ريتاج

ازعاج ..

أمسك يدي بقوة لا تتركها
وأن حاولت الابتعاد اخلق لي الف سبب للبقاء
لأنني 💓

.......................

عيوني بالكوة مغمضتها وصوت المنبه طيح حظي ما بقه عندي عقل ردت اتحرك بس مكدرت فتحت عيني اباوع شكوو
اخترعت لما شفت صقر حابسني بأيده وما اكدر اتحرك

هذا شيسوي هنا وليش المنبه كعد يدك معقولة موبايلي بس صوت كلش عالي
أهااااا تذكرت اني البارحة جان عرسي .. همزين استرجعت ذاكرتي لو ما متذكره جان راح بيها صقر
ردت ادفعه عني بس قوي وميتزحزح حتى عظامي وجعتني

التفتت اباوع لوجهه خشمي صار على خشمة ووجهه قريب مني رجعت راسي على المخدة وباوعتله أول مرة هيج يصير قريب مني يعني هذا الشعور ما اعرف اوصفه حب زعل منه على عتاب ..ليش يفكر هيج 

ولو أمي ما حجت للكرايب حتى علمود سمعتي حتى اذا كلت محد متقربلي هم رح تخرب سمعتي ويطيح حظي ولو حاجيه سالفة الخطف يروح بالهم بعيد احتمال خالة جان ما قبلت بيه زوجة لأبنها .. اعرف بيهم يفكرون هيج حتى صقر بس كلامة جرحني يعني هو هم احتمال اذا متعرضلي احد جان ما تزوجني ولا خطبني من الاساس

تنفست بثكل رفعت جسمي شويه حتى الوح التلفون الي صرعني بس يدك اخذته وطفيت المنبه ردت ارجع اتمدد بس شفته مفتح عيونه وصافن
ريتاج... صباح الخير استاذ صقر ممكن تكوم لأن ما اكدر اتحرك
حجه وصوته بيه بحه مال نوم...رجعي بعد وكت
ريتاج... أول شي يكولون صباح النور بعدين شنوو بعد وكت لعد ليش المنبه دك مثلا يباركلك لو شنوو
صقر... شيباركلي هو اني جاي احس روحي متزوج من الصبح مشاكل بعدنه بصباحيه عرسنه ريتاج

ريتاج...انته السبب لو ملاحظ هسه توخر لو شلون
صقر... حاضر استاذة ريتاج لا تواخذيني

وخر ايده عني وكمت اخذت موبايلي وطلعت الصورة الي البارحة اخذتها لما جنت بالحنه أيدي وايد صقر حطيتها بالستوري الانستا وطفيت
ريتاج... يلا صحصح حتى لنتأخر عن الطيارة وصدك ليش ما انطيتني جواز السفر بأيدي
صقر... خاف تضيعيه حاطه بجنطتني أنتي اصلا ما سألتي عنه ولا عني

ما جاوبت اخذت هدوم رحت للحمام غسلت بمي حار وطلعت لبست ملابس ثگيلة لأن اعرف بروحي اتمرض ولو احنه بنهاية الشتا والجو صار احسن وأقل برودة
فتحت باب الحمام وصقر صار كبالي واكف ومغمض عيونه يفرك وجهه حتى لا يرجع ينام شعره واكع على كصته ومنظره مال طفل

ابتسمت وما كدرت امنع نفسي من انو الزم شعره
وخرته عن وجهه رجعته وره وگلت...رح نتأخر اذا ضليت على هلحالة

صقر... ما كدرت انام كل ما اغفه شويه يدك عليه شهاب لو خالي اخر شي ساعة 2:00 يله عافوني أو اني كلت لشهاب زوجتي تنتضرني

ريتاج... عززة هسه شيكولون عليه صدك تحجي
صقر... شسويلهم غير عيوني طفت وبعد ما اكدر اجامل احد
ريتاج... وتذبها براسي استاذ صقر
صقر... شني السالفة اشو من الصبح استاذ صقر لما جنه مخطوبين ما جنتي هيج تحجين وياي