وجع الماضي

الحلقة ٧

استهديت بالرحمن ونعلت الشيطان... توضيت وصليت... لبست شالي وعبايتي الاسلامية.. امي ريمةالله يرحمهه جانت تكلي..الستر مريود بنيتي..والخوف يكون من الله مو من عباده..اييييييه الله يرحمهه هيه بدار حقهه واني بدار الباطل ...وياما راح اشوف واشوف باطل..تعيشون وتشوفون وياي؟؟؟؟طلعت من غرفة الاستقبال ...اتفحص بيت عمي ماشاء الله بيت عامر قصر من طابقين..كلش جبير..غرف نوم وصالة طابق ثاني كلشي بيه..مطبخ وبلكونة على الحديقة ترد الروح..الاثاث كلة فاخر تبارك الله الله يزيدة ويعمره..اني جنت اتصور بيته حلو وضخم بس ما جنت متوقعته بهل الشكل..طلعت لكيتهم ملمومين على طاولة بالبلكونة وديتريكون كلهم... صبحت عليهم ....صباح الخير جاوبني عمي وكام من مكانة جرلي كرسي بصفة والغراب جان كاعد كبالي..كالي صباح النور ريما تعاي اكعدي يم عمج ..كعدت بالكوة..هوة جاوب من يمة ونبز..كال صعبة شوية ..شتو ما مرتاحة يمنه..عمي اندار عليه..وخزرلة عيونة..اني كبل ما يكمل رديت عليه حقي اخه بذراعي ما اتاني واحد ياخذة الي..
اني عايشة بخير طول عمري اشتم ايدي اشبع ...بس اويلي ع الجوعي شكد ميخلون بحلكة يبقة جوعي..سحب الكرسي يريد يكوم حتى يضربني.. وجان عمي يصيح.. شنو من صباح اكشر هذا ..استحو واحترموني ..هوة نزل راسة ليجوة وكالة سامحني يابه.. وسكت...صبح مبين من اولة مغثة..كعدت على اعصابي.. جانو مسوين جاي وكيمر وصمون حار وعسل وزبد اني ما جنت احب هذا الريوك بقيت لازمة الخاشوكة واخوط بالاستكان.. وصافنة ..عمي كالي شبيج ماتتريكين لو ما يعجبج؟كتلة والله عمي اني ما متعلمة اتريك هذا ريوكم ..اني اتريك بيض عيون .. لو بيتنجان تكلاه ..لو طماطة وبيض.. هذا ريوكم النكناكي ما احبة.... الغراب كال هاي مرة هاي...حتى اليكعد كبالهه اسد نفسة على الاكل وتخليه يغص بالكمة..عمي كام يضحك هوة وبنته سمر وانور..وغراب البين غص وكام يكحكح باللكمة حتى روحة رادت تطلع...هههه اجتي امه تركض بكلاص المي ....اسم الله عليك وليدي...هاك هاذ كلاص المي... اني دنجت راسي واضحك.. يبووووو على حبيب الماما....هية غصة... سواهه معضلة... مرت عمي راحت وسوتلي بيضتين عيون..كعدت عليهن وخلصتهن..حتى لحست الطاوة لحس...كمنا حتى نطلع...عمي كالي ريما انتي اطلعي وية محمد...بسيارته..واني وسماح وسمر..بسيارتي... وانور يروح بسيارته..اني تململت وضجت ونفضت ايدي...كتلة عمي لاتحط بانزين ع النار....اني تربيت ما اختلي برجال وحدنه..كالي ميخاف بنيتي اخذي بكلامي ..راح يصير رجلج بالمستقبل..اذا الله راد اسمعي كلامي وانطي لروحكم مجال حتى تتعرفون على بعظكم..