ريتاج

لحظات جميله في ذاكرتي

انفتح الباب وطلع ولد صغير ابن خالتي
مبين من شكله بلمدرسه مرحله الابتدائي بس لأن صار هواي مجايه ما عرفته
ملحگه عليه هوه وصغير وعمره جان ٤ سنوات
راح طفر سلم على بيبي ويبوسها فدوه شكد حلوو ومؤدب
ونوب راح لأمي سلم وعلى صقر هم سلم عليه وعلى ابراهيم هم اجه ويانه
راح على أية مد أيده يسلم عليها هيه جرته وباسته بخده
حمزه...هلوو مد ايده وسلم
ريتاج... متعرفني اني ريتاج بت خالتك
سلمت عليه ودخلنه للبيت الولد راحوا ويه زوج خاله هبة بالاستقبال  خاله هبة جانت بالمطبخ لما سمعت صوت النسوان
اجتي ركض وسلمت
هبة...هلا بيكم والله فرحتوني بجيتكم وأصلا امي موو من عوايدها
تجي بس اني اوصلها متسأل عني
ضلن يسولفن ويتعاتبن وأني هم التهيت ويه أية بنات هبة وحده بالسادس ابتدائي اكبر وحده بيهم وتوم عدها الي هم حمزه وبنيه اسمها حوراء وثنيناتهم بصف الاول ابتدائي
همزين التهوا بالسوالف والغده صار بالوحده بس هم بعدني ما اشتهي
استحيت من خاله وكعدت اكل أكلت لگمتين وقلت شبعت
رحت على الجاي قالت خاله هبة...ريتاج حبيبتي بس صبي جاي خلصوا اكل
ريتاج... من عيوني ..طلعتلي استكانات الجاي وصبيت
رحت قدمتلهم زوج هبة ما يشرب ويه الجاي شكر فوصتني ما احط شكر
كعدت يم امي
امي...اشو صايره نادره بالبيت ولا تشتغلين
ريتاج... وداعتج خاله هبة قالت صبي قابل اكوللها ما بيه حيل
ابتسمت امي وقالت...لعد لما نرجع كل يوم اجيب خطار حتى تشتغلين وتستحين منهم
ريتاج عليت صوتي حتى الهي امي وقلت...امي تحب تسوي كبه تمن ولأن احنه
ما ناكلها فمتسوي خطيه وين تطلق قدراتها
ضلن يسولفن على الكبة وجابنها على الاكل كله .
جاي اباوع بلفون جان اجاني اشعار من صديقتي رغد شگد اشتاقيتلها
بسرعه فتحت الاشعار مسويه مشاركه على منشور مكتوب بيها
صديقتي اشتاق لكِ مع مرور الايام هلا تحزنين على حالي
دزيتلها رساله
"هلووو رغد شلونج والله ملتهيه رحت لبيت جدي بعد انتي قيسي "
طلع تم الرؤيا وجار الكتابه
"هلوو ولج عوبه والله مشتاقتلج من صار الحادث وانتي ماكوو خفت عليج"
دزيتلها
"لتخافين حبيبتي اني بخير وببيت جدي اهل امي لأن عدهم عرس "
نوب هاي دزتلي ملصق قلب
"ريتاج تعرفين شصار وياي باليوم الي رجعت من المستشفى ويه اهلي "
خفت وبسرعه كتبت
"شصار ولج"
"اجوي خطبوني "
قالت هيج انصدمت
"ليش ما قلتيلي حيوانه المفروض اول وحده تعرف مو صديقتج اني"
"ردت اكلج وكتها موبايلج مغلق خطبني عصام الي ويانه بالجامعه "
"صدك الف مبروك ونشالله يوم الي ازفج بأيدي"
شنوو السالفه كلها رح تعرس لوو اكو كومه اعراس لوو ماكوو عمي الله يكثرهن
"الله يبارك بيج باعي راح اروح امي تريدني"
"اخذي راحتج سلميلي عليها هواي "
"يوصل"
سديت منها باوعت عليهن بعدهن يسولفن بس هسه قلبنها السالفه على الزعاطيط ومشاكلهم وبيبي بس تنطي نصائح 😌
