وجع الماضي

الحلقة ٣٣

#وجع الماضي
#ليوثي المياحي

محمد ضاج..واحساسة..متضارب وية تضارب ردة فعلي..جان يتصور راح افرح..بس انصدم ببرودي..ورفضي اله ولطفلة..يمشي روحة جية جدام صالة الطوارئ ..وعقلة واعصابة..تلفانة..جديتي وجدي  دخلو عليه..
شوية واجة عمي..وسمر..اللي ركضت وجلبت بركبته تهني بيه وتبوس..وتبارك..وابوه  ما كالة شي..ينتضر يشوفني..
دك الباب ودخل علية باسني..وباركلي..جديتي  جميلة طلعت.. وهوة كعد بصفي..
ريمااا مبروك..عليج وعلينة..البيبي..
عمي هذا حجي مو وكته هسة..
ليش بنتي..وعيونة احسهه تريد تاكلني من اللوم..
يعني اجة مو بوكتة..والله يا عمي اني بحيرة وما فاهمة روحي..
مد ايدة على شعري كام يمسد بيه..
اسم الله على بنيتي..كوي روحج..وتعاي وياي والله ادللج دلال..
محمد فتح الباب..ودخل..
خو تروح وية رجلهه..ويدللهه..بعد عليش تروح وياك..
ما اريد اروح وي اي واحد..
الطفل..ما جان ابالي..جملتا وتفصيلا..جنت مفكرة انطي درس لمحمد واعاقبة على اللي سواه بيه..من ابتعد عنه..وجنت مفكرة ادرس واوصل واحقق ذاتي وطموحاتي..الطفل كسر برنامجي..ما فتهمت روحي افرح بيه لو احزن..عثرة صار بحياتي..خايفة بداخلي..وما مفهتمة شي منهه..واخر واحد احب اشوفة هوة محمد..
ما اريد اشوفة اصلا..لا من قريب ولا من بعيد..حاقدة عليه..لان هوة سبب بكلشي؟؟
خلوني يم جديتي..ما اريد اروح لاي مكان..
محمد  يلزم بروحة حتى ما يصيح..
لا..لا كافي انهزمتي مني وما كلت شي..الليلة متباتين..الا ابيتج..وية رجلج..سمعتيني كافي خبال..
تسمع عمي هاذة اسلوبة المحلو..عياط وصياح..ما اريد اروح وياه.ولا اريد شوفتة هوة بالذات؟؟
معناهه ترحين وي عمج..اريد افرح بيج وبالزغيرون..شكلتي..
ولا تهتميلة..هسة نضربة جلاق ونطردة..هههههه..ضحكت حتى بطني كامت توجعني..محمد خلة اديه على صفاحة..وتخوصر..
لا والله خاف ماتقبلون..تردوني ما امر على مرتي..وابني..
كتلة من يكول ولد يجوز يطلع بنية..وثانيا اخاف لا طفلي..يطلع غراب على ابوه..
عمي خرب من الضحك..على ابنه..
هااا ريماا..الولد صار بنية..واني الغراب..
اي ههههه المهم.. ما اريد اشوفك..واطلع برة هسة..
عمي اشرله بايدة كلة اطلع..وسد الباب بوراك
محمد طلع وسد الباب وراه..واني وعمي ميتين من الضحك..كمل المغذي..وكمت احضر روحي حتى اطلع من المستشفى..
عمي خليني اليوم اروح وية جديتي..وباجر..احضر غراضي..واجي يمكم..
ماشي بنيتي اللي ترديه يصير..باجر الصبح..ادزلج..سيارة تجي تاخذج من بيت جديتج.. يالة بنيتي خل نطلع..
طلعت..ومرتجية  على عمي..محمد بالممشى مال المستشفى..فتت من يمة واني مغلسة كني ما شفته..رحت لجديتي وجدي..سلمو على عمي..بس سلامهم جان بارد..وببتسامة جامدة..ومكروهه..هذا اللي اخوه كتللهم..بنتهم..وهوة هذولة اللي بنتهم خانت اخوه..ودمرت عائلة كاملة..وضيعتهه..طبيعي حتكون العلاقة..متوترة..طلعت وية جديتي..وجدي..لكيت كرار ايتانينه بالسيارة برة المستشفى..طلعو همة كبلي..واني امشي على كيفي..حتى اوصل السيارة واصعد..وما احس الا ادين التفت على خصري وشالتني وكامت تركض..كرار نزل من السيارة..ويصيح ويركض وراي..وعمي صلاح..وكف بمكانة مذهول..
