وجع الماضي

الحلقة ٣٤

كل عام وانتم بالف خير ..عيد سعيد..ينعاد عليكم بالخير والصحة والسلامة..
#وجع الماضي

جنت لازكة بيه..ورة محجة..حسيت ابروود..حسيت روحي تريد تطلع مني..ليش؟؟؟شنو اللي سويته بدنيتي..كل ما اجي افرح تنسد بوجهي..
جمدت بمكاني..ورجلية وادية تيبسن..ما كدرت اهز راسي..واباوع بالوجوه ..وعمي..كلة..شنو هل حجي..سالم..بعد هل عمر..وحتى لو..ترة هية رباية امي ريمة..الله يرحمهه..وبنتنه..
صوتة وصلني سجاجين بكلبي..
كالة اي اعرف..احبهه..ويا ريت تطلع بنتي؟؟اريد اطلع عايش بحقيقة..مو جذبة..حياتي بدت بجذبة..جنت عليه..وعليكم..مرة حبيتهه..ونطيتهه عمري ودنيتي..كافئتني..بالغدر والخيانة..
حطوا روحكم بمكاني..شمعرفني انو هية بنتي..امهه كالت..واني ما اثق بامهه..ترة اني خلصت هلسنين بالغربة..اتجرع المر؟؟لا كدرت انسى..ولا كدرت اعيش حياتي..انحرمت..من كل شي..ابسط..شي انحرمت منه امي اللي ماتت وما ودعتهه..حسو..بيه..وافتهموني..هوة تحليل بسيط يبرد ناري..وينسيني اللي راح..عل اقل اطلع بشي من هل دنية..
عمي كالة..واذا طلعت مو بنتك..شنو نشمرهه بالشارع؟؟
لا..بس اكون عرفت الحقيقة..وبردت ناري..
اني بعد ما اريد اسمع..ولا ابقة كاعدة يمهم..يعني اذا ما طلعت بنته..يخلوني يمهم..صدقة لوجه الله..
ابد ما اجت ابالي هاي السالفة..اني اللي عمري كلة عايشة..مكسورة جناح..بسبب امي منى..بنات المنطقة كلهن عدهن ابهات..بس اني لا ام ولا اب..امي ريمة الله يرحمهه..جانت توكف بوجه..كلمن يحجي عليه..حتى لو بكلمة..وما  خلت واحد يغثني بحجاية..وكفت وياي وكفة رجال..وما كالت مو بنتي..وانته جايني بعد كل هل سنين..تكلي اريد اتاكد بنتي لو مو بنتي..ما حسيت بكلبك..وما حسيت بحنية..ما حسيت برابط يربطني بيك..ما ركزت بوجهي..حتى تعرف اني بنتك لو لا..اتوصمت بالعار..واني ما الي اي ذنب بيه..جيت انته حتى تكمل..تكسر اللي جبرته..طول السنين اللي راحت..
وكفت وحتى الدموع نشفت..وما تريد تطلع..
حقك..لازم تتاكد..بس اللي راح تسويه بهل تحليل..راح يكطع اي رابط  بيني وبينك..محد كايلك هاي مو بنتك..
المهم..ماشي راح اسوي التحليل..بس تنسى انو اني بنتك..لو ثبت التحليل..فعلا انو اني بنتك..اني مراح يأثر عليه..لان اني من الزغر..موصومة بالعار..
ابتسمت..وما اعرف ليش؟؟حتى الوضع مو مال ابتسامة..
سوي اللازم وانطيني خبر ع الموعد واني اجي اسوي التحليل..ومنا لذاك الوكت..اني مو بنتكم..لحد ما نشوف نتيجة التحليل..
محمد الله يخليك طلعني منا..وبعدهه..انته حر تريد تبقة وياي او تعوفني..
طلعت ما اعرف شلون كدرت امشي..بس حسيت بخطوات محمد..بصف خطواتي..فتح باب السيارة..وصعدت..من غير ما احجي..شغل السيارة وطلعنة واني دايرة وجهيي للشارع..ما ردت تجي عيني بعين محمد..السيارة تمشي..واحنة ساكتين..مخنوكة..والدموع محبوسة ما ترضة تنزل..وتريحني..لحد ما وكفت السيارة..التفتت لمحمد..مد ايدة..وسحبني عليه..وحسبالك اني جنت اتاني حضنته..بجيت..لحد ما فرغت كلبي..محمد يحضن بيه..ويرجع يبوسني..من راسي ..جان حاس بوجعي..
