مجموعه قصص رعب(عالم أحمد طارق)

"موقف حمام السبااحه.."

النهاردة كنت رايح حمام السباحة زى ما بعمل كل اسبوع بس المرة دى كانت مختلفة شوية ..
صحيت و روحت متأخر عن معادى نص ساعة ، بس عادى مش مشكلة ، لما روحت البسين مكنش مليان كان فى اتنين رجالة و ست وحدة بس ، انا اول ما شفتها حسيت بحاجة غريبة جداً ، وشها كان شاحب اوى و كل لبسها اسود ، فاانا كنت خايف منها بس تجاهلتها خالص و نزلت اغير هدومى ، بس لما رجعت كانوا لسة موجودين و الست كانت بتبصلى بطريقة غريبة و إللى خلانى استغرب ان هى كانت على طول قاعدة فى الحتة إللى فيها ظل اللى فى البسين ، و ولا مرة راحت ناحية الشمس ، بس انا مشغلتش بالى و نزلت و فضلت اعوم لمدة مش اقل من نص ساعة ، بعد كدة وقفت شوية عشان ارتاح ، بس كنت خايف اقف فى المكان اللى فيه الظل كنت خايف من الست و لاحظت ان وانا بعوم كانت هى قاعدة بتراقبنى و بتبصلى بنظرات مريبة و كنت حاسس ان انا الوحيد إللى شايفها ، بدليل ان هى كانت ماشية جنب الرجالة و محدش بيبصلها ، و بعد فترة لقيت الناس طلعت و بقيت انا و الست لوحدنا ، و نزلوا ، و بمجرد ان هما نزلوا لقيت الدنيا غيّمت مع ان اليوم ده كان حر اوى و السما كانت صافية ، و فجأة لقيتها بتتحرك لأول مرة ، من ساعة ما نزلت و بتتحرك بـ حريّة عشان مكنش فيه شمس ، كانت بتقرب مني و انا ببعد كنت حاسس ان ملامحها بتتغير للأسوء و انا كنت مرعوب منها ، فضلت تقرب و انا ابعد لحد ما مرة وحده لقيتها بتجرى فى الميه عشان ترجع فى المكان إللى هى كانت واقفة فيه فى الأول ، و فى نفس اللحظة فى ناس جت و الدنيا رجعت مشمسة تانى و الناس نزلت الميه فا انا اطمنت شوية، قولت انزل وشى ف الميه شوية ، بس قبل ما انزل وشى شوفتها بتضحكلى ضحكة توقف الدم فى العروق ، كانت اكتر ضحكه تخوف شفتها فى حياتى ، و كنت اول مرة ألاحظ ان سنانها عاملة زى السكاكين ، بس انا نزلت وشى الميه و لما طلعته لقيتها اختفت تماماً ، مع ان انا نزلت وشى المياه خمس ثوانى بس و لما سألت الناس عنها قالولى ان مكنش فى حد فى البسين غيرى.

تصويت لو عجبتكم .. 💛