وجع الماضي

الحلقة ٣٠

اعتذر عن التاخير لضروف حالت دون استطاعتي نشر الجزء..اعتذر مرة ثانية
#وجع الماضي
#ليوثي المياحي..

طلعت هايم على وجهي .. ادور بالشوارع ..شارع شارع.. متخبل من غيابهه حتى من جنت كارهه وما طايقهه جنت متعود على وجودهه وياي ..من ارجع شارب وسكران حتى انساهه اول ما ادخل للبيت اروح اشوفهه بغرفتهه شلون نايمة وملفلفة روحهه شعرهه مطشر على المخدة ..ادمنت وجودهه بحياتي وادمنت نفسهه وريحتهه ..راح اتخبل شلون اكدر انام وهية مو يمي ..الليلة اللي توحدنة بيهه وصرنة روح وحدة ما تفاركني .. عيونهه عيون الريم ..غزالتي شكد بجيتهه وشكد ظلمتهه .. وهية قررت ترد اللي سويته بيهه بضربة قوية ..تهجرني وتخليني بعذاب دوم..ليش ..ليش رحتي ريمتي .. وين خاتلة وين الكاج؟؟ شنو اللي اسويه هسة اني..احس روحي مجتف وما اكدر اسوي شي مثل ما كال ابوية لا اكدر ابلغ الشرطة واكلهم مرتي انهزمت مني ..اووووووف داخل بدوامة مالهه نهاية ..احس روحي تريد تطلع ...وكمت اغني ((وما ظن يجيبة البخت ...راح وخسرتة.. متكلي شيصبرة..كلبي الهجرته..لا هية كسرة ظلع..من الكلب منشلع..ظليت اون وحدي..وياونتي سكته...))لازم الكة عنوان خوالهه واسوي المستحيل حتى اعرف وين ساكنين.. لان ما عدهه احد وين تروح بس خوالهه بقو.. الكاج ... الكاج.. وساعتهه اطلب تسامحيني وارجعج وياي.. اني اعرفهه كلبهه طيب ..
ريمااا تحجي
بتت بصف جديتي جميلة..وغفيت واني ما ادري بروحي..كمت اتكلب..وتفكيري بمحمد..بس حيل بيه يستاهل..واللي مايسوكة مرضعهه سوك العصا ما ينفعة..مثل ميكولون..اهلنة..
هوة اللي وصلنة لهل حالة..انفخ بالزفير واعصابي مشدودة..بس احس فرحانة بجيتي عليهم..ونوبات..احن..واكول لوباقية..بس من ارجع لعقلي هوة هذا الحل الانسب..حايرة وي روحي ليش ما كلت  لجديتي انو اني متزوجة..ما ادري خفت محمد يلكاني ويرجعوني اله..لو خفت ..اكوللهم..شنو اللي صار وشلون انهزمت منه..مهما يكون هوة رجلي..وما اكدر..اطلعة مو خوش ادمي كدامهم..اللي صار صار بعد..واني لازم اوكف على رجلية..واشوف حالي..
اريد ادرس واوصل..بس شسوي اني وزغيرة لكيت روحي  واكعه.برجال وعرس وبيت..وعيال  ..على هل هواجس والافكار اخذني النوم..بعد تعب..
الصبح كعدت..ما لكيت جديتي يمي..دخلت للحمام غسلت..وتوضيت وصليت..بنفس ملابسي مالات البارحة اللي جيت بيهن..رجعت لغرفتي..وفتحت التلفزيون..فضولي جان كاتلني..اريد اشوف محمد شصار بيه..فتحت التلفون..اول مفتح كام يدك تررن..تررن..باوعت عالاسم..طلع محمد..ضحكت وما فتحت خط..بعد وبعد راح اتشوف مني..الا اخلي راسك يشيب..ياااااا غراب البين..مسجات من عندة تكول احجي وياي.. يهدد ويتوعد ..شوية شوية كام يتوسل..ريمتي..الله يهديج..وين انتي بس كوليلي..
هههههه والله وطحت..
حبيبتي مرتي..ريماااسامحيني..ريماااكوللي وينج..واني اجيج..انطيني فرصة بعدني ما مكملة قراية الرسالة ..ودك التلفون..هوة يدك واني ارفض..ما جنت اريد احجي وياه..حتى ما ارتخي..او ارخص روحي ..قفلت التلفون..وكعدت وكلبي يدك..سريع..ايدي ترعش..اثبت بروحي..وجان الباب تندك..ودخلت جديتي تتوجة على عوجيتهه..