محمد كال لكرار ..رجال وخاطف مرته..انته شدخلك..ارجع لسيارتك..ومالك شغل بينه..
ههههههههه..عمي غمزلة بعينة اني شفته..كرار ضل متبسمر بمكانة..ورجلي..شالني وخلاني بالسيارة اللي جاي بيهه ابوية..سد الباب علية وطار خلاهه عجاجة ورانة..واني مكيفة ع اللقطة..ومسوية روحي ضايجة..وما راضية..واني اتمضحك من جوة ليجوة..ومحمد طاير بالسيارة..وكاظ الستيرن باثنين اديه..ودماراته طالعة تريد تطك..كلت خل اسوي بيه مقلب..كلتلة اخ بطني..على كيفك لا تمشي سريع بطني توجعني..تريد تموتنه..
لا سامحيني ..مو اني الغراب..لعد نيتج..تزوجين هاذة الهبل..
اي شكو بيهه..اجة ويريد يكتبلي كلشي باسمي بس يخطبني؟؟اجة بشكل رسمي دخل من الباب مو من الشباك..
ضرب بريك بكل قوته..
شلون..شلون..اني اللي راح ارميج من الباب..ليهسة وانتي تحجين عليه..خاف حبيتيه واني ما ادري..
افتح الباب علواه..حتى اموت واخلص منك..
كل عقلج تحجين..وج اني ما صدكت لكيتج..تردين اعوفج..هذاك بيتج..
اسمع ترة اني ما اريد اروح لبيتك..وديني لاي مكان غيره..وما اكون اني وياك لوحدنة..
تحجين جدي..لو تتقشمرين..
بجدي وبعمي..وبخالي..انته..لا..لا..لا..
اني اي..اي..اي..وهسة نشوف..ضل يتوسل بيه حتى انزل ..بس مقبلت..تلفونة دك..جاوب..هلوو بابا..اني بالسيارة..وهاي ماتقبل تنزل وياي ونروح للبيت..
اي يا يابة ميصير..غير مرتي ..وبيتنه قابل وين موديهه..
يا ابني اجفة الشر وجيبهه..وخلي الامور تمشي طبيعيه..
يابة افهمني..شراح اسويلهه..الميت شيكدر يسوي كدام المغسل..يالة هياتني راح ارجعهه للبيت..
هههههه..خطية والله..عمي كلب عليه وصار وياي..شغل السيارة وديورهه..وخلله تايراتهه تزيط بالشارع هلكد مضايج..ههههه..مشة وهوة يتأفأف..ويدردم..
اني لبدت ساكته..ما جنت اريد اثيرة..ولا ادابلة..خفت انوب يطنكر ويرجعني..الطريق كلة ساكت..لحد ما وصلنة..طفة جكارته..ونزل حتى يفتح الباب..مال بيتهم..اجة علية فتحلي باب السيارة..وشالني..كالي شوية عيني روحج ترة انتي ثكيلة..
اني تذكرت..بساع جان احط ايدي على بطني..اي لان اكو واحد ساكن ابطني..زين اني بعدني زغيرة ..شلون راح اجيب وشلون راح اربيه..عقلي..ما يستوعب هل سالفة..وعيون رجلي تتفحص بيه..نزلت من حضنة وتنهدت ومشيت جدامه..دخلنة لكينة الجماعة..يتانون بية..وكامو يبوسون ويحضنون ومبرووووك يتربة بعزكم..كعدت بوسطهم..عمي..كال..باوع ولك محمد..بنتي اريدهه كبال عيني..يعجبك تجي تكعد ويانه هلة بيك..واذا ما عجبك..الباب يوسع جمل..هذا بيتهه..وتتهنة بيه..
شنو يابة..متريدهه وياي..شنو راح اكلهه..وتخاف عليهه مني..