بكل الاحوال اني وياج ريمااا وما اعوفج..انتي مرتي..وام ابني..اذا طلعتي بنته..او مو بنته..هذا ميهمني..
حجي متكطع وشهكات..كلتلة..واذا طلعت بنت حرام..لا راح اشرفك..ولا اشرف اهلك..وشلون راح اخلي عيني بعينك..وشلون راح تكون معاملتكم وياي..
ليش خليتني اروحلة.. من كاللكم مو بنتي..
تدري ذبحني..كتل الشي  الحلو بيه..ما كدرت اكمل حجي تعبت..من البجي..محمد غسلي وجهي..ومد الكشن على طولة..مديت جسمي..وغمضت عيوني..اريد انسى اللي جرالي..اتمنى انام واكعد الكاهه مجرد احلام..اااااه يا ريماا عمر يش هذا..والمكتوب فوك الجبين لازم تشوفة العين..
وصلنة لبيت عمي ..كعدني محمد..لكيت روحي..تعبانة..كتله محمد دخيل الله لا ابيتكم ..خليني بعيدة..وارحوك لا تضغط عليه..اخذني لبيت جديتي جميلة..وتعالي شوكت متريد..لزم ايدي..وكالي شنو ريما..هم تردين تنهزمين مني..وتتصورين اعوفج وحدج..لا..لا..اني مو ناقص اصل..امشي اخذج لبيتنه..باوعلي وحسبالك جاي يشاورني..يعني انسي..وخل نبدي من جديد..واني روحي طالعة..جاوبته بسكوتي..رجع شغل السيارة..وطلعنة لبيته..نزلت بالكوة كدام البيت..رجلية خاينتني..ومحمد..فاهمني..وحاس بيه..ما كدرت امشي خطوة..اجاني ولزمني من ايدي..لا تخافين ريماا..اللي فات مات..انسي..راح نفتح صفحة جديدة..بيناتنه..ما رايد شي منج..كافي انتي يمي..يالة ادخلي بيتج مريتي..وتوكلي على الله..وسمي بالرحمن..
اني بعدني متوجسة..خطوة ليكدام وخطوة ليورة..اريد اروح وياه..وخصوصا..ويه حجية اليطمن ..اوكفته وياي..وتشجيعه..الي..بس خايفة..خايفة اثق بيه..ويخلة بيه من جديد..لح بحجية..وياي..يلة ريمتي لا تعاندين..ادخلي ونوري بيتج..
وية ريمتي..ومريتي..وبيتج..لكيت روحي..امشي وياه..وادخل البيت..يمكن الله..جعل هل سبب..حتى ارجع لمحمد..ما حبيت افكر..ولا احلم..لا كل ما احلم..ينكلب الحلم ضدي..دخلنة البيت..وايدة بايدي..عكس دخلتنة بيوم العرس..فتح الباب..ودخلنة..اشتميت ريحة العرس..بالبيت..يا دوب خطيت الخطوة الاولى..بالبيت ومحمد سد الباب ورانة..فزيت..كتلة ليش سديت الباب..تقدم علية ولزمني من خصري..بحنية..ومعزة..حط كصته على كصتي..حتى عيوني غمضن وحدهن..
واخيرا سديت باب بيتنه..علينة..واخيرا رجعتج لبيتج..انام واصبح وانتي يمي..
احم..احم..لا مو يمك..انته بغرفة واني بغرفة..
ههههههه ميهم المهم..انتي يمي وابيتي...اااااااه شكد عذبتيني..ريمااا..خليتيني..امشي مثل المخبل..بالشوارع ادور واسأل..ااااااه يا ريمااما مصدك اخيرا رجعتج وياي..
محمد هذا الحجي مو وكته..صحيح انته رجعتني للبيت..بس الله اعلم شراح يصير بعدين..
شيصير خل يصير..انتي ابيتج ورجلج وياج..حللي وشتطلع النتيجة..اني وياج..روحي تمددي وارتاحي واني اروح اجيب اكل واجي..
