وجع الماضي

الحلقة ٢٥

#وجع الماضي
#ليوثي المياحي

وكفت حركة رجليه..وصارت صنطة..عرفت انو انخمد..ونام..طلعت اتسحب على كيفي..رجعت للحمام غسلت مرة ثانية واني اسب بروحي على ضعفي..والمي يغسل الحي والميت ..غسلت وتنشفت..ولبست ملابسي وصليت..خشعت..وتذللت لربي وبجيت..ودعيت ربي ..ياخذلي حقي ويضهرة كدام الناس كلهه..ارتاحيت شوية..ولو اني ما ارتاح..اذا ما نفذت كل اللي ابالي..مشيت باوعت عليه من فتحة باب غرفته..جان نايم على بطنه وصدرة عريان..وانفاسة..منتظمة..مالات واحد نايم ومرتاح..وضميرة..ما يأنبة..تانيت شوية..حتى يروح بسابع نومة..وشيطاني..رايح جاي..ويزن بيه..عفتة ورحت لغرفتي..اخذت شالات ثنين..ورجعتلة..جسمة جان مرتخي من الشرب والنوم..
وعلى كيفي بدون ما اخليه يحس ربطت اديه بالسرير..كل وحدة بجهه..وكل مرة..اسحب ايدة واقربهه ع حافة السرير..واشدهه..بقوة..هوة يتحرك..شوية..اني اعوفة..كملت ورة تعب ..كعدت اتنفس وارتاح من القلق..جنت خايفة يحس..ويكوملي..ويخربط علية الشغل..نزعت حزام بنطرونة..وكمت اضرب بيه الكاع من جهة البيهه الحديد..هوة فز من نومة..دار راسة..يريد يعرف مكان الصوت..عيونة حمر مورمة من السكر والنوم..اجة يريد يحرك اديه..ما كدر..جان بعدة ما مستوعب..ولا فاهم شي..باوعلي..وراد يسحب اديه..او يحركهن بس ما كدر..
كتلة شبيك..شتريد..بس فتح عيونة..حتى يشوف شصاير بيه..شاف اديه المربوطة..والتفتلي..شاف الحزام بايدي واطكطك بيه..فتح عيونه..باستغراب..وجان يضحك بكل قوتة..هههههه انوب قلقني وخوفني بالزايد..اكثر من قلقي عليه..
هههههههه شتردين تضربيني..يا بنت..منى..تسوينهه مو بعيدة عليج..وعليهه..يلة...يلة..اضربيني..وكام يهز بروحة ويتملص..على الفراش..حاولت احرك ايدي واهفة بحزام اول..وافرغ نار كلبي..بس ايدي بادت..وفشلت الضربة..حاولت اقوي روحي..وشيطاني يكلي..هوة اللي بدة..هوة اللي سوة كلشي بيج..هوة اللي كسر شوكتج..بس شي اقوة مني خلاني..ما اتحرك..
رميت الحزام..وجثمت على ركبي ارتجيت على اقرب كرسي وبجيت..واني اشهك..وهوة ساكت..كدامي..ليش ما تخليني احجي...ليش..اني رباية امي ريمة..مو رباية منى..ليش ما تريد تسمعني..ليش اتذل بية وتحاسبني على شغلة ما مسويتهه..
جاوبني بكل هدوء..
لان شفت بعيني..ومحد كالي..
ماشفت شي...ماشفت..انته انعميت..من الحقيقة..اني جنت مخدرة..امل جابتلي نومي بصرة..ومخليه وياه حبوب مخدرة وهلوسة..شربتهه وتخدرت..وراهه ما اعرف شلون اخذتني لبيت امي ريمة..وكالتلي محمد خابر وكال اريد اشوفج ابيت جديتي ريمة..وحدنة كبل ما ازفج..صدكتهه
ما اعرف شلون..حسام اجة..ماكدرت ادافع على روحي..
مصمص شفايفة..وكالي..حجاية عوجة..اصلا امل عمرهه ما تسوي هيج..
