ريتاج

ماذا اعني..

أنت لم تأت هذا المساء مجددا
وأنا ايضا لم أنساك الامر الجيد
أن كلانا يحافظ على وعوده
الأخيرة..💔

🔰🔰🔰🔰🔰🔰🔰

للمرة الرابعة أمسح وأكتب بالرسالة بس ما تجرأت ارسلها اخر شي مسحت الرسالة وسديت الموبايل حطيت ايدي على راسي ورجعت بذاكرتي لما شبكني ليش هيج سوه بعد عقلي شينسيه الموقف..
أنفاسه على رگبتي خلت جسمي يتجمد ..هسه اني شجاي افكر ليش احس روحي سخيفة حطيت موبايلي على الشحن ونزلت لكيتهم عاديين بس يسولفون وياه ما أتجرأت اباوعله سويت روحي مشغولة رحت للمطبخ وكملت الاماعين الي ضلت على النص درت وجهي أية واكفة بصفي

من ورة ما اخترعت صوتي وصل لسابع جار وطبعا الضحية الماعون تطشر بالكاع وصار فتات باوعتلها...الله يسامحج ليش هيج فززتيني
من ورة صوتي الكل أجه للمطبخ
خالة...صار خير عيوني انكسر الشر
بيبي باوعت لأية وضربتها على ظهرها وكالت...غير تحجين تكولين خرعتيها
أية كالت وهيه تمسح على ظهرها...ما أدري بروحي اخوف
ضحكت وكالت...اصلا موو اني السبب جانت بغير عالم بحيث بصفها وما شافتني

عسيتها من ايدها ضحكت بيبي وكالت...يله مصار شي بس لموا الكزاز خاف تتعور بي الطفلة ،، كالت هيج وراحت
خالة...أية روحي لغرفة صقر رتبيها خطية اخوج تعبان من الطريق يريد ينام
هزت راسها رادت تلم الكزاز بس مخليتها كلتلها روحي لشغلج هسه اني اشيله راحت كعدت الم بالكزاز وهو واكف يم باب المطبخ بس يباوع عليه
ريتاج... حباب روح مجاي اكدر اركز بشغلي
صقر... بس اني ما حجيت شي وما دخلت للمطبخ

ريتاج... حتى لو بس وكفتك تحسسني عبالك واحد ديراقبني
تقدم يمي وكال...مجاي اراقبج اباوع عليج
ريتاج... ثنينهن نفس المعنى بالنسبة ألي
صقر... وشرح تسوين اذا كتلج اراقبج ..تفلتين
فتحت حلكي ردت احجي بس أية صاحته فغيرت رأيي وما حجيت شي أبتسم وطلع من المطبخ وخرت كل شي من تفكيري وشلت الكزاز

........

كاعدة بالغرفة دكت أمي وكالتلي العملية رح يسووها اليوم حيل تفاجأت وحتى بطني كامت تلويني من الخوف عبالك اني الي رح اسويها الله يساعدة لمرتضى شنوو شعوره هسه ما كدرت تحجي وياي هواي ملتهيه بس كلتلي هيج وراها كالتلي باي .. ما اعرف شسوي ادعي بكلبي و قرآن قريت بعدها حسيت بالوحدة حيل حسيت روحي وحيدة بهلوقت حجيت لأية وكتها جانت اسراء موجودة الكل عرف انو اخوية رح يدخل لغرفة العمليات بيبي ضلت تدعيله هيه وخالة أية تحاول تغير من مزاجي بس ماكوو فايدة التفكير ابد ما راح من عقلي

أية...شون رح تضلين هيج ما أكدر اعوفج بهاي الحالة كومي
ريتاج... شكوو
أية...رح اخليج تشتغلين حتى لتفكرين على الاقل شويه
لزمتني من ايدي ودفعتني وياها للطارمة
ريتاج... يااا شبيج أية
أنطتني الصوندة وكالت...رشيها بالمي بين ما اجيب الماسحة
تنهدت بقلة حيلة وهزيت راسي راحت وبديت أرش الطارمة
ما أحس الا وصوت صقر جاي من ورايه
صقر... كالوا اخوج رح يدخلوه لغرفة العمليات اليوم صح
ريتاج... اي وحيل خايفة يارب يكوم بالسلامة