عمي بعدة ديحجي والغراب جرني من ايدي اجرجر للسيارة وهوة يدردم كافي صايرتلي عزيزة امشي للسيارة شوفيني شتردين اسووين... كافي تدللين ..اسوين نفسج خايفة تصعدين وياي.. وانتي منو رايدج...والله يا الله...صعدني بالسيارة وسد الباب عليه ..واني ادردم ومشتعلة نار..شغل سيارته ومشه سريع..كالي يالة ما تحجين شو انكص السانج..كلتلة لا ما انكص بس اخاف احجي والشيطان اللي ويانة يروح ينتحر ..ههههه يضحك بعرض حلكة واني صافنة عليه سبحان الله طلع يعرف يضحك ..والغراب الاسود انكلب بقدرة قادر الى رجال يسحر معقولة من ضحك هيج انكلبت كل تقاسيم وجهه..وبين شخص ثاني غير العرفته...كالي ولج شبيه لسانج متبري منج هيج..جديتي امنه ماجانت هيج عليمن طالعة ..اني احجي وياه ودايرة راسي على الشباك..كتلة لا..لا هاي موهبة من الله اللي يتجاوز علية اردلة الصاع صاعين..بلة اسكت خليني اتفرج على الشارع وانته بالذات لا احب احاجيك ولا اتقرب من يمك..كالي اي صدك بهاي عندج حك ..من كثر ما الرياجيل اموته روحهه عليج ..كمتي تتشرطين وتددللين وتختارين ويامن تحجين ويامن ما تحجين..التفتتلة والنار مشتعلة بيه ..نرفزني من كلامة ..بس ما ردت ابينلة انفعالي وتوتري حتى مايفرح..كلتلة لا..لا ابن عمي اني اسم الرجال ماسحته من قاموسي تريدني ابدة بيك انته..كالي منين يمعودة اشو الخطيب اللي تقدملج انهزم بليلة خطبتة..وخرب عليج فرحتج..هههههههههههه اني نطيته ظهري حتى ما يشوفني واني مقهورة وضعيفة..كتلة لان الرجولة مو حجي ومة كلمن لبس بنطرون كال اني رجال ...الرجولة افعال .. والخطيب جان مو رجال..بلع لسانه من الصدمة وجوابي عليه...كملنا الطريق واحنة ساكتين..لحد ما وصلنا....محمد يحجي....اني ما اعرف هية قوية لو تتضاهر بالقوة ..الكلمة تردهه كلمتين ..ما تسكت اذا انجرحت..عمري ما صادفت مثل هاي النوعية من البنات..درست وفتريت وتعرفت على هواي بنات بس شخصيتهه فريدة ابد ما صادفني مثلهه او حتى قريب لشخصيتهه..شي جديد اول مرة اشوفه..انوب التحدي اللي بيناتنه بيه خلطة عجيبة مابين نفور وكره وقرب وفضول ...بكد ما اني اكرهه وخاصة انو هية مفروضة علية فرض بكد ما اني فضولي حتى اعرف طينتهه وافهمهه واسمعهه ..وخاصة من تحاول تقلد حجينة ..ما انكر هية حلوة وبيهه هواي اشياء زينة ..وبيهه صفاة ما موجودة باي وحدة ..وهية معروفة بحسن تربيتهه من جديتي امنة الله يرحمهه ..بس الهه وجه ثاني دائما اشوفهه بيه..وجه الماضي الاسود اللي لازك بيهه..انوب لزك بيه اني همين..لازم الكة حل ..واخلص منهه..ما اريد ارتبط بيهه..خاصة انو اني اكرهه موت مثل مكتلكم..شلون ازوجهه واني اشوفهه شوفت العمة..شلون اوزج وحدة ما احبهه شلون....
