وجع الماضي

الحلقة ٢٨

#وجع الماضي
#ليوثي المياحي

شاف دموعي..وية شهكات مكتومة..سكت شوية وراهه كال..عليش تبجين؟؟؟
ما كدرت..اجاوب..والغصة بحلكي..
جاوبيني..خليني افتهم..ليش تبجين ؟؟من الفرح لو ندم ..
جنت اتاني..يمسح دموعي..ويحضني..ويضمني ..الصدرة..ويطمني..ويكلي احبج..وانتي مرتي..حجايات بسيطة ..تهديني..وتفهمني انو هوة بواعيته..واللي فات مات..وهذي صفحة جديدة..نبديهه سوة..
بس استحوابة الي مال رجال..ما ناسي..ومرايد ينسى..اتاكد من طريقة كلامة..
نادمة..تصيرين مرتي..من صدك..لو مكيفة لان اكتشفت انو ما وصلج..واخذج ..ذاك النذل؟؟؟
فتحت عيوني على كبرهن..وانصدمت..من ردة فعلة..لميت روحي..بالرغم جنت مهددة..وكفتلة..وكتلة..انته ابالك..انو اني دا ابجي عليه...
على بشر..ما يعنيلي شي..على واحد اتفقت وياه بنت عمتي..حتى يوكعونك ويوهمونك..ونجحو بهذا الشي..شبيك ماتريد تفهم..؟؟ليش ما تريد تصدك..
ما اكدر..اجذب اللي شافته عيوني..ما امدر امسح مشهد شفته..وانطبع بذاكرتي..
لعد ليش؟؟ليش..خليتني اخسر احترامي لروحي..؟؟ليش تعذب بيه وتذلني..
بكل برود يحجي..ولا كانو صايرشي..انوب حرك اعصابي حرك..
حقي ومالتي..لا خلفلة عليح..ولا منية منج..
مشيت اخذت دشداشتي..مشيت وطلعت من الغرفة..وهوة يحجي..تنهزمين او وين مترحين..انتي حقي ومالتي..اخذج شوكت ما اريد واحب..ركضت للحمام..اسبح..والحقد الاعمى ماليني..وكره مالة حدود..
محمد يحجي...
بكد فرحتي..بانها..طلعت عفيفة..ونظيفة..وتاكدي بان حسام النذل ما ماخذهه..بكد ما بجيهه..ضوجني وشعلني بنار..ماعندي عذر..وكل حجي الحب..والهيام والفرحة..طار مني..والحنية..اللي جنت مستعد انطيهياه..واحسسهه بيه..هم طار..ما عدهه اعذار تبجي عليه كدامي..لحظات ومنظرهه وياه..خلة كلبي..يتحجر..والفرحة..تطير..واني..اجرحهه مرة الخ..غصبا عليه..ليش ما مكتوبلي..افرح..وياهه..ليش هوة واكف بيني وبينهه..ما كدرت انسى..ولا كدرت امحي..المشهد من عيوني وتفكيري..ضربت..الفراش بقوة وقهر وكمت..حتى اسبح..الدنية ضلمتهه وضالمتني..والداية غلط مو صحيحة..من الاول..حسيت بالدنية..ادور بيه..وكلما حاولت اوكف..ارجع اوكع..وما اجة ابالي احد بس هية..طلع صوتي ضعيف وتعبان..ريمااا..ريمااا..
اني طولت بالحمام..كارهة روحي..وضعفي وقلة حيلتي..دورت بكل الحلول وخليتهه براسي بس ما نفعت..فكرت انتحر مرات ومرات وجيت اسويهه واخلص من هل دنية..بس خوفي من عذاب رب العالمين بكل مرة جان يمنعني..لحظات غضب عنيف..هز جسمي هز وسيطر عليه..طلعت من الحمام رحت لغرفتي..وكبل بدلت ملابسي..وصليت ..تمددت..شوية على الفراش..حسيت بعطش رهيب..طلعت حتى اشرب مي..والكاه بالباب واكع..ومجطول ويون ..بالرغم من اني شكد كرهته وجنت ضايجة من عندة..بس ما جنت احب اشوفة مريض وتعبان..وما اساعدة..كومتهه بالكوة..اجرجر..اجرجر..واني الهث..واسب بروحي..نومته بفالفراش..وجبت مي بارد غسلت وجهه..رحت جبت دواه وشربتهيا..عفته بالغرفة وطلعت اسمعت صوت تلفون يدك..جنت ناسية عمي نطاني تلفونة..رحت اركض بغرفتي وعلى صوتتة تتبعته..ولكيته..
..وليدي شلون صار..
عوجت حلكي وهزيت راسي..ما ناقصني بس مرة عمي..الووو..الووو..خما بيه شي..انتي خما بيج شي...كتلهه..لا الخمد لله زينين..لا تخافين عليه..اقوة مني ومنج..
