ريتاج

وجه مظلم واسرار مخيفه

وصلنا يم المطعم طلعت من السياره ورغد طلعت وراحت لباب المطعم
جاي اعدل ملابسي صاحتني رغد من بعيد وكالت
رغد ...ريتاج اني حفوت للمطعم جيبي العلبه بيها جكليت بالسياره وتعاي
ريتاج... روحي هسه ما اطول
فتحت الباب وطلعت العلبه سديت باب السياره مشيت خطوتين من السياره وبعدها حسيت بأيد تجرني من ايدي ونفس الشخص حط وصله ع خشمي وفقدت الوعي ما حسيت شي بعدها الا واني هنا
....
لما تذكرت اخر شي صار الي عرفته انو اني مخطوفه واهلي يارب اهلي يحسون انو اني ماكو بلكي يبلغون الشرطه لو يدوروني
وره فتره من الجوع والعطش سمعت صوت الباب ضليت اتصنت ع مصدر الصوت وصوت حذاء الشخص يتقرب
ريتاج...اذا تقربت اكثر رح تندم
_هههه حتى وانتي بأسوء حالاتج تهددين الشخص الي امرنه بخطفج كال راسها يابس يرادلها جره اذن ويمكن تبقين هنا لمده طويله فلازم تتعودين على المكان
ريتاج... اي كان هذا الشخص اذا كان رجال ليش شاد عيني لو يخاف تنكشف حقيقته الوصخه
بس خلصت كلامي ما حسيت  الا بالمي كله على جسمي ومي بارد
_لزمي حدودج وعرفي ويامن تحجين
ريتاج والبرد يموت...بالمناسبه وين اختفت الضحكه السمعتها قبل دقيقه
_تنفس بصوت عالي وكال...لا تطوها اكل ولا شرب وبالمناسبه ميفيد العناد بشي
راح واني ضليت اغلط عليه
ريتاج... لك حقير انته انسان فاشل لان تمشي بين ايدين الناس مجرد لعبه يتحكمون بيها
_وكف مكانه دار وجهه عليه باوعلي بنضره غريبه وكال...خل نشوف منوو رح يساعدج حط قطعه القماش على عينيط وراح ..الدنيا حيل بارده   قمت اعطس وملابسي مبلله حسيت نفسي بالقطب الجنوبي
مع انو الظلمه تخنك بس تماسكت نفسي وضليت افكر اشون اطلع منا
اخر شي اجتني فكره لازم اسويها بعد مده نعست ما اعرف الدنيا ليل لو صبح  بس خايفه كلش على غفله ويجي احد يعتدي عليه  و كثر البرد احس اصابعي يوجعني بس ما قاومت النعاس ونمت
كعدت بعد مده من الوقت طبعا ما اعرف ساعه كم لان الدنيا ظلمه حاولت اوخر القطعه من عيني حركت حواجبي المهم شلون ما كان اخيرا كدرت اوخرها لكن الي شفته فاجأني
اني بمكان جبير كلش وبوسطه اكو مسبح هم جبير واني حاطيني على حافه المسبح يعني اي حركه زايده اوكع بالمسبح واموت والاغرب ماكو احد المكان فارغ ضليت اصرخ بلكي يسمعني احد بس ماكو المكان تقريبا مهجور اني اخاف ابقى وحدي يا الله ساعدني ضليت اناجي ربي وادعي لان بس هو القادر على حمايتي حسيت بتعب بكل جسمي وعظامي توجعني ضليت على هاي الحاله يومين جوعانه ماكوو اكل ولا شرب واني مصخنه فقدت الوعي وما حسيت على نفسي الا واني بالمستشفى دقيقه اني بالمستشفى فتحت عيني ركزت
امي وابويه ورغد واهلهه كلهم يم راسي شكدما فرحت ضليت محتاره شلون لگوني شوفتهم ردتلي روحي نزلت الدمعه من عيني عبرت عن هواي كلام عن شوق عن تعب عن خوف ما ادري بس ردت حضن يحتويني ضليت ابجي امي اجتي حضنتني وضلت تبجي وياي اجه بابا شافني
بابا...بنتي شلونج            ريتاج هي وتبجي...ابد مو زينه بس لما شفتكم اختلف كل شي