صباح النور على ريمتي..اريد ابوسج لان ما مصدكة..والفرحة ما سايعتني..حضنتهه..واطمن بيهه اني يمج..ابوس بيهه..وترجع تحضن..طلعنة سوة رحنة نتريك..لكيت جدي كاعد..على ميز..صبحت عليه وبوسته..وكعدت اتريك وياهم..وجان سيد كرار..اجة..ما اعرف ليش اضوج منه..من البارحة..وهوة عيونة..ما نزلت مني..انوب زيد ضوجتي من كاللهم ابات يمكم..واني اول ليلة..وياهم..وما راح الا بطلوع الروح..من جديتي فهمته..وكالتلة يروح..ويطمن لان اني كاعدة وياهم..وما بقو وحدهم..سحب كرسي وكعد عليه..يتريك..ما التفتلي ولا باوع عليه..التهيت بالريوك..وجان يكول..ريمااا انتي متأكدة..انو انتي ما ضامة شي علينه..
عيني طلعت من محجرهه..يبووووه هذا بس لا كشفني على حقيقتي..لا تهتزين وثبتي روحج ريماا..يسأل بيه اليكول متهم..
لملمت روحي وخليت لساني يشتغل ..اللي معتبرتة ذراعي اليمين وما يقصر بالشدات..
لا خوية ما عندي شي ضامته عليكم .. العندي كلة حجيته الجديتي..
جديتي خنزرت عليه وكالتلة..ولك لا تضل تسأل من الصبح..
اشو جاي متحزم علية .. سامع شي.. حتى تسألني هل اسئلة..
خزرني بعيونة وضل يدردم انتي عربية وشلون الهوايش والزرع ..هههه وكلما احجي كلمة يضحك عليهه ..حسبالة يضوجني ..لان حجيي يختلف شوية عن حجيهم  بس ما يهز بيه ولا شعرة..هاي اطباعي وحجيي هيج عجبة عجبة ما عجبة خل يطخ راسة بالحايط..
انتي شبيج شطتي على كيفج.. شبيج علكتي الجو وتنرفزتي وهجمتي فد هجمة ..ما كلتلج شي عندج شي كولية واذا ما عندج شي عادي شوية واني طالع..
وليش هيج تستنتج..
لان جيتج البارحة مو خالية ..جاية علمود شغلة ..محتاجة شي ..شنو السبب اللي جابج.. اريد اعرف وليش هسة اجيتي ليش ما فكرتي من زمان تجين؟؟
كتلة وشنو يعني شنو اليفرق؟؟
تدرين ليش اجيتي ..اني اكلج؟؟ لان سمعتي جدي وجديتي راح يقسمون الورث وهمة عايشين وميردون يظلمون احد بحياتهم ..بس انتي من سمعتي و عرفتي اجيتي حتى تاخذين الورث..
اوكف..اوكف اصبر ..لا تاخذني حاصل فاصل اني ما جاية علمود الوسخ اللي تحجي عليه ..اجيت لان ما عندي احد اروحلة بعد ما انسدت البيبان بوجهي.. عمامي ما قصرو وياي اني عفتهم وعفت الدنية لان اريد ادرس واختار حياتي ..ما اريد واحد يختارهه الي ..ورثك خليه الك لان اخر شي افكر بيه هية الفلوس.. 
كمت من الميز ونفسي انسدت من الريوك ..وهوة ياكل ويحجي..كالي اكعدي لا تكومين بعد ما خلصت حجيي..
لزمتني جديتي حتى ارجع واكعد.. وهوة كمل حجية..على كل حال مكانج موجود من كبل ماتجين ..راح اسحب اوراقج واقدملج بالجامعة اللي ترديهه ..ماشي بس اريد اسمع منج شنو اللي صار بيج ومنين عرفتي عنوانة وشلون وصلتينة وشنوا لترديه..تبقين يمنة لو ترجعين ...وهواي اسئلة بس مو هسة بعدين جاوبينة..سحب الكرسي وكام يمسح بحلكة بالكلينس.. مال واحد مثقف عود واني اباوعلة من جوة ليجوة.. التفتلي وكالي حضري روحج العصر يجيج السايق ياخذج للشركة حتى تشوفينهه وهم نحجي..يالة ثيماله..لبس سترتة وطلع  .. واني من غراب لغراب كل واحد يريد هوة اللي يتحكم وينهي واني صايرة مثل الطوبة واحد يشوتهه يمنة والاخ يردهه يسرة.. لا تاناني حتى اكلة أي او لا ..نفذي وانتي ساكته ..كعدت اتنهد واتبجبج واتنحنح وجديتي اتسكت وتقنع بية ..بنيتي هوة هذا هيج طبعة ومحد ما يكسر كلمتة هوة الحفيد الجبير مال العائلة..وهوة المتكفل بكل الاملاك مالتنة ومشغلهن ...
