وجع الماضي

الحلقة ٣٢

#وجع الماضي
#ليوثي المياحي..

عرفتهه راح اتجيب اخوهه وياهه..لان مستحيل..ما تكول الاخوهه..واني مو غشيمة..لهل درجة...
من خابرتني..كالتلي ريماا وصلت..للكافتريا..وجاي اتانيج ..والكافتريا جانت عبارة عن مطعم زغير..
كبل كم يوم رحنه اني وجديتي زيارة للكاظم سلام الله عليه..زرنة وندعينالكم..استراحينة بهل كافتريا..وصاحبهه جان رجال جبير من اهل الله خوش ادمي حيل..
المهم.. كتلهه سمر بطني توجعني..وما دا اكدر اتحرك..بلكي تخليلياه يم ابو المحل..واني ادز واحد يجي ياخذه..حسيت بضوجتهه..من صوتهه..خلت القميص وطلعت برة المحل..وهية تباوع يمنه ويسرة..
اني جنت كاعدة وية عمي محمد بالسيارة..وبمكان ختلة..ما يشوفونة بيه.. طلعت من الكافتريا..ومحمد كمز من السيارة..يسأل بيهه..نفض اديه..وعلامات الحيرة والدهشة بوجهه..حرك سيارته..وطلعو راحو..ورة ما تأكدت من روحتهم ..نزلت من السيارة ورحت اركض على ابو الكافتريا..
دخلت وسلمت..ما لكيت الحجي..لكيت صانع بمكانة..كتلة..عندي امانة يمكم..جابتهه الي بنت عمي..وخلتهه يمك..
كالي شني الامانة..وشسمج..حتى اتاكد..
اني اسمي ريماا..والامانة قميص..بعلاكة بيضة..
كال اي هاي هية مد ايدة وجر العلاكة ونطاهه الي..اخذتهه ومديت ايدي وطلعت القميص..اشتميته..وترست مناخيري بريحته..اخذته.. وية ديرت وجهي لني اني ومحمد وجه بوجه..عيونة تلمع..من الفرحة..والمحبة والحنان..واني الجني ركبني..كلت خل اطلع واعوفة بدون ما احجي ولا كلمة..غلست سويت روحي..ما شايفته..ضميت القميص..وعدلت روحي..ردت اطلع..وجان يلزمني من ايدي..
ريمااا؟؟؟
باعي علية ..
ريما..رجليه ارتخت..والقوة اللي جانت بيه تبخرت..كمل على..اللي بيه..بصوتة..يا ووويلي ع الحنية..
مريتي؟؟
هوة كالهه..واني انلسعت..اذكرت..صدك اني مرته..سحبت ايدي ما رضه يحلهه..عركت..واني اتوجع..لميت روحي واني حالتي ..مرهوجة..سويت روحي ما اعرفة..وانو جاي يتحارش بيه..ولميت عليه الناس..وخليته..هوة والناس..يتصايح..
كتلة عوفني..ما عافني..كمت اصيح..واعيط ياناس ديتحارش بيه..الناس الموجودين بالكافتريا..وبرة..لزمتهم النخوة..وجوي يتراكضون..كالولة عوفهه..ترة اتصير موزينة..
محمد جن جنونة..وتنرفز وكام يصيح ويعيط..
ترة هاي مرتي..
ذبلت عيوني..وكلتلهم..لا رجلي ولا اعرفة..يصجم بالحجي الناعم..ولان مانطيته مجال جرني من ايدي..وردت بس اسحب ايدي منه ما هدهه..واني ابجي ودموعي تجري..
وهوة..لا والله صدك تحجين..
كتلة اي لا اعرفك ولا عمري شفتك..
لزموه الجماعة..واحد غلط عليه..
محمد ضربة بوكس على وجهه..
خليتهه..عالكهه بيناتهم..وانهزمت بجلدي..
رجعت وكلبي..يمه..
شوية ودك عليه على رقمي الجديد..الظاهر هاي سمر الجلبة منطيتهيا..
الووووو؟؟
نعم تفضل شرايد مني..
صدك ريماا ماتعرفيني..وانتي مو مرتي..وتنهزمين مني؟؟
محمد اللي يجي من ايده ربي يزيدة..وانتة اللي وصلتنه لهل حالة...
