ريتاج

عودة

يارب في القلب 💓 أدعية لا يعلمها ألا انت
فأستجب لنا يا أرحم الراحمين وبحجم جمال هذا اليوم يا الله😍
أجعل لنا نصيب من راحة البال والسعادة يا كريم🌹🌸

****************

أني وبابا واكفين يم باب العمليات وأمي لما عرفت شصار اجتي وتخربطت هسه هيه بغرفة معلكيلها سيروم بابا كال روحي شوفي أمج وهو رح يبقى ينتظر شوكت يخلص الدكتور العملية ،،كل هذا الوقت بابا جان يلوم بروحه وأني بس أبجي وأدعي الله يكوم مرتضى بالسلامة ..

رحت للغرفة ألي بيها ماما شفتها كاعدة وصافنة بس دموعها على عينها رحت يمها وكلت...ماما لتسوين هيج تره بابا يلوم بروحة وأنتي بس تبجين وتخربطتي لازم نستحمل أذا نضل هيج منوو رح يسولف ويه مرتضى لما يطلع من العملية شون رح نكدر نواجهه هاا أذا كلكم تعبانين هااا جاوبيني...؟

لزمت أيدها وبستها وكلت وصوتي مبحوح...ماما أني أكدر اسوي نفسي قويه كدام بابا بس هو كلامه يخليني أبجي أول مرة أشوفه بهذا الضعف موو لازم كلنا نوكف سوه حتى نكدر نكمل أذا انتي مترضين تحجين وبابا هم نفس حالتج وهم أسوء شون يعني نعوف مرتضى يصارع حياته بغرفة العمليات

وأحنه كاعدين ننوح .. باوعتلي وكالت...يعني مرتضى ما رح يصيرله شي ريتاج أبني رح يطلع ويعيش موو ؟!!
هزيت راسي وكملت...يطلع بس أنتي ادعي الله يكومه بالسلامة أقري قرآن تره الله ميعوف أحد أني هم دعيت ورح أضل أدعي يلا هسه كومي وياي
بابا يريد أحد يواسيه

طلعنه من الغرفة والمغذي شلته أني ومشيت وراها راحت أمي يم بابا ولزمته من أيده ضلت تحاجيه أخر شي كعدوا رحت أجيبلهم جاي شي يشربوه ورجعت لكيت الطبيب يحاجيهم ركضت وكلت هااا دكتور أخويه شونه
الدكتور...أبنكم جان بوضع حرج طلعنه الطلقة بس مكانها جان حساس ما أكدر

أمي...شنوو متكدر شبي أبني دكتور أحجي
الدكتور...ما أكدر أكول شي ألا لما يكعد بس هسه حالته مستقرة الي خايفين منه الطلقة صارت بمكان من ظهرة ويمكن ينشل أذا أنشل يحتاج عملية وهاي
العملية لازم تسووها بالخارج لأن الأجهزة موو كفؤة وأحتمال جبير أنو متنجح
فلضمان حياة أبنكم سافروا بيه هذا الكلام المفروض أكوله ورة ما يكعد

كمل وهو يوخر كمامه من وجهه...حتى نعرف يكدر يحرك أطرافه لو لا بس كلتلكم حتى لتنصدمون هذا ألي صار هسه أعذروني .
راح الدكتور وأمي وكعت بالكاع وكامت تلطم وتكول يمة أبني رااح
ريتاج... ماما ماكوو شي نشالله شديكول الدكتور؟؟يحتاج عملية ثانية هذا هو نسويها ومايصيبه مكروه بأذن الله

بابا رغم صدمته ضل يطمن بماما لحد ما هدت بس ماقبلت ترجع للغرفة لأن رادت تشوف مرتضى ميخلون هواي يفوتون أمي بس تفوت ترجى بابا بيهم حتى يدخل وبميه يا ويلاه يله دخلوا أما أني موو مهم أهم شي ماما وبابا يشوفوه أدخل لما يكعد من البنج ...رحت أشتري كهوة راسي مصدع  أشتريتها ودخلت للمستشفى قبل لا أوصل لغرفة مرتضى سمعت صوت جدا مألوف ألتفتت من بعيد ..صقر معقولة كمت أهلوس !!.شجابة لهنا ؟؟