درت وجهي لقيت صقر وزوج خالتي يلعبون دومنة الله شكد ما العب هاي اللعبه ما امل باوعت على ابراهيم صافن عليهم ويريد يلعب أية هم صافنه
ريتاج... ابراهيم أية تلعبون وأشرت على الدومنة
أبراهيم...اي والله صار ساعه كاعد صافن ولا يحسون اريد العب
أية...اي علمود نبطل صفنات 
صقر... يلا بس لتبجون فركش اللعبه وكال يلا كلها تلعب
احنه كيفنه وكعدنه نلعب بس خرب يومهم بس يفوزون وأكثر المرات
الدوشيش بأيدي بحيث بس مره وحده فزت واخر شي فاز زوج خالتي علينه كلنه واني صافنه ما اعرف شلون يكشفون الي عندي
حتى أية احسن مني باللعب قلت... زين منوو يلعب بات
زوج خالتي...لا اني ما العب بس اباوع عليكم
صقر... لعبه مال جهال هاي
أية...ليش موو هذاك العيد لعبت ويانه وكتها صرت بفريقك
ريتاج... بعد انكشفت تلعب يعني تلعب ..باوعت على ابراهيم وقلت...انت اكيد تلعب ماكوو اعتراض ..انطيتهم المحبس مالتي الي اشتراه ابويه بعيد ميلادي دائما البسه بأصبعي لأن تعودت عليه
صرت اني وأية وايلاف بنت هبة ويانه فريق صقر و ابراهيم فريق واضطر زوج خالتي يلعب وياهم وهوة سبورتي وهم موو كلش كبير بالعمر يطلع عمره بلثلاثينات حتى نصير متساوين بالفرق الفريق الياخذ محبس للفريق الثاني نقطه فأحنه ردنه النقطه وهم يمهم المحبس بدينه اللعب وصراحه ما انتبهنه  منفعلين ونصيح بيبي تشجع فريق الولد وامي تشجع فريقنه وخاله هبه تشجع الأثنين
احنه متقدمين عليهم بخمس نقاط هم ضلوا يغشون ويعوفون المحبس وراهم ميضموه وأحنه نضل ندور اجه دوري حتى اكشف المحبس بأيد منوو
أمي تصيح ركزي وأيلاف تكول أنتبهي ع الايد شلون شكلها حتى تعرفين لمحبس بيد منوو طلعوا هم غاشين بس هلمره بطلنه لعب رحت اغسل وجهي
مغسله يم الباب مال حمام باوعت شكلي بالمرايه عدلت شعري دا امشي اجه
صقر...انتو خسرتوا بالدومنه واحنه خسرنه بالمحيبس وحده بوحده
ريتاج... أدري بس احنه ما غشينه مثلكم
صقر... يولي شبيج متنرفزه هاج المحبس مالتج ..جر ايدي ولبسنياه
ضليت صافنه بوجهه ما اعرف انطق هوه انتبه
عاف ايدي وباوع عليه بأستغراب من نفسه وقال...اني اروح اشغل السياره كولي لأمج وبيبي حتى يتحضرن رح تصير ساعه بالسته ..راح وطلع
ضليت صافنه بمكاني باوعت على المحبس بأيدي اليمنه بأصبع البنصر نزعته
ولبسته بأصبع الخنصر ورحت للأستقبال
ريتاج... صقر يكول خل نطلع رح تصير ساعه ٦:٠٠
بيبي...بعد وكت
ريتاج... راح يشغل السياره تحضروا اذا تردون تتفاهمون وياه خل ايصيح عليه ابراهيم
ابراهيم...اصيحه لو نروح
امي...لا خل انروح خاف الولد عنده باجر شغل وتعبان
هبة...ياا زين انتوا شوراكم
امي... اريد امر على قرابتنه الباقين وأسلم عليهم
هبة...براحتج بس عوضيها بعدين زين
امي...نشالله