نعلت الشيطان وكمت ابرد باعصابي..
حجاية منا وحجاية منا ..تريكنة ودخلت حتى ارتاح شوية ..البيت كلش جبير مال تجار قديم بس مرمميهه وصايرة حلوة .. ومرتبة وضايفيلهه ديكورات فنمزجت قديم وحديث ..الغرف متكابلة وجه بوجه والبوب كلهه اطل على صالة جبيرة ..غرفة الاستقبال بالبداية ..ورة المدخل والمطبخ صاير بنهاية البيت .. جديتي اجتني العصرية وجايبة وياهه علاليك نايلون مليانة غراض ..كعدت افرك بعيوني ..شني هل علاليك.. جديتي كالتلي ملابس بنيتي.. خما انخليج بملابسج اللي جيتي بيهه ..
وانتي جدة رحتي اشتريتيهه.. لا بنيتي هذا كرار خابرني راد قياسج ونطيته تقريب قياسج واشتراهن ودزهن
لا هاي واكفة ..اكيد انضرب بعقلة ..معناهه كام يقيس بمختلف القياسات لحد ما لكة قياسي وشتراهن ودزهن ..هههه الاصت عليك محمد؟؟ هلهلو يبنات (هلهلتن الله عليجن) كلوووووولش ..والله ولكيت من يتوبك ..ابتسمت وتربعت افتح واشوف شجايبلي بالعلاليك..وجديتي بصفي.. خطية ما مخلي شي ما جايبلياه حتى الملابس الداخلية جايبلياهن ..مخليهن بعلاكة وحدهه.. ما اعرف هلولد شيريد مني ..ليش عينة دائما علية ..بس لا كلبة انضرب بسهمي ..لايابة ماكو هيج خرافات.. جديتي تضحك وما تعرف شنو بالعلاكة... طلعتهن .. شافتهن ..كالت عزة ...يمة هاي حتى الملابس الداخلية مشتريهه.. زين منين عرف قياسج...هههه شكد استحيت وما جاوبتهه..شمدريني من عرف قياسي..كالت هاي اول مرة يسويهه عمرة ما سواهه كبل وية أي وحدة من بناتنه ولا غير بناتنه.. لان نعرفة مايحب النسوان ..هاذة شي جديد اول مرة اشوفة....
أي جديتي فرحيني بعد وبعد.. هية اطركت على راسي ..اختاريت نفنوف طويل وردي بيه فتحتين من الصفاح ومفتوح من كدام وبنطرون اسود بوري وبوتين وردي خفيف وشال مشجر وردي وصخ...طلعت ضخامتي حسيت روحي جبيرة ومليانة .. واني منا حليوة ومجكنمة .. طنطشت ادية باكسسوارات ملونة تهندمت وطلعت ..لكيت سيارة عالية ..تخبل ..السايق عمي محمد ..فتحلي الباب ..ذكرني برجلي.. وهوة محمد يغيب عن بالي.. لو مهما تبدلت الاحوال والدنية ..اني لمحمد ايدي بايدة ونبقى لبعض عرايس.. باوعت لايدي انمحى منهه أي اثر للعرس ..حتى اثار الحنة انمسحت ..كلبي وجعتي السيارة تمشي بيه واني ما اعرف منين طبينة ومنين طلعنة.. وكفت السيارة كدام بناية عاية كلش وكلهه جام ازرك مربعات..