يتنفس قوي ويلهث..ما كدرت اسيطر على روحي..سألتة.. محمد خما ضربوك؟؟
اي ضربوني ودموني..واني هسة بالمستشفى..دا اضمد الجروح..
سود وجي عليك..صدك تحجي؟؟
سكت شوية وطلع صوتة مبحوح وذابل..عذبني..
شبيج مرة تكليلي احبك..ومرة ما تحبيني..وما اكدر اصبر بدون ريحتك..واخذتي قميصي..وتنقهرين لان ضربوني..ومرة تكولين ماتعرفيني..اصفيلج على راي..خل افتهم..
اوووف..العرك يتصابب مني رغم..التبريد..مشتغل..
سكتت..وما حجيت كلمة..رد كالي ريمااا وياي..كتلة ايييي..
كلبي كام يأن..وحالتي تخربطت..يااااربي..كلبي كام يتراخة ويحن..وعركة مشتعلة بين محمد وبين كلبي..
هسة هوة افتهم حالتي..ويريد يضغط عليه..حتى الين..وارتخي
ريما.. خليني اشوفج حتى نتفاهم واحجي وياج..والله اخليج على راحتج..اذا ردتي تجين وياي..لو ترجعين لبيت خوالج..اسمعيني مرة  بس..خلينة نكعد ونحجي حتى افسرلج..الامور..لوميني..عاتبيني..بس لا تنهزمين مني..
محمد اللي صار بيني وبينك..يرادلة وقت..حتى تلتم الجروح..وتبرد..وتنسي..ماخليتلي شي زين اذكرك بيه..
لا خليتلج..خليتلج..ليلة..نطيتيني بيهه احلى شي بحياة اي رجال ..ليلة ربطتنة العمر كلة..ترة اني رحت لبيت عمتي..وافتهمت كلشي..خل اشوفج..مرة وحدة..اريد احجيلج كلشي..وداعة جديتي ريمة الله يرحمهه..اذا جانت عزيزة عليج..كليلي وين مكانج خليني اجيج..والله راح اتخبل..ريمااااا؟؟
كطعت المكالمة واني دموعي..تجري وتجوي بخدودي..يعني ما صدك بيه ولا راد يفتهم..الا ما راح سأل يم عمتي..
كلبي شال من يمة بالزايد..انوب خلاني اصر على انو ابعد عليه..وبعد وبعد يمحمد راح تشوف مني..
اتصل مرة وثنين وحاول..دز مسجات..اني قفلت التلفون ومهتميتلة..يومين بالضبط..لا طالعة برة ولا طابة..كاعدة بالبيت..حتى اوراق كالي عليهن كرار..ما رحتلة للشركة ما ردت ابقة اني وياه لوحدنة .. وجنت اتحاشاه بكل تصرف خليته يجيبهن..للبيت..جابهن اوقعتهن..انطاني كم نسخة..وكالي ضميهن هاي وحدة مالت الكاع..والثانية مالت البيت..وحدة مالت الورث..ونسخة من كل الاوراق بقت يمه..كالي سجلتهن كلهن بالطابو..
الباب اندكت..اني كلبي حس اكو شي ..سمعت صوت محمد وهوة ينادي..ريمتي..ريمتي..يا ريمتي..
جنت اكلب بالتلفون رميتة  ..بالكاع حسبالك طلعلي منه جني..وانهزمت..ركض..محمد اندل البيت وهياتة اجة..جديتي طبت للصالة وهية تترنح على عوجيتهه..شافتني واني مستعجلة واركض..كالتلي شبيج..تركضين..منو هذا اللي اجانة..
كتلهه ما اعرف اني هنا وما شايفة الباب..رحت اركض ختلت بغرفتي..اسمعه دخل وصوت عالي..واني كاعدة مكرفصة ومخلية راسي بين رجليه..جنت اخاف يجبروني اروح وياه..جديتي دكت الباب بالعوجية..وكالتلي ..اطلعي..عليش خايفة..تعاي شوفيه شيريد ولا تخافين..
فتحت الباب..واني ارجف.وطلعت..وجديتي تمشي كدامي..واني اسحل وراهه..كابلني..بالصالة وهوة كاعد بكل هدوء..ما فاتتني لمعة عيونة لان شافني..وشكد حلو الاحساس..من انتي زعلانة..ويجي رجلج..يرضي بيج..اتحسين روحج عزيزة..