اي عمي لا تخليني وياه ترة ياكلني ..وياكل اللي ابطني..ما دام راح اعيش هنا..خليني ابغرفة وهوة بغرفة ثانية..
ريمممممااااا..
محمد صيح..حسيت الدخان طالع من خشمة..
عمي كالة..لا تصيح عليهه..واني موجود..اللي تريدة ريمااا يصير بدون مناقشة..
لمعت عيوني بخبث..وتذكرت كلام..امي ريمة اللة يرحمهه..على المرة اللي تتوحم..كلت خل شوية انصب عليه..
كتلة ريحتك صايرة تكتل..اغسل اخاف تطلع بالولد...هههههه..
مشتهية..فحم..ومشتهية حجار..
ههههههههههههه عمي ضحك هوة وسمر..ومرت عمي تعوج بحكهه..مرة يمنه ومرة يسرة..
محمد دايخ..شنو هل اشياء اللي تشتهيهن...
مرت عمي ما صبرت..
بنيتي..هية هاي هم مشتهاه..اشتهيلج شي حلو...فحم...
لا ..لا..مرت عمي..اني مشكلتي بمشتهاتي..
عمي كال اللي تشتهيه بنتي يجيهه على طول..
روحي  ارتاحي بغرفة محمد..واللي طلبتيه يجيج ..طلعت للغرفة واني اتبشبش وية سمر..وهية تضحك بصفي..ومحمد وراي..
كال سمر ارجعي انتي اني اريد اطلع وي ريماا..وكام يحجي..ريماا كافي..عاد تدللين..تردين كل واحد يكعد بغرفة..شلون يصير..
اي اخي..انت..اللي جنيت على روحك..وبعدين اني مو وحدي انام اني وابني..انته بديرة واحنة بديرة..خليته واكف ع الدرج..وهوة ما مفتهم شي..يضحك..ويهلس بشواربة ..ههههههههه
صعدت لغرفته..تمددت الفراش جا يخبل..الجرباية جبيرة توسع لتلث نفرات..الدوشك سبرنك وعالي ..يموت..تمددت عليه..ومديت الاربعة..اخذتني النومة وية ريحة محمد..اللي مالية الغرفة..والفراش تدوخ..فتحت عيوني لكيت الغرفة ضلمة..حسيت اكو جسم نايم بصفي.. الريحة عرفته..وحافظتهه..والعيون..ساكنات  بعقلي..محمد نايم بصفي..اديه محاوطاتني.وعيونة..سارحة..بيه..بصوت هادئ ومبحوح..
صحي النوم ريماااا..
انتة شسوي هناااا..
اتطمن على مرتي اخاف تحتاج شي..
محمد كافي..بلا..كلاوات..وكوم منا..الطبيب كالي ممنوع  الاقتراب وممنوع اللمس..هههههههههه كام يضحك..عوفني..كمزت من مكاني..وانهزمت..رحت للباب..وهوة يضحك..ويحجي..
انهزمي..انهزمي..وين انتي اوين اني..
ريماااا ...امووووووه..ورمالي بوسة ع الطاير..خلة كلبي يرفرف..خلاني خجلانة وكل شي بيه..تخربط..وكت العشة..نزلت..للصالة لكيت الجماعة ملمومين..كعدت ورة ما سلم عليه انور..وباركلي..جابو العشة وخلوه ع الميز والتمينة وكل واحد بلش بالصحن مالتة..وعمي..تلفونة دك..عاف الاكل..وكام على صفحة..ما اعرف ليش كلنة ركزنة عليه..هوة سحبة من جيبة وكام يحجي..يالله اي كولي خير ان شاء الله..سليمة اختي ماشي اكيييد اي باجر ان شاء الله..
عمي فتح عيونة بوسعهن..انوب خوفنة ليكون صاير شي..فتح حلكة وابتسامة حزينة تزينت بيه..لا حجة ولا كال..قفل الخط..ودمعت عيونة..احنة انتانيه..يحجي..حتى نعرف شبيه ونعرف الصاير..
عمي شنو السالفة ..ترة خلص صبرنة..شبيهه عمتي..وشصاير..
