وجع الماضي

الحلقة ٦

الدنية غامضة احسهه ومخربطة..سمعت صياح وعركة ..كتلكم من البداية ما ياخذهه واحد الة من العائلة ما اخذتم كلامي.. ترة محد يكلبهه مادام وراهه الماضي السخيف.. وحتى لو تزوج هم راح ماضي امهه يلاحكهه وبكل مناسبة راح يعيرهه بهل سالفة...عمتي كالتلهه ابنك ومارايدهه ولا يطيقهه شلون بلة كلي نغصبة يعني..لو نزوجهه لبنك الزغير ...عمي كاللهه مو بكيفة هاي لحمنه ودمنه واخوية موصيني عليهه وامانة الله ورسوله..والله يسود وجهه اللي ما يصون الامانة... تردين الله يسود وجهي...ياخذهه غصبن عليه..عمتي كالتلة .. اي ليش انته مو تدري راس ابنك يابس ويكرهه يموت منهه..شتريد يزوجهه حتى يعذبهه..ويطلكهه باول اسبوع..كاللهه شتردين تفضحينهه بالقرية ..تريدينهه تصير علج بحلوك الناس والله خطيبهه انهزم .. لان ماضيهه اسود... باعي من هاي اللحظة راح اخذهه تبات يمنه بالبيت..خليهم ياخذون واحد على اللاخ ويتعرفون على بعضهم .. وبعدين يزوجهه يرضة مايرضة.. ويويلة مني اذا كسر كلمتي.. شيريد يضيع بنت اخوية من بين اديه.. هاي عرضنه واحنة نعرف شلون نحافظ عليه..عمتي كالتلة... يا اخي يجوز البنية هم ما رايدته.. كاللهه اي مو اني امشي برايهه .. اني قررت ومو بكيفة ولا بكيفهه كلت كلمتي وبعد ما اتراجع منهة ....يلة لمي ملابسهه وخل تصحصح.. حتى تروح ويانة.....
اني راسي دايخ ويوجعني ريحة العطر القوية شكته الخشمي ..سمعت كلشي بس ما كدرت احجي او اكول حرف واحد..اللي صار بيه شي صعب.. صعب هواي..صعب علية وعلى عائلتي ..من اجيت للدنية وكبرت افتهمت انو اني النقطة السودة بحياتهم لا يكدرون يوخروهه ولا يكدرون يبقوهه..تعبت وتعبتهم وياي وما عندي طاقة بعد حتى اقاوم بهاي اللحضة..حتى البجي مليته عيوني ناشفة ..ما متعلمة على الفرح.. حتى افرح الحزن والضربات اللي توجع هية الحالة الطبيعية ..مالتي..طلعت وباوعت عليهم جان كلبهم مكسور علية.. وكل واحد جان يحب يواسيني بطريقته ويشيل الحزن من عندي.. هذولة الكم واحد بقولي من الدنية..ابتسمت وشجعت روحي..حتى ما احسسهم بخيبتي.. عمتي سليمة اجتي تركض حضنتني وضلت اتبوس بيه..وتبوس براسي.. كالتلي يمة لا تنقهرين بنيتي ولا يهمج هوة الخسران.. نجاحج بالدراسة اهم منه ومن اهلة..وحتى عشيرته..
