ريتاج

من جديد

قطرة الماء💧في بيت النمل.. بحراً
أعلم يا صديقي أن الأشياء لا تُقدر بحجمها ..بل بتأثيرها
⚡⚡⚡⚡

تعبت ..من شنوو تعبت؟؟ من كثر ما بجيت أحساسي غريب عبالك رح أفاركهم وبعد ما اشوفهم لزمت قميص بابا وبسته بخدة حضنته وكلت...أرجعوا بالسلامة ونشالله مرتضى يمشي مثل قبل وأحسن ديروبالكم عليه تره هوه يخاف بس يسوي نفسه قوي لتعوفوه وحدة بمكان خااف يصيرله شي..
كملت وأني اباوع بعيونه

ريتاج... دير بالك على روحك أكل زين لتنسه الدوة مالتك مال ضغط أخذته موو
هز راسه ولزمني من خدودي وكال...حبيبه گلبي أنتي بابا لتبجين نرجع نشالله بسرعة منتأخر روحي يم بيت جدج ولتهوسيهم لتضوجيهم صيري عاقله
ريتاج... جاي أحس اني طفلة بكلامك

بابا...هو أنتي الزعطوطه مال أبوها شما كبرتي تبقين بعيني صغيرة
كلامة جان يزيد الطين بله كمت أشهك وزادت دموعي كال وهو يطبطب على راسي ويبعدني...يله كافي صقر صارله ساعة واكف رح يتأخر
صقر... لا عمي أخذ راحتك قابل رح تطير البصرة
بابا...لا أبني تتأخرون ويصير الليل يله بنتي بأمان الله

مسحت دموعي وهزيت راسي مشيت خطوة وكلت...دير بالك على ماما تره تخاف تشوف مرتضى بهاي الحالة
صعدت بالسيارة فتحت الجامة وكلت...هم لتنسه تنطيها الدوة مالتها مال مفاصل تره حالتها تنتكس وعضامها تصير توجعها
بابا...مع السلامة كاافي بابا أدري لتوصين حريص

صقر دار وجهه عليه وكال...هاا نطلع
هزيت راسي ودرت وجهي لبابا صار بعيد أشرت بأيدي وسديت الجامة عيوني دمعت بصمت أيد لزمت أيدي باوعت بصفي لارين كاعدة يمي
حطيت راسي على جتفها لأن عيني احسها ثگيله وراسي يوجعني ما حسيت على روحي ألا وأني نايمه

صقر

ما أعرف ليش بس حسيتها متريد تروح ويه هذا الي يتسمه فهد نظراتها تفسر كل شي وأني أصلا ما ردتها تروح من الأول صدك شايف روحه هذا الفهد بس يباوع وعيونه زايغه طايح الحظ .. مدري أحس الشخص بس أباوعله من عيونه أعرفه شنوو معدنه أحساسي ميخيب باوعت لفهد عرفت شخصيته التحفة لما طلعت ريتاج من سيارته أحسه بس يخنزر

طايح الحظ لو ما أبوها واكف جان علمته شون يباوعلي ألا شويه أرتكب جريمة ميعرف عليمن يباوع هيج
سيارته مدري شون متحملته ...غثيث... ألا شويه توكع السيارة بالكاع مسكربة
ورة ما راح يلا ارتاحيت مينهظم

ريتاج ضلت بس تبجي وتوصي بأبوها لحد ما مل شكله بالكوة متحمل ما ينهار الله يساعده ما ردت أكطع عليهم كلامهم بس أبوها كللها رح تتأخرون وكذا دخلت ريتاج للسيارة وعينها ضلت على ابوها مشيت بالسيارة ورة شويه
باوعت من المراية شفتها نايمة وساندة راسها على جتف لارين

ريتاج نايمة لارين صافنة على الطريق وأني اسوق السيارة بسرعة من الملل أريد اوصل للبيت وأرتاح بغرفتي بحيث الطريق نص نهار سويته أربع ساعات ومرتين نزلت أشتري مي ولفات حتى ناكل
بالنسبة لريتاج ضلت نايمة طول الطريق حتى أكل ما أكلت
وصلنه للبيت بعد ما نشلت عظامي من التعب طبكت السيارة بالكراج وو....