جاوب وكال لا ماكو شي غير الخير..تكول اكو مشكلة وتريدنة نروح حتى نحلهه..باجر من الصبح حضرو رواحكم حتى نروح..ماشي..
محمد رفع حواجبة..وهوة ما مقتنع بالسالفة..
كال اي ريماا ما تروح  حامل ومابيهه حيل..وموزين عليهه الروحة والجية..
عمي غاطس راسة..بنص الصحن..ما راد يناقش او يجاوب واحد من الكاعدين..ابتسم..وكال..اعتقد اني كلت الكل..راح نروح وريمااا اولنة..نمشي علكيفنة..حتى ما تتعب..والله يسهل..
..عمي بس اني ما مفتهمة شني..السالفة..
وثانيا..امل ما اريد اشوفهه..ولا احب احجي وياهه..من هسة اكلك..اني ما اضمن روحي اسويلك مشكلة اذا شفتهه..واحتمال تلكوهه تك ايد او تك رجل..
ضحكو كلهم..وتغير الجو الكئيب..خلص وكت العشى بين ابتسامة..وضحكة وسهرة..عادية..ومحمد لازك بيه..ما يتزحزح..من يمي.. وكل شوية مخلي ايدة علر جتفي..لو يحط ايدة فوك ايدي..واني اوخر ايدة..من علية..يتبسم من جوة ليجوة يريد يشوف ردة فعلي..كمت من يمة ورحت كعدت..بصف عمي..ههههه ازرك..الرجال وضاج..شلون اعوفة واكوم من يمة..اني متعمدة اسوي هل حركة..حتى اضوجة..ونوب زادت ضوجته من عمي مد ايدة على جتفي وحضني.....
عمي كال اي شمحلاهه..من كعدة..وريماا يمي..وبيهه كل ريحة الغالين..المحروم يكعد طول عمرة محروم.ههههه
محمد يبلع بريجة..كال..اي ليش لا صحة وهنة..بابا الله ينطيك..بعد وبعد..هههههه كلهه ضحكت واني بطني وجعتني..دست زايد بالاكل..لحد ما انتخمت..
ضربت عمي بسمار..كتلة عمي ريحتك..مو طيبة..كوم اسبح ..ههههههه طكو من الضحك..
محمد كال.. هااا بدت البسامير...
اني ما استحملت كمت اركض للحمام حتى ارد من راسي..حتى ركبي خدرن..ودموعي طلعن..
ومحمد لازمني ويغسل بوجهي..وما كملت الا بطلعان الروح..غسلت..ردت اطلع دورت اي شي الزمة حتى اتجي عليه وامشي..ايدة اتمدتلي..ولزمني..امشي وهوة ساندني..حنية ما متعلمة عليهه..زادت وجع كلبي..كعدت ..شوية..حتى ارتاح..وكمت حتى انام..تعبت وما عندي رغبة اسهر بعد..كلت اروح امدد واريح ظهري..كمت..كتلهم تصبحون على خير..
تعبت اريد شوية ارتاح...
اي بنتي..اصعدي ارتاحي اسم الله عليج..
محمد نفض بنطرونة وكام...يلة اني هم ..اروح ارتاح..وية مرتي تصبحون على خير..عيوني احولت من سمعت راح يصعد وياي...رجعت كعدت..وحاسةانو الجماعة فاهمين ليش رجعت كعدت..ويضحكون من جوة ليجوة..محمد مد ايدة ..حتى يكومني..يلة ريمااا اصعدج للغرفة انتي تعبانة ويرادلج راحة..
لا..لا طار النوم..من عيني خلينة سهرانين..بعد وكت..واني من صدك طار النوم من عيني..هوة كعد ويستغفر..كل شوية يكلي..يلة..واني ادير وجهي..سمر كامت ..لزمتهه من ايدهه..وكمت اروح وياهه..خليته مصدوم..
سمر كالتلي..اوي واني شنو..ذاك رجلج وروحي وياه..
ما عليج بيه سمر..امشي نامي وياي بالغرفة..
ههههه اذا جيت نمت وياج اسوي بيج سواية..ماتنسينهه طول عمرج..
هههههههه الله يستر منج منه..انتي تهددين..وهوة يتاني اي فرصة..حتى يستغلهه..امشي نامي يمي ولا يهمج..
