ريتاج

صديقتي هي اختي

الكَسر في اللغة العربية اقوى من الضّم
لكن أذا اتيتني مكسوراً َضمَمْتُك 💔
.......................

عيونة تلاحكني وأني ساكتة ما احجي شي كم مرة سألني ليش بس مجاوبت عبالك عقلي وكف وأبد موو وكتها لازم الكه تلزيكه للجفصة مالتي
كمل ولف ايدي رجع سألني مرة ثانية وكال...ليش متردين اتزوج اسراء
بلعت حنجرتي من الخوف بس طلع صوتي مثل العصفور الي ماخذين لكمته
ريتاج... لأن أسراء متناسبك وما اعتقد هي البنية الي تحلم بيها
صقر... البنت الي احلم بيها !! وتعرفين انتي ياهيه ؟

ياربي اني شكد اريد افلت من الوضع انوب جاي ازيد الطين بله
ابتسمت ووكفت على طولي وكلت...يعني متريد تتسرع مثل خطبة لارين
صقر...متأكدة بس هذا السبب
دنكت لأيدي ومو كادرة احط عيني بعينه واني متأكدة هو كعد يباوعلي
منتضرني اجاوب فكلت...ماكوو اي سبب بس هيج مجرد نصيحة
رفعت راسي وعيونة تباوعلي بنضرة حزن وخيبة تفاجأت لهاي النضرة
ولا مرة شفته هيج يباوع دار وجهه ومشه قبل لا يروح كال بدون لا يدير ظهره الي
صقر... ايدج حطيلها دهن ولفيها ترة متطيب وحدها

هزيت راسي عبالك كعد يشوفني شنوو جاي اسوي وهو اصلا داير وجهه طلع من المطبخ تنهدت وباوعت للمحلبي كعد يفور طفيته وطلعت اصيح أية اجتي صبت ورحنة كعدنة نسولف ويه شهاب ونعاتبه مجاي نشوفه بالنسبة لصقر يسولف ويضحك عادي واني بس اباوع عليه وصدك لازم اذكر جهود أية لأن كل ما تشوفني صافنة عليه تنبهني
شهاب...ليش متزوجوني عوفوا ابن اختي اني اوله ترة
كالها بضحك وبيبي ماصدكت...شهيبان استجن شوية ابني اشو انته الي رافض فكرة الزواج وكم مرة ادورلك على بنية تطلعلي بيها ميت عيب وعيب والبنات الاعرفهن الله يستر عليهن حليوات مؤدبات وصوتهن ميطلع
شهاب...جاا منوو كالج يمة اريد بنية حلوة المهم اخلاقها حلوة وشسوي بيها صوتها ميطلع اني اريد مرة تلعلع وتسولف وياي موو تضل صنم

بيبي...شحلاتهن والله يا أبني حتى البيت يشيلنه على روسهن يطبخن ونادرات موو فاهية فكاكة ما تعرف تشيل الماعون وتروح تكسرة
حسيت الحجي يقصدني بيبي مجانت تقصد احد بس اني اخذت على روحي وطلعت الكلمة من حلكي...ماما جانت تصيحلي الفاهية وكلشي متأمن اشتغل تخاف اكسرلها البيت
الكل ضحك ورجع اشهاب حجة...ماريدها تشيل البيت فوك راسها بس تحطني بين عيونها يمة وهدومي شوفيلهن حل أريدهن ينكون ارجع للبيت الكاهن معقجات وحال الضيم حالهن فدوة ما اوصيج اهم شي تعرف تكوي هدوم ومتحركلياهن.

ضحك صقر وكال...شهاب حلات البنية بفهاوتها
باوعلي وابتسم ضليت صافنة مثل الخبلة ..شيقصد
دغتني اية وكالت...امشي نروح ننام لأن بعد اذا بقينة زايد يصير
هجوم على شخص ثاني
كلهم ضحكوا عبالهم تحجي على بيبي بس تقصدني عود اني على صقر غصيت بالمي وكمت على حيلي شهكت وكلت...ياااا شنساني
كلها صاحت...شنوو
باوعتلهم وكلت...موو شي طارئ بس باجر حنة صديقتي رغد وأتفقت وياها اجيها لعرسها وخابرت اهلي ووافقوا بس المشكلة منوو يوصلنة لبغداد
صقر بابتسامة...طارئ