Nakikita mo ngayong nag-aagaw buhay ang iyong kapatid at anu mang oras ay maaari ng mapigtas ang pising dumurugtong sa kanyang buhay. Nasa pagitan ka ngayon ng pangako sa namayapang ina at kagustuhang iligtas ang iyong munting anghel. Hinawakan mo ang kanyang maputlang kamay at wala ka ng pakialam sa kahihinatnat ng magiging aksiyon.
Nagliwanag ang iyong mga palad kasabay ng pasimulang paglakbay nito sa katawan ng iyong kapatid. Ang kaninang naghihingalong kapatid ay nanumbalik ang dating sigla't lakas. Napansin mong pumukaw ito ng atensiyon sa mga tao sa ospital at lahat sila ay dinumog ka't nais ring magpagamot.