تمددنة اني وياهه على السرير..وهية تحجي واني تعبانة..وهية تحجي واني اجاوبهه..لحد ما اخذتني النومة..كعدت من الصبح على ايد تكعد بيه..فتحت عيني بالكوة لكيته محمد..
يلة كومي..مرية منهزمة من رجلهه..
عوفني نعسانة ما بيه اكعد..تعبانة..
كومي راح نروح ملهم ينتضرونج..
يبووووه من الصبح..ميصير واحد يرتاح...مشكلة صايرة اني شنو بنصهه..اووووف لو بس اعرف شني هل مشكلة..
كومي حضري روحج..وغسلي وجج..ومن نوصل راح نعرف..
كمت..رتبت اموري..والكاهم كلهم ملمومين..يتانوني.. طلعت وية محمد بالسيارة..واني الفضول راح يكتلني ..شني هل مشكلة اللي العائلة كلهه رايحة تحلهه..وليش اني لمركزين عليهه بالذات..اسئلة دور بفكري ما لكيتلهه جواب..انجطلت على الكشن بعد ما رجعة اللي محمد..اللي جان ساكت..وسكته وراهه شي..اوووي تعبت من التفكير يخبر اليوم بفلوس باجر ابلاش..
فتحت عيوني ومحمد كالي صحي النوم..ريمااا..
صباح الخير ...واني اتثاوب..واغطي بحلكي بايدي..كتلة ليش جايبينة لبيت امي ريمة الله يرحمهه..انتو مو كلتو مشكلة يم كرابتكم ورايحين نحلهه...محمد تعرف شي وضامة عليه..
لا ..كلشي ما اعرف علمي علمج..
ريمااا هياتنة وصلنة..هسة راح نعرف كلشي..سكتنه..اثنيناتنة..وكل واحد شارد بذهنه..مشينة بالطريق..الزراعي..ماشين لبيت امي ريمة..ما افتهمت كلشي بيت امي ريمة اشجابة بالنص..همة مو كالو لبيت عمتي..سليمة..شعجب اجوي لبيت امي ريمة..
اني شمدريني..مشيت ورة سيارة ابوية..نوب الطريق مو عدل كلة طسات..والسيارة بس تهتز..واني حاسة كلبي..هوة اللي يهتز..حاسة بالنفس ثكيل..وكلبي يرجف من جوة..مديت ايدي لمحمد..لزمت ذراعة..ردت شوية امان ..ردت شوية حنية..
محمد...حاسة..كلبي يريد يطلع..
لزم ايدي ورفعهه لحلكة وباسهه..لا تخافين..اني وياج..مهما يصير..وما اخليج وحدج..عيوني ذبلت..وحسيت براحة من حجيه..لا كدرت احجي ولا ردت احجي  سكتنه ثتيناتنة..والعيون تحجي حجي خرسان.. لحد ما وكفت السيارة..نزلو..من سياراتهم..وسدو بيبانهن..اني تبسمرت..ورجلي ما عادت تكدر تشيلني..باب بيت امي ريمة مقفول..ومحد طلع منه..رعشة مشت بيه..وي كل ذكرى عشتهه..بهل بيت..عمي..يدك بالباب..ويصيح..يهل البيت..افتحو الباب..حسيت الدكة مو بالباب حسيتهه بكلبي..واهل الدار راحو وبعد مايرجعون..لحظة وانفتحت الباب..فركت عيني زين شفت خيال..رجال..رجال شكلة ساكن..بكلبي..وعيني وعقلي..عيوني ضبضبت من الدموع ..امسح بيهه ..واركز..ايد محمد تسللت لايدي..لزمتني وتعصر بيه..خيال رجال..طويل ..عندة حتافات..عريضة..شعره ابيض..حواجبة سود..ثخان..عيونة عيون امي ريمة الله يرحمهه..شفايفة جبيرة..مثل شفايفي..زعلانة وماخذة موقف من الدنية..لابس فانيلة نص ردن وبجامة..نوم..مبين عليه هسة كعد من النوم..عيونة تتداور وتتفحص بالوجوه..عمي حضنة..بكل قوته ويبجي..حمد الله على سلامتك اخوية..ليش هيج..لا سألت لا كلت..اخبارك انكطعت علينه..الحمد لله على سلامتك..الحمد لله شفتك..
شفت الدموع تلمع بعيونة ..شفت سمر تبجي..الولد والبنات كلهم متفاجئين..الدموع ما خلتني اشوف زين..امسحهه وترجع تجري..احس شهكات طلعت مني من غير ما احس ااااااااه..يا كلبي...ااااااااه يا ظهري اللي عشت طول عمري مكسور..اااااااه يا باااااابااا..هنا كمت ابجي..بصوت عالي..الابو اللي انحرمت منه..عمري كلة..عمري ما كلتهه..ولا طلعت من حلكي..جنت اتوجع من اشوف اي طفلة..زغيرة مجلبة بركبة ابوهه..واني اتحسر..
لا كدرت اوكف..ولا اكدر امشي..ولا اكدر اكعد..ابجي واباوعلة..اللسان اخرس..والدموع تجري..وعبرة تطلع وعبرة تطب..الجماعة كلهم..باسوه وحضنوه..واني..بمكاني..متبسمرة وما تحركت..ما كمت اسمع اي كلام..ولا اشوف وجوه..اباوع بعيونة..اللي تاكل بوجهي اكل..عمي قرب من يمة..وشاورة ..عفت ايد محمد..وتحلحزت..مثل الزغار..شلون الجاهل من ستوة يمشي تواته..وهدفة ابوه..اللي يداديه..ويصيحلة..تاتي تواته..بيت الحجي هياته...يصيحلة ويشجعة..حتى يوكف بعد كل وكعة يوكعهه..وتالي يروح يحبي..حبي..هاذ الحلم صار حقيقة..ابوي اللي ما دريته حي لو ميت..عشت عمري..مكسورة جناح..وابوية كدامي..الخطوات..كبرت وكامت تركض..طلعت مني صيحة..برغبة..جبيرة انو اكولهه واخيررررا..
باااااااااااااااباااااااااااااا
رميت روحي..بوسط اديه وصدرة..احضن وابوس..وابجي..وهوة يبجي وياي..حاسة برعشة جسمة..يبجي..واديه..محاوطاتني..بس مرتخين..صار شكد ما شايفته..مرغلت دموعي بفانيلته..ومرغت خشمي..بصدرة..وبركبته..اشمشم بيه..وبريحته..اللي انحرمت منه..وشفايفي تردد..بابا..بابا..بابا..لحد ما حجة..عمي وكال بصوت يرعش ويبجي..يلة تعالو طبو جوة..ما طلعت راسي من صدرة ولا اشوف واحد..ضامة وجهي..بحضنة..وهوة حاضني..ويمشي وية عمي..طبو للبيت..ما طلعت ولا كلمة منه..كعدو بغرفة الخطار..كلهه تسالة عن احوالة وهوة يجاوب..وحجية ثكيل..ومتحفظ..صوته كلش حلوو..نغمة صوته ترن باذاني..الله فرحة جبيرة..ما سايعتني..لازكة..بيه وما كدرت..ابتعد لحظة منة..
طلع للخارج..انهزم ورة سالفة امي منى..وتنقل من دولة لدولة..وبالاخير استقر..بامريكا..اشتغل..وكون روحة..ما تزوج ورة امي..وما كدر يرجع الا يوكع الحكم منه..جان حزين هواي على موتت امي ريمة اللة يرحمهه..وما شافهه..زدت بحضنتي الة..وهوة يحجي..وبالرغم من انو حاسة باديه ما تحضني حيل..بس ما همني..اي شي..مطمنه..لازكة بيه..عمي كالة انو اني اخذت شهادة السادس اعدادي وبمعدل عالي..وتزوجت..ومحمد يسمع..وراسا..لزم ايدي..وشبكهه..وعمي يحجيلة شلون حاول يحافظ على بنته.
سكت..سكته طويلة..واني عدلت كعدتي..حجة ويا ريته ما حجة..
كالي ريماااا اريد اسويلج تحليل (أ.د.ن) حتى اتاكد..
ما كمل..واني افتهمته  وحدي..وهاي الضربة القاضية..#ليوثي