وجع الماضي

الحلقة ٣١

#وجع الماضي
#ليوثي المياحي

كلبي كام يرجف من الخوف ...يبووووه لو شافني..جان شسويت ..معقولة ما انتبه عليه رغم عيونة تلاكن.. نوب كرار وياي..وكاعدين على فد ميز ...كملت خاف ما خلصت من سالفة حسام تجيني سالفة كرار...لازم اشوفلي طريقة واطلع منا بدون ميشوفني ..وخاصة مبين عليه سكران ومطوخ ..ومن شكلة هواي تعبان..اجرجر برجلية ..من الخوف كامن ميعينني.. امشي واني خايفة لحد ما وصلت للميز كرار وكف على رجليه ..كالي شبيج ريماا ..انتي زينة؟؟
ما ناقصني انوب بس انته ..عيوني حايرة وخايفة ..نار بكلبي اشتعلت؟؟ وبطني زاد وجعهه ..احس بسجاجين تكطع بيهه ..كتلهم يلة كومو خل نرجع للبيت لان احس بتعب وبطني موتتني ..
جديتي كالتلي اسم الله عليج بنتي.. محصنة بسم الرحمن .. خاف استبردت من الموطة اللي اكلتيهه.. كتلهه يمكن ..يلة يمة خل نروح ..مبينهه تعبانة حيل..
الغراب كال تردين اشيلج اذا مابيج تمشين على رجليج..
فتحت عيوني على كبرهن..كتلة لا..لا أي اتشيلني ومحمد بشوفك شايلني ؟؟هية هاي العايزة..اوف اطلع من مصيبة تلاكيني الثانية..
؟..لا اكدر امشي ..اسبقني انته وامك واني امشي وراكم على كيفي؟؟
لزم امة من ايدهه وهوة يساعد بيهة ..واني خاتلة وراهم وضامة وجهي من يم محمد حتى لا يشوفني ..همزين جان سكران ومطوخ وما ركز علي زين من اجت عيني بعينة.. امشي على كيفي ورجلية كوة شايلاتني.. ..محمد الله ينطيه العافية كاعد كبال ميزنة ..بس قهرني هواي شكلة تعبان حيل وجكارتة بايدة ولحيته عالية..رجعت ضايجة عليه وعلى روحي وجسمي تعبان وحالتي حالة ..انوب هذا بالسيارة يرادلة خلك ..واني روحي طافرة .. وصلنة للبيت..يادوب ذبيت الجياس مالت الملابس ..وكبل نمت.. بالليل ورة العشة ..اندكت الباب الرئيسية..اجوي عائلة كرار ..خالي ومرتة وثنين من بناتة سلمو وكعدو واني ..مالي خلك اكعد وياهم.. كرار تبسمر كدامي وعيونة طالعة نازلة تتفحص بيه.. كمت جبتلهم عصير وفواكه..واحلة شي بالبيت انو شتريد موجود.. عكسنة من يجينة الخطار كبل نسويلة تمن ومرك ولحم لو ثريد مال تشريب لحم.. لو مكبعة.. وراه ستكان جاي..لا فواكه ولا عصير..ذن شني مايسندن العظم.. ورة ما كملو وكفت وكتلهم اني اترخص منكم لان تعبانة واريد انام شوية.. تصبحون على خير...
رد الغراب؟؟ لا اكعدي ..جاين عليج؟؟تفاجأت وباوعتلة ..يبووووه هذا بس لا جاي يريد يخطبني صدك..
خير خما اكو شي صاير؟؟التفت الابو وكالة بابا احجي عاد..
خالي تنحنح.. عبالك مايريد يخطبني بس مجبور..كال لجدي يابة اجينة نريد نخطب بنتكم ريماا لابنة كرار..
يبوووووه الاصت عليج ريمااا؟؟ شراح اسوي ياربي.. شلون اخلص من هل مصيبة ..اللي وكعت فوك راسي.. رجعت كعدت..ما اكدر اكللهم اني مزوجة لان اذا كتلهم ..اكيد راح يسئلوني ليش انهزمتي من رجلج واني ما اريد واحد يعرف سري.. بس لازم اتصرف باسرع وقت..اخذت قراري..وكتلة خالي..اني اجيتكم ردت ارجع المي لمجاريهه..وردت ارجع صلة الرحم..وما ردت اكطع وياكم...خالي اني...اني..مزوجة..
الكل...فتحت حلكهه...وااااااه..ومستغربة..
اي لعد قابل اخليهم يخطبوني..واني على ذمة رجال..(انتو شتحجون )حتى عرسي بعده اخضر..شهر ماكمل..
