وجع الماضي

الحلقة ١٦

#وجع الماضي
#ليوثي المياحي
الحلقة ١٦
صدكوني اخذني الضحك..ههههههه بليلة وحدة اثنين يخطبون..واني ما رايدة ولا نفسي بواحد منهم..يوم تانيته..ما اجة..وحرم علية فرحتي..وخلاني بالوجه الاسود ..كدام اهلي وحبايبي..والثاني..كشرلي على انيابة..وشوفني وجهه الحقيقي..قبل ما نكتب كتابنه..الحمد لله اشكر ربي..كشفلي حقيقتهم..قبل ما يوكع الفاس بالراس..واصير ضحية  لواحد منهم..صحيح محمد نادم على فعلتة..وصحيح باقية غصة بالكلب كلما اجت العين بالعين..بس ما كدرت انسى..عملتة وياي..الناس كلهه تخزر بيه..تنتظر..حتى افتح حلكي واحجي..واني لا ضل عندي فكر ولا ضل عندي عقل حتى افكر بيه..وارد عليهم..تصدكون بالله..احساس الفرحة..ماعندي معدوم من الاساس..لا بهذا  ولا بهذا..محمد كام يحجي وعيونة تجدح نار..جيت متأخر حضرة السيد حسام.. اني طلبتهه كبلك واني ابن عمهه واولة بيهه..رد حسام وصارت مناكرة وية محمد..وكال الراي الاول والاخير الهه وهية ليهسة ما كالت رايهه .. حسيت علكت بيناتهم فدنوب وبقت معلكة على شعراية.. لو غير وحدة جان كيفت وفرحت فرحة مو طبيعية وين لاكية بهل وكت والخطاب  يتعاركون عليهه.. بس اني ما حاسة بشي حسيت صدري ضاك علية.. وكوة كمت اجر النفس..ما كدرت احجي ولا كلمة ..محمد كالة زين وحضرة الوالدة موافقة؟؟مو جانت رافضة ..ردت ام حسام ..اني اللي يفرح وليدي اسويه وما دام عدهه عائلة وهيج ملمومة وتتعارك عليهه لعد هاي كنز ومستحيل تتفوت..وفوكاهه ماشاء الله على بنيتي حلاة واخلاق وحبابة.. ربي يتمملنة بالخير..حسام ابتسم فرحان برأي امة بعد ما جانت رافضة..محمد كام يتغزل بيه كل بالة يضوج حسام..عمي كال..بنتنه درة واللي يزوجهه يا هنيالة ادب واخلاق وجمال..الرأي الج ريماا من غير ما اضغط عليج انتي اللي راح تختارين وراح تعيشين وياه..محمد يباوعلي ويدزلي رسائل انذار بعيونة معناهه ديري بالج..توافقين عليه..وحسام يباوعلي بنضرات ذبلانة وكلهه توسلات واعتذارات على اللي صار قبل وكانو يكول هياتني وفيت بالوعد واجيتج خاطب...واني بوسط عائلتي وبين اثنين ما اريد ارتبط بيهم..يرادلي رد دبلوماسي حتى ما ازعل احد..ونوب تطربك على راسي؟؟ نزلت راسي حتى ما اباوع بعيون واحد منهم..كتلهم جيتكم على راسي وعيني ..محمد ابن عمي والاضفر عمرة ما يطلع من اللحم وحسام شرفني بالزيارة وية الوالدة ربي يعلي سعودهاا..بس اني اريد اكمل دراستي بالجامعة..ام حسام جاوبت..احسن كلام .. حسام موافق ادرسين وانتي مخطوبة..وما يجبرج تبطلين هذا حقج..عمي كال بنيتي ربي يكملج بعقلج دراستج وعدتج تكمليهه بأذن الله..اني حسبالي نهزمت انوب زاد الضغط علية..اووووووف شنو الحل..