جدي كال..ريمااا تعاي اكعدي بصفي..
كعدت وايدي..تلعب بذيال الشال..والاحساس الناري..بلهفته..كتلني كتل..
جدي كالي..ريماا بنيتي..رجلج اجة علينه اليوم..وحسب كلامة..تعب لحد ما لكاج..ويريد يرجعج..شتكولين؟؟
من غير تردد جاوبت وكلت لا؟؟
هوة كمز من مكانة..ويصيح حسبالة وحدنة ويكدر يخوفني..
ريمااااااا؟؟
جديتي ضربت الكاع بالعوجية..كالتلة لا تعلي صوتك انته ابيتي..هية رافضتك..وماتريد ترجعلك..بالرغم ما قبلت تحجيلنة عن مشكلتهه وياك..ومحترمة خصوصياتكم..
جدي كاللهه اسكتي يامرة..الرياجيل تحجي..اني اللي تقررة بنتي..يمشي..مو حسبالك ما عدهه والي ..اللي اتكولة احنة وياه..
هوة من يصيح ويعيط..اني اكيف عليه..وعلى كلبي مثل العسل..اعرفة رجال ويريد يحكم..ويعيط..ويشيل المسؤلية وحدة..اي مهما يكون هاذ ابن عمي؟؟
ريمااا اريد احجي وياج وحدنة ممكن؟؟
اذا سمحولي الجماعة..
ماعدنة مانع..المرة مرتك..تفاهمو على كيفكم..واللي تتفقون عليه..احنة وياكم..
كامو جدي وجديتي..واني تضوجرت..جنت ما احب انفرد وياه..ما احب احجي لان اعرف بنفسي رهيفة وبساع اذوب بالحجي الحلوو..
اجة كعد بصفي..
ريمااا..سامحيني..برغم كلمة سامحني..جبيرة..وصعبة ..واني عمري ..ما كلتهه لواحد..بس الج انتي كلتهه..سامحيني..غلطت بحقج..هواي  سامحيني..على كل كلمة وجعتج..وجرحتج بيهه..سامحيني على كل ضربة..مستج..اني نادم على كل اللي سويته بيج..اني حالتي تعبانة وتعذبت هواي وراج..ارجعي وياي..ارجعي لبيتج..اوعدج راح اتغير..وكل شي راح يتبدل..اكعدي ابيتج..وادرسي..واني اروح واجي عليج..المهم ترجعين الي..كافي عاقبتيني هواية ..
ذكرني ابيتي..وبالليلة الاولى اللي راد يغتصبني بيهه..ذكرني..بالضرب والدموع..ذكرني بكلشي..الذاكرة رجعت بيه لذيج الايام الصعبة..وحسبالك اشوفهه هسة كدام عيني..لمعت الدموع..بعيني..ابتعدت عليه..
ما اكدر..حتى لو احبك..ما اكدر..شي اقوة مني..اللي انطبع..بيه منك..ومن عمايلك السودة..والذكريات..المشؤمة..ما اريد ارجع وياك..ولا كأنو صاير شي..
ريماا بس تعاي وياي وشوفيني..والله راح اتبدل..واعوفج على راحتج..وراح..انسيج كل ذيج الايام..ريماا محتاجج..لا تعوفيني؟؟
محمد..اترجاك لا تضغط عليه..وكت ما احس..اني كدرت انسى..واتجاوز اللي صار ذاك الوكت نكعد ونحجي..بالموضوع..هسة..مستحيل ارجع وياك..
احتقرتني وظلمتني..وجذبتني..ولعبت بحالي..كافي اللي شفته منك..يرادلي وكت  هواي..حتى اصلح اللي كسرته..بيه..سنين وسنين..والناس..تجرح بيه..القريب والبعيد..بس  امي ريمة الله يرحمهه..علمتني على القوة والصبر.. وشلون اوكف على رجليه وادافع على روحي بعد كل انكسار..اما انته..حتى مجال انو ادافع على روحي ما خليتلي..سامحني..ما اكدر ارجع الك..