كتلة ليش ما تصدكني..والله ما سويت شي..ولا عندي اي علاقة..بيه..
رجع ارتجة..وكالي..اذا تردين اضربيني اتفضلي..اضربي ..تمدد بهدوء ورجع غمض عيونة..اني حسبالي اجرحة..بس تالي اني انجرحت..هوة اللي معذبني ويتعنطز علي..رميت حزامة..وكمت امسح بدموعي..شكد اكره ضعفي..وقلة حيلتي..كدامة..وكدام اي واحد..جيت اريد اطلع..وهوة حجة..
اي فكي ادية ورجلية..كبل ما ترحين..
رجعت فكيتهن..بالكوة..وهوة امدد واني مدنكة عليه..من يوم اجيت وياه واني دائما بعيدة..واتحاشاه..وبليلة وحدة هيج صار بيه لعد بقيت الليالي شلون..فكيته..ورميت شالاتي على ذراعاتي..طلعت وخليته يضحك..اجيت اريد اغلبه..اطلعت من يمة مغلوبة..اجيت افش بيه غيضي..انوب اغتاضيت بالزايد..سديت باب غرفتي زين..وانخمدت..ابرد باعصابي..التالفة..والملم بجسمي اللي كلة يرجف..
********
محمد يحجي..
كدامي..بمنشفة الحمام..شعرهه مبلول ويقطر قطرات مي على وجهه..اتباوعلي..بنظرة غزالة..شاردة.. من خطر عدو يتربص بيهه..انهزمت تركض..وتناور..مناورات الصيد.. لحظة وصرت جدام الباب..كبالهه..ريحتهه..تكتل..وجمالهه يفتن..شعر طويل..واهداب عيونهه مبللة بقطرات الندى..جسمهه يسلب العقل..رغم ملفوف بالمنشفة..ياخذ الكلب..ريكي..نشف..ولهثت ودخلت..اقنع..بروحي..اكرهه..واموت منهه واخاف اضعف..حتى اشوفهه..هيج..واني قررت انهزم من عدهه وما اشوفهه..كلبي رفرف..حالي حال اي عاشق..يرفرف كلبة..من يشوف حبيبته..تمنيت..وتمنيت قربهه..
عذااااااب...لحظات ضعف ضكت..بيهم لذة قربهه وعذابهه مني..تندمت هواي..ورجعت بتفكيري..بلي صار ..ونوب لسانهه طويل..وبالرغم من تمنياتي بقربهه ..بس جنت كارهه..بنفس الوكت..الجسم اللي انمدت عليه ايد غيري..كلما اتذكرة..اكوم اغلي واشتعل نار..بلحظة..استسلمت..ورخيت..ذكرتهه..برخصهه..وكلبي يوجعني.. لو بيدي اكتلهه..ااااااه يا غاليه..ما حاسبج تخونين..يا..يا غاليه..ما كدرت انام من القهر..كمت اروح واجي من يم باب غرفتهه..ميت مرة..اخر شي دخت وانخمدت حطيت المخدة فوك راسي..بالكي اهدة شوية وارتاح..كعدت لكيت روحي مربوط..وهية شايلة الحزام..اخذتني الضحكة..واني ما مستوعب..الحالة..بس والله لو مسويتهه..وضاربتني..جان الا اكسر ايدهه.. واكتلهه وارتاح من العذاب..تريد بيدهه تاخذ حقهه..وخرت ورفضت..جان تكدر تاخذ حقهه بذيج اللحظة..هنا صدمتني..جنت اتوقعهه سافلة اوكعت من عيني.. بس بتصرفاتهه.. كامت تكبر بعيني..
واللي حجته معقولة صحيح..
لا عقلي يريد يصدك..ولا جوارحي..تريد تصدك..الظلم الواكعة بيه..مثل متكول..طير النوم من عيني..وبقيت سهران للصبح..ادور وافكر وين الحقيقة..
