وجع الماضي

الحلقة ٤

#وجع الماضي
#ليوثي المياحي

بهذيج الايام اني التهيت بامي ريمة ومرضهه العرس مال اخت سهى لغيته ومارحت بيه..همزين اجتي من يم ربي اصلا اني ما جان اللي واهس بيه.. بس بيوم السبعة  رحت  ابارك بس وارجع للبيت كبل ماتضلم الدنية .. ما جنت اريد اروح بس امي ريمة لحت علية هواي واني ما حبيت اكسر كلمتهه..لبست نفنوف جديد ولبست فوكاه صاية مزركشة اشتريتهه من خالتي عيشة... هاي مرية بالقرية هي وحيدة ما عدهه اهل.. تجيب هدوم من المدينه وتبيعهن على نساوين القرية بالاقساط...وفوكاهه كل نساوين القرية يحجون عليهه ويذمون بيهه على مرة سايبة لان تروح وحدهه للمدينة وترجع.... هاي عقلياتهن امهات القرية...بقيت عشر دقايق وطلعت حتى ارجع للبيت رفعت الصاية مالتي حتى لا تتوسخ بالتراب اثبت رجلي من مكان لمكان شوية شوية حتى لا اعثر .. جان الطخ بدنكة ..مدري حايط..كمت اتافاف واعدل بروحي واهز براسي ...جان الكة صاحبنة يبتسم...كالي مرحبة.. ومدلي ايدة حتى يسلم علية.. دفعت ايدة وكمت ادردم...كتلة اني اعرف همة يطلعون بالليل مو بالنهار......هوة ضحك هههههه وكالي منو همة؟؟؟؟كتلة متعرفهم ...اسم الله العظيم ..وخر من كدامي اريد اروح...كالي مو كبل ما تكوليلي ع اسمج...خنزرت عليه وفتحت عيوني كل قوتي.. كتلة... شنو ؟؟؟شنو...اسمي وما اكولة ؟؟شلت الصاية زين وكمت اركض وانهزمت من يمة... اسمعة يضحك بكل قوته ويكول... اول وتالي راح اعرف اسمج يمخبلة...وصلت يم سهى واني الاهث واصيح عليهه حتى تطلعلي ...طلعت وهية تضحك...كالتلي هلا ومرحبة بالغالية يا كلبة ليش ما جيتي للعرس...كتلهه بلة شاحجي وية هاي المخبلة انتي مو تدرين امي مريضة وما اكدر اعوفهه لوحدهه يعني منين يجي الواهس اركص وامي بهل حال...المهم دخلت وسلمت كعدت شوية .. حطيت الفلوس بايد ام العروسة وهنيتهه على زواج بنتهه وبستهه من ورة خشمي وطلعت سحبت سهى كتلهه وصليني لنص الطريق وارجعي..وهم شوية نحجي ونسولف..كالتلي باعي هذا الرجال اجانه وعزمناه عرفت انو اسمة نهاد يسكن بالمحمودية .. وج اخيتي هذا سلبلي عقلي الليل كلة كاعدة نايمة افكر بيه اخذ كلبي ..كتلهه خطيه هذا نهاد وكع بمصيدتج...كالت والله ما ارتاح الا اخذه.. شتكولين لو اخذ ابو سعدي سايق التكسي يوديني لبيتهم واشوفة وابوحلة بحبي اله...ههههه كتلهه حبتج حية..رجعت للبيت بعد ما تفاركنه بنص الطريق.. بس هوة ملك الموت يخلي الواحد مرتاح...كعدت يم امي شوية وما احس غير خالتي ام سهى تدك بالباب... طلعتلهه.. سلمت علية وكالت جيت اشوف اخيتي ريمة واطمن عليهه... دخلتهه على امي وسويتلهم جاي اني كرهتهه وكمت ما اطيقهه حطيت صينية الجاي يمهم وردت اروح هية كالت بنيتي ريما اكعدي عندي حجي واريدج تسمعيه.. اني ما ردت اكعد باوعت لمي ريمة هزتلي براسهه بمعنى اسمعي الكلام واكعدي..تربعت كبالهه وكعدت..وامي طلعت وخلتنه وحدنة كالت بنيتي ماجد وليدي رايدج واني الحقيقة ما عندي شي عليج بنية مؤدبة وتربيت ريمة واخلاقج القرية كلهه تحلف بيهه..وابني ماجد تعرفية رجال جادود ويعيشج احسن عيشة هوة دزني يريد جواب منج شتكولين انتي...اني .. نطيت بالحجي لان كلبي جان مليان منهه..