رحت عفتهم يكملون اخذت الموبايل جان على الشحن وشاحنتي اهم شي طلعت لكيتهم بالطارمه يسلمون على هبة شبسرعه موو من عوايدهم يلا رحت بوستها وسلمت على بناتها رحت كعدت بالسياره طول الطريق اني ساكته وأفكر بألي صار وبصديقتي رغد امي كالتلي شبيج قلتلها راسي يوجعني
وصلنه لبيت قرايب بيبي يعني ما اعرفهم ولا يعرفوني بس بالمناسبات يصيرون احباب قرايب بس من بعيد
سلمت على حجيه كبيره بالعمر  باوعتلي صفح من فوك ليجوه ونوب راحت
قلت بصوت مسموع...شبيها هاي معاجبها
باوعت لقيت صقر يبتسم
ريتاج... شكوو اكو شي بيه يضحك ..ملابسي بيهن شي اشو تباوع صفح
ما عاجبتها جيتي الحجيه
صقر ضحك بصوت عالي...لا موو انتي احلا من بناتهه فغارت منج يولي غير
ما لابسه حجاب وأحنه ما عدنه بنيه تطلع بلا حجاب بس انتي كسرتي القالب
مالتهم
ريتاج... ياا قالب عززا نوب كسرت حتى بالبيت ما فتت
عااد هذا طك ضحك شمدريني قصده همه يحجون
بالالغاز عبالك وكلامهم نص ما ينفهم
ابراهيم...معليج بيهم شما حجوا انتي راضيه على نفسج وما بيهن شي
ملابسج مرتبه ومستوره بس على الحجاب
صقر وگف ضحك وباوع عليه صفح قال...انت منو طلب رأيك بملابسها امشي وياي خل انفوت ضلينا بره من وره ريتاج
باوعت عليه صفح...من ورايه منو كالك استمع الي وأني ادردم الله الله
رحت وعفتهم فتت للأستقبال سلمت عليهم ما اعرفهم بس ما ارتاحيت
لأن غريبين وأول مره اروح وي امي لما تزورهم يعني ما يعرفوني وبس
يباوعون ونوب الاستقبال كبير كاعدين بي الولد والنسوان هم النسوان يسولفن بالطبخ والجهال والمشاكل والرياجيل يتناقشون بالسياسه والطوبه والأمه مگلوبه رحت سألت بنيه وين الحمام دلتني فتت قفلت الباب وضليت واكفه
تقريبا بقيت بالربع ساعه بالحمام اكره التواجد ويه ناس غريبين بنفس البيت ولمده طويله احس هذا مو مكاني وأنوب امي ملتهيه وبيبي هم أية استلمنها قرايبها
هيه قريبه عليهم قابل مثلي خلصت تفكير وعدلت شعري ملابسي وطلعت
أول ما طلعت طفت الكهرباء اسمع اصواتهم عاليه يسولفون يعني حتى لو عيطت محد يسمعني حتى اذا اريد اعلگ الفلاش مال موبايلي ما اكدر الموبايل يم امي ما اندل ارجع للأستقبال البيت كبير وظلمه هندس بديت اخاف بس ردت ضوه موبايل او ضوه من الشباك مال قمر او اي ضوه حتى يطلعني من الخوفه الي بيه وسمعت الحجيه تكول...يلا امشينه بالطارمه بعد نص ساعه  يلا يشغل المولده ياخذ استراحه
خوش كلش اطمنت وگلبي قام يدگ ١٠٠ دقه بالثانيه احس قمت ارجف من الخوف وأنوب كلها كامت تريد تطلع للطارمه منو يسمعني بلأستقبال حتى يسمعوني بالطارمه يارب امي بلكت تذكر وتسأل عني
سمعت صوتها ما اكدر انطق احس الخوف خرس الساني وبدت الذاكره تعيد الصار وياي اختنكت بالقوه اخذ نفس
امي ..ياا لعد ريتاج وين
بيبي...ليش يمه موو جانت كاعده يمنه ويم أية 
امي...لا يمه قبل لا تطفه الكهربه هيه راحت للحمام وما اجتي
الحجيه...لتخافين عليها ما يصير بيها شي اگوه مني ومنج