طلع محمد وخلاني..وية افكاري..تعرفون شنو معناهه اطلع..مو بنته..معناهه..بنت زنا..بنت حرام..معناهه هذولة كلهم مو عائلتي..ورجلي مو ابن عمي..والطفل اللي ابطني..معناهه امة ما عدهه نسب..يعني حياتي كلهه تطلع جذبة..وامشي منا لا اعرف اصلي ولا فصلي..اوووف يا ربي..شكد مصايب راح توكع على راسي من ورة هاي الحجاية..حاسة الدنية  مسدودة بوجهي..ورافضتني..كلشي تخربط بيه..حتى البجي ما ريحني..ما عندي  حلول ولا خيارات..دائما ينفرض علي الواقع..واني ما اكدر اختار..دورت السالفة براسي..ما اريد اندفع واتصرف تصرف اندم عليه..استقريت على انو اسوي التحليل..وراهه اتصرف..اخذت التلفون واتصلت بجدي وجديتي..وتطمنت عليهم او وعدتهم اني ازورهم باقرب وكت..ما كدرت احجيلهم..ولا اكوللهم شصار..بيه..بقيتهه غصة بكلبي.. تمددت بالصالة..بملابسي..ومحمد اجة..فتح الباب وشايل علاليك اكل وياه..حطهن على الميز..
يلة ريماا كومي وياي خل نحضر الاكل..اكلي وكوي روحج..واللي ابطنج..
بالرغم مالي نفس اكل بس كمت..كعدت على الميز..وياه..وكمت انكنك بالاكل..
كومي ريماا بدلي ملابسج..وانزعي الشال..واني راح الم الاكل..
خليته..ودخلت لغرفة النوم..اللي شاهد على اسوأ ليلة بحياتي..مشيت خطوة بالغرفة محمد وراي وانفاسة بركبتي..
انسي ريماا..سامحيني وانسي..والله بعد ما احط ايدي عليج..سامحيني..
تنهدت ..كضيت عمري كلة الناس تغلط وياي..واني اسامح..
ما جاوبته ودخلت..اخذت اللي اجة كدامي من ملابس..ورحت للحمام سبحت..اباوع بوجهي بالمراية وماي الدوش ينزل عليه..حسيته تعبان ومعجز بعز الشباب..تعبان مثل حياتي التعبانة..كرهت روحي..وحياتي..وفقدت كل رغبة بالحياة..
محمد اتابع بيهه..بعيوني..موجوع.. لوجعهه..صوت الدوش بالحمام طول ومن صوته حسيت بكمية الوجع اللي تمر بيه ريماا..ورة شوية واسمع صوت وكعة ..صحت..ريمماااااا..ركضت لباب الحمام..اضرب بيه دك ودفع ودفرات..بكل قوتي..وما تفتح..الصوت انكطع..وخوفي زاد رجعت ليورة واجيت ركض وبدفرة كسرته..لان جانت قافلته عليهه
بالمفتاح..كدامي منظر يكتل..ويوجع..
كسرت الباب بالكوة وكفت مصدوم من المنظر..اللي شفته..ريمااا امددة على طولهه بالكاع..والدوش يجري..ركضت عليهه رفعت راسهه خليته بحجري..اضرب بوجهه بايدي حتى تكعد...ريماااا.ريمااا..افتحي عيونج..ما جاوبتني. شلتهه بعد ما  لفلفته بالمنشفة..وطلعت اركض بيهه حافي..طرت خليتهه بالسيارة..وكبل للمستشفى..وريماااغايبة عن الوعي..وبغير دنية..وصلتهه.. اخذوهه من ايدي..ودخلوهه للطوارئ واني بقيت برة اتاني..شوية تاخرت واني على اعصابي..لحد ما طلع الدكتور..
كتلة خير دكتور شبيهه..كال المرة حامل..وظغطهه  وسكرهه صاعد هواي..بعد شوية جان نطتكم حياتهه..
كمت اضرب على رجليه بادية..ولازم راسي..لان خطية اللي شافته مو قليل..اي دكتور وهسة شلونهه..
بعدهه تعبانة لازم تبقة يمنه بالمستشفى..لحد ما تستقر حالتهه وينزل ضغطهه..والسكر..واذا ما نزلن..راح نظطر نضربهه ابر..وهاي الابر مو زينة على الجنين..
