ريتاج

لا تحكموا علي

الي بالصورة ملابس ريتاج 👆

نايمة بأمان الله ..وما اشوف الا دولكه مي مفرغة على وجهي
صحت بعلو صوتي...الله وأكبر الواحد ميكدر ينام براحته بهلبيت
أمي...ولج كومي رغدة اجتي يله تريكي ونطلع نشتري ملابس للحفلة

رغدة الي هي رغد بس ماما هيج تصيحلها ورغد مكيفة على هلشي
ريتاج... ماريد يله ماريد اتزوج عوفيني انام غيرت رأيي
امي...دنلصمي وكومي سبحي غيري ملابسج بين ما اجهز الريوك اني شكوو خابصة روحي اصيحلج رغدة هيه تجي تكعدج بطريقتها
ريتاج... بطريقج سدي الضوة بلا زحمة
ضربتني بالدولكة الي جانت بيدها على راسي وراحت لحمدالله مو كزاز
لفيت روحي باللحاف أتكلب وأدردم عليهم لأن ميخلوني انام هاي الايام تحضيرات للمشية مال زلم وأني الواكعة بيها كل شوية تعاي ريتاج اريد احجي وياج ابوج يريدج حتى مرتضى يتفيك براسي وحاس روحه جبير

بس أني هم ما مقصرة نومي قل وصايرة اسهر على التلفون وألغي ويه صقر لحد ما اعيوني تثكل يله انام وبالنسبة للكعدة امي تكعدني بالعشرة وأكيد ما شبعانة نوم هاي ثاني مرة أأجل الروحه للمول حتى نشتري الي محتاجيه موو بس ملابس مكياج وعطور حتى أكسسوار بابا كال اشتريلها أمي اعترضت بس هو كللها بنتي الوحيدة واريدها تفرح بزواجها
طبعا اني صح فرحانة بزواجي بس هواي افكر لدرجة أشرد بذهني عالم ثاني من ورة التفكير شهيتي انعدمت وقريبا رح يصير بيه فقر دم اذا ضليت على هلحاله وأمي تجبرني أكل حتى لا اتمرض ووراية عرس

حجيت شكم مرة ويه صقر على الجامعة بقت سنة وحدة حرام اعوفها انطيته اقتراح اكمل وبعدين نتزوج بس ما قبل وكلي تكملين ورة الزواج يعني اتسجل بجامعة ثانية بالبصرة ...اكثر شي مضايقني ابتعادي عن اهلي اصدقائي البلقسم وألي مخليني افكر زيادة عن اللزوم شون رح اصبر ببعد عائلتي اكيد زياراتي الهم تتقلص واجيهم قليل لبغداد ..
وتفكيري الثاني شنوو تصير حياتي بعد الزواج صقر شون يعاملني خالتي احتمال تغير تعاملها وياي لأن اجيهم جنه
تنفست بقله حيلة لما رغد دخلت للغرفة وخرت الغطا من راسي وكلت..شكوو
رغد...ريتاج كافي نوم موو زين عصام قبل لما كتله اريد اروح ويه ريتاج حتى نشتريلها غراض
ريتاج... غصبا عليه يقبل ميصير الاخت تعوف اختها بوقت الحاجة

وكملت بنبرة ناصية...عصام يريد يخلص منج اربع وعشرين ساعة تنكين على راسه خطية الولد واصلا ميعارض وجودج يمي لأن يعرفج صديقتي واختي الي ما ولدتها امي ضروري تجين وياي تره هذا موو اي عرس عرس ريتاج

هزت راسها وكالت...واثقة من نفسج ..كومي يله غسلي حتى تتريكين وبعدين السالفة مال ماريد اتزوج بطليها كل ما تضوجين من شي هيج تكولين خل يسمعج صقر وكتها شيسوي بيج
ريتاج...قابل شيسوي تعرفيني طباكات وكل ساع برأي طلعيلي ملابس على الجرباية وانتضري جوه يم ماما بين ما اغسل
رغد...امج حتجي ويانه موو
ريتاج... اكيد لعد شون نروح بتكسي ونرجع تكسي لأن بابا عنده شغل
كالت وهيه تفتح الكنتور...بعد عندج طلعه ثانية بالمهر والمهر لازم تشترين كلشي ملابس بيت طلعة ومال حفلة كلهن مرة وحدة ومكياج كامل