الحمد لله..خمسة وخميسة بعين العدو؟؟؟
وبعين المايصلي..ع النبي..(صلو..ع النبي مو تنسون)
انكطع صوت مرة عمي ..وطلع صوت عمي ...هلا ريوووم شلونكم .. الحمد لله عمي بخير.. لا تاخذين على خاطرج من حجي مرة عمج ترة اتخاف على ابنهه وماتصبر على فراكة .. ولا يهمك عمي دا انطيه الدوة بانتضام ..  باجر احنة جايينكم من الصبح ..هلا بيكم عمي ..بس ليش اتعبون نفسكم ..احنة هم ما باقين كم يوم ونرجع .. لا لا اكعدو بعد ..ستوكم بديتو.. يلة تصبحين على خير بنتي.. ليلة سعيدة ..
ما ناقصني بس بقت امه تزورني واني علة بكلبي ولو بيدي انهزم اليوم كبل باجر اعوفهه الهم بطولهه وعرضهه.. بتت ليلتي واني سهرانة للصبح ضايجة من روحي وكارهتهه غفيت شوية وفزيت الصبح .. كمت نضفت ولملمت ومسحت وكنست وغسلت سويت ريوك ..وما لحكت اخلي لكمة بحلكي..كعد الشفية وهوة يترنح  حتى العين بالعين من تلاكت انهزمت منه.. ما جنت احب اشوفة او احجي وياه ..حطيتلة الريوك بالصينية على طبلة زغيرة وطلعت ..رحت على جيراني مرة بسام اول مشافتني كالت هلا بالعروسة ...بكلبي كتلهه كولي المهروسة ..مو العروسة..هلة بيج ..حبيبتي .. لبستي شي من النطيتهن الج لرجلج شكالج..كتلهه أي لبست وفرحت بيه..وكضيت ليلة وياه ولا بالاحلام.. أي بالعافية .. اكلج هاي المرة ام البوتيك رادت اوديلهه الغراض وبطريقي اريد اشتري شكم حاجة للبيت شنو رايج تجين وياي تغيرين جو شوية احسن من هاي الخنكة..والله ما اعرف .. اريد شوية هيل اريد اسوي جاي مهيل .. هاا مهيل نوب لازم مسويته هوي رجلج وتردين تكعدين راسج.. ههههههه .. لا تجرجريني بالحجي ..همة العرايس شيسوون ..ههههه وضحكت.. راحت جابتلي حبايات الهيل ..نطتنياهن وكالتلي هذا الهيل يمهلهل ..وهية تتمضحك وتقشمر كامت تعسني من صفاحي واني اضحك وافزن مشيت وطلعت من يمهه كملت الجاي وهيلته وجان تندك الباب ....هلا ومرحبة..هلا ومرحبة
عمي ومرتة بالباب ..عمي حضني ويسلم ويبوس بيه ومرتة مشت من يمي .. لا سلمت ولا باركت راحت ركض على ابنهه ..وينة وليدي محمد يمه ..عمه نايم بغرفته..حجيت من غير شعوروبدون وعي ..ربي يكمل هليوم على خير .. طبت تركض لغرفته ..اباوعلهه من الباب تحضن وتبوس اللي يكلك جان غايب عنهه سنين .. يابة وليدي.. شبيك يبعد جبد امك .. حمد لله على سلامتك.. ليش هيج ضعفان .. شنو ماتاكل.. عوجت حلكي ..ابن امة .زهوة هم كام يبوس بيهه ويحضنهه.. اباوعلهم .. غراب وعكربة صفرة ..عمي دخل وسلم عليه وسأله ..شلونك محمد .. شلون صرت وليدي.. كالة الحمد لله بابا بالدوة ومداراة ريماا صرت زين شوية .. مطيت ركبتي اووووو شنو هل اعتراف بالجميل..مشيت للمطبخ حميت الريوك وهمة يحجون بيناتهم.. هنيالة عندة امة وابوه عندة عائلة تسأل عليه وتتفقدة واني وحدانية مكطوعة من شجرة لا احد يسال ولا من يفتقدني
ولا من يكلي شبيج ..عيوني انترسن  دموع ..مسحتهن هسة مو وكت بجي ..كعدو يمنه ومحمد ارتاح شوية حسيت وجهه نور بجيتهم .. وكام يبتسم ويضحك من يحجي .. واني البسمة ابد ماشوفنياهه كلامة وياي كلة صياح وعرك وتهديد.. وياهم حجية حلو وتبسبس .. اوياي الله عاميه..سبحان مغير الاحوال واني متعجبة بيه وبيهم.. جوي يريد يرجعون ومحمد جلب بيهم حتى يباتون ويانة..اني رجلية تكسرت وركبي كامن يوجعني .. معناتهه لازم ابات وياه بغرفته مرة الخ .. اجة المهندس بسام ومرته على العشة .. كامو يحجون ويتشاقون واني سارحة بليلتي .. تعشو وهمة يمدحون بالتركيب مالتي .. بس امة .. ما عجبهه الاكل..حتى هوة  اللي جان ما ياكل من ايدي.. وكع على وجهه وضرب لما كال يزي.. ورجعت بيه الروح وخدودة احمرن او وردن  ..كملت السهرة بالفواكه والمكسرات..وكبل ما تروح صديقتي .. سالتني كدامهم .. شكلتي ترحين وياي باجر ..ناخذ فرة بسوك المدينة ونوصل بضاعتي للبوتيك.. محمد عيونة ضاكت.. وين ترحن ؟؟
جاوبته صديقتي..بس نروح ننطي بضاعتي للبوتيك..وردتهه تجي وياي..حتى تغير جو..بس هية تتهرب وماتقبل..