لتخافين.. اني التفتت لعمي..وكلتله....اللي اتشوفة بيه الخير سويه عمي..اني ما ارد كلمتك..اجة تقرب مني..وباسني..وعيونه..مليانه حزن او وجع..كالي ياله بنيتي كومي تعاي وياي للبيت..سلمي على عمتج..حتى نروح..هزيت راسي..زين..عمي..وكمت كبل ما يطلع كلتله..عمي اني راح اجي وياك..واسكن ابيتك..بس خليني اكمل دراستي..وادخل للجامعة..ما اريد اتزوج..كالي بنتي..انتي متعرفين اطباعنه..اني عندي ولد..بالبيت..وميصير اخلي بنية وياهم..من دون علاقة شرعية..حتى بشرع ربي حرام..خلينه نروح هسة..وبعدين الله كريم..لميت ملابسي وغراضي..وعمتي سليمة ساعدتني..عمتي ام محمد ضلت ساكته وما حجت ولا كلمة..وهذا السكوت مالتهه وترني وضوجني..ساعدتني امل..وهيه تبجي..على فراكي..لان صرنة اخوات كبل منصير اصحاب..اني بوكتهه جنت عايشة بفراغ..حتى الفرحة مال نجاحي نسيتهه..وبيوم اللي اجيت افرح بيه..حزنت..علي صار..حتى لهفتي..على اللي جاي..راحت وكمت اخاف..من اللي يتانيني..خايفة هواي ..احس بكلبي..يوجعني..جنت جاية على مرحلة..من حياتي..الله اعلم شلون حتكون..ومحد يعرف بعلم الغيب بس الله..لميت كتبي..اللي احتاجهن.وغراضي وطلعنه..بالظلمة..بعد ما سلمت عليهم..احساسي..باني مفاركة روحي..جان كاتلني ..والكاع..اللي عشت بيهه..وكبرت..وفتحت عيني بيهه..صعبة فراكهه..رايحة لبيت ثانية..رايحة لناس ثانين..اول مرة..اطلع من كاعنة وقريتنه..ودعتهم من غير شعور..السيارة تمشي..تبوك بالكاع..وتختصر الطريق..واني..سارحة بخيالي..اباوع من شباك السيارة..من ورة الجامة..لحد ما نعست واخذتني النومة..احلامي كلهه كوابيس بكوابيس..لحد ما كعدتني مرت عمي..كعدت ونزلت من السيارة..دخلنة..لبيت كلش جبير..مليانة اضوية..وكلهه مشتعله..دخلنه وعمي..صاح على بنته ..كاللهه.وديهه للاستقبال
بصف غرفتج..لحد ما ندبرلهه غرفة تكعد بيهه..طلعنه..بدون ما نحجي ولا كلمة..هية وتمشي شوفتني البيت كله..الغرفة اللي نطوهه الية ..جانت الاستقبال وهية خاصة للضيوف..المهم خليت ملابسي وتلهيت اصفط بيهن..وارتب كتبي وغراضي..بعد ما طار النوم من عيني..شوية وعمي صاحلي..اني اجيت اركض عليه..كالي ..بنيتي ريما..البيت بيتج..واني بمكان ابوج..اي شي تردينة..بس كوليلي..واي واحد يضايقج..اني موجود..لا تكولين انج وحيدة..ولا انتي ضيفة..انتي بنيتي....ستوني ردت اجاوب..وصوت سيارة وكفت بالباب طلع ابن عمي غراب البين اجة كالعادة لابس قميص اسود وبنطرون هم اسود يتمايل يمنه ويسرة الظاهر مطوخ بالشرب...التفت علية شافني وجان يبتسم وية عوجة حلكة.. وكام يتمسخر..كال هاي انتي هنا؟؟؟؟شنو انهزم الخطيب... وجايبينهه تلزكونهه الي..عمي  كالة ...جان استحيت جاي تترنح وحلكك تفوح منه ريحة العرك.. ياسكير...هوة زاد بالابتسامة.. ورد على عمي وهوة يهز بايدة.. كالة اترنح حتى انسى البلوة اللي تردون اذبونهه براسي... اني ضجت ونسيت انو اني ابيتهم .. طلعت وجهي الثاني ... ولساني الطويل كتلة ؟؟؟ لا والله محشوم... شوف ولك غراب البين ..اني اريد الزك بيك لو انته... عمي صلاح ضحك ههههههه مرته خنست.. وهوة اجاني يركض يريد يضربني عيونه حمرة ..وشعره منفوش حتى شكلة جان يخوف.... كالي انتي ناقصة تربية وتردين واحد يربيج من اول وجديد...المرة اللي فاتت مشيتهه الج... من بللتيني بالماي بس هاي المرة مراح اسامحج عليهه....اني عفته يتوعد ويسب ورحت اركض للغرفة مالتي سديت الباب علية بالمفتاح لان ما عندي ثقة باي واحد....تمددت على قنفة من قنفات الاستقبال... حتى ارتاح شوية ..وجواية احساس بالرهبة والخوف مسيطر علية