طلعت الصبح ..للشغل..لبست ملابسي وانهزمت من البيت..حتى ريوك ماتريكت..لان ما اريد اشوفهه واضعف..كلت اروح الهي روحي بالشغل..حتى انسي روحي..جماعتي بالشغل كامو يضحكون عليه..كالولي هاي شصاير بيك..بسام صاحبي ..كالي على كيفك اخوية التعب مال الزواج مبين بيك..وهوة يضحك ويتقشمر..شوفو النشاط والحيوية المبينه عليه.. واني سارح بدنيتي..بعيون ريمااا..ابمشاكلي..عقلي..وكلبي بعركة..مالهه تالي..ريحتهه تنعش كلبي..شوية وصرت مثل المخبل..اضرب بالعمال..واروح لكابينة العمال اشرب وارجع..للشغل..من الصبح..احب انسى وافازع العركة البين كلبي وعقلي..لحد ما اقترب موعد الريوك بسام يحجي علية ويجرجر بية حتى اكوم من الشرب وجه الصبح كالي شبيك يا اخي ليش هيج اسوي بروحك..اكو شي صاير ..اذا اكو مشكلة كلي حتى اساعدك ..كتلة بروح امك عوفني اطلع من راسي وخليني متونس وطاير.. كالي ميصير هيج هستوة بدة الشغل وتوة الصبح بدة اذا اجة وكت العشة شلون راح تكون حالتك.. بسام رحمة لوالديك عوفني.. روح اتريك وارتاح وكافي تزن باذني..معليك بية اني حر بتصرفاتي.. كالي شبيك هذا مو لسانك محمد ..والله ما ارتاح اذا ما اعرف شبيك واساعدك بالي اكدر عليه.. لان حالتك مو طبيعية .. حجة ودردم وراح ..كظيتهه شرب والشمس صارت عالية وتحرك حرك.. كمت ما اوجد كمت اشوف الواحد عشرة ..الدنية صارت الوان خضرة وحمرة وصفرة بعد .. العمال رجعو للشغل بس بسام رجعلي وكام يتعارك وياي حتى ابطل شرب وارجع وياه.. وجان نسمع صوت سيارة جاية علينة ..سيارة اول مشفتهه غوشة عيني ركزت بيهه مرة واثنين ..عرفتهه سيارة ابوية كلبي رجف من شفته .. اكيد اللي جابة شي جبير ويستاهل واحد يتعنالة ونسيت انو اني كسرت تلفوني ورميته وي تلفون ريمااا حتى اكطع اتصالهه واتصالي بالدنية ورة اللي سوتة بيه .. طفة السيارة ونزل حاولت استجمع كل قواي وامشيلة حتى اسلم عليه واشوف شنو الشي المهم اللي جابة علية.. رغم انو راسي ثكيل واطوطح ..سلامة جان كلش بارد ومن ورة خشمة ..كتلة بابا خما اكو شي صاير بالبيت فهمني؟؟ هز راسة مال واحد ضايج ومقهور ...كالي اووووو ابني رجال ما شاء الله سكران بعز النهار .. اكو واحد يسوي سوايتك تخلينة قلقانين على سيادة حضرتك عايش لو ميت.. ما عندك احساس.. بعدين انته مو عريس ليش ما كاعد يم مرتك .. كتلة بابا لا تعلي صوتك خاف العمال يسمعون تعال وياي روح للبيت ونتفاهم.. غمزت لبسام كتلة أي اني جاي حتى ابوية يحس انو ماكو شي واني دا اشتغل .. اجة بسام سلم على ابوية ورجع ..اني اخذت ابوية من ايدة ورحنة للبيت ..من دخلت كمت اباوع هنا وهنا جنت خايف من ابوية لا يشوف أي شي موطبيعي ويكوم يشك بالموظوع.. بابهه جان مسدود وريحة الجاي عنار فايحة بالبيت.. ابوية صاح ريمااا ريوووم اجة عمج.. لحظات والباب انفتح .. اجتي تركض عليه وشعرهه مفلول وطاير وراهه يخبل.. دمعت من الموقف اللي شفتهه بيه.. رمت روحهه بحضنه وتبوس بيه بعد شوية تريد تنزل دمعتهه وتبجي.. واني من وراه اغمزلهه .. وخليت اصبعي على حلكي حتى تسكت وما تكلة أي شي.. وما تبجي عيونهه ذبلانة..وباهتة وهية تباوع عليه شلون اسوي اشارات وحركات وهلكد ما تستهبل..اجيت اضحك..