امي ...يبعد روحي شسوالج هذا الحيوان خوما اذاج
ريتاج بابتسامه مكسوره...اصلا ما يتجرأ يأذي شعره مني ولساني موجود
وميعرف منوو اهلي
دكتور...السلام عليكم ..ريتاج شلون صرتي احسن
ريتاج...الحمدلله بس اكدر اطلع من المستشفى لأن اريد ارجع للبيت اشتاقيتله رغد...اوك يعني للشقه مالتنا
ريتاج... اكيد لا اريد ارجع لبيت اهلي بيتي بعد ما اريد افارق اهلي
رغد..على راحتج اني واهلي اجينه حتى نطمن عليج لازم نروح انشالله ترجع صحتج
ام رغد...حبيبتي ريتاج ازمه واتعدي لتحطين بالج
ابو رغد...انشالله تكومين بالسلامه بنتي ، احنه نترخص
سلمت عليهم وراحوا
ريتاج... وين مرتضى اشو ماهوه معقوله ميريد يشوفني
امي...يمه اجه ويانه للمستشفى بس ضل بره المستشفى يكول ما اريد اشوفها ضعيفه وضل يبجي ويدعي لسلامتج
ريتاج...بابا تكدر تخلي يجي اشتاقيتله     
ابويه...من عيوني ،،راح بابا يجيب مرتضى وتذكرت اسأل امي شلون لكوني
امي...لما ما اجيتي سألت عنج رغد كالت تجيب العلبه وتجي وره ١٠ دقايق ابوج راح وما لقاج اجه كال ماهيه طلعت من المطعم لقيت العلبه بالگاع تخبلت وضلينا ندور عليج البارحه الصبح لكينه الكامرات المطعم جان بي كامرات مراقبه ولما توسلنه بي طلع الكامرات شافتها الشرطه دورو الشخص الي خطفج وهم من غبائهم ما فكروا بالكامرات وما لبسوا قناع المهم لكيناه والشرطه خلته تعترف ولگيناج
ريتاج... ضليت ساكته وامي تمسح على شعري وره شويه اجه بابا وراه فات مرتضى
ريتاج... هاا مرتضى شتاقيتلك ما اشتاقيتلي ولك
مرتضى رفع راسه وهوه يبجي ...شلونج
ريتاج... شنو هاي جاي تبجي
مرتضى...لا الرجال ميبجي
ريتاج... زين شكوو جاي لعد.     مرتضى...اجه وحضن ريتاج وباسها من راسها
ريتاج...خربطت شعره وهوه كل مره اخربط شعره يضوج ما حجه بس ابتسم
الدكتور...خلص المغذي تكدرين ترحين ولازم تاكلين فقر دم عندج لان بعدج ما الج طاقه
ريتاج... مغذي ،،ما انتبهت على الكانونه حاطيها على ايدي اليسره  ضليت صافنه على الدكتور وهوه يوخرها لزمت ايد بابا خايفه من الالم مكان الكانونه جان احمر
راح بابا ومرتضى يكتبون اجرأت الخروج ماما ساعدتني حتى اوكف بالقوه يله كدرت اوكف
امي...تكدرين تلبسين لوو البسج اني يمه
ريتاج... ماما شنوو السالفه اكدر يلا خل ابدل
امي...عافت ايدي واستندت على الحايط طلعت ماما حاولت اوكف بدون اي شي يساعدني لكن وكعت على رجلي رجعت كمت وكعدت على السرير ضليت البس ملابسي اني وكاعده عظامي توجعني يمكن من وره الصخونه ..ليش ريتاج هل كد انتي ضعيفه لازم تصيرين قويه وتثبتيلهم انو مو كلشي يوكعج
كملت اجتي ماما وصلتني للسياره وكعدت كل الطريق هم يسولفون واني ما احرك ساكن ضل فكري بألي صار تره مو شويه تظاهرت انو اني قويه حتى ما اكون فريسه بين ايديهم
امي...ريتاج يمه شبيج ليش ساكته صار ساعه نسولف وانتي مو هنا
ريتاج... لا ماما وياكم بس ما اريد احجي تعبانه
بابا...حط ايده على ايد ماما واشرلها يعني عوفيها خطيه
وصلنا للبيت اول ما فتحوا باب البيت حسيت بالعبره خنگتني بس ما بينت شي