وصلنه..للجزيرة السياحيه..شفتهه كلش حلوة..المي والملاعيب..والبرج..والناس والزوارق كلش حلوة..امشي واباوع مثل الماشايفة منا ومنا..ما منكد عليه الطلعة غير غراب البين..سبقته بخطوات..سريعه..لحكت عمي..كعدنه..بوسط ثيلة جوة شجرة كعدة عائليه..اكل وكرزات ومشاريب..وحجي وضحك..ابد ما حسيت بالتوتر..جنت عايشة اللحظة ومتونسة بوسطهم..حتى اللهجة مالتي صح تختلف عن لهجتهم بهواي كلمات بس ما جانت مضوجتني..اضحك على ححاياتهم ويضحكون على حجاياتي..ونكات ونسة من صدك..الغراب جان ..مدلغم على روحة..تعرفت بالزايد على عائلة بيت عمي سمر جانت كلش لطيفة وياي.. وانور واحد منكتجي ودمة خفيف وجهه بشوش عكس غراب البين.. اللي معقد.. ومعقد الناس وياه..امهم سماح بكد ما هية زينه وياهم بس حسيتهه تميل لغرابي اكثر منهم..وهذا اللي انعكس على معاملتهه وياي..ورغبتهه بية..يبوووووه شكد اتخاف عليه الي يكول وحيدهه..ترعش عليه رعش..دائما تحاول تساندة اذا بالحجي او بالفعل اتأيدة بكلشي..اذا جان صح او جان غلط..تباوع على حلكة...حتى لو وكع اكل على ملابسة ..تلكاهه تركض تمسحهه.. تسوي شغلات ماتسويهن وية بقية اولادهه..الي يكول نازللهه بجفية..واني اراقب واضحك من جوة ليجوة..بلكي يصير بيهه فايدة وتكدر تحل موضوعنة..عمي بدة الحجي كالي ريما,...انتي لازم تحضرين اوراقج حتى ادخلين للجامعة..ابغداد..حتى تتعودين على السكن هنا يمنه ومحمد راح يجيبج ويوديج للجامعة..الغراب حجة ونط...ليش يابة شنو السايق مال حضرة جنابهه اني...اني رفعت حواجبي باستهزاء..واني اباوعلة بتك عين ...كتلة شكو بيهه سواق الست؟؟؟؟هوة كمز من مكانة وامة لزمته من ايدة ورجع يحجي ....يابة اني احترمك كللهه تحترم نفسهه ولا تضل تنطط وتختبر صبري..عمي كالة صلي على النبي ..وليدي هية قابل شكالتلك..كتلة اني ما كلت شي هوة عمي كال توديني وتجيبني..حك لحيته المهلسة..بقهر حسيت لو يلزمني بهل لحظة الة يخلي كل قهر الدنية بيه ..بس ما اخاف لان عمي وياي ..
عمي كالة.. كبل ما تاخذهه وسجلهه بالجامعة لازم تخطبهه وبحضور كل عماتك..نسوي حفلة عائلية ع كدنة..ورة منرجع تاخذهه وترحون تختارون حلقات وكل الذهب اني راح اصوغة الهه..لا تخلي شي ينقصهه ..ريما ما يغلة عليهه شي..اي شي تريدة تاخذه الهه بدون مناقشة... ولا تهتم للفلوس..هااا ولا تناقشهه..اذا من محلي او اي محل ثاني منين ميعجبهه ..واني سداد..اتنهدت حسيت روحي تريد تطلع حسيت روحي دخلت بقفص ما منه طلعه..واني مو كد التحدي برغم عزة نفسي وقوتي بس ابقة بنية مكسورة جناح..ما حلة بعيني الذهب وكل اللي راح ياخذوه اليه..ستوني ردت احجي..والغراب كال..مو بعد وكت يابة ..خلينه بعد نتعارف على بعض..كالة عمي ..زين احنة راح نروح وانتو اكعدو وتفاهمو وحطو النفاط على الحروف ..بعد ما اريد اسمع ولا اشوفكم تتعاركون ..