وجع الماضي

الحلقة ١٥

#وجع الماضي
ليوثي المياحي

امشي وعيوني اضلمت ولا واهس بالدنية عندي حالتي تبجي الحجر ..محمد يمشي بصفي وهوة ساكت ومقدر حالتي ..الطريق بين بيت عمتي وبيت امي ريمة الله يرحمهه مو بذاك البعد.. محمد سكت ..سكت وبعدين حجة وكال.. ريمااا تعاي نروح لبيت ابوية ماتكدرين تكعدين وحدج هنا ولا تكدرين ترجعين لبيت عمتج.. تعاي اخذج اوديج لبيت عمج ..هم ترتاحين وهم نطمن عليج..كتلة ما احب اروح لاي بيت ..نوب ارجع البيتكم..كالي ريما اعرف شدتحسين وحاس بوجعج.. طاوعيني مرة .. خل اخذج وياي.. لان اني لا اكدر اكعد وياج بالبيت وحدنة ..ولا اكدر اعوفج اتباتين وحدج.. بهل بيت الجبير..كتلة لا عادي.. احس بمرارة..همة كرايبي كلهم تخلو عني..هاي مو اول مرة ولا اخر مرة..تعودت على هل وضع ماتفرق شي عدهم..لا يضل ابالك...وصلنة للبيت..فتحت باب الحوش..ودخلت..وخليته وراي ما اعرف دخل وراي لو راح ومشة..الوضع كلة تعبان..كرهت عيشتي..وتمنيت..لو اني متت ورتاحيت..احسن من ضلم هل دنية..واللي مكسور..جناحة الدنية تزيد عليه..كسور فوك كسور..اااااااااه ياكلبي..شكد تعذبت..وشكد بيك جروح..اوجعات..هواي الزمن رماني..وشكد بجيت..وجرت الدمعات..
الام رمتني..والابو عافني..اموت باليوم الف مرات...
زماني جنى علية..والدنية تلطخ بيه لطخات.....
ااااااااخ يا كلبي..نشفت الدمعه..وانفتحت الجروح وما ترضة تشفى..كلبي وجعني..ملتهب مثل الجمرة...لو ميته ولا هل عيشة الذلة..دخلت للغرفة مالت امي ريمة الله يرحمهه..وكبل ذبيت روحي على فراشهه..ونمت..مثل ما تعودت..اتغلب على اوجاعي وانسة همي بالنوم..كل ما وكعت بمصيبة..نوبات احس المقاومة والمكابرة ما بيهه فايدة..فزيت ورة فترة طويلة..حسبالك نايمة صارلي دهر..باوعت واني افرك بعيوني..لكيت محمد..وعمتي الجبيرة..بالحوش..والوكت قارب على الغروب..عمتي كالت..صحي النوم.. ليش هيج معذبتنه وياج..ليش ماترضين تاخذين ابن عمج..وتنهين كل السالفة والقيل والقال..احنة كومة عدنة اشغال مو نكعد ونعوف اشغالنة علمودج..اني خزرتهه بعيني..اني ما ناقصتهه واعرفهه من اول ما تشاوفنة ..اعرفهه ما تحبني ولا اطيقني..كتلهه ..الله ما كاتبلنة نكون سوة..كالتلي اكعدي..واستجني..ولا ضلين تطربكين مثل الفرس..محد يزمطج..اهدي..وكافي تتلاعبين بيه وبينة..احنة ما يصرفنة تصرفاتج هاي..احنة ما عدنة وحدة بعدهه زغيرة وتبات وحدهه..اعوف اهلي..وعائلتي واولادي واجي..على حضرة جنابج..وما تقبلين...محمد كال..كافي عمتي..كافي اني بس ما ردتهه تكعد وحدهه..واني ما اكدر اجي اكعد وياهه وحدنة..كالتلة..اي يا ابني لشوكت هيج راح تبقة..احنة كلنة نلمهه ونزوجهه..حتى ترتاح وتريح الناس وياهه..كاللهه اصبري عمتي شوية اهلي كلهم جايين الليلة وهسة همة بالطريق..شوية وهمة بالبيت..كتلة وعليش جايين..شنو اني سويتلكم مشكلة وجاي يحلوهه..اي شمحلة حضي..كمت اتافف من هل وضع اللي وصلتلة..بس تعرفون اللي مكسور الخاطر..هيج يكوم يتلوبح..واني اكبر دليل...رجعت لغرفتي ..وسديت الباب بادية الثنتين..لا اريد احجي ولا اشوف اي واحد..نفسيتي تعبانة..والنفس بالكوة يطلع..كل جرة نفس تاخذ وياهه حسرة تجرح بكلبي..صدري..متنك..علي اريد ابجي حتى ارتاح..بس ما اكدر دموعي..نشفت..وعيوني..ذبلت..اغمضهن..واضغط عليهن حتى امسح الحركة اللي بيهن..دمي فاير..واعصابي..متشنجة..وشايلة..حمل..ثكيل على جتافي..واتجرع..بريجي المر..من الهم اللي اني بيه..
شوية وجان يندك الباب..محمد كال ..ريمااا يلة امشي حتى نروح لبيت عمتي..سليمة..ابوية والجماعة وصلو..كتلة انته ابوك اجة عليك اني وين اروح عليش اروح وياكم..كالي كافي عناد..امشي عدنة حجي حتى نحجي بيه..كتلة..خلي الحجي لروحك..ولا تحاول وياي..لاني لا راح اطلع من البيت..ولا اروح لغير بيت..حاول وياي بس منطيته مجال..راح طلع شوية واني سادة الباب علية..من جوة..لحد ما رجع..وكام يدك بالباب بكل قوته..سمعت ..صوت عمي..كمت وفتحت الباب..دخلو..الكل..اخذتهم لغرفة الخطار..عمي ومرتة وسمر وانور..وعماتي الاثنين..ورجالهم..يعني لمة..الله يجعل الخير بيهه..وبعد السلامات..عمي كال..اخذتي كل الوكت ريماا..اليوم اجيتج وجبت عمامج وعماتج واريد اخطب بنت الحسب بنتي ريماا..لوليدي محمد..شتكولين..اني بعدني دايخة..وضايجة من حجيه..وما احس الا صوت هورن سيارة..جدام البيت..طلع رجل عمتي..يشوف..شكو..وجان يرجع وياه حسام..وامة..سلم على الكل وكعد..كال..من حسن حضي..انكم كلكم موجودين..جيتكم اني وامي نريد نخطب..بنتكم المصون ريماا..الي..يبوووووه ضربتين بالراس توجع..وهذولة خطيبين..بفرد ليلة..واني..لا رايدة هذا ولا ذاك..كلت خل انهزم..واعوفهه على الله..#ليوثي
توقعاتكم..متابعيني..اشتعلت..وعلكت..المن راح نطي هل بنية..لمحمد ..لو لحسام..انتو اختارو..حتى انحني ريما ونزفهه لخطيبهه..