امي...حجيه بنتي واعرفها تخاف من الظلمه روحوا ادورها هسه وأجي
الحجيه...شبيج قابل بنتج زعطوطه اشو شكبراتها معقوله تخاف
امي...حجيه ليش اجذب عليج لعد ..التفتت لصقر وقالت
امي...خاله انطيني موبايلك حتى اشوفها وين الفلاش مال تلفونك قوي
صقر... صدك جذب يلا امشي خاله اجي وياج روحوا بس ابراهيم هاك سويج مال سياره افتحها حتى نروح عشا وتعشينه ..جذب حتى يفلتون منهم
الحجيه...ياا شوكت تعشيتوا
صقر... قبل ما نجيكم           الحجيه...صدك ام عامر تعشيتوا
بيبي...اي حجيه تعشينه قابل مستحين منكم يلا خيرها بغيرها
(لأول مره المتحدث صقر)
صقر
رحنه اني وخالتي ندور على ريتاج البقيه طلعوا بره بالطارمه على الهوا  دورنه بالمطبخ ماهيه
صقر... خاله متأكده ما صاير شي لأن احس خوفتج مبالغ بيها
امي...يا يمه سالفه طويله بعدين احجيلك بس خل اندورها
رحنه دورنه يم الغرف ماكوو بعدين لگيناها متخربطه يم الدرج شكلها
جانت تدور على شي تشغله المسكينه اخترعت نوب هيه ما طايقه الحجيه
احسن حل الها تفلت من يمهم امها گامت تصيح بأسمها عليها وتصحي بيها
شلتها وديتها بالمطبخ كلش خفيف وزنها خالتي جابت قلاص مي ورشت على بنتها وكعدت بس بعدها مخترعه وتتنفس بصعوبه شبگت امها وضلت تبجي صراحه انقهرت عليها وما اعرف ليش خفت ليصير بيها شي...خاله يحتاج نوديها للدكتور
خالتي...لا خاله هاهيه تسلم ما قصرت هسه اني شبيه لو مرجعتها لبيت جدها كل مره ما اخذها وياي بس هالمره لا هيه اعترضت ولا اني حجيت لو مرجعتها جان ما صار الي صار
ريتاج ويه انفاسها المتقاطعه...مصار ..شي بس لتعوفيني وحدي مره ثانيه زين لأن اخاف اختنگت گمت ارجف وتخربطت بس خل نرجع للبيت احس ما بيه حيل احمل نفسي جسمي ثكيل
امي...هسه اني اساعدج انتي لا فطرتي مثل الاوادم ولا غده يسد البطن ولا عشا شيصير بيج وأكلج من لما اجينه قليل تاكلين حسب طباكاتج يعجبج تاكلين ما يعجبج ما يعجبج تصومين
صقر... اروح اشوف السياره هاج الموبايل خاله خلي يمج طلعي للطارمه حتى اوصل السياره يم الباب وتعاي زين
امي...ماشي وليدي تعبتك وياي
ريتاج بثگل بالكلام ...بس كول لأية جنطتي وموبايلي بلأستقبال خل تشيلهن لأن انساهن
امي...تنسه امها وأبوها بس ما تنسه الموبايل
صقر... تدللين هسه اكللها
راح واني گمت ساعدتني امي وصلنا للطارمه كلها تستفسر امي ما قالت بس
جانت متخربطه وكعدناها شكلها ضايجه من الحجيه وبيبي تبوس بيه
رغم متعصبه ويه البنات بس حنيه قلبها جبيره (فرقوا بين الحجيه وأم عامر الي هي البيبي )
امي...يلا مع السلامه نشوفكم بالافراح
الحجيه...الله وياج نشالله بالافراح ليش لا بعد صقر موجود نزوجه
بيبي...عيني اني ناويه ازوجه على اختياري وأني اعرف البنيه التعجبه
الحجيه...طبعا بس كون من گرايب مو غريبه لا نعرف اصلها وفصلها.
