ريتاج

بداية لتغيير

ألم تُرهق يا وطني من الضياع

🌷🌷🌷🌷🌷

ساعة 4:00

وصلنا لبغداد بعد ما كعدنه بالمطعم وتغدينه وطبعا كل شويه يوكف بابا السيارة بمكان ونضل شويه وبعدين نكمل الطريق وطبعا بابا يسوق على السريع بس وكفاتنه بلطريق هي الي أخرتنه وأمي كل شويه تدك وتسأل وصلتوا لو لا تخاف لا يصير حادث على الطريق لأن بابا الله يحفظه لو بيده يوصل بسرعة الضوء

أنطاني المفتاح وراح يطبك السيارة بالكراج أخذت المفتاح وفتت للبيت وأخيررا الواحد لما يرجع لبيته بعد مدة يحس ملك الدنيا والله راحة نفسيه نزعت حذائي تكرمون وطبيت للأستقبال نظيف الظاهر ما فايتين أله لأن مستحيل يبقى نظيف بهلشكل رحت لغرفة مرتضى ..

ما أتفاجئ أصلا توقعته مكلوبة من وراه الكنتور مال ملابس فارغ والجرباية صايرة كنتور وطبعا لازم أغسلهن وأني ما اعرف استخدم الغسالة أمي متقبل ألزمها تكلي تتكهربين
رحت لغرفتي فتحتها من القفل ودخلت بدلت ملابسي ورتبت الي بالجنطة حطيتهن بالكنتور وطلعت لكيت بابا يخابر سد التلفون وكال..ريتاج رح أروح

للشغل تأخرت امج كالت لتعوفها وحدها بالبيت تخاف ليصير ألج شي..
ريتاج... شنوو السالفة بابا قابل شيصير أني بالبيت بعد وأذا صارلي شي أخابرك لتخاف بس أنته للتأخر أني رح ألتهي هسه بالتنظيف رح أنظف البيت أنظف الغرفة مالتكم
بابا...لا الغرفة نظيفة شيخلصني من كلام امج أذا توصخت

ريتاج... ههه ديلا لعد تعال للبيت حتى نتعشة سوه
هز راسه بمعنى اي  وباس راسي وكال...يلا ديري بالج على نفسج وعلى البيت مع السلامة
ريتاج... الله وياك
راح سديت الباب وبديت تنظيف نظفت غرفة مرتضى رحت لغرفتي بعدين الاستقبال نظفته رغم هو نظيف بس اريد أضيع وقت ولما كملت رحت صليت صلاة المغرب جان ستوه مأذن وراها لزمت الموبايل شفت رسالة من رقم مجهول على الفايبر كاتب هلوو     ، كتبت...منوو حضرتك ومنوو انطاك رقمي

ضليت أكلب بي اريد اعرف صاحب الرقم  بعدين خابرت عله رغد ضليت أسولف وياها بالتلفون كلتلها تعاي أريد اشوفج ونكعد سوه صار هواي مشايفتها مشتاقتلها كلش ونوب هسه مخطوبة لازم تسولفلي عن الي صار والصراحة لازم أحضر عرسهة ولو بعد هواي للعرس بس المهم هي صديقتي ولازم اول وحدة أساعدها بالحفلة.. طبعا

موو أول وحدة أني امها أول وحدة بس لأن ما عندها خوات وأني ما عندي أخت أحسبها موو بس صديقة ألأخت الي ما جابتها أمي.
رحت طلعت حب شمس وشيبس وحبشكلات لأن لما أكعد وياها لازم أكل عبالك تفتح شهيتي هاي الأنسانة على الأكل .. المهم رتبت المكان ودزيتلها رسالة "وينج"

رغد... "بالسيارة بابا جاي يوصلني لبيتكم"
ريتاج... "ع شنو سيارة هو البيت ع بعد شكم فرع من بيتكم"
رغد... " لان بابا جان يريد يطلع وكلي أوصلج بدربي "
ريتاج... "ها خوش سلميلي عليه "
رغد... "يوصل ،، بعدين تعاي أني مخطوبة وأهلي ميقبلون أطلع وحدي"