ريتاج

كلام جارح

أكثر أنواع العبرات وجعا هي التي تبقى ثابتة في الحنجرة غير مبالية بأحساسها المؤلم تأبى الخروج مع الدموع ولا ترضى الرحيل بصمت 💔
💞💞💞💞💞💞💞

أسراء...شنو شكلتي؟؟
ريتاج... كلت الي سمعتيه
اسراء...لا سمعيني ما سمعت
ريتاج... هااا يعني متشوفين الناس وتردمين بيهم ومتسمعين الكلام روحي للدكتور يفيدج

اسراء...بااوعي لج احترمي ترة أكسر راسج والله لا عبالج من بغداد وتتكبرين علينه لا عيني ترة متعرفين ويه منوو أنطخيتي
ريتاج...أي ما اعرف ويه منوو انطخيت ولا اريد اعرف بسس دقيقة كلتي من بغداد وأتكبر ليش شايفتني لازمة لافته كاتبة عليها من بغداد وأتكبر مثلا ترة أني ولا مرة تكبرت على الناس ولا كلت أني احسن منهم بس شكلج تردين سالفة تتعاركين بيها وياي بعد اني كلت الي عندي كل شخص حر بتفكيرة والله تصدكين تصدكين متصدكين طبج مرض

اسراء...حقيرة اني تحجين وياي هيج والله اذا ما أخلي اهلي يردولج هذا الكلام الي كلتيه بحلكج ما أطلع اسراء
ريتاج... الي تردين تسويه سويه ترة اني ما خايفة منج وأني ما سويت غلط ويلا هسه وخري من كدامي اريد اروح اكمل الحفلة بسلام

ما حسيت الا وأيدها على خدي وخدي كام يوجعني
أية...ولج هاي ليش ضربتيها ،، ريتاج شو باوعي
بصدمة أتنفست وأحاول ما أتعدة وأضربها ما اريد اصير مثلها واردلها المثل
ريتاج... صدكي يا اسراء أذا ما رجعتلج هاي الضربة بضربة توجع اكثر ما يطلع أسمي ريتاج رح أرجعهه الج بس بطريقتي لتنسين على كولتج طريقة بغداد موو هيج تكولين ،، وخرت وجهي من يمها وكلت لأية...أمشي خل نروح

لزمتها من أيدها وجريتها وياي وهي بس تسال شكوو وشصاير بس كلتلها لما نرجع اسولفلج سكتت وكل شويه تباوع عليه كملت الحفلة رحنه أخذنا هدوم من داليا اني وأية ولارين لأن بقينة نرتب البيت البجامة مالتها طويلة علية وخصرها أعرض مني لهذا السبب رفعت البجامة وطبكتها حتى لا تتبلل بالنسبة للخصر كدرت أتدبر أمري لأن شويه راكدة عليه شعري سويته كبة ورفعته حتى لا يضوجني أما وجهي بالكوة لكيت وكت ومسحت مني المكياج
طلعنة أني ولارين على الحديقة الي صايرة ورة البيت كعدنة نظفها لان هم دخلولها ووصخوها
أجتي أية استفسرت شصار حجيتلهن وضلت كل شوية تغلط عليها
أية... والله أروح هسه أكسر عظامها هسه أنتي لا يمها ولا حواليها وهيج ضربتج والله لو كايلتلي جان رحت كفشتها من كشتها هاي الصايرة جنها جني
ريتاج... معليج بيها ورجاءً بنات لتحجن لجنس مخلوق اريد أني اشوفها منوو ريتاج حتى تضربني

لارين...ياربي زين هي ليش تكرهج قابل حاجيه وياها قبل
ريتاج... وداعتج ولا اعرفها بس ذاك اليوم لما رحنة لبيتهم حتى ما حجيت وياها بس وكتها وصلتني للحمامات
لارين...لعد حبي يمكن عندج شي بشخصيتج ماعدها وهذا الشي مضوجها ويخليها هيج تكرهج
ريتاج... يعني اني شخصيتي حلووة