وجنت اتاني الفرصة حتى اتشفة بيهه....كتلهه من ناحية انتي ماعندج شي تكولينة بحقي فهاي جذبة لان اني سمعتج باذني هاي اللي ياكلهه الدود...كلتيلة ما اريدهه ماتفيدك لان ماضيهه وسخ.. اختار غيرهه..وابنج اذا جان خوش زلمة وعندة خير هواي فخليه لروحة الحمد لله اني عايشة بنص الخير وما محتاجة خيركم...ولا محتاجة ولدكم...هذا جوابي وما اريد احجي بعد...كمت من يمهه وخليتهه فاكة حلكهه ومصدومة من جوابي... كامت لبست عباتهه وطلعت وهية ضايجة والغضب مالي وجهه..اااااه شكد ارتاحيت من طلعت اللي بكلبي...امي ريمة صاحتني كالت ها بنيتي شرايدة منج...حجيتلهه كل اللي صار كامت تلوم بية ليش بيوم سمعتهه تحجي علية ما كلتلهه..كالت جان عرفت شلون اردهه وافضحهه بوسط النسوان هاي قليلة الاصل ..كتلهه جنت اخاف عليج تنقهرين ويصعد الضغط مالتج....بليلتهه امي تخربطت وضلت تون شربتهه دوة وضليت كاعدة وياهه لحد الصبح حالتهه صارت فد نوب مو زينة ما صدكت طلع الصبح اجة عمي بعد ما اتصلت بيه اخذهه للمستشفى نوموهه مستشفى وخلوهه بالعناية الان جانت حالتهه تعبانة هواي..كعدنة وياهه..لحد ما اجة الطبيب وطلعونة ما خلونة انبات يمهه..رجعنه وكل واحد حاير بهمة..عمي رجع وياي للبيت..كال انبات ونرجعلهه من الصبح..واني الوهواس اخذني شلون اعيش بلياهه..اكيد راح اصير ملطشة من واحد لواحد..عمي احسة غريب علية بكل سنة اشوفة مرة وحدة..وعائلتة مطشرة  ابغداد كل واحد عليه بروحة..وصارلهم سنين لا جونة ولا مرو علينة..حتى اذكر جان يجي يكل الامة تعاي عيشي وياي ابيتي بس امي ريمة جانت تكلة ما اكدر وليدي اني الكة راحتي هنا ابيتي وبفراشي..عقلي كام يودي ويجيب..والدمعه بطرف عيني ناشفة.. الجو مكهرب ومتكدر..حتى مالنة واهس ناكل لكمة..ولا حتى نحجي..لحد ما طلع الصبح.. دك التلفون ..جان من المستشفى كالو تعالو اخذوهه لا ن جاي تنازع بالروح..اني وكعت وحسيت الدنية اندارت بيه وكلبي انهز وانتفض.. رجة قوية ضربتني .. بداية مصايب جاية علية.. واني كلبي دليلي..خلاني عمي ارتب بالبيت واحضر فراش لامي ريمة والدموع حارة وتحرك بوجناتي خلاني هايمة وحايرة بروحي.. بسرعة انتشر الخبر وسمعو كل اهل القرية..الكل جوي يسألون عن امي .. اجة عمي وجايب امة وياه..الجيارين واهل القرية راحو يتراكضون عليه حتى يساعدونة..حتى ينزلوهه وياه.. امي جانت امددة جنهه ميته.. صايرة صفرة نومية والنفس بالكوة يطلع ويشخر..من شفت هيج حالتهه ايست وكطعت الامل .. ودخلت بهستيرية .. والبجي والنحيب زاد من عماتي اجن وكامن يبجن ويلطمن على امهن..وراهه اجتي مرة عمي سماح وبنته سمر واولادة اللي عمري ما شايفتهم.. صايرين رياجيل محمد.. وانور.... قرأن يقرة والدموع تجري وهدوء متشنج..اتاني شوية... وامي ريمة بدنية ثانية .. طالعين طابين عليهه.. عمي منع احد يدخللهه بس اللي يقرون قران بصفهه..وهوة كاعد يم راسهه ويلقن بيهه الشهادة تعدة وكت المغربية..مد عليهه الغطى وطلع كال "انا لله وانا اليه راجعون " والدمعه بعيونة..مرت الايام صعبة وثكيلة ومرارة موت واحد عزيز تكتل الكلب..واطلع الروح من الجسم..ما اعرف شلون مشت..