نزل عمي محمد حتى يفتحلي الباب ..كتلة والله ماتفتحهه ليش قابل اني على راسي ريشة والله تكعد ..عيب علية رجال جبير وشيباتك براسك وتريد تفتحلي الباب لاعمو لا..ارتاح اني افتح الباب ..نزلت ودخلت للشركة .. الاستعلامات مخلين وحدة بيه تكول للكمر اكعد واني بمكانك.. سلمت علية وابتسمت وفرحت بية اخذتني ودلتني بمكتب الاستاذ كرار.. بالطابق الرابع.. دلتني منين اروح وكالتلي هوة جاي يتانيج.. مشيت الباب انفتح من كيفة دخلت انسد من كيفة ..هههه خبلني ..صعدت بغرفة زغيرة دست دكمة صعد من كيفة ادوخ وارجع اسيطر على روحي..دست دكمة الخ نزل ليجوة ضليت بالسبع مرات مدري اكثر اصعد وانزل واني مكيفة حسبالك لعبة ..هههههه لحد ما اجة مهدم اللذات ..الباب انفتح علغراب ..عاجد حواجبة ومعبس وصرخ بية ..هوة هذا لعب ..الكامرات دتصور بهبالتج..وكلهه تضحك عليج.. خجلت.. بلة اني شمعرفني مخلين كامرات وتصور..كالي امشي وراي اخذني دخلني ابمكتبة ..ووووواوو مكتب كلش ضخم كعد على الكرسي مرة ميز ضخم ..نطاني ملف من غير ما يكلي شبيه فتحته.. بيه رسوم بيانية وعقود ..كلشي ما افتهمت منه..
كتلة شنو هذا.. هاي كاع وعمارة ومعملين زغار للحلويات وبيت اسجلن باسمج من يوم توفت امج.. والارباح جاي تروح للبنك باسمج.. كل شهر الارباح مال الشركات والمعامل تروح برصيدج بالبنك.. احنة جنة مقررين كبل ماتجين نخليلج حساب بالبنك من الارباح للاملالك مالات امج.. بس بقة انريد توقيعج على الملف حتى انثبت الحساب بالبنك.. اخذت الملف اوقعت من غير ما اسال ولا سؤال.. ونطيته الملف ..جنة مقررين انجيبج حتى توقعين من يطلبون من عدنة.. المهم كوليلي عمامج يعرفون انتي يمنه؟؟  كتلة لا وما اريدهم يعرفون؟؟ ليش شنو انتي منهزمة منهم ..مسويلج شي؟؟ كولي ومعليج لا تخافين اني اتصرف؟؟
لا ما مسويلي شي.. وما اريدهم يعرفون اني عدكم فترة ..اريد اسجل بالجامعة وادرس واعلم روحي ما اريد غير شي؟؟
واملاكج؟؟ ما اعرف بهاي السوالف لا املاك ولا ورث ..هنة يمك انته مشيهن.. اني ابالي دراستي وبس لا رايدة فلوس ولا ملك..بنضرة غريبة باوعلي وباستغراب ..كالي هاا صحيح ترة الغراض اللي اشترتهن الج اليوم كلهه بفلوسج..لا عبالج مني.. أي ماجنت محتاجتهم ليش تعبت روحك.. لا اني ما تعبت موظفة ويانة تشتغل اخذت مقاساتهه لان نفس قياسج ..اشتريت كلشي على ذوقي ..حتى الملابس الداخلية اني اختاريتهن..ههههه ...خجلت حيل وحسيت بالاهانة اعصابي اشتعلن راح الوعي من عندي..كمت اطشر بالورق اللي ع المكتب اشيل بالورق واشمرهن بوجهه.. كل ورقة راحت بديرة..طلعت من يمة واني ادردم والله ماتستحي ولا تخجل ..ما عندك شرف يا عار.. سديت الباب بكل قوة وخليتة يرن..
طلعت ورجعت على اعصابي الملابس اللي اشتراهن اللي لميتهن كلهن ونطيتهن لمكدية ..دكت الباب علينة تريد مساعدة.. اني اروح اشتري ملابس بنفسي اني ما محتاجتة او محتاجة لغيرة..وقررت اتجاهلة واتجاهل شوفتته من الاصل احساسي بوساخته كتلني لان كالي اختارهم هوة عبالك اني وحدة بنت شارع وهوة يصرف عليهه .. مخلي ابالة الماضي مالت امي منى حسبالة اني حالي حالهه..كمت اكرهه حيل وكلبي حن لمحمد..فتحت التلفون ..ميات المسكولات والمسجات كلبي كام يدك سريع ما اعرف ليش ..طلعت رقمة ودكيت عليه واني مترددة..اول ما دك فتح خط وهوة ملهوف.. ريمااا وينج.. لا تعذبيني ..كولي انتي وين.. اريد نتفاهم..احجيلي اللي بكلبج ..سوي اللي ترديه بيه بس لا تعوفيني وترحين ..ريما حاجيني...انطيني فرصة..