مرحبة بنيتي..منورة والله ربي يبارك بيج..تعاي اكعدي بصفي..باوعتلي..وكالتله ..خلي اجيبلكم استكانين جاي..واجي..مشت وابوية التفتلي..كالي اكو واحد عندة هيج وردة ابيته ويسكر؟؟ مو ابقة صاحي وامتع عيوني بيهه..
هههههههه ضحكت كتلة تقصد..شي بابا..ترة ابنك رجال..
والرجال يتباهه بنفسة لان سكران..
بحية ريماا..تتمايل مثل غصن الزيتون..وشعرهه يتمايل على جتافاتهه..اااااااخ منك يكلبي..
حطت الجاي..وابوية يحجي..وياهه وهية..تجاوبة بابتسامة..اول مرة اشوفهه وين جنت منه
اشعماني عليهه..
كال.. اجيت حتى اخلي النقط على الحروف..
ارتجيت على الكرسي وكتلة اي بابا كول شعندك..
مرتك..واللي شفته عليهه..
انصدمت..ورجعت عدلت كعدتي..ورتبت روحي..شبيهه مرتي..وشنو اللي شفته؟؟
امل اعترفت وكالت كل اللي صار ..جابت حبوب مخدرة..وهلوسة..وخلتهه وي النومي بصرة ونطتهه لريماا..خدرتهه ودوختهه..واخذتهه لبيت امي ريمة الله يرحمهه..واتفقت وية حسام حتى يجيهه..اللي ضربته انته بسجينة..بجتفة..وانهزم.
فتحت عيوني..ابلع بريجي..بالكوة اشوف ابوية اثنين..وريما تلاثة..
هههههههه بابا جبت اخوك وياك..تريد الف دينار انته وياه..وتروح ..لزمني من جتافي..وهزني حيل..وصاح بيه..اني ما جاي اشاقة وياك..اصحة على روحك..من هاذ الوضع اللي انته بيه..
صاحي بابا ..صاحي..السالفة ما بيهه شي....
اني ما شفت مرتي بوضع مو زين ..مرتي مابيهه شي..وما كو شي حتى نحجي بيه ..واحنة مصافين .. بس لان عندي شغل اجيت هنااا ..
ابوية رفع حواجبة..وتفاجأ..وما فاهم شي..
ريماا..كالت..اني مو كلتلك..وما قبلت تسمعني..الحمد لله..الحمد لله..ربي يظهر الحق..ضربت ايدي عالميز..اللي كدامي..ما اريد اسمع ..وما احب افهم.. من الرياجيل تحجي..النسوان تسكت..كومي طبي لغرفتج..
ابوية لزمهه من ايدهه..وكالي..لا تعاي اكعدي واحجي..واللي ترديه يصير..
ريما..شسوالج..احجي ضربج؟؟هانج..كولي اني اخذلج حقج..
ريماا عيونهه تعبانة..والدموع بدت تطلع..وما كدرت تحجي..انوب وترتني..وازمت الوضع..
احجي ريماا..اذا سوالج شي..
كتلة بابا مصار شي..بيناتنه..اني ومرتي..مصافين وماكو شي بيناتنه..والوضع..طبيعي..قاطعتني..ريماا..لا عمي..لا..ما صدكني...اني ما اريد اعيش وياه..اخذني منا عمي اترجاك..اني تعبانه هواي..
خبلتني..والباقي من عقلي..طار..كمت من الكرسي وكمت اصيح..
وين ترحين..وين تردين تمشيين..مرتي..ومو بكيفج ..تمشين..
نار اشتعلت بيني وبين ابوية وريما..#ليوثي