وجع الماضي

الحلقة ١٧

#وجع الماضي
#ليوثي المياحي

عماتي هلهلن ..وصاحن مبارك عليكم والف مبروووك الله يتمم بخير ..اييييي خلونة نفرح سمر راحت تركض اتبوس باخوهه وتبوسني..مرت عمي ضلت صافنة وما تعرف شنو اللي ديصير ..صاح عليهم عمي كاللهم اسكتو؟؟؟لازم نسمع منهه ونعرف انو قبلت بدون ضغط او غصب.. ريمااا كولي موافقة لو لا.. كتلة موافقة عمي بس ما اريد العرس هسة خلي بعدين بعدني زغيرة  ..عمتي الجبيرة  جانت بس تريد تتخلص مني.. كالت لا ترة انتي مو زغيرة المثلج مزوجة وعدهه ثنين وثلاث .. ادرسي وانجحي وفرحي روحج الدراسة ما راح تنهزم منج احمدي ربج لكيتي رجال بهل وكت يقبل بيج .. عمتي سليمة ايدتهه وكالت بنيتي ازوجي وفرحي روحج وادرسي وانتي ابيت رجلج ..عمي كال اذا هيج العرس الجمعه الجاية..محمد كال حاضر اني موافق ..كالي ريماا خما ناقصج شي..اني راح اكوم باللازم واهيء كل مستلزمات وامور العرس ونتوكل على الله ومبروووووك علينة ريماااا.. جوي سلمو علية الكل سلام وياه بوسة من الخد ..واني كلبي مقبوض ما افتهمت شنو اللي قابض كلبي من الداخل ..انتبهت واذا بمحمد كبالي اجة يسلم علي ويبوسني كدامهم كمت اتهرب ..محمد كال بابا البس خطيبتي الحلقة والنيشان ..زين اقرولي الفاتحة .. مدو اديهم الكل وقرو سورة الفاتحة ..واني اجتني سكينة وهدوء ما اعرف سببهن محمد بصفي ودفو جسمة يمشي بجسمي سحب ايدي ولبسني الحلقة والنيشان.. هسة صحيح اكدر اكول ربطني..وصار خطيبي..
...وبوسط الهلاهل والتباريك والهوسة ..محمد عيونة علية تلمع وشاورني.. الف الحمد لله جنت متوقع راح اضيعين مني .....مبروووووك علية.. كتلة لا تفرح هواي ماتعرف الله شضاملنة.. كاللهم من رخصتكم اريد احجي وية ريماااا بتفاصيل العرس...عمي كالة اي وليدي احجو وتفاهمو ما اريد شي ينقصهه من مستلزمات العرس..جرجرني وراه دخلني بغرفة امي ريمة الله يرحمهه..كالعادة..كالي ريمتي ما اريدج تاخذين على خاطرج مني اعذريني ..لان ما خليتلج اي خيار .. باوعيلي بعيني..درت راسي حتى ما اباوع بعيونة..حسيت بشي يدغدغ بجسمي مثل التنميلة..ونضراتة جانت ترفرف على وجهي وجسمي..مد ايدة حتى يلزم ادية وخرتهن وضميتهن ورة ضهري..حسيت بضوجته وخيبة الامل بوجهه..اي لعد شعبالة بسهولة راح اسلملة روحي وهوة اللي خلاني او
افق غصبا علية ..كالي  ريمااا على راحتج.. اني عاذرج عندي امل انج راح تحبيني بيوم من الايام مثل ما اني كمت احبج..باوعيلي..جان يحط ايدة على مكان كلبة..اهنا انتي ساكنة..اني صحيت على روحي سامحيني..جنت منهزم منج الج..وعاشكج واني ما اعرف..انطيني فرصة وخليني امسح اللي فات واعوضج..ما اعرف شلون طلع مني الحجي ..كتلة انته تعرف شنو معناهه تغتصب بنية..انهزمت منك وهم لحكتني وفرضت نفسك بالاكراه بحياتي..عمري مراح اصير الك الاجسد ولا روح..حسيته تكهرب وجسمة ارتج وكام يرجف.. وخدودة رعشت رعش.. انتفض وضرب ايدة اليمنة باليسرة..وكال اني صوجي جاي اطيب خاطرج وانزل روحي الج..اول وتالي راح انتي تجيني محناية اديج ولابسة البدلة البيضة .. راح اتانيج العمر كلة لحد ما ترضين ..وطلع حسيت بنغزات اللوم لان قسيت عليه وكلامي جرحة..بس هوة ضغط علية..وخلاني هيج اردة..الجماعة كلهم راحو لبيوتهم.. عمتي رجعت لبيتهه بالكوة..خليتهه تروح..امل اصلا ما تحجي وياي..وعمتي دوم تحجي عليهه..عمي كالي باجر نجي ناخذج حتى تنزلين للسوك  نشتريلج بقية الجهاز من ملابس وذهب وفرش..كتلة لا عمي اعذرني انتو شتشترون اشترو اني قابلة بيه..مالي واهس لا اشتري ولا استنكي..بدت الاستعدادات للعرس عماتي يفترن على البيوت ويعزمن النسوان..ومحمد اجر صالة للافراح وعزمو كل معارفهم وشترو كل مستلزمات العرس..وبدت ايام الحنة والعرس واني بوسط كل هذا ضايعة ..محمد يريدني اطلع وياه اكعد وياه واني لا طايقتة ولا طايقة احجي وياه او اطلع وياه ..ما جنت احب اضعف كدام حجية وتغزلة الحلووو..اللي ياريت يخلي كلبي شوية يلين من ناحيتة..احساس كلش جبير طاغي علي احساس بالخوف من هالحياة الجديدة اللي رايحتلهه ..اني ورجال اموت منه...