....نهار جديد..فتحت عيوني..على ضوة داخل من جام الشباك..كمت استرجع بذاكرتي..المشوشة..بيت ثاني وناس ثانين..غير الناس اللي تعودت عليهم..كعدت وعيني بالسكف..وعقلي سارح..شراح اسوي..شراح يفضهه وية غراب البين..شلون..اكدر اتاقلم وية هل عيشة الجديدة..حسبة تجيبني وحسبة توديني..جان الباب يندك..باوعت..كمت ع الباب..واني خايفة..من ورة الباب ..كلت منو ..جاوبني بصوتة الثخين..القوي..الغراب بعينه..ههههههههه ضحكت..كلت يعني ما نساهه وضامهه الي..كتلة خير شرايد...كالي شنو..تردين احجي وياج من ورة الباب..كتلة اي اكيد...كلي شتريد..وستر روحك...نفخ زفير وبعصبيه..كال ياصبر ايوب..عمج يكلج تعاي اطلعي ويانه..راح نتريك.. برة..هااااا صدك مبروك عليج الشهادة والنجاح..كتلة تتتتتتسلم..ماشي اني طالعة...كالي شسوي لحضي الطايح اللي بلاني بيج..كتلة..لا والله مسكين انته..واني هم واكعه على وجهي ..اتوكل ابدل ملابسي واجي..جان يضرب الباب دفرة..وهوة يصيح..شنو هل الالفاض السوقية..هوة هذا مستواج..شحاسبتني خدام عندج..كتلة روح منا ابن عمي ولا تعصب..ليروح يطكلك عرج..زاد بضرب الباب..ومشة..اسمع خطواته تبتعد شوية شوية..ابتسمت..وفتحت الباب..لكيتة واكف كبالي واجت عيني بعينه..كلبي كام يدك..جان يهجم علي دفعني ودخلني للغرفة وياه..عمري ما متقربة من رجال ولا مختلية وي واحد بغرفة وحدنة..لوة ايدي..ورة ظهري..وعيونة تجدح نار..كالي ولج..انتي ماتكدريلي سمعتي..يا بنت منى..لو مو احترامي لابوية جان كسرت راسج..ايدي كامت توجعني..واني احاول اتملص منه..كتلة حل ايدي..صدكني..راح تشوف مني..العجب..راح اتوبك واندمك..على كل كلمة كلتهه بحقي..اني مو بنت ريمة..اذا ما راويتك..عيونة صارن جمر..وكام ينفث نار..كالي كوني كد كلمتج..وشوفي شراح يصير بيج..عافني..وراح يمشي..اني كمت افرك بزندي وارجع ليورة..واتعثر..خلة نار العناد والحرب بيني وبينه مشتعلة...انتبهت اللهجة التهديد والوعيد بنبرة صوته..وبعيونة الحمرة..اعتزازة بنفسة وغروره..ضوجني..بس اني كدهه وكدود..تكدرون تكولون علية وكيحة بين مخالب الغراب....هههه شلون وصف ...بس صدكوني هوة الانسب اله بضلام شخصيته .. ولبسة الاسود.. الوانه قاتمة حيل مثل حياته..شعره اسود طويل ومشطة صفح.. حواجبة سودة وثخينة حيل.. ومتلازكات من النص..عيونة كبار وبنصهن حبة زيتون حيل سودة.. وبيهن لمعه نار تحرك حرك..شفايفه مبرومة ليبرة ومكروهه مثل شخصيته اصلا ما يعرف يضحك..لحيته خفيفة طاكة جديد..عايفهه لا مرتبهه ولا ابد مخليهه بين سطر وسطر ..شعراتهه سودة.. حتى بشرته سمرة فاتح.. تسود وية نوعية لبسة القاتم..وشخصيته..جسمه طويل وعندة جتاف مربعه.. هاي اوصافة مو كلتلكم جنه غراب نفس مواصفاته...ومسوينة تكول مهند التركي..بس غير حضي النحس اللي رابطني بيه..هواي اجة على بالي انهزم..بس وين اروح واني ما عندي احد اعرفة ..بس فكرة الهروب خليته اخر حل.. اذا لكيت روحي مجبورة على زواجي منه..لازم اوكف بوجهه وما اخاف ولا اتراجع لا...لا ما اتراجع ولا اخاف...