رحت على كيف واني استند على الحايط وصلت لقيت الجنطه مال الهدوم وغراضي كلهن بغرفتي ردت اعدلهن بس ماما اجتي وهيه عدلت الغرفه ز
وضلت تسولف وياي صراحه شويه نسيت لو اني اريد اتناسه الي صار  وتفاعلت وياها طلعت قالت ارتاحي طبعا كل ما تجي ماما تجيب اكل وياها رح يزيد وزني من وراها
تمددت على الجربايه(السرير) وللأسف كأنو ماكو مفر من يلي صار ضليت اربع ايام على هااي حالتي بالقوه يلا اكل ما عندي شهيه للأكل والنوم تجي ميه حسبه بالي يلا اكدر انام
كعدت ساعه١٠ الصبح طبعا اهلي يعوفوني براحتي شوكت ما اكعد اكعد رحت للمطبخ ماما كعد تخابر خالتي ومبينه ماما فرحانه تفرح هواي لما يخابروها اهلها ابتسمت لما شفتها فرحانه سلمت على خالتي وسدت التلفون
ريتاج... ها ماما اشوفج فرحانه
امي...اي يمه خالتج خابرتني وعزمتني على عرس بنتها تبارك بعد اسبوعين
ريتاج... تبارك بنتها الجبيره موو
امي...اي اني اريد اروح صار هواي ما رايحه واشوف خواتي كلهن
ريتاج... اي روحي شوفيهن
امي...واعوفج وحدج لا يمه
ريتاج.. بدون قصد طلعت من حلقي...اروح وياج قابل وين ابقه
امي...صدك بعد احسن حته تغيرين جو وطلعين من جو الكأبه
ريتاج لما شفتها فرحانه ما ردت ازعلها وقلت...كولي لبابا حتى نشوف شناخذ هدوم وغراض واكيد  شكم فستان للعرس
ماما..خابري انتي وشوفي يمكن هسه بالشغل ميجاوب بس اذا شاف ريتاج يجاوب بسرعه الضوء
ريتاج... ماما احس اكو ريحه
امي..ضلت تشم بالمطبخ...ماكو ريحه ولج
ريتاج...لا ريحه غيره بالموضوع
امي...ياا وكت شقة يلا خابري         ريتاج... صدكي مو شقة
خابرت بابا
_الوو ريتاج بيج شي بابا
_لا بابا ماكو شي بس اريد اقط فلوس
_علمود فلوس خبلتيني عبالي شي صاير ليش ترحون للسوق
_اي وعلمود شي ثاني خاله ام تبارك عزمتنه على عرس بنتها بعد اسبوعين نريد نروح
_يعني تردين ميزانيه الدوله موو ميزانيه البيت يلا ما يغلا عليكم شي راح ادز  الفلوس بيد مرتضى ياخذ تكسي ويجي
_ليش ماخذ وياك مرتضى يلا بس يمكن نطول بالسوق يعني لتنتظر على الغده _لا اني عندي شغل هم اطول يلا باي
_بااي
امي...ها شكال               ريتاج... رح يدز فلوس بيد مرتضى
امي...خوش حتى ناخذه ويانه روحي بدلي
رحت بدلت وكملت وكعدت يم ماما
امي...واخيرا شفت ريتاج      ريتاج...ليش يعني ما جنت ريتاج بس جان اكو شي مأثر عليه وتخلصت منه
وصل مرتضى للبيت بسرعه اخذنا ويانا حتى يشتري هدوم وضلينه نشرح السالفه
وصلنا للسوق ياربي اني وين جنت السوق متغير ضلينا نشتري الي ناقص وشتريت ٣ فساتين بعد فره طويله بالسوق رجعنه للبيت واحنه هلكانين من التعب
بابا..الله يساعدكم
ضلينه نسولف ونسينه نحضر غراض وملابس
رحت لغرفتي طلعت شكم تراكسود وحذاء رياضي (تكرمون) وامي لحت عليه اخذ حذاء كعب اشترتهن غصب عني لان اني قصيره 💔
قبل لا انام تذكرت العطر الي اشتريته مكتوب عليه اسمي رحت طلعته وحطيته بالجنطه وطبعا من عطر واحد الى ان حطيت ميز التواليت كله 😂
ورحت في نوم عميق 😴

رأيكم وتعليقاتكم مهمه حتى اعرف اذا عجبتكم القصه اولا
Love you💓
بااي