ريتاج

عائلة

الا يمكنك ان تشفى في نفس
البيئة التي جعلتك مريض..  

❤❤❤❤

بعد ساعة ويدك المنبه واني كاعده اباوعله بلكي يدك علمود اكوم ابدل واحضر  بس ما تحملت اكثر وكمت هسه بالستة وعشرة المفروض بالسبعة نطلع
لزمت جنطتي عدلتها وتأكدت كل غراضي بيها بس رتبتها لأن اني ما طلعت الهدوم منها اصلا ..محد يلحكني بالاهمال 😐
لبست قميص كحلي وجينز خليت لفه مثل الشال على ركبتي وتناسقت ويه لون الحذاء والجنطة رفعت شعري ذيل حصان وكعدت على الكرسي  بصف الجرباية صفنت على أية شون هيج نومتها ثابته لا تتزحزح ولا تتحرك بنومتها ابتسمت اتذكرتها لما كالتلي كعديني قبل لا ترحين وصدك مديت ايدي وكعدتها طبعا هيه بالعادة تكعد بالسبعة بالسته علمود التنظيف بس هسه بطلت

هلعادة علمودي ولان اني وياها صرنه نسهر فصعب عليها تكعد من وكت
فركت عيونها وكالت...ساعة بيش هسه
جاوبت بسرعة..6:30 يله بين ما يصحصح الحلو اروح اشوفهم كملوا لو بعدهم
هزت راسها ونزلت ويه جنطتي حطيتها يم الاستقبال والباب مال طارمة لمحت خالة وياها بيبي يمشن ويسولفن مبدلات ملابسهن بيبي حاطه العباية بأيدها وسانده روحها على خالتي ابتسمت لمنظرهم مدري ليش ورحت يم بيبي لزمت ايدها وبستها براسها...صباح الخير
بيبي...صباح النور حبيبة                خالة...صباح النور
انتبهت خالة تعاتب بيبي...يمة كتلج احسلج ترحين للدكتور تره موزين على صحتج والله
بيبي...اني ادره بروحي كلش زينه والحمدالله لما امرض اني اروحلها برجلي لتلحين عاد وروحي شوفي اخوج عامر وين صار

راحت خالة ولزمتها وصلنه للاستقبال وكعدت على الكرسي
ريتاج... بيبي شبيج شنوو مريضة
بيبي...لا مو مريضة بس ضغط مالتي هلايام صاير يصعد هواي يلجون عليه الا اروح للدكتور
ريتاج... احسلج بيبي على الاقل ينطوج هناك دوة مال ضغط ويكلولج شنوو الزين وشنو الي يزيد الضغط
بيبي...انطوني دوة مال ضغط والطبيب يكلي لتاكلين المالح واني اكلي كله مالح شسوي عاده نوب ضغطي صاعد من وره المشكله الي صارت بين لارين وصقر شكد كلتله ولك بيبي شصار ميجاوب بس احسن شي خلصت منها ولو بت ابني بس احسها غريبة ومو من ثوبنه

ما اريد اطرق للهلموضوع فكلت...اروح اشوف اية شسوت
هزت راسها وصعدت للغرفة باوعتلها جانت كاعدة على الكرسي وصافنة
ريتاج... شبيج يمعودة جنج وحدة مطلقة
ضحكت وكالت...مدري للحظة حسيت رح يضل جزء فارغ مني قبل لا تجين الفراغ والملل جان يحيط بيه وجزء من حياتي جنت الهي روحي بشغل البيت بس الانسان هم يمل ويهلك من الروتين خطار يجون لازم اشتغل عرس لما اروح هم اشتغل طلعة ماكوو محبوسة بالبيت تدرين شكد حسيت بالتغيير لما رحت لعرس رغد كسرت الروتين شويه واحلى شي اخويه ابتسامته الي صارت قليلة من لما اتوفه الوالد بس تدرين كثرت لما اجيتي ..

نزلت راسي بخجل وكملت هيه بضحك...رجع يتشاقه ويانه مثل قبل اخويه ايهم لما مات بابا جان يحاول يغير الجو ويطلعنه من الكآبة بس صقر موت بابا كلش كسر ظهرة مو قصدي اكول ما اثر بأيهم بالعكس هو الجبير وعليه المسؤلية ايهم قوي تظاهر كدامنه وسوه روحة عادي بس بالليل جنت اسمعه يسولف لأمي بقهر بعيد عن الكل ..صقر ضل شهرين ميحجي ويه احد بس كم كلمة على كد الحاجة لأن جان حيل متعلق بيه لما توظف شويه صار احسن وبده يتقبل الواقع وصار وتزوج ايهم صارت حياتنه احسن وعاديه بس اني ضليت ما عندي شي افرغ بيه طاقتي مليت من روحي ومن كلام بيبي ذاك الوكت جنت استنجد بأيهم حتى يدافعلي اذا حجوا عني كلمة