الليلة ليلة الحنة...ريحة البخور والياس اللي بالصينية والحنة طاغية على المكان.. نضفنة الاستقبال وفرشناه حتى النسوان تجي تكعد..والرياجيل برة البيت اجرولهم كراسي وسوو لهم مكان اباب البيت..التمت النسوان والبنات والزعط.. اني كعدت بالوسط لابسة بدلة حمرة عمتي سليمة اختارتهه الي..البنات يشاورن بيناتهن ويتمضحكن كل وحده ابالهه تصورات بخيالهه عن فارس احلامهه..النسوان بدن يغنن ويتمركصن..عمتي سليمة جابت الكيك والببسي وزعتة على المعازيم.. وشعلت البخور وجابت الحنة وكعدت كدامي وبدت تغني وايدي بايدهه وتحني بيهه.. عروستنة واخذناهه بعد شل هل عواذل...
واللي يريد يتبارك يجي بصفكة وهلاهل..
هاي الليلة حناهه ...فرحانين وياهه..
واللي يريد يتبارك يجي بصفكة وهلاهل...
هي تغني والناس يرددون وراهه.. واني حاسة روحي تريد تطلع .. اريد ابجي بس ما اكدر مخنوكة ..اهلي مسوين عرس واني ما عندي اهل..وينة وكيل العروس... وين امهه.. احني ادية والدمع يجري على الخد..صوت عمتي وهية تغني هيج مواجعي .. حضنتني وكامت تسكت بية وتشاورني ..كافي بنيتي ..الحمد لله.. من الفرحة كمتي تبجين.. اعرف .. مستحية .. كلنة مرينة بهل موقف ..اعرف بيج تفتقدين الاهلج.. بس احنة اهلج افرحي .. ترة الفرحة ماتجي مرتين..ربي يسعدج ريمااااا...  محمد اتصل على عمتي..غمزتلي بتك عينهه ..جاوبته..هلة بالعريس.. شنو حسيت بعروستك تبجي وتصلت...كاللهه الله يسلمج عمتي بلكي تنطينياهه..عمتي نطتني التلفون ..ورجعت الهلاهل والغنة..وصوت محمد تسرسح لاذني بنغمة متغيرة.. الدم كام يتنافر بعروك وجهي وجناتي احمرت ..كالي هلا بعروستي ..ليش عيني تبجين تردين اجي ..رديت بصوت مبحوح من البجي ..وين تجي..وشيجيبك..كالي باوعي من الشباك تلكيني يمج.. رفعت عيني باوعت من الشباك جان اشوفة كبالي ..جان يشمرلي بوسة من بعيد ..خلاني ادنج واستحي من روحي..عمتي كالتلي كافي تبجين وجهج احمر والمكياج راح يخرب على وجهج..جوي يدخلون هوة وعمي وسمر ومرت عمي..الهلاهل علت والصلاة على النبي ..عمتي ما خلتة يدخل كالتلهه انته اطلع ما يصير اتشوف العروسة بلليلة الحنة..عمي باسني من راسي وسمر اخذتني بحضنهه..وكامت تهلهل وتتمركص وتغني..مرت عمي سلمت علية سلام بارد مال وحدة ماخذة على خاطرهه مني..وكعدت بصف عمتي.. اني اعلمج خل اخذ ابنج واعرف شلون اربيج يلعمة..كملت السهرة بجو الغنة والركص خلاني احس ولو شوية بالفرح..جابو الذبايح وركبو وسوو العشى..ورتبو الجنط.. حتى يرجعون لبيوتهم..سمر كعدت وياي حتى تبات يمي..كملت الحنة وراحو كل المعازيم والجيارين..عمتي ابتسمت وكالت تعالن نسوي مقلب بمحمد..صاحتلة كالتلة محمد تعال طبب عروستك لان محناية رجليهه وما تكدر تمشي.. واني ما اكدرلهه لان ظهري يوجعني.. وهوة ما صدك اجة يركض دنج علية وشالني ..وهوة يتقشمر وية عمتي..يكللهه ولا يهمج اجي من المريخ واشيل مرتي اني شعندي غيرههه..اني متت من المستحة والخجل كدامهم.. شالني .. اني اباوع على امل وجهه اسود وكام ينطي الوان.. والعرك يتصبب منهه..اني لزكت بمحمد ولفيت ادية على ركبته ..حتى اموتهه من القهر.. هوة ما صدك حضني حيل ولزك بية.. كال شنو هل نعيم وهل دفو .. ربي يديمهه نعمة علية..كتلة حرارة وصابتك على راسك؟؟ كام يضحك هههههه حتى من نزلني على الفراش ..وهوة يضحك..كال احلة دعاء بحياتي سمعته ..واحلة حرارة من الكلب مالي..تصبحين على خير يا حرارة كلبي..طلع وخلاني ابتسم وحدي وي روحي..ورة شوية رجع وبايدة هدية مسلفنة وعليهه وردة حمرة.. كالي هاذة تلفون وية السيم كارت حتى نسولف وتاخذين صور وانتي عروسة بالفستان الابيض غمزلي بعينة وهوة طالع كالي طالعة تخبلين ريماا ..وراه دخلو الجماعة فرشو الفراش ونامو يمي ورة سوالف وضحك وما حسيت الا اخذني النوم وشعور الفرحة بانو اني عروسة ومحناية طغى على بالي..#ليوثي