وما بين احنة ملتهين..بالسوالف والمناكر..والاخذ والعطا..والعيون متعلقة وحدة بالخ..بقرب ونفور..كلبي يكلي ارجعي وعقلي يكلي عفية..اريدج هيج..قوية وثابته..بكلب رجال..ومحمد عيونة تترجى..وشفايفة..تطلب مني السماح..اديه تتوسل..ما حسينة شلون انفتح الباب..ولا حسينة بالخطوات اللي جاي تتقرب من يمنه..مندمجين..بحالنة..لحد ما تنحنح..وحجة..
ريمااا..منو هذا اللي كاعدة وياه..وجه بوجه؟؟
يبووووه الغراب الثاني..جنت ناقصته..جان غراب صارو اثنين..اكيد راح يتناكرون بيناتهم واني الخاسر الوحيد بهل منازلة..
ستوني ردت اجاوب..ومحمد وكف وكفة..الند للند..وبحلك عيونة بيه..اني رجلهه..انته اللي منو وشصير منهه..
اني ابن خالهه..بس اللي اعرفة انو هيه بعد مو مرتك..وما تريد ترجعلك..عليش جاي وتقنع بيهه..
اوووو هذا شيحجي شيلوص..
اللي كالك هل حجي يجذب عليك..اللي بيناتنه..سوء تفاهم..وهسة نتجاوزة..
كرار ابتسم ابتسامة عريضة وطلع ورقة..من ملف جان شايلة بايدة..
ما اعتقد بعد هاي الورقة...
نطاه الورقة..واني ركبي خدرن..وكمت ما اكدر اسيطر على روحي..حتى ابقة واكفة..شنو هل ورقة وشمكتوب بيهه..
محمد يقرة..وحواجبة..مرة يصعدن ومرة ينزلن..
التفتلي..اخذت الورقة منه ..اقرة وافرك بعيني..ما مصدكة..
توكيل محامي..حتى يرفع قضية طلاك..على محمد..حمى مشت بيه..وبجسمي..اقرة والاثنين يخزرولي بعيونهم..كمت اشوف الاثنين اربعة..دخت وما احس بروحي وكعت بس باديمن ما اعرف....
ريمااا داخت واني جنت مذهول من اللي قريته..ركضت عرضت ادية..كبل ما تطيح بالكاع..ومسود الوجة اللي واكف يمي..ملهوووف ويسأل..
ريماااا شبيج..ريمااا..
اجوي جدهه وجدتهه..على صوتنه..جديتهه..تركض ..وكوة تمشي بالعوجية..وترعش..
يبووووه هاي شسويتولهه لبنتي ..ليش هيج..حبيبتي..اني ما صدكت لكيتهه..ليش هيج..
خليتهه بحضني..وشلتهه..وطلعت اركض بيهه اوديهه لاقرب مستشفى..ومسود الوجه يكلي عوفهه اني اجيبلهه الطبيب للبيت..
كتلة المرة مرتي واني حر بيهه..
جديتي..كالت هذا مو وكته..ودوهه للمستشفى..رحنة نتراكض..كرار شغل سيارته..وصعدنة وياه ورجلي فوك راس..عقلي  قافل..وما يريد يفكر باللي صاير بيهه..اهم شي اوصلهه للمستشفى..
وجهه اصفر..وخضر..النفس كوة يصعد وينزل..كلبي وكع..بين ضلوعي..خوف ..وفجعة..نسيت قبل شوية مسوية توكيل للمحامي..حتى ترفع قضية طلاك..صحيح دمي فار..واني..اقرة بالورقة..بس ارجع واكول اني السبب..اني اللي ضيعتهه بعمايلي السودة..اركض طاير..والوم..بروحي..وعقلي..وكف من التفكير..وهية بالسيارة..امددة..وغايبة عن الوعي..وكفت السيارة يم المستشفى..ومسود الوجه..يركض وراي..ما اعرف ليش دائما واحد مشاركني..بالاول حسام..وهسة الاستاذ كرار..والله يعلم شراح يطلعلي بعد وبعد..من وراج ريماااا..وكفت وكمت اصيح..اجني الممرضات يتراكضن..اخذنهه مني خلنهه ع السدية..ودخلوهه للطوارئ..وكفنة برة اني وجديتهه..وجدهه..وكرار..يباوعلي صفح..حسبالك بيناتنة.. ثار..لو ورث..العجايز ما كدرو يوكفون..كعدو على اقرب كراسي..
