ريتاج

لا يشعر...

كذبت على نفسي عندما قلت سعيدة ببعدك 👎

£££££££££

دگات كلبي صارت سريعة أحس خايفة ومرتبكة عبالك مسوية شي غلط كتبتله رسالة "صقر..؟ "
رجع كتب "اي صقر شبيج متفاجأة ما رح اعديها ألج رحتي بدون حس لا خبر"
رديت بغضب "شنوو راح تسوي يعني هاا اني رجعت لبيتي وأصلا كلش مرتاحة ابتعدت من الهوسة من أسراء ومن .. منك "

جاوب بسرعة "مني ليش أني شسويتلج ؟لو ما أني بالشغل جان أتصلت عليج بس ميخلون احد يلزم موبايل بس اني ونوب اخابر حتى اتعاقب بسرعة "
كتبت "يعني أني ما استاهل تتعاقب علمودي! "
ما جاوب شي عفت الموبايل ورة شوية دك التلفون باوعت صقر صدك يحجي

رفضت المكالمة ورجعت كتبت "ليش دكيت "
"منوو كال أني ما استاهل رح تخبليني شبيج "
أبتسمت وكتبت "كافية كلش كافية بس أني هم ما اقبل احد يتأذة علمودي أي شونك أخبارك "
كتب بعد مدة "حمد الله انتي شونج "
"دوومك أني على الله عايشة "            كتبت "شونها لارين "

"زينة يبوو مخلصان منها حتى وأني بالدوام تخيلي كل شوية تتصل "
كتبت بغضب "هي رح تصير زوجتك لازم تتحملها ولازم تجاوب على اتصالاتها" "أي صحيح صدك ما كلتي تحضرين خطوبتي لو لا " 
ما ردت احجي عنها بس غصب عني  اكيد رح يسألج عن خطوبته
"لا.."      "ليش "
ردت بأي طريقة أتخلص من عندة كتبت "بابا يصيحني رح اروح باي "
سديت الموبايل ورجعت بحضن بابا لحد ما نمت.. 

_________________
كعدت وأني بغرفتي دقيقة اني جنت بالأستقبال شجابني هنا
رحت غسلت وجهي ورحت للمطبخ طلعت جبن وشوية زيتون بابا يحبة الصبح وية الاكل أما اني فأصلا ما أحب طعمة يكولون بي هواي فوائد بس ولا يعجبني أكل منه رحت أسوي جاي تذكرت صقر من طلب مني أسويلة

أبتسمت شكد جنت أتعارك وياه وعلى اشياء تافهه عفت علبة الجاي وطلعت الكهوة ما اريد اي شي يذكرني بيه

طلعت الدلة مال كهوة وحطيتها على النار صار هواي ما شاربتها طبعا أني كلشي ما اعرف أسوي بس الكهوة مالتي تخبل 😍 طلع بابا من الحمام وكال
صباح الخير 
ريتاج... صباح النور تعال بابا أكل ريوك حضرته
أبتسم وكال... أي وأخيرا احد يسويلي ريوك بس وين الجاي

ريتاج...سويت كهوة تريد ؟؟ لو اسويلك جاي
بابا...جيبي يلا أحسن متعرفين تسوين جاي.
ريتاج... تعلمت أسويه بس صار هواي ما مسوية كهوة
أنطيته وكعدنة نتريك فتحت موبايلي على الأنستا وبحثت عن صقر
وطبعا مثل ما توقعت أسمه بالأنكليزي صقر فتت على الصفحة مالته ناشر

صورته يربي اني بالصور ما أطلع هيج ليش بس هو عكس الشي طالع..حلوو الله يستر كم بنية زاحفتله فتت على اليوميات مالته ناشر صوره العلم العراقي وكاتب شعر

عشگناك بكثر ما بيك من جروح ومن حبك ولا فد يوم ملينة
وتعَبنة السهر والخوف والدمعات لكن ياوطن ماكلنة شعلينة
ومابعنة القوافي والأرض والدين وما عفناك لكن بيك ظلينة
من مرك حزن صرنالك أحنة دموع ومن مرك فرح كل أحنة غنينة
ولد الملحة كلي شلون هم ننساك غزر حيل ملحك ياوطن بينة
وتاريخك شمس من زاخو حتى الفاو وبس أسمك فقط والله يكفينة
أسمك ياوطن والله يكفينة