.محمد يحجي.....من اجينة من بيت جديتي ريمة بعد ما توفت وابوية مجلبلي ع الزواج من هاي المتعجرفة...اصحة وانام على هل سالفة ..كرهني بروحي اني كتلة ما اريد ازوج  اي مرة مو بس هية ..اذا تريدني ازوج اني اني اختار شريكة حياتي ..ولهسة ما لاكيهه من الكاهه اول واحد راح اكلك انته...يكلي لا ابد الا هية...مشت ايام.. وا ني كل يوم اكرهه زايد وانتحس منهه لان كبت المي عليه ..شتريد تبقة قوية لتالي لازم يجي يوم واكسر راسهه..وانزل عينهه المليانه عناد للكاع..وكفتهه كبالي وتتحداني وحجيهه المسموم خلاني اكرهه بالزايد..احنة اثنينه ما متوالمين ما ارهملهه ولا هية ترهملي..اني بوادي وهية بوادي ثاني..ومستحيل نتلاكة..وزاد نار الكره من تكابلنه ..كره اعمى دا يكبر يوم ورة يوم اكره لسانهه الطويل وردة فعلهه..واكره راسهه اليابس وحجيهه كلهه على بعضهه اكرهه..من يوم ما سمعت ابوية يسولف على خطوبتهه مني هية ارتاحت وفرحت..بس هية شنو البيهه ينحب حتى احبهه واخطبهه..مخبل اللي ياخذهه ويتزوجهه..اني سبحت وبدلت..همة راحو..يهنونهه بمناسبة نجاحهه..ويحظرون خطوبتهه..كلت خل احتفل وحدي.. طلعت رحت شربت وتونست وية اصدقائي..من رجعت ..لكيتهه جدامي..وفوكاهه..لسانهه شطولة..وترد عليه بكل وقاحة..ومن غير خجل..حقد ونار بداخلي..مسيطر عليه..لازم اندمهه واكسر شوكتهه..انوب ابوية قرر تعيش ويانه..احساس يكلي لو اني اكتلهه لو تكتلني..بعمايلهه..ضليت بس اتحلف بيهه اسوي ما اسوي..طيرتلي عقلي وفكري ..وبدة العد التنازلي لعقوبتهه..من الصبح دزني ابوية حتى اروح اصيحهه تجي تتريك ويانه..وماكد عليه الا اروح وياهم..يعني طلعه وبالغصب ما تراد..كبريائها وعنادها ..خلن اللعبة تحلو ..فدخلت اللعبة..اريد العبهه واكسرهه بايدي..هوة شي بداخلنة..ما نكدر نغيره..اكيد البنت طالعة الامهه ..امهه اللي دمرت عائلتنه..وهيه جاية كلهه ثقة ..احساس ضوجني..غروري مقابل ثقتهه..كلت اي فرصة الكاهه للهجوم..ابدي بدون تردد ..لازم اكون علىاتم الاستعدادحتى اطيحهه وافوز عليهه..ولو اني لو هيه.. وخاصة بعد السم اللي نفثته بوجهي هاذ الصبح..شوفو شراح اسوي بيهه..مسكينه ريما..اني وياهه والزمن طويل.وانتو ويامن راح توكفون.....