محمد لا دور علي .. فرصتنه انتهت ..انته كتلتهه بمهدهه .. بعد لا تتصل علية ..الشريحة راح اكسرهه لا تعب روحك ..قفلت الخط.. وفعلا طلعت الشريحة وكسرتهه هية والموبايل  ..كسرتهه وبجيت لان جان بيه شي مكسور ..جرح جبير ..وكل واحد يباوعلي بطريقة تاذيني وتجرحني.. الجروح والهموم وحدة ورة الخ تعبت؟؟ وانكسرت؟؟ ووعد على روحي ..ارد الوجع لكل واحد اذاني ..واداوي جرروحي بروحي واوصل للي خططتلة مهما جان صعب..بجيت واني اشهك لحد ما تعبت ونمت..كضيت كم يوم بالبيت لا اطلع..ولا روح ولا اجي..واول ما اشوفة يجي للبيت اروح ركض وادخل لغرفتي..وكلما يجونة خوالي وخالاتي خطار ..يعاملوني..بلطف..بس احسهه مجاملات..ومحسوبة حساب...كلة علمو شي واحد اني اعرفة واحس بيه..ماضي امي منى..اكيد اللي شفته بعوائل عمامي راح اشوفة بعوائل خوالي..حاولت بس ما احتك بيهم..وما احجي كلشي للرايح والجاي..الوحيدة اللي ارتاحلهه..هية جديتي..حتى جدي تحسة لسة شايل غيظ بكلبة على بنته.وعلى الماضي..وعلى اهل ابوية..حسيته وفتهمته من طريقة الكلام والاشارات..وهذا كلة انعكس عليه.. اخذت موبايل جديتي  خابرت على عمتي سليمة..ردت اسألهه طلع قبولي لو لا....كالتلي..بنيتي..وينج الدنية مكلوبة عليج.. كتلهه.. اني بخير عمتي..بس ردت اسأل..طلع قبولي لو بعدة..سمعت القبولات طالعة.. اي بنيتي..سالت امل كالت اي طالعات..وانتي طالعتلج..كلية القانون.. ايييييي ..الف الحمد لله..عمة..اوراقي احفظيهن يمج..حتى اادز واحد ياخذهن من يمج..احلفج بالله عمتي لا تكولين لحد على الاوراق ولا تكولين خابرتني ريماا..كافي اللي شفته من عذاب وقهر..وظلم..وانتي تعرفين اللي صار... لا تخافين بنيتي حافضتهن الج شوكت متردينهن
تجين تلكيهن.. واذا تردين ادزهن الج وين متردين.. قفلت الخط واني فرحانة ..لان راح ادرس الكلية اللي احبهه .. في سبيل احقق ذاتي ..وابني شخصية ريماا.. اللي اريدهه .. المحامية ريمااا.. لازم اكون اسم لامع ومعروف ..رجعت فرحانة من غرفة جديتي..لكيت الغراب واكف بالصالة فتت من يمة تجاهلتة ولا كانو موجود .. ما حسيت ا لا وسحبني من ايدي.. كالي اوكفي ..وين جنتي.. ايي عوفني وانتعه شعليك ..قابل خطيبي.. اكلج اسمعي الكلام احسلج..لازم اعرف وين ترحين وشسوين والمن تخابرين ..جديتي كالت اخذتي التلفون منهه..المن خابرتي..انته معليك هية تعرف..باوع لا تستفزني اني ما اشتغل عندك حتى اخذ اوامر.. حليت ايدي منه بطلعان الروح..بجية جديتي .. اللي جتي تمشي وبيدهه الباكورة كالتلي ها بنيتي حاجيتيهه.. أي جدة حاجيتهه..من رخصتكم تعبانة راح ادخل ارتاح.. عفتهم ودخلت واحلم بحياة جديدة جامعة ودراسة ومحاضرات وزملاء واصدقاء ..اتخيل ومسوية جو ولا بالاحلام..وفجأة حسيت بلويات ابطني .. ونفسي كامت تلعب..رحت اركض للحمام..وكمت ارد من راسي..كلبي طلع من مكانة من الوجع..الله لا ينطيك..رجعت للغرفة وتمددت وقررت العصر انزل للسوك اشتري ملابس وغراض..جديدة وشوية اتونس..كلت لجديتي..