والغراب على طاري ريمااا اجاني..
خلي ريماا تكعد..وبعدين بيناتنه حجي..
ماكو بيناتنه شي لا كلام ولا سلام..
لا بيناتنه ريمااا..انته عفتهه واني احبهه..
صكيت اصابع اديه..اريد اضربة بوكس..بوجهه..اكسر خشمة بس احنة بالمستشفى..ومرضى ودكاترة ..فبطلت..كتلة انته ناسي انو دتحجي على مرتي..
بس اطلكك اني اخذهه..
ليش هل اصرار عليهه.؟؟يا اخي..كومة اكو نسوان..لا تكلي احبهه..ما صارلك من عرفتهه يومين..وكمت اتحبهه..
هذا الشي ما يخصك..بس انتة لا تفرح بيهه..
رفع اصبعهه بوجهي..وراح يم جديته وجدة..وخلاني اتكرضم..
طلع الدكتور..نسيت الغراب شكالي رحت اركض..ع الدكتور..
هااا دكتور خير شبيهه..مرتي..شنو عدهه؟؟
خير خير..دوخة..عادية..بحالة مرة حامل..
عيوني زغللت..بالدمعه..وبسمة شعرضهه شطولهه..على وجهي احس..بيهه اتزيد..شوية شوية..كلبي دكاته كامت تزيد..ولساني عجز..على انو..يحجي..
شتكككوول..حااااااامل؟؟؟مرتي ..حامل..
اي حامل مبروووك عليكم....يرادلهه شوية تحاليل..ومراقبة..يم دكتورة اخصائية..خل تكمل المغذي..وتكدرون تاخذوهه..
ما مصدك روحي..رجعلي عقلي..وكت..ما جديتهه كامت تبوس بيه..وتبارك..وجدهه شالني بحضنه..والغراب وجهه اسود ..ودخن..خلة وراح طلع ..من المستشفى..
دخلت لريمتي..احب اشوفهه..واشوف الفرحة مالية وجهه..امددة..والمغذي يكطر شوية شوية..بالوريد..حاطة الايد الخ على راسهه..ومغمضة..عيونهه..بدخولي..كعدت..وفتحت عيونهه..واجت العين بالعين..ما كدرت افهم.. نظرتهه..وشنو اللي بيهه..شو احس ماكو لمعة فرحة بعيونهه..نظرة بيهه انكسار وخيبة..كعدت بصفهه..ومديت..ايدي حتى الزم ايدهه..ما خلتني..وسحبتهه..
ريمااا مبروك عليينة البيبي..
سكتت ودمعه..سالت على صفحة وجهه..خلتني اضغط ايدي على ايدهه بالكوة..
شبيج ريمااا..انتي ما فرحانة بالطفل..
كتلة..لو بوضع غير وضعنة..جان طرت من الفرح..اجة بغير وكته..اني جنت اريد ادرس..واوصل..ما احب شي يعطلني ويشغلني انو احقق احلامي..ولا احب تضغط علية بيه في سبيل ارجعلك..
تفاجأت وانصدمت..منين قسوة الكلب هاي..اي مرة تفرح..بطفلهه..الاول مهما جانت ظروفهه..بس هية غريبة..
مو لهل درجة..ريمااا انتي تحجين صدك..ما تردين طفلنة..
محمد اترجاك اطلع وخليني وحدي..خليني اشوف حل لروحي..
بلة وشنو الحل..
لا اريد ارجع وياك..ولا اريد طفلك..اطلع من يمي..
مخبلة انتي..كل عقلج اعوفج..او اعوف ابني..
اني طالع بس احسبي حسابج.. ترجعين وياي..ولبيتي..وجربي كولي لا..وشوفيني شراح اسوي؟؟
وضرب اديه على صفاح رجليه..
محمد طلع ضايج من يمي..واني ابجي..ما اعرف شنو البية..حاسة احلامي..كلهه انهارت..بهل خبر..وعقلي ما يكدر يفكر..واني ابجي بداخلي..
محمد خابر ابوه حتى يجيه للمستشفى..وجديتي دخلتلي..حتى تطمن عليه وتشوف شنو الموضوع....#ليوثي