يا ربي شني هل مصيبة..زين دكتور سوي اللي تشوفة مناسب..واني راح اكمل الطبلة..والحساب..
عفته وطلعت..وفكري متشوش..كملتلهه الطبلة حتى تنام مستشفى..وخلصت الحساب..ورجعت لغرفتهه..وبعدهه فاقدة للوعي..خابرت على ابوية..انصدم بالخبر..كلة من ورة ابوهه يريد يكتل مرتي وابني..متوتر..رايح وجاي..مرة افتح الباب..اباوع عليهه..ومرة اطلع..اشتم هوة..وضوجتي..طلعته..بالجكاير..وكل شوية تدخللهه ممرضة اجيك حالتهه والمغذي المخليلهيا..وتقيس الظغط والسكر..رجعت للبيت اخذت فراش وياي..ونمت يمهه بالغرفة..نمت وريماا..امددة لا هية حيه ولا ميته..من الصبح..فتحت عيونهه تلكاني..بصفهه كاعد وحاضن ايدهه..
شنو اللي صار محمد..
حمد لله على السلامة..مريتي..حمد لله..كمت ابوس بيعع من كصتهه..كتلهه لا تخافين..شوية ضغطج صاعد..وهسة استقر..
احس راسي ثكيل ويوجعني..
من القهر والقهر مو زين عليج..
سكتت شوية ورجعت كلتلهه..
ريمااا شوية سويلي مجال حتى اكدر انام بصفج..ولا ما نمت الليل كلة هسة غفيت..وانتي كعدتيني..
محمد ترة احنة بالمستشفى..نام هناك..على القنفة..
لا اريد انام بصفج..حبيبتي..
تحلحزت شوية هوة ما صدك..نام بصفي..وحط راسي على ذراعة..وحضني..يشاور بيه
الحمد لله عليكم..الله لا يحرمني منكم..
اخر شي اتذكرة..جنت واكفة جوة الدوش..الدنية اصفرت ودارت بيه..دخت..وجسمي نمل..مكدرت اسيطر على روحي..وكفت جوة الدوش..
ضربت ايدي على راسي...محمد شوف شلون نسيت المي يجري بالدوش...
هههههههههه اي هسة بيتنه غركان والغراض طايفة..كلتلك هاذ البيت منحوس..على اهلة..ههههههههه اي هاي شلون بداية ...
لا تخافين..اوعدج اعوضج..وداعة راسج..
ريمااا خليني يمج اريد اعوضج..
دخت ومعدتي كامت توجعني..النفس ثكل..ايدة تسرح بشعري..
هههههه تريد اسويلك تنفس اصطناعي..
محمد فز من مكانة..اي ترة اني اللي راح يغمة عليه..هلمرة..
اخذهه الضحك واني لبدت بحضنة..لحد ما دخلت الممرضة..تتنحنح..فز وكام من يمي وطلع..كضة الصبحية..كلهه وهوة يمي..وبحنية ما متعودة عليهه..لحد ما حسيت روحي..بحلم وكل شوية اكرص روحي حتى اصدك..سمعت حس وصوت عالي برة الغرفة..ثاري الجماعة كلهم جايين..عمي وعمتي سليمة..والولد انور وسمر..ووو هوة....وياهم...
دخلو كلهم يمي..ويولسوني ويصبرون بيه..بس هوة كعد برة الغرفة على كرسي مكابل الباب ..اباوعلة وعيني ما كدرت تفارق خيالة..الكلب يرف عليه..من غير ما اشعر..انحرمت منه عمري كله..حسيت بدموعي تجري..ومحمد لزم ايدي وهمسلي..ريماااا ابوج يريد يدخلج..
اترجاك محمد اذا تعزني لا دخلة..
لا تغثين روحج ريمااا مو زين عليج..القهر..هسة اني اتصرف..
كلة خل يحجز حتى اروح اسويلة التحليل..
ريمااا هذا مو وكته..ارتاحي هسة وراهه الله كريم..
شوية بقو وطلعو..راحو..يوصلون عمتي..ويرجعون لبيوتهم..هوة ما تحرك..ضل واكف..بطولة..وما نزلت عيونة..من عليه..همة طلعو ومحمد وياهم..وهوة..دخل عليه..#ليوثي