هاا وللعلم الخطوبة هية للتعارف...ما اريد واحد يمس بنتي بكلمة او يجرحهه..مرة عمي كالت...اي شبيك يرجال خل يتعارفون على بعضهم..وراهه يقررون شوكت ينخطبون ويعرسون انطيهم وكت..عمي خنزر عليهه تخنزرة مالت موت..كاللهه من شوكت انتي تكسرين كلامي ...كلمتي وحدة وما صير اثنين..وهل كلام يمشي على الكل مو بس همة ...ماشي..واني اللي اقرر الاثنين الجاي الخطوبة والخميس العرس بعد ما تخلص اربعينية امي الله يرحمهه..كلنة سكتنه..الغراب ازرك..والبقية احمرووو..مرت عمي خنجرت..بعد ما اكلت رزالة زينة من عمي..كلت خل اذب بانزين عنار واعلكهه فدنوب..كلتلة..مبروووك عليك اني..يا عريس..انور وسمر..كامو يضحكووون..ويكلولة مبروووك...مبرووووك.. عمي ابتسم..الا الغراب..وامة وجهم مدلغم...خلصت الكعدة..عمي كام..ونطاني هدية..علبه حمرة ...فتحتهه لكيتهه كلادة ذهب..بيهه الحرف الاول من اسمي..لبسهه بركبتي وباسني...وكالي مبروووك..بنتي هذي..هديتي الج...ستوني ردت اشكره..ومرة عمي..وراه اجتي وباستني..من راسي..وشاورتني كالتلي الف مبرووووك..اتدللت على الاخر..شنو من هدايا..وذهب..ما متعودة على هيج شي اني..باوعت بعيون الغراب جانت تلمع..وشفايفة..ترجف وترف..جنة يريد يكول..شي..بس ساكت..ويمتمت..عمي التفتلة وكالة..امشو روحو تمشو بالجزيرة..وتحاجو واتفاهمو..التفتلي الغراب ..وهزلي ركبته..مشى واني وراه..رحنة يم المي..جان منظر الزوارق بالمي كلش حلووو..جنت اشوفهه بس بالافلام..تربعت على الصبة يم الجرف ودندلت رجليناتي بالمي ..السمج ناعم جان يدغدغ برجلية وكلساع افز واعيط..والغراب يضحك علي..جان مكابلني..كالي اكلج عود انتي من صدك موافقة ع الخطوبة..خنزرت عليه المنظر جان كلش حلووو ومفرحني..فرحة مو عادية.. خزرتلة وحواجبي يلعبن..واني ابتسم....انا العروسة....يا عريس...يا عريس..تنهد وكالي..اني ما اريدج..لازم الكة حل..وياج..بالنسبة الي الموت ..ولا انتي..امسي واصبح..بوجهج لا لا مستحيل....مو انتي المرة..اللي احلم بيهه..ابد..عاد صدك نفذ صبري وحمة حمامي..وكفت بعد ما طارت ونستي..وهوة يخزرلي عيونة..يتاني ردة فعلي..عيوني انعمن والصورة غوشت ..استحضرت كرهي..لموقفة مني ومن غير ما احس حطيت ايدي على صدرة..ودفعته بكل قوتي..وكعته ..كتلة عود ما اوصيك ابقة احلم..زين...الدخان كام يطلع من خشمة..عفتة ومشيت واني اتلفت..حتى اتاكد كام من وكعته لو لا..تنهيدة انحبست بداخلي..اريد اطلعهه..بس ما تطلع...وكف الحيلة..وصاح علي..وحك اللي خلقج..اليوم اكتلج اكتلج..التفتت عليه وطلعت لساني..ورحت اركض واعيط..عمي ...سامر..الحكولي..كمت اركض..همزين العائلة جانو يلمون بالغراض حتى يرجعون للبيت جوي يتراكضون على صياحي..كاله دمسهه..وشوف شسوي بحالك..اتخلي عقلك وي عقلهه..هز راسة ولزم حنجة..وهوة يهدد وايدة على شعرة..والقهر كاتلة.....يتبع