حفيدات الحجيه يسمعن ويتمضحكن يباوعن على هاي البنيه الي دلتني على الحمام ما اعرف اسمها مبين الحجيه مجلبتله لصقر
يبوو على السوالف ولا تخلص الولد راح للسياره الا شويه يزوجوه وهو مو
داري طلعت من البيت والنسوان بعدهن يسولفن لقيت ابراهيم وصقر بالسياره
فتحت الباب كعدت وسألني ابراهيم...هاا سلامات ريتاج شبيج
ريتاج... لا مابيه شي بس دخت وتخربطت الحمد لله
دار وجهه صقر من وره الكرسي وباوعلي صفح
رفعت ايدي وهزيتها بمعنى شكوو
رجع عدل وجهه  وره ربع ساعه هم بعدهم بالبيت دك هورن حتى يطلعون
طلعت امي وجهه ما يتفسر شبيها وبيبي تحجي وياها وأية تمشي وراهن صعدن كعدت امي يم الجامه وأية من الجهه الثانيه وبيبي يمها
سألت بصوت ناصي ...شكوو اية ليش امي ضايجه
اية...لما نوصل اسولفلج
طلع ابراهيم اغنيه( اخاف باجر) كال صقر ...يمعود شناويلنا وطلع اغنيه القيصر (مدرسه الحب) الاغنيه بيها هدوء على كلام حلوو ضليت صافنه وما
انتبهت الروحي كنت ادندن بصوت ناصي باوعت لأمي مو يمي همزين.. بيبي جانت منتبهه ومبتسمه وأية بس تسمع وياي أبراهيم جان يغني ويه الاغنيه وصقر يسوق بصمت
رجعت سكتت وره كم دقيقه وصلنا للبيت الكل طلع بقه بس صقر يصف السياره امي قالت جيبي علبه طرشي من السياره نسيت انزلها انطتها الحجيه لبيبيتج
رحت للكراج السياره معلوگه الاضويه وصقر بيها
مشيت للباب دگيت الجامه فتحها
صقر... شعندج هنا ولج.           ريتاج... أريد علبه الطرشي مال بيبي
جانت على الكرسي شالها وانطانياها
ردت امشي بس شكله ضايج تعرفون فضولي شلون ما اسأل
فتحت الباب كعدت
ريتاج... شكوو صاير شي        صقر... ماا اعرف ريتاج شسوي امي تگول اتزوج وجديتي تريد هيه تختار البنيه والحجيه تلمح لما جنت بالاستقبال على حفيدتها كل واحد يقرر شكل شسوي اخاف ازعلهم
ريتاج... عليك بلي يختارها قلبك معليك بيهم انته الي رح تعيش وياها موو اهلك هم بس يردون يفرحون بيك ويشوفون جهالك
صقر... ما اعرف شعور محير اني معجب بلارين بس ما مستعد اتزوجها لأن لما دزيتلها رساله گلتلها تعاي للعراق وأبوج يقبل أني وكتها حاجيته حتى تجي كم يوم قالت صقر شوف حياتك أني الحياه بتركيا عاجبتني وما ردت من بعدها على اتصالاتي وكتها حيل كرهتها وأحس الها قابليه تعوفني مره ثانيه
ريتاج... ألي يريدك يجيك لو كان بأخر الدنيا وألي يعوفك الله وياه ..مره ثانيه من يضوجك احد تكدر تعتبرني مستمعه جيده ..حطيت ايدي على كتفه
صقر... يولي لتتفلسفين روحي ودي الطرشي شعندج هنا هسه يكولون
ريتاج...صدك احجي صقر تره محد يوقف على احد
طلعت من السياره رحت للبيت انطيت العلبه مال طرشي لبيبي ورحت لأية تسولفلي شصار جانت بالمطبخ بس هيه
ريتاج... سولفيلي شصار حبابه امي ضايجه
أية...لما طلعتي باوعت الحجيه على ملابسج وضلت تحجي شلون ما لابسه حجاب وملابسها ما حلوه خاله جاوبتها قلتلها ابوها ما حجه على حجاب ويريدها هيه بقناعتها تلبس حجاب بيبي ايدتها بالحجي وثنينهن على خاله ضاجت وما نطقت ونوب عافن امج بيبي والحجيه ضلوا يتعاركن بيبي تكول اني أزوج صقر والحجيه تكول شبيها حفيدتي ومن هاي السوالف
طبعا اسراء من لما اجينه هيه ما كعدت راحه ساعه تقدم جاي وساعه فواكه وبس تتمشى رايحه كاعده  صقر خطيه هو منزل راسه يستحي
ريتاج... أسمها اسراء هه المفروض البنيه تستحي موو الولد والله العظيم اخوج يعرف يقرر هو مو صغير بس شتحجين وياهم
كملنا سوالف
كعدنا نحضر عشه لأن ما اكلنه شي جاي نصب
ما نسمع غير صوت عالي بالاستقبال..
يتبع..
تعليقاتكم انتقاداتكم
Love you 💕
بااي