المراحل.. غسل ودفن وفاتحة وعشى ميت وذبح كل هاي التفاصيل عشتهه واني مغيبة واحساسي ميت لا كدرت اخمن شنو مستقبلي الجاي ولا كدرت اعرف شراح يصير بية منا وهيج..ولا كدرت ارجع الماضي حتى اعيش بيه لحظات وداع لام ربتني وكبرتني مثل بنت بطنهه.. جنت فاقدة للحس والوعي حتى وجوه الناس اشوفهه خيال ...مشدوهه ومخدرة الناس تواسيني وتاخذ من خاطري وتبوس وتدردم وية حالهه تكول خطية هل مسكينة شلون راح تعيش وحدهه لا والي الهه ولا تالي..وناس تكول بقت وحدهه منو راح ياخذهه..اسمع واغلس جنت مستهبلة وعقلي ضاع مني بلحضات مهما جان بيه قوة .. هذا الموت كسر ظهري .. تلث ايام الدنية مخبوصة واني اشوف بالمكلوبي اني صاحية وما صاحية ... فرغ البيت وبقن بس عماتي اللي بالنهار يمنة بالبيت وبالليل يرجعن لبيوتهن..بس عمي وعائلتة بقو بالبيت ليل نهار..حضرو الدفنة ..واهتمو بالذبايح وعشو المعزين بعد ما نصبو بيت الشعر كدام البيت..واهل القرية كامو بالازم وازود..راحت كل الناس لبيوتهه واشغالهه فلينه بيت الشعر ولمينة الهوسة والفرش وغسلنة المواعين والجدورة ...اني خليتهم ورحت الغرفتي لان اللي بكلبي ما يعرف بيه بس اللي خلقني..تمددت على فراشي وكمت استرجع شريط الذاكرة..حتى سمعت الاصوات كامت تعلة وتعلة.. بنص سكون الليل.. عمتي لطيفة كامت تحجي من صوتهه عرفتهه كالت.... خوية احنة نسوان عدنة رياجيل غربة ما نكدر نعوف بيوتنة رايحين جايين .. وما نكدر ناخذهه تعيش ويانة لان عيب ..نبقيهه ويانة بالبيت..ورياجيلنة غربة ..شنو الحل..عمتي الثانية سليمة..جانت احن منهه..كالت ..شدتحجون..تردون انذب بنت اخونة..عمي صلاح..كال اني ما كايل اخليهه يم وحدة منجن..هية بنت اخوية..واني اولى بيهه..وعدا هذاك اخوية وصاني..وخابرني كبل ميطلع..كالي بنتي امانة بركبتك..بس اني عندي اولاد كبار..بالبيت..ولهيج راح اخذهه عروسة لبني محمد..ورة الاربعين..حسيت بالتوتر والهبطة مالت محمد وصلتني لحد يمي..بين من رجفة صوتةوحسيت ريجة نشف..مبين جان معصب وهوة يحجي..وبلهجة ولد بغداد..كام يحجي وينكنك..بابا شنو تريد تلزكهه عليه..بماضيهه وبمشاكلهه..اصلا اني ما احبهه واكرهه موت..من الله ما احبهه..شلون اخذهه..واني حتى شكلهه ماشايفة..ولا اذكرة اخر مرة شفتهه جان عمرهه خمس سنين عمي صاح على محمد صيحة تهد الجبال....كالة ولك تكسر كلامي..تعال بعد اضربني راشدي..كلبي وكع..بين ضلوعي..صرت عالة على الناس..وناس ترميني على ناس..محمد كالة حشاك بابا..سامحني..اني مو هيج قصدي..اني كلت خل اكوم انقذ الموقف..كمت بالكوة امشي بخطوات..بطيئة..وثكيلة..فتحت الباب..وهمة كلهم انتبهو علية..كمت اباوع عليهم ادور واخمن على محمد..وبالكوة عرفته..لان جان واكف كبال عمي..واخوه الثاني جان كاعد..خزرت عيوني..على هذا محمد..اللي جانو يعرضوني عليه..ويرفضني..لا شايفني..ولا ماخذ رأيي..وجاي يحكم علية اليكول اني مجلبة بيه..كام يخزرلي بعيونه..خلاهن بعيني..الي ما نزلتهن من عيونة ابد..ولا خفت او توترت منه..بس اللي بقة بعقلي..عيونة بس..جانن بياضهن..كلش ناصع..وبنصهن فص عين اسود..التكول زيتونة..تلمع..ونضرتهه ثابتة..ثاقبة..وفوكاهم حواجب..سودة وثخينة التكول هلال..مالات غضب وغل..حجيت..من غير ما اتردد..