عمي ربي يحفضك ويعزك اجيتو من غير ما اعرف ولا عندي علم خلوني افكر وانطيكم جواب  حسيت الكل ضاج وانقهر لان مانطيت كلمة..حسام خزرلي عيونة وكال اي ماشي احنة نترخص راح نروح ونبقة ننتضر ردج ريماا..سلمو علينة وطلعوو..بهاي الاثناء محمد فجأة جرني من ايدي وجرجرني لغرفة امي ريمة وسد الباب وارتجة عليه..كتلة شبيك انتة تخبلت صار لعقلك شي؟؟؟كالي  وانتي خليتي بيه عقل .. ..تحجين صدك جذب..اني بصمتج الي من يومهه اذا تذكرين..انتي الي مو لواحد ثاني ..كتلة لا بصمتني ولا بصمتك اني ملك نفسي مو ملك احد..روح من يمي يبن الناس ..احسلك ما صدكت الله هداني وكلت كلمتين هدن الوضع لا تخليني امسلت واعلكهه..اتقربلي بلهجة التهديد وعيونة تلمع واصبعة بوجهي اسمعيني صبرت عليج هواي كل هاي الفترة نطيتج مجال وسعت صدري وياج ..بس كافي عندج خيارين لو اني او اني,,ما كو حجي زايد هسة اطلعين كدامهم تكليلهم قبلت بمحمد يخطبني...اني ضيكت عيوني وعوجت حلكي احب افهم على اي اساس يهدد بية..بلة متفهمني ليش تهددني..كال ترة هسة اطلع عليهم واكللهم ترة اني نمت وياج بالحرام وانتي هسة حامل مني هاااا شكلتي..فتحت حلكي وضليت صافنة..عليه... كتلة اي وشوكت هل حجي صار؟؟روح اطلع كللهم وشتريد تالف الفلهم .. محد  راح يصدكك..لان الكل يعرف بالحقيقة.. كز سنونة ونفذ صبرة كال حتى لو كلت بالجذب يصدكوهه وانتي تعرفين معنى الشرف عدنة.. بدليل عماتج ما حجن الحقيقة لرجالهن..وحتى لو مو صحيح بس النار تترك رماد وراهه..شوفي شراح ينكال عليج وشراح يصير..كلة منج ما خليتيلي خيار ثاني..جيتج بكل الطرق بالهداوة والحنية وبالقوة والقسوة ..اريدج تفهمين شي واحد انتي الي وما اخليج ترحين لواحد ثاني..قرري واني طالع ومن تطلعين وراي احب اشوف شراح تكليلهم ..فتح الباب وطلع وخلاني ضايعة ونوب كرهي زاد عليه يعني بالغصب بالقوة بالجذب ماخذج ماخذج.. اني راح اطلع اكوللهم ترة يجذب وحجية مو صحيح..يريد يفضحني بيناتهم واني ما مسوية شي..الله لا يوفقك يا غراب البين..من يوم وكرت على حياتي..صارت سودة مصخمة..طلعت خطوة ورجعت عشرة ليورة..عمي صاحني..ريمااا وينج..كتلة هياتني عمي جاية..طلعت من الغرفة ورحت عليهم..احسهم يدردمون ويشاورون ويتهامسون..عمتي سليمة كالت..الله يسعدج بنيتي تبارك الرحمن الخطاب ع الباب..محمد كال..عمتي..ريماا عدهه حجي تريد تكولة الكم..بس استحت تكولة كدام حسام وامة..عيونة اجت بعيوني..احسهه تكول ريما كولي مثل ما تفاهمنه..لو تردين اني اكوللهم..عمي ضل بشك وحيرة وتوتر كال شبيكم واحد يفهمنه شني السالفة..كمت احجي وعيوني بالكاع..عمي..اني...اني..امممم...كالي شبيج كمتي اتمتمتين احجي..ستوني ردت احجي ومحمد كالة..بابا..ريماا موافقة..ع الخطبة..واني موافق..بصراحة ..نريد نتزوج..شتكووووول...#ليوثي