم ما لكيتهه..رجعت رحت لبيت امي ريمة الله يرحمهه..واني دا امشي بالمنطقة جان اشوف حسام بسيارته  ستوة نزل منهه ..عرضت سيارتي ونزلت منهه والزمة كتلتة كتلة عمرة عفته مدمة مشمور بالكاع ركبت سيارتي ورجعت ادور حاير وخايف على مرتي ومتحير على ريمتي جوهراي الغالية اللي ضيعتهه من بين ادية

اسوق واضرب على الستيرن بايدي من القهر .. سويت اللي اجة بتفكيري وانعميت ع الحق افكر بيهه وبمنظرهه وهية وياه ..اهز براسي اريد انفض هل فكرة المشؤمة اللي جلبت بيه.. وين راح الكاهه.. وينج يريماا.. والله عرفت يشلون ترينهه الي وتعذبيني.. وصلت لبيتنه بنص الليل من دخلت ابوية تفاجأ  كالي شبيك ..محمد وين مرتك.. اووووف يعني معناهه ما موجودة يمكم..انهزمت..انهزمت بابا.. لزمني ابوية من ياختي وكام يهز بيه..
ليش اشسويتلهه وخليتهه تنهزم منك.. والله حرامات بيك ما تستاهلهه.. شكد وصيتك عليهه .. وكلتلك الحقيقة ..بس والله حيل بيك..طلعن صدك مرة وبنت رجال.. خلي حتى تعرف قيمتهه .. بابا هذا  الحجي مو وكته هسة خل نطمن عليهه وبعدين شتريد تسوي بيه سويه.. وين الكاهه هية ما عدهه مكان تروحلة بيوت عماتي دورتهن ماكو مرايحتلهم بيت جديتي ريمة الله يرحمهه  رحتلة وما لكيتهه.. وهنا ما اجت وين تروح ..بقت بس خوالهه يجوز يمهم انطيني عنوانهم يابة خل اروحلهم...والله يا وليدي ما اذكر وين مكانهم اليوم البارحة منو باقية ابالة...كلي البارحة شتغديت ما اتذكر تريدني اتذكر قبل عشرين سنة.. بس يمكن امك تعرف هياتهه سمعتنه واجتي .. نكرت وكالت يا يمة اني ما اتذكر صار سنين يابو سنين .. يعني ما بقة غير نبلغ الشرطة.. هااا تبلغ الشرطة على مرتك.. شتكللهم انهزمت مني ..والله رجال ؟؟ كافي يابة اني بيا حال وانته تقشمر علية .. امي كالت احسن وليدي ارتاح منهه والله لا اخذلك اغات اغاتهه .. وعلكت بين امي وابوية عفتهم وطلعت اللي بيه مكفيني ..وينج يريماااا.. حيل بيك يمحمد.. اللي سويتة ابنت عمك اليتيمة مو قليل ..امانة وضيعتهه..# ليوثي