عمي..اني بنت ريمة..ورباية اديهه..الله يرحمهه..عمري ما جنت..مو زينة  والماضي..اني مالي ذنب بيه..امي ريمة هية اللي ربتني..وما اريد اتزوج..لا من ابنك ولا من غيرة..وسامحني بهاي الكلمة..قدرك عالي..عندي..
وانته اللي مدري شسمك..ترة اني ما رامية روحي عليك..حتى تجي وتحجي عليه...باوع راجع روحك الف مرة كبل ما تتهمني وتذمني..اني اصلا ما رايدتك ورافضتك من الاساس..مو انته رافضني..يكون بعلمك..اني من بيتنه هذا ما اطلع..لا الك ولا لغيرك..كلهم بحلكو عيونهم ممصدكين..وكاحتي..بس نسو انو همة طلعو هاي الانسانة الوكيحة بداخلي..امي ريمة علمتني..ما اسكت عن حقي..واللي  يمسني بكلمة ارجعلهيا عشرة..وهوة حضرة جنابة ميعرفني..وجاي يحكم علية..حسبالة اني رخيصة..وبساع ارمي روحي..جوة رجليه..واكلة فدوة اخذني اني مسكينة..هواي..
الجو توتر والاعصاب..تشنجت..وصارت نار..كال عمي..اني مجاي اخذ رأيج ولا رأيه..هذا قراري..ولازم تنفذوه انتو الاثنين..
جاوبنة اني ومحمد بصوت واحد وبنفس اللحضة..لا..لا...لا...
تدخلت عمتي سليمة..وهية احن منهم علية...كالت استهدو بالرحمن..وصلو ع النبي..اني اكول ريما..هل سنة بالسادس اعدادي..خل تكمل وهية شاطرة والهه واهس بالدراسة..خليهه تجي يمي تدرس وية بنتي..امل..مثل اختهه..تكمل دراستهه..ويبرد تراب امي..ربي يرحمهه.. وبعدين انشوفلهه حل.. شتكولون يمكن ماكو احسن من هل حل..كلهه سكتت..والمبين الكل ارتاحت لهاي الفكرة..عمتي..سليمة كالت اخوية صلاح..اني مو قصدي اكسر كلامك..انته جبيرنة وتاج راسنة..حتى اذا ردتهم يعرسون..ما يكدرون يعرسون لان امي بعد ترابهه اخضر..خلي شوية نستراح..وهية هم خطية تستراح وتخلص دراستهه..وحتى نطيهم فرصة..يتعرفون على بعض..وبعدين..الله كريم..شتكولون..اني طلعت وخليتهم..والضاهر اخذو برأي عمتي سليمة..كامو يرجعون لبيوتهم..سلمت عليهم كلهم الا هوة ..مسكين جان عبالة يخوفني..جوي يطلعون..فات بصفي..شاورني..من دون ما يخلي واحد يحس بيه..كالي ريمة ما عرفت تربيج..زين..اني اعرف شلون اربيج..راح يمشي ويتمايل..بتفاخر..واحنة عدنة عادة من يجينة واحد ويريد يروح من يمنة بالسيارة نرش مي وراه..عمتي رشت المي..ورة سيارتهم..الولد جان كل واحد عندة سيارة..اخذت طاسة المي..وكمت ارش ورة كل سيارة تطلع..سيارة محمد وية مايريد يطلع فتح الباب واني رشيت المي ..بللته من فوك ليجوة..باوعلي بغضب وحطني كدام عينه..وكام يهدد بيه..واني اضحك ضحك شماته..وبدة اللعب...وللحكاية بقية