جاوب عمي..كال اي مابيهه شي..خليهه شوية تغير جو..وتتعرف ع سوك المدينة..وهاي هديتج بنيتي..هدية صباحيتج..ورة ما رحت..ونوب جينة وما جايبيلج شي..حطلي عمي..شدة فلوس ..بايدي..واني احلف وهوة يحلف..صديقتي غمزتلي وشاورتني..يالعافية عليج..خذيهن..علواه واحد بنطيني ورقة خضرة ام العشرة .مو شدة نوب..ههههه
ضحكتني لميت..الهوسة..وجيرانه ؤاحو لبيتهم..وعمي دخل لغرفة الخطار..مرة عمي كالتلة اني راح ابقة سهرانة..انته روح نام..اريد اشبع من وليدي..كبل ما نرجع..رجعلهه وسحبهه من ايدهه بالكوة ودخلهه للغرفة..كاللهه عوفي الولد تعبان..وبعدة عريس جديد..شنو ما تحسين انتي..كتلهم لا عمي..لا خليهه..اني هم منعسانة واريد اسهر..وهوة هم مشتاقلهه..اني راح ادخل انام..وخليتهم وحدهم ايدة ورا ضهرهه..ومرتجية عليه..وتحجي..هيه وياه..دخلت لغرفته..قصدي غرفة العمليات..ليلة الخ..بصفة..عذاب..واني انجويت..وجمرت..وتلوعت..وشكبر لوعتي..فرشت فراش العرس..وانخمدت عليهه..اااااه شكد جنت اتمنه اكون عروسة وزعلانة وية رجلهه..وتدلل عليه..حتى يراضيهه..وياخذهه بحضنة..اااااه يا كلب..العيون مغمضة..والنوم ما لفاني.. مثل ما رافضتني الدنية..حسيت الباب..انفتح..لملمت روحي وتغطيت باللحاف زين..واهدي بانفاسي..ردت اسوي روحي نايمة..بس اني ما اعرف امثل..رموش عيوني ترف..وفضحتني..ولا كدرت اغمض عيوني..صوت انفاسة..باذني..نايم بصفي..فتحت تك عين وركزت لكيته نايم يمي..ويضحك..
ما راح اكلج..اني..خاتلة وملفلفة روحج..باوعتلة..ونزلت عيوني..واني ساكته..ما جاوبته..كالي كومي نامي على الفراش..ليش رايحة بعيد..كتلة..لا لا ابن عمي.. ما اريد...
كالي كومي احسلج..
كتلة لا عبالك خايفة منك..ولا خايفة من اللي سويته بيه..روح نام بعيد علية..ترة اكوم اطلع انام برة الغرفة..واني ما متعلمة على نومة العز..هاي النومة الكم..
من غير ما تنطنطين..ما اريد اسمع ولا كلمة كومي..نامي علفراش.. احسن ما اكوم انومج بالكوة..وما تنامين الا بحضني....اني السعت..لميت روحي وكمت نمت على الفراش..ونطيته ظهري..حتى ما اباوع عليه.. ونمت ..
من الصبح..كمت وتوضيت وصليت..وية عمي..كعدنة نتريك وية محمد وامة..طلعو همة رجعو البيتهم..ومحمد حضر روحة حتى ينزل للشغل..جيك روحة..لبس و ريح حالة..وطلع ...
كال خليتلج فلوس..ع الميز..خاف طلعين وي مرت بسام..اي شي يعجبج اشتريه..ولا تخلين شي بنفسج..
هزيتلة راسي..اودعة واملة بعيني بشوفته..ودمغني بريحته..عيوني غوركت ودمعت..باوعلي بتعجب وكالي شبيج..خما تعبانة شو مو على بعضج..
لا ماكو شي..دنكت راسي..حتى ما يركز بوجهي..دار وجهه وراح..واني اباوع على خيالة..واطبعة بذاكرتي..اللي عمرة مراح ينمحي منهه..اول رجال..واخر رجال..بحياتي..لبست وتحضرت..حطيت فلوسي..بجزداني..ولبست عبايتي..ورشيت عطر ..وطلعت..لكيت صديقتي جاي تنتضرني..بالباب..طلعنة بسيارة رجلهه..وغراضهه مخليتهن ورة على الكشنات..راديون يغني..وهية تردد وياه..مسوية جو فرايحي..هنيالهه..بنت مدينه بعد..شخصيتهه قوية وثقتهه بروحهه عالية..تتسوك وحدهه..وهية ادير شغلات البيت..ومسوية لروحهه مشروع تربح منه..وصلنة للبوتيك..نزلت وكامتت تتفاهم وية المرة على الغراض..وكالتلهه..راح اروح اخذ فرة بالسوك علما تجيكين البضاعة والاسعار..ومن تكملين خابريني نطته رقم التلفون وطلعت..#ليوثي