وقبلت تجي وياي..كعدت العصر لبست عبايتي الاسلامية..وطلعت..وية جديتي..ركبنة بالسيارة وي عمي محمد..ومشينة..ما جنت اعرف المكانات هلكد..جديتي جانت تعرفهن مكان مكان..اخذتني لمحلات الملابس النسائية واختاريت بنفسي لبسي وغراضي جنت هواي فرحانة ..جديتي ما خلتني ادفع فلوس الملابس والغراض هية دفعتهن.. تعبت خطية من المشي..كالت راح اكعد بعاي الكوفي وانتي كملي مسواكج من هذن المحلات ولا ترحين بعيد حتى لا تيهين..كتلهه ماشي..اخذت راحتي فدنوب..اختاريت ملابس تخبل..على راحة راحتي..وحسب ذوقي اني..خلولياهن بعلاليك..اول خطوة بحياتي الجديدة..اللي اني مسؤولة على روحي بيهه..تعبت من المشي والتنكي..الدنية بدت تظلم..شلت العلاليك..وديتهن للسيارة عمي محمد تلكاني وشالهن مني وخلاهن بالصندوك..واخذني للكوفي اللي كاعدة بيه جديتي..دخلت..وجان الكاهه كاعدة هية والغراب..كرار..اوووف شكد ضوجني وطلع روحي..شكد كرهته..او وكع من عيني..من سوايتة الاخيرة..كعدت كبالهم..وظهري.. نطيته للناس..طلبت..كاسة موطة..وضربت زرك بيهه.هههه..اكل واتلذذ ونسيت منو حوالييه..جانت نكهتهه كلش طيبه..طلبت كاسة ثانية..بعدني مشبعانة ..كلش طيبة..حتى هلكد ما مستعجلة صارت عندي شوارب على حلكي من الموطة..هوة يباوع علي واني بطلت اكل..حتى انسدت نفسي..وشهيتي..يأشرلي..بلسانة..على حواف حلكه..ما فتهمت..شبي بس يعوج بحلكة ويطلع بلسانه..كتلة شبيك انته ما تستحي شنو هل حركات قابل انته مخبل..جدييتي كالت بنتي عيب..من الناس احنة مو بالبيت..
ياجدة باعيه شديسوي..
كالي اريد افهمج  امسيحي الموطة من على حلكج..ولا تلعطين مثل الجهال..
وانته شعليك..قابل ابوية انته..هسة اروح اغسل ويروح..انته عليك بحالك وبس..
عيونة تهدد وتنذر..اسكتي احسلج واحترمي نفسج ترة اجي اكص لسانج..اكو وحدة تحجي وية خطيبهه هيج..ضحكت.هههههه حتى بطني..كامت توجعني..وردت ارد من راسي..وشوكت عيني خطبتني..
جديتي كالتلهه كرار شوية شوية..عليهه..مو كلتلك اصبر..حتى نمهدلهه الطريق..
كتلهه جدة فهميني شنو السالفة..
ردت هية وكرار بنفس الوكت نريد نخطبج..كرار كال انتي مكتوبة الي..واتاني بيج العمر كلة..
آه..آه..يا ربي..دخت وصفرت الدنية بعيني..ونفسي ضاك..عليه..ونفسي لعبت..ردت ارد..منو يخطب..منو..انتو شنو بكيفكم تقررون..بلة شلون ثاري اني طلعت مخطوبة واني ما ادري..يبوووو يحضي..كمت اندب على قسمتي
كالي شبيج..اي  خطوبة وعرس على سنة الله ورسولة..
كمت اريد ابرد روحي...حسيت الموطة ضربت براسي..عفتهم ورحت للحمام..رديت الموطة كلهه من بطني..ومعدتي توجعني..والدنية ادور بيه..والدوخة اخذتني..غسلت وجهي..وطلعت امشي بالكوة..هبت عليه ريحة..اعرفهه..ريحة محمد..اي ريحته احتلت خشمي..اباوع بعيوني..وادور واشمشم..ان اشوفة..اي والله محمد كاعد..بالكافيه..كبالي ..المشاريب كبالة ع الميز وجكارته بحلكة..عيوني طلعت من الدهشة..وجان توكع عينة عليه ويشوفني..وكرار كاعد وعيونة راح تطلع علي..انصادت ريمااا...#ليوثي