وجع الماضي

الحلقة ٨

#وجع الماضي

#ليوثي المياحي

خفت من نظرته اللي جانت مليانة حقد وكره واحتقار ...بس اني تعلمت ما اخاف من شي..تربيت ابيت مرة عراقية اصيلة بنت شيوخ بنص الكاع والزرع..تربيت ابميت رجال..امي امينه علمتني ادافع على روحي اذا واحد اعتدة عليه..هوة يخزرلي ...واني اغلس اسوي روحي ما منتبهتلة..كتلة..حرامات اتعكرت هل ونسة والطلعة صارت سم...من ورة شخص...عكر علينه..الجو الحلوو... بحلك عيونة وهوة ما مصدك..هههههه...كالي لا تخافين ... هسة ارجع وابدل ملابسي ونطلع نتونس ما اضيع ونستج...لتخافين..

يبوووووه هذا اكيد ناوي يذلني ..بس لا يريدني اطلع وياه وحدي....هلوووو عود يكدرلي ..والله ولا اخاف منه.. طلعنة من الجزيرة السياحية وهوة ينفض بهدومة اللي توصخت من الوكعه.. الضاهر جانت اكو بركة مي وكع بيهه..ههههههه اني كمت امشي بصف عمي حتى ما يكدر يتحرش بيه ...وهوة جان يهرول ومبين عليه الزعل والضوجة .. كل واحد ركب سيارته اللي اجة بيه اني بساع صعدت ولبدت بصف سمر حسبالي افلت منه ...
بس ما حسيت ا لا انفتحت باب السيارة وجرني من ايدي ونزلني من السيارة وهوة كاز سنونة كز..... كالي مثل ما جينه نرجع ... رجلي على رجلج ..اني ما ردت ابين انو اني خايفة منه ... بس بيناتنه الحجي اني رجليه من الخوف كامت تخوط خوط وكل شوية اعثر بس اسيطر على روحي....ادري بيه ضاملياهه وراح ياخذهه غالية .... صعدني بسيارته وشغل السويج وطار خلة التايرات تشحط شحيط بالطريق ... الشباك مال السيارة جان مفتوح والهوة كلش قوي ... بدون ما احس كلتلة سد الشباك الهوة القوي مو زين تروح تتمرض ....كالي وشيهمج انتي اذا تمرضت او لا ... لو اهمج جان ما دفعتيني هل دفعة وضحكتي الناس عليه...اني هيج سوين بيه .. والله يا بنت منى الله اردلجياهه مربع انتي اللي جبتيهه لروحج اذا ما خليتج تتوسلين بيه وتجين تكليلي اسفة اني مو محمد...اصطبري والايام بيناتنه.... كلامة جان بيه نوع من التحدي والحقد والكره اني بقيت لابدة سكتت ما حجيت ولا كلمة... شحجي غير نوب ينفجر بوجهي ...فكلت اسكت احسن ما احصل رزالة غسل ولبس ..هوة كام ينفخ .. تحسة يريد ينفجر...وصل لبيت مو بيت عمي .. وكف السيارة وطفة المحرك... وكالي يلة انزلي...

،اني هم نزلت بدون نقاش ..اباوع البيت مو بيت عمي كتلة هاي وين موديني هاذ مو بيتنه ... انته مو كلت اروح للبيت اغير ملابسي .... جاوبني وهوة يخزرلي بعيونة .. أي هوة اني جاي لبيتي حتى ابدل ملابسي ونطلع ....

بحلكت عيوني زين ... يبوووووه يريما ؟؟؟ تاليتهه جاية لبيت لبيت رجال ونوب وحدج ؟؟ كتلة واني شكو طابة للبيت انته طب غير ملابسك شنوا تخاف لو تريد اشعلك الضوة..طب عيني طب الله يسترك؟؟ سبقني بخطوة وابتعد.. وكف ورجعلي مرة الخ جرني من ايدي حسبالك اسد وجلب بفريسته جرني وراه كتلة وانته شيهمك اذا دخلت للبيت اولا انته مو نيتك تبدل ملابسك اني شنو دخلي بالموظوع بعدين انته ما تستحي تريدني اني وياك بالبيت ولوحدنه...باوعلي وعيونة بيهه لمعه حقد وكره..كالي ولج باعي هاي المنطقة محترمة ما اريد فضايح اطبين وانتي ساكته ترة اسوكج جلاق اكسر عضامج... حسيت الوضع كلش صعب ولازم اتصرف باسرع وقت وهوة جرني كمت اصيح بعلو صوتي ياناس يا عالم الحكولي .... هذا الرجال خاطفني ... يبوووووه.... اوووووويلي.... الحكولي ....يهل المروة....باوعلي وهوة مصدوم حط ايدة على حلكي وسدة الي وهوة يسب ويشتم بية وبامي .. رجعني للسيارة فتح الباب ورماني وقفلهه علية..ومشى وهوة يشتم ويلعن بيه..واني كيفت لان امنت منه؟؟؟...
أي قابل اخليه يغتصبني واكعد بايرة ومحد يكلبني.. بكلبي كلت اكول العمي عليه واخليه يرزلة رزالة تسوة حياته .. كعدت اتفرج من شباك السيارة على الرايح وعلى الجاي المكان كلش هادئ ما عرفت شنو اسم المنطقة .. البناء حديث والبيوت كلهه راقية مبين عليهه ناس اشكال والوان ... حتى لبسهه مختلف ... وكل واحد عليه بروحة ماكو احد اله شغل بالثاني والدليل من عيطت كلهه سمعتني ولا واحد اجة علية .. طلع الغراب من البيت وهوة كاشخ وشعراته مسرحهن ومجلجلهن .. حواجبه سودة وثخينة كالعادة ريحته سابقته اجة وعيونة ابد ما نزلت من عندي.. يباوعلي من فوك ليجوة ..واني هم ما نزلت عيني منه كصيته من فوك ليجوة..العين بالعين والبادي اضلم مثل ما يكلون ... رفع تك من حواجبة وشغل وطلع...وضع وانفرض علينه اثنيناتنه هوة من حقة يختار شريكة حياته ..وبغض النضر اذا جان حاكم عليه بالماضي مالتي .. بس اني ما عندي أي ذنب .. من حقي اقرة وادرس واحب وازوج...