كرار كمز من مكانة..وكام يحجي وياشر باديه ويبحلك بعيونة..اللي تريد تطلع من الصدمة.. شوكت تزوجتي وشلون؟؟
زين شعجب ما لابسة حلقة بايدج..وبجنسيتج ما مكتوبة مزوجة..مكتوب باكر..شلون...متفهمينه؟؟
كلينة الحقيقة..انتي منهزمة..لو شني سالفتج..
اصبر شوية ..هدي اعصابك هسة اجاوبك على كل اسئلتك..
اني اخذت ابن عمي..وبعدني عروسة جديدة..ليش عفتة واجيت..
ضيك عيونة..بحالة استجواب..يتبعه اتهام..
وليش انهزمتي..خاف اكتشف بيج شي..مو زين
اني هنا تخبلت..وجنن جنوني..يعني اي شي مو زين يصير لازم اني لمسويته..اي شي غلط لازم من جوة راسي..مو من يم الرجال..شلون عيشة هاي..كبل خلة العيب..بيه..مو بغيري..وكفتلة على حيلي..واصبعي بوجهه..احترم روحك احسلك..ولا تتعدة حدودك..وياي..محد مخليك وصي عليه..عفته..لان جان متسلط..ومتجبر عليه..حالة حالك..وبعدين هاي شغلات بيني وبين رجلي..محد اله حق يدخل بيهه..وما اريد احد يكلة اني يمكم..والله والخلقني..اذا واحد كالة اني يمكم..انهزم..منكم..واخليهه الكم طويلة عريضة..افتهمت استاذ كرار..شوفلك وحدة غيري..تتحكم بيهه وتسويهه لعابة..بعدة ما اجة اللي يسيطر عليه ويتحكم..بحياتي..واريدك تعرف..اني مرة بعشر رياجيل..عمري ما نزلت راسي..لاحد؟؟وشرفي هوة قوتي..وسلاحي..وانته جايني هسة..تكلي ليش انهزمتي..
هذا جوابي..من رخصتكم..تصبحون على خير..
درت وجهي..ومشيت لغرفتي..وخليتهم فاكين حلوكهم..كافي مذلة وانكسار..اللي يتقربلي..اشرب من دمة..ههههه..
مرت الايام وهدوء رهيب ..كلشي ساكن..حتى مشاكل ماكو..حسبالك الهدوء اللي يسبق العاصفة..وما كو اي شي جديد..كرار قلل جياته للبيت..اتجنبة..من يكون موجود بالبيت..حتى هوة احسة يتحاشاني..كضيتهه..اكل وشرب ونوم..النهار كله نايمة..اكعد اكل وارد انام..مدري شبيه ..دايخة..وما اشبع نوم..ونوب صايرلي واهس بالاكل..مو بانصاف..
بليلة كرار اجة..يتعشى ويانة..كعد على الميز مقابيلي..جنة مسوين برياني..وزلاطة..وطرشي..وكبة..ومكلين بيتنجان..وخير من الله..وفواكه من كل الاشكال..اخذت الخاشوكة..وكمت العب بالصحن..اشيل برياني وارجعه..واكلب بيه..ما اكلت..لان نفسي انسدت من كعد كبالي..رفعت عيني..على صحونتهم..واحد واحد..كرار ما اعرف ليش مهتمين بيه الوحيد اللي مخليلة صحن جبير..ومخلين كل الانواع يمة..حتى الزيتون الاسود..اللي احبة مخلينة يمه..اشتهيته فدنوب..مديت ايدي وسحبت الصحن من يمة ..هوة عيونة احولت احب الزيتون هواي شسوي نفسي ودنت عليه .. اني اكدر اجيب صحن ثاني بس ما اعرف ليش حبيت اضوجة ويمكن لان حسيت مهتمين بيه زيادة علزوم.. اكلت حباية وكفت بزردومي ..كمت اكحكح.. جريت سراحية المي حتى اشرب ..طلعت فارغة كمت اترسهه هوة اخذهه كبلي وراح علبراد حتى يترسهه..اني لكيتهه فرصة قضيت على الزيتون كلة.. جديتي وجدي ايباوعون عليه وما مفتهمين شي .. وحتى اني ما مفتهمة شي؟؟ اجة كرار وجايب وياه المي ..دارلي بالكلاص واني اخذتني الضحكة وجدي وجديتي هم كامو يتمضحكون وهوة خطية واكف ما يعرف شني السالفة..مسحت حلكي.. واخذت كلاص المي من عندة..
عوج حلكة وكااال صحة وهنة ..لو كايلتلي اني انطيه الج عليش هل تمثيل..هنة زيتونات..ونوب سود هههههههه...
كمت كتلة اشتهيتهن...خليت ورحت لغرفتي..وخليته فاك حلكة علية؟؟مصار شي بذيج الفترة ..بس اكثر شي ضوجني .. جنت جايبة وياي جفية مخليتهه بجيب جاكيتي.. بيهه ريحة محمد..كلما كلبي يشتاقلة اطلعهه اشتم بيهه وابجي..دورت على الجفية كلبت الغرفة ومالكيتهه ..سالت جديتي كالت أي غسلتهه بالغسالة..تخبلت وعقلي طار مني ..شلون راح اغمض عيني وريحتة مو وياي بالفراش ..ياا ربي شلون احصل على أي شي منه حتى يصبرني ..لازم احجي وي اختة سمر واخليهه ادزلي قميص فانيلة بيهه ريحتة.. سمر عندي ثقة بيهه وهية حبابة هواي.. خل اتصل بيهه..رحت على جديتي وكلتلهه جدة اريد اشتري تلفون وشريحة..كالت ميخالف هسة اخابر السايق ياخذج للسوك اشتري تلفون وارجعي بس لا تتاخرين ..طلعت وي عمي محمد اشتريت تلفون وسيم كارت وعبيته رصيد ورجعت ..دكيت على سمر مرة ومرتين وتلاثة ..لحد مافتحت خط..كالت الو ..كتلهه وسم شبيج ماتفتحين خط علي.. كالت...ريماااا وج هاي وينج وين انهزمتي الدنية مكلوبة عليج وانتي ولا يمج.. وبعدين انتي مو تدرين اني ما ارد على رقم غريب ما اعرفة.. كتلهه شكو ماكو ..محمد شلونة..
كالت شعجب اتسألين عليه ..صراحة ريمااا محمد موزين..اخوية راح يموت من عملتج هاي.. هايم وضايع لا ياكل لا يشرب مكضيهه سكر وجكاير.. خليه حيل كل اللي يصير بيه ..سمر تدرين بيه شكد احبه...والله احبة واحتاجة هوة الي  مصبرني بهل دنية..
شنو ؟؟؟شنو هل تناقض ريماا..تحبينة وتنهزمين منه؟؟
احبة ..بس اريد اتوبة من افعالة اريدة يحس على روحة اريدة يعرف معزتي اريدة يكتشف الحقيقة وحدة..سمر .. اسمعيني اريد خدمة زغيرة منج..اي كولي ان شاء الله ما اقصر..اريد قميص لمحمد بس ما مغسول اريد ريحته بيه..
وووووه صدك تحجين ريماا؟؟
أي شسوي ادمنت على ريحته ..والجفية اللي جنت شايلتهه وياي غاسلينه وراحت ريحته ..بس
عيوني ..ما اريد احد يعرف انو اني اتصلت بيج..
ليش ماتردين ترجعين..
لا ارجع بس اريد شوية ارتاح ..فد سنة سنتين.. عوفج مني وكوليلي..شخبارة وين يروح ما وين..
والله ما اعرف وين يروح..بس جياته للبيت قليلة..من تصير فرصة كوليلي على مكانج حتى اجيج..
بيني وبين روحي كلت اكللهه على مكان بعيد..اخاف كلشي يصير وتكول لمحمد..كتلهه..دبري القميص..ونتخابر بعدين..باي..
قفلت التلفون..واني انتضر خبر..منهه..عن قريب..
محمد يحجي..
اني ابيت صاحبي..جنت رايد انهزم من دنية ريماا..كضيت اغلب وكتي بالشرب والنوم..اللي طار من عيني من يوم راحت ..حالتي تعبت..وما اهتميت بمضهري وشكلي..وحتى عملي هملتة..كاعدين ستونة نريد نشرب اني وصاحبي..وجان تلفوني يدك..فتحت خط الو...هلو سمر..هسة وكتج..خير كولي شرايدة..
عوف كل اللي بايدك واسمعني..
شبيج صاير شي..كولي لا توتريني..
ريمااااا؟؟؟
عيوني لمعت..والفرحة زارتني..وهيه تحجي..والضحكة..ملت وجهي..من حجتلي..شلون تحبني ومقهورة علية..وشلون طالبة قميص بيه ريحتي..عفت صاحبي والشرب..ورجعت طاير اركض..واردد قميصي ..حلوو. حلووو قميصي...الا امليه ريحة..هههه
كلت لسمر تحجي وياهه..وتكللهه دبرت القميص..وين المكان حتى تسلمه الهه..
رجعت للبيت نزعت القميص وعطرته..اخذت سمر بالسيارة بعد ما اتفقت ويه ريماا..يتلاكن..بكافتريا..بالكاظمية..قريب من الامام الكاظم ..عليه السلام..جايج..